Өткен тәуліктерде шекарашылар Ресейде ұрланған көлікті Өзбекстанға өткізбей ұстады
Алайда, тексере келе бұл автокөліктің Ресей аумағынан ұрланып, іздеуде жүргендігі анықталды. Ұсталған азамат көлігімен бірге Сарыағаш аудандық полиция бөліміне тапсырылды.
Нұр-Сұлтан. 24 наурыз. Kazakhstan Today - Өткен тәуліктерде шекарашылар Ресейде ұрланған көлікті Өзбекстанға өткізбей ұстады;
Ірі көлемдегі қорғасын концентраты мен темір сынықтарын және металл құрамды руданы заңсыз шекара асырмақ болғандардың жолын кесті;
120 литр заңсыз алкоголь өнімдерін елге кіргізбей, 1500 пачкаға жуық әртүрлі темекі өнімдерінің заңсыз айналымын тоқтатты;
Есірткі тасымалдаушыны ұстады;
Бекіре тұқымдас балықтарды ел аумағынан алып кетуге тосқауыл болды;
Елден 770 литр жанар-жағармайды 19 тонна тауық жұмыртқасын заңсыз алып шықпақшы болған адамды ұстады;
Электрошеокер мен кастет тәркіледі;
Сарыағаш шекара отрядының "Жібек жолы авто" бөлімшесінде шекарашылар "Хюндай Туксон" автокөлігімен Өзбекстанға қарай өтпек болған 1987 жылы туған Ресей азаматын ұстады. Автокөлік Ресейде тіркеуде екен. Алайда, тексере келе бұл автокөліктің Ресей аумағынан ұрланып, іздеуде жүргендігі анықталды. Ұсталған азамат көлігімен бірге Сарыағаш аудандық полиция бөліміне тапсырылды.
Ақтөбе шекара отрядының "Жайсаң авто"өткізу бөлімшесінде 1975 жылы туған қазақстандық "Мерседес-Бенц" жүк көлігімен Ресейге 20 000 кг қорғасын концентратын ешқандай рұқсат құжаттарынсыз алып өтпек болыпты.
Аталған отрядтың "Әлімбет авто" өткізу бөлімшесінде "ДАВ" автокөлігімен Ресейге 20000 кг. темір сынықтарын алып өтпек болған 1965 жылы туған Ресей азаматы ұсталды.
Сондай-ақ, Қостанай шекара отрядының "Аят-авто" өткізу бөлімшесінде де 59 жастығы Қазақстан азаматы "Вольво" жүк көлігімен жалпы салмағы 19 280 кг. металл құрамдас руданы Ресейге құжатсыз алып өтпек болғаны үшін ұсталды.
Қордай шекара отрядының "Қордай-авто" өткізу бөлімшесінде 25, 58 және екеуі 48 жастағы төрт Қырғыз Республикасының азаматтары 17, 9 және 24 литрге жуық, 55 жастығы қазақстандық 70 литр әртүрлі маркалы алкоголь өнімдерін біздің елге заңсыз алып келуге талпынғандығы үшін ұсталып, құзырлы органдарға тапсырылды.
Дәл осы тексеріп-өткізу бекетінде біздің елге келе жатқан 48 жастағы қырғыз азаматынан әртүрлі маркалы 70 пачка темекі табылса, Мырзакент шекара отрядының "Жетісай-авто" бөлімшесінде 1980 жылы туған қазақстандық Өзбекстанға қарай1480 пачка әртүрлі темекі өнімдерін заңсыз шығармақ болыпты.
Қордайлық шекарашылар тағы да біздің елге қарай келе жатқан 1987 жылы туған қырғыз азаматының автокөлігінен жалпы салмағы 72 кг кальянға арналған темекі өнімін тауып, мемлекеттік кіріс департаментінің қызметкерлеріне актімен тапсырды.
Қостанай шекара отрядының "Желқуар-авто" өткізу бөлімшесінде қызметтік иттің меңзеуімен 1983 жылы туған қазақстандықтың автокөілігінің артқы орындығында жатқан баскиімнің маңдайшасынан салмағы 20 грамм көлемінде "марихуана" есірткісі табылып, ұсталған азамат Жітіқара аудандық полиция бөліміне тапсырылды.
Бейнеулік шекарашылар "Бейнеу - Нүкүс" бағытындағы № 648 пойызды тексеру барысында вагондардың бірінің шаруашылық тамбурынан 20 кг көлемінде бекіре тұқымдас балықтарды тауып алды. Иесі анықталған жоқ, актімен желілік полиция бөліміне тапсырылды.
Қордайда 50 литр дизель отынын, алып шықпақ болған 1987 жылғы қырғыз азаматы, 160 литр "АИ-92" бензинін алып шықпақшы болған 1973 жылғы қырғыз азаматы, 50 л Аи-92 бензинін алып шықпақшы болған 1958 жылғы қырғыз азаматы, 110 литр дизель отынын алып шықпақшы болған 1977 жылғы қырғыз азаматы, Жетісайда 400 литр дизель отынын алып шықпақшы болған 1961 жылғы Өзбекстан азаматы ұсталды.
Қордай шекара отрядының "Қарасу-авто" бөлімшесінде 60 жастағы қазақстандық "ДАФ" автокөлігімен 19 тонна тауық жұмыртқаларын Қырғыз Республикасына қарай ешқандай құжатсыз алып шықпақшы болыпты. Жүк мемлекеттік кіріс департаментіне тапсырылып, көлік иесі тергеуге келу туралы қолхатпен үйіне жіберілді.
Семейлік шекарашылар 1962 жылы туған ресейліктің автокөлігінің орындығының астына жасырылған "POLICE HL-2013" маркалы қолшам түріндегі электрошокер тапса, "Үбе авто" бөлімшесінде "Өскемен - Новосибирск" бағытындағы автобуста 19 жастағы қазақстандықтың сөмкесінен қолдан жасалған кастет тауып алды.
Ақпаратты пайдаланѓан жаѓдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігініњ материалдарына авторлық қ±қық.
тақырып бойынша жаңалықтар
Алматыда бірнеше күн бойы толассыз жаңбыр жауады
24-28 сәуір аралығында Алматы қаласында толассыз жаңбыр жауады деп күтілуде, деп хабарлайды Алматы қаласы әкімдігінің баспасөз қызметінен.
Жауын-шашын кезінде мотопомпа, шанц құралдарымен жабдықталған 52 жедел мобильді бригаданың кезекшілікке шығады, 2,5 мың қап құм дайындалады.
Күндіз жауын-шашын кезінде барлығы 465 бірлік арнайы техника, 28 мотопомпа және 810 жұмысшы, ал түнгі уақытта 236 бірлік арнайы техника және 215 жұмысшы жұмылдырылады.
Судың кедергісіз ағып кетуін қамтамасыз етіп, су басудың алдын алу үшін 320 жұмысшы мен 92 бірлік арнайы техника арық желілерін, арық өткелдерін тазалау бойынша жоспарлы жұмыс жүргізеді. Күн сайын арықтан 250 м3 лай және кездейсоқ қоқыс шығарылады.
Ауа-райының бұзылуына байланысты жүргізушілерге ағаштардың құлау қаупі мен электр желілерінің үзілуіне байланысты автомобильдерді жол жиектеріне қоюға кеңес берілмейді. Қала тұрғындары мен қонақтарына тауға бармауын сұраймыз. Су тасқынының алдын алу үшін тұрғындардан арық пен каналды қоқысқа толтырып, бітеп тастамауға шақырамыз.
Анықтама үшін:
Қазгидромет" РМК болжауынша:
24 сәуір: көшпелі бұлт шығады, 3 мм-ге дейін өткінші жауын, оңтүстік-батыстан 3-8 м/с жел соғады, күндіз ауа температурасы +23...+25°C.
25 сәуір: күн ала бұлтты, таңертең және түстен кейін 15 мм-ге дейін жаңбыр жауып, найзағай ойнайды. Оңтүстік-батыс, батыс 3-8 м/с жел, найзағай кезінде екпіні 15-20 м/с. Ауа температурасы түнде + 10...+12°, күндіз + 18...+20°C.
26 сәуір: көшпелі бұлт, түнде және таңертең 8 мм-ге дейін жаңбыр жауады. Батыс, солтүстік-батыс 3-8 м/с жел соғады, найзағай кезінде екпіні 15 м/с. Ауа температурасы түнде + 10...+12°, күндіз + 16...+18°C.
27 сәуір: күн ала бұлтты, күндізгі сағат 15-тен 23-ке дейін 3 мм-ге дейін жаңбыр жауады. Батыс, солтүстік-батыстан 3-8 м/с жел соғады. Термометр бағанасы түнде +8...+10°, күндіз +13...+15°C көрсетеді.
28 сәуір: көшпелі бұлт шығады. Батыс, солтүстік-батыстан 3-8 м/с жел соғады. Ауа температурасы түнде +7...+ 9°, күндіз + 13...+15°C.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бірінші тоқсанның қорытындысы бойынша МӘСҚ-тен 840 мыңға жуық адам әлеуметтік төлем алды
2024 жылдың бірінші тоқсанының қорытындысы бойынша Мемлекеттік әлеуметтік сақтандыру қорынан (бұдан әрі - МӘСҚ) 840 мыңға жуық қазақстандық 215,2 млрд теңге сомасына әлеуметтік төлемдер алды, деп хабарлайды ҚР Еңбек және халықты әлеуметтік корғау министрлігінің баспасөз қызметінен.
Еңбекке қабілеттіліктен айырылған жағдайда төленетін әлеуметтік төлем бюджет қаражаты есебінен мүгедектігі бойынша мемлекеттік әлеуметтік жәрдемақыға қосымша тағайындалады. МӘСҚ-тен төлем медициналық-әлеуметтік сараптамада белгіленген 30%-дан 100%-ға дейінгі дәрежеде және еңбек қызметін жалғастыруына қарамастан жалпы еңбекке қабілеттілігін жоғалту кезеңінде жүзеге асырылады.
2024 жылғы 1 сәуірдегі жағдай бойынша бұл төлемді 11,5 млрд теңге сомасына 90 мыңнан астам адам алды, бұл 2023 жылдың сәйкес кезеңімен салыстырғанда 31% - ға артық. Белгіленген төлемнің ай сайынғы орташа мөлшері 57 346 теңгені құрады.
Асыраушысынан айырылған жағдайда төленетін әлеуметтік төлем міндетті әлеуметтік сақтандыру жүйесіне қатысушының асырауында болған адамдарға бюджет қаражаты есебінен төленетін асыраушысынан айырылуы бойынша мемлекеттік әлеуметтік жәрдемақысына қосымша тағайындалады. МӘСҚ-тен төлем асырауындағы адамдар 18 жасқа толғанға дейін, ал күндізгі оқу нысанында оқыған жағдайда 23 жасқа дейін төленеді.
Есепті кезеңде көрсетілген төлемді асыраушысынан айырылған 61,2 мың отбасы 8,6 млрд теңге сомасына алды, бұл 2023 жылдың сәйкес кезеңімен салыстырғанда 39%-ға көп. Белгіленген төлемнің ай сайынғы орташа мөлшері 58 543 теңгені құрады.
МӘСҚ-тен жұмысынан айырылу жағдайы бойынша әлеуметтік төлем әлеуметтік сақтандыру жүйесіне қатысушыға оның жұмыстан шығарылу себебіне қарамастан тағайындалады. Негізгі шарт - жұмыссыз ретінде тіркелу. Төлем мөлшері жұмыссыз ретінде тіркелгенге дейінгі соңғы 2 жыл ішінде МӘСҚ-ке әлеуметтік аударымдар жүргізілген орташа айлық табысқа, жүйеге қатысу өтіліне және табысты ауыстыру коэффициентіне (45%) байланысты.
2024 жылдың 3 айында бұл төлем 18,3 млрд теңге сомасына төленіп, оны 122,6 мың адам алды, бұл 2023 жылдың бірінші тоқсанындағы алушылар санынан 2 есе дерлік асып түсті. Өсім азаматтардың Электрондық үкімет және Электрондық еңбек биржасы порталдары, сондай-ақ екінші деңгейдегі банктердің мобильді қосымшалары арқылы төлемге өтініштер берудің электрондық нысанына сұранысқа байланысты. Белгіленген төлемнің ай сайынғы орташа мөлшері - 65 402 теңге.
Жүктілікке және босануға, жаңа туған баланы (балаларды) асырап алуға байланысты табысынан айырылу жағдайына байланысты әлеуметтік төлем жүктілік және босану бойынша демалыстың барлық күндеріне тағайындалады. Төлем мөлшері жүктілікке және босануға байланысты демалыс күніне дейінгі соңғы 12 айда МӘСҚ-ке әлеуметтік аударымдар жүргізілген орташа айлық табысқа және еңбекке жарамсыздық күндерінің санына байланысты болады.
2024 жылғы 1 сәуірдегі жағдай бойынша бұл біржолғы төлемді 65,8 мың болашақ ана жалпы сомасы 81,9 млрд теңгеге алды, бұл өткен жылдың сәйкес кезеңімен салыстырғанда 19%-ға артық. Тағайындалған төлемнің орташа мөлшері 1 460 282 теңгені құрады.
Бір жарым жасқа дейінгі бала күтіміне байланысты табысынан айырылу жағдайы бойынша ай сайынғы әлеуметтік төлем баланың туған күнінен бастап әлеуметтік сақтандыру жүйесіне қатысушыға тағайындалады. Төлем мөлшері соңғы 2 жылда МӘСҚ-ке әлеуметтік аударымдар жүргізілген орташа айлық табыстың 40%-ын құрайды. Екі және одан да көп бала туған кезде төлем әрбір балаға жеке тағайындалады.
2024 жылдың 3 айында бұл төлем 67 мың адамға тағайындалды, оның ай сайынғы орташа мөлшері 79 106 теңгені құрады. Төлем 94,9 млрд теңге сомасына жүргізілді, бұл 2023 жылдың осы кезеңімен салыстырғанда 1,8 есе көп.
Осылайша, міндетті әлеуметтік сақтандыру жүйесіне қатысатын жұмыс істейтін азаматтарды әлеуметтік қорғау жұмыс істемейтіндерге қарағанда әлдеқайда жоғары.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыда жыл сайынғы жылу желілерін сынау өткізіледі
Сурет: gov.kz
2024 жылғы 24 сәуірден 15 мамырға дейін Алматының барлық аудандарының аумағында жылу желілерін гидравликалық сынау жүргізілетін болады, деп хабарлайды Алматы қаласы әкімдігінің баспасөз қызметінен.
Бұл күндері күн сайын сағат 04:00-ден 07:00-ге дейін магистральдық және тарату құбырларын тексеру тікелей жүргізілетін кезде қала тұрғындары мен мегаполис қонақтарына өте мұқият болуға, қарапайым сақтық ережелерін сақтауға кеңес береміз!
Қауіпсіздікті қамтамасыз ету шараларына қарамастан, кенеттен оқыс жағдайлар болып қалуы мүмкін: судың сыртқа ағуы,жол жабындысының ішінара бұзылуы және т.б.
Мұндай оқыс жағдайларда ешқандай дербес әрекет жасамаңыз, оқиға орнынан дереу кетіп, ол туралы "Алматы жылу желілері" ЖШС-не 378-06-48, 378-06-62 (тікелей нөмір), call-орталық: 341-07-00 немесе 341-07-77 (қосымша 1011 немесе 1014), сондай-ақ 109 телефондары арқылы хабарлаңыз.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстандағы зейнетақының орташа мөлшері аталды
Жыл басынан бастап республикалық бюджеттен 926,5 млрд теңге сомасына зейнетақы төленді, оның ішінде базалық зейнетақы төлеуге - 291,4 млрд теңге, ынтымақты зейнетақы төлеуге - 635,1 млрд теңге қарастырылды, деп хабарлайды Қазақстан Республикасы Еңбек және халықты әлеуметтік қорғау министрлігінің баспасөз қызметінен.
2024 жылғы 1 сәуірдегі жағдай бойынша зейнеткерлер саны - 2 млн 364 мың адам.
2024 жылғы 1 сәуірдегі жағдай бойынша жиынтық зейнетақының орташа мөлшері 132 595 теңгені құрады, оның ішінде ынтымақты зейнетақы мөлшері - 89 901 теңге, базалық зейнетақы - 42 694 теңге.
2018 жылғы 1 шілдеден бастап мемлекеттік базалық зейнетақы төлемі зейнетақы жүйесіндегі өтілін ескере отырып, әр алушыға жеке тағайындалатынын еске саламыз.
Бұл ретте 1998 жылғы 1 қаңтардағы жағдай бойынша ынтымақты жүйеде жұмыс істеген уақыты, сондай-ақ міндетті зейнетақы жарналары (бұдан әрі - МЗЖ) төленген кезеңдер зейнетақы жүйесіндегі еңбек өтіліне қосылады.
Егер азаматтың зейнетақы жүйесіндегі өтілі 10 жыл немесе одан аз болса, сондай-ақ мүлде жоқ болса, базалық зейнетақы ең төменгі күнкөріс деңгейінің 65%-на тең болса, содан кейін 10 жылдан асқан әр жыл үшін оның мөлшері 2 %-ға артады. Ал егер сіздің өтіліңіз 20 жыл болса, базалық зейнетақы төменгі күнкөріс деңгейінің 85 %-ын құрайды. Еңбек өтілі 30 жыл немесе одан көп болса, күнкөріс деңгейінің ең жоғарғы мөлшерінде яғни 105% белгіленеді.
Егер бір ай ішінде міндетті зейнетақы жарналары Бірыңғай жинақтаушы зейнетақы қорына бірнеше рет аударылса, жинақтаушы жүйеге қатысу мерзімі бір айды құрайды.
Осылайша міндетті зейнетақы жарналары неғұрлым тұрақты және толық көлемде аударылатын болса, зейнет жасына жеткенде базалық зейнетақы төлемдерінің мөлшері соғұрлым көп болады.
Өз кезегінде азаматтың жасына байланысты зейнетақы төлемдерінің мөлшері 1998 жылғы 1 қаңтардағы жұмыс өтіліне (кем дегенде 6 ай қажет) және зейнеткерлікке дейінгі кезеңдегі орташа айлық табысына байланысты болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.