13.03.2020, 21:47 4374

2020 жылы Қазақстанда ана мен баланы қолдауға 693 млрд теңге қарастырылған

Қазақстанда ана мен баланы қолдау 8 мемлекеттік жәрдемақыны және 3 төлемді қамтиды. Жалпы алғанда, бұл мақсаттарға 2020 жылы 693 млрд теңге қарастырылған.

Алматы. 13 наурыз. Kazakhstan Today - 2020 жылы Қазақстанда ана мен баланы қолдауға 693 млрд теңге қарастырылған.

Қазақстанда ана мен баланы қолдау 8 мемлекеттік жәрдемақыны және 3 төлемді қамтиды. Жалпы алғанда, бұл мақсаттарға 2020 жылы 693 млрд теңге қарастырылған.

Ағымдағы жылғы 1 наурыздағы жағдай бойынша жалпы сомасы 5,3 млрд. теңгеге 45 904 адам бала тууға байланысты біржолғы жәрдемақы алды. Бұл мақсатқа 2020 жылы 45,2 млрд теңге бағытталады.

Естеріңізге сала кетейік, 2020 жылы бірінші, екінші, үшінші баланың туылуына берілетін біржолғы жәрдемақы мөлшері 38 айлық есептік көрсеткішті (бұдан әрі - АЕК) немесе 100 738 теңгені құрайды, ал төртінші және одан кейінгі балаға 63 АЕК немесе 167 013 теңге төленеді.

Жыл басынан бері жалпы сомасы 5,8 млрд. теңгеге 138,8 мың адам бір жасқа дейінгі бала күтіміне байланысты жәрдемақы алды. 2020 жылы аталған жәрдемақыны төлеуге 39 млрд теңге бағытталады.

Жәрдемақының бұл түрі жұмыс істемейтін ата-аналарға беріледі. Ол отбасындағы кірістерге қарамастан тағайындалады және төртінші балаға дейінгі балалар санына қарай ұлғаяды (бірінші балаға - 5,76 АЕК немесе 15,270 теңге, екінші балаға - 6,81 АЕК немесе 18 054 теңге, үшінші балаға - 7.85 АЕК немесе 20811 теңге, төртінші және одан кейінгі балаға- 8,9 АЕК немесе 23 594 теңге).

2020 жылғы 1 наурыздағы жағдай бойынша 37,5 мың адам 14,7 млрд теңге сомасында Мемлекеттік әлеуметтік сақтандыру қорынан (бұдан әрі - МӘСҚ) жүктілік пен босануға байланысты табысынан айырылған жағдайда төлем алды. Ағымдағы жылы бұл мақсатқа 86,4 млрд теңге бағыттау жоспарланған.

Мемлекеттік әлеуметтік сақтандыру қорынан жұмыс істейтін ата-аналарға бір жасқа дейінгі бала күтіміне байланысты төлемдер 2020 жылғы 1 наурыздағы жағдай бойынша 234,7 мың адамға 15,3 млрд теңге сомасында төленді. Ағымдағы жылы төлемдердің жалпы сомасы 100,1 млрд теңгені құрайды.

Мүгедек балаларды тәрбиелеп отырған ата-аналар мен қамқоршыларға берілетін жәрдемақы мөлшері 2020 жылы 43 657 теңгені құрады (1,4 ең төменгі күнкөріс деңгейі). 2020 жылғы 1 наурыздағы жағдай бойынша 87,727 адам жалпы сомасы 7,7 млрд теңгеге осы жәрдемақыны алды. Бұл мақсатқа 48,1 млрд теңге бөлінді.

18 жастан асқан бала кезінен бірінші топтағы мүгедектің күтімі бойынша тағайындалатын және төленетін ай сайынғы мемлекеттік жәрдемақының мөлшері 1,4 ең төменгі күнкөріс деңгейіне тең. 2020 жылы аталған мемлекеттік жәрдемақыны жалпы сомасы 1,3 млрд теңгеге 14 349 адам алды. Биыл бұл мақсатқа 8,6 млрд теңге қарастырылған.

2020 жылы "Алтын алқа" және "Күміс алқа" алқаларымен марапатталған көпбалалы аналарға жәрдемақы төлеуге 47,5 млрд теңге бөлінді, төлемнің орташа мөлшері 16 967 теңгені құрайды . Ағымдағы жылғы 1 наурыздағы жағдай бойынша аталған жәрдемақыны 233,8 мың адам 8 млрд. теңге сомасында алды.

2020 жылғы қаңтар-ақпанда мүгедектік бойынша мемлекеттік әлеуметтік жәрдемақыларды төлеуге республикалық бюджеттен 46,3 млрд. теңге, асыраушысынан айрылу жағдайына байланысты 12,2 млрд. теңге бөлінді. 2020 жылғы 1 наурыздағы жағдай бойынша мүгедектік бойынша мемлекеттік әлеуметтік жәрдемақы алушылардың саны 521,4 мың адамды, асыраушысынан айырылу жағдайында - 165,8 мың адамды құрайды.

Сонымен қатар, 2020 жылғы 1 наурыздағы жағдай бойынша республикалық бюджеттен декрет демалысындағы жұмыс істейтін әйелдердің міндетті зейнетақы жарналарын субсидиялауға 434,4 млн теңге аударылды. Бұл қаражат МӘСҚ-тан бір жасқа дейінгі бала күтіміне байланысты әлеуметтік төлем алатын 85 мыңға жуық адамның жеке зейнетақы шоттарына түсті.

2020 жылы, болжам бойынша, бір жасқа дейінгі бала күтімі бойынша демалыста болған кезеңінде жұмыс істейтін әйелдер үшін міндетті зейнетақы жарналарын субсидиялауға 5,9 млрд теңге бағытталады.

Сонымен қатар, көпбалалы отбасыларды қолдау 4 және одан да көп кәмелетке толмаған немесе 23 жасқа дейінгі күндізгі оқу бөлімінде оқитын студент балалары бар отбасыларға жаңа мемлекеттік жәрдемақы төлеу есебінен қамтамасыз етілді. Аталған мемлекеттік жәрдемақы 2020 жылғы 1 қаңтардан бастап отбасының табысына қарамастан сараланған мөлшерде төленеді: 4 балаға - 42 496 теңге; 5 балаға - 53 127 теңге; 6 балаға - 63 757 теңге; 7 және одан да көп балаға - 74 388 теңге. 2020 жылдың 2 айында 382 мың отбасы жәрдемақы алып, 36 млрд теңге төленді.

2020 жылы мемлекеттік жәрдемақылар мен төлемдерді төлеуге 693 млрд теңге қарастырылған.

Ақпаратты пайдаланѓан жаѓдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігініњ материалдарына авторлық қ±қық.

МӘТІННЕН ҚАТЕ ТАПТЫҢЫЗ БА?

Оны тінтуірмен таңдап, Ctrl + Enter пернелерін басыңыз.

тақырып бойынша жаңалықтар

Ең көп оқылғаны