31.03.2021, 20:47 22008

Қазақстан мен Ресей ерекше қорғалатын табиғи аумақтарды дамыту саласындағы екіжақты ынтымақтастық бағдарламасына қол қойды

Бағдарлама әріптестік қатынастар мен халықаралық ынтымақтастықты дамыту, олардың әлеуетін нығайту үшін ерекше қорғалатын табиғи аумақтар арасында тәжірибе алмасу сияқты маңызды іс-шараларды қамтиды.
ОРЫНБОР. 31 НАУРЫЗ - Қазақстан Республикасының Экология, геология және табиғи ресурстар министрі Мағзұм Мырзағалиев пен Ресей Федерациясының Табиғи ресурстар және экология министрі Александр Козловтың кездесуі барысында 2021-2024 жылдарға арналған ерекше қорғалатын табиғи аумақтарды дамыту саласындағы қазақстан-ресей ынтымақтастығының бағдарламасына қол қойылды, деп хабарлайды KAZAKHSTAN TODAY ҚР Экология, геология және табиғи ресурстар министрлігінің баспасөз қызметіне сілтеме жасап.
 
Айта кетейік, құжатқа қол қою Қазақстан Республикасының Үкіметі мен Ресей Федерациясының Үкіметі арасындағы Қоршаған ортаны қорғау саласындағы ынтымақтастық туралы келісімді іске асыру болды.
 
Бағдарлама әріптестік қатынастар мен халықаралық ынтымақтастықты дамыту, олардың әлеуетін нығайту үшін ерекше қорғалатын табиғи аумақтар арасында тәжірибе алмасу сияқты маңызды іс-шараларды қамтиды. 
 
Осылайша, "Марқакөл" (Қазақстан) және "Катунский" (Ресей) мемлекеттік табиғи қорықтары бауырлас қорықтар форматында ынтымақтасатын болады деп жоспарлануда.
 
Бұдан басқа, "Үлкен Алтай" трансшекаралық биосфералық резерватының базасында Тараптар қорық ісінің теориясы мен практикасы бойынша жыл сайынғы далалық мектепті ұйымдастырады. 
 
Сондай-ақ, "Алтын Емел" ұлттық паркі бірқатар ресейлік қорықтармен келісімдерге қол қояды.
 
Бағдарламаның басқа бағыттарының ішінде "Алтай" трансшекаралық резерватының шекарасындағы қоныс аударатын жануарлар түрлерінің санын бірлесіп есепке алуды көздейтін экологиялық мониторинг, Каспий теңізі акваториясының солтүстік бөлігіндегі қоныс аударатын құстар популяциясының бірлескен зерттеулері мен мониторингі бағдарламасын әзірлеу және іске асыру да бар.
 

Сонымен қатар, Бағдарлама ауқымындағы екі жақты ынтымақтастық трансшекаралық экологиялық туризмді дамытуға және экологиялық ағартуға да бағытталған", - деп толықтырды Экология министрлігінде.

 
 Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

Ең көп оқылғаны