Қазақстанда әуе тасымалының ережелері өзгеруде
Сурет: Depositphotos
Қазақстанның Көлік министрлігі әуе тасымалы қағидаларына өзгерістер енгізу жобасын әзірледі. Түзетулер музыкалық аспаптар мен жануарларды тасымалдаудың жаңа талаптарын, мүгедектігі бар жолаушыларға арналған қосымша кепілдіктерді және әуе компанияларының жауапкершілігін күшейтуді көздейді, деп хабарлайды министрліктің баспасөз қызметінен.
Бұл жобаға сәйкес, жолаушыларға домбыра мен қобыз сияқты музыкалық аспаптарды ұшақ ішіне қол жүгі ретінде, жеке жолаушы орнында немесе тіркелген багаж ретінде тасымалдауға рұқсат берілуі мүмкін. Салонда тасымалданатын аспап міндетті түрде берік қорғаныш қаптамасында болуы тиіс. Оның өлшемі 110×35×30 см-ден, ал салмағы 10 келіден аспауы қажет.
Сондай-ақ, жоба аясында әуе компаниялары белгілеген талаптарға сәйкес жануарларды ұшақ салонында тасымалдауға мүмкіндік беру қарастырылған. Бұдан бөлек, мүгедектігі бар жолаушыларға әуе тасымалы кезінде жеңілдіктер беру нормасын заңнамалық деңгейде бекіту ұсынылады.
Құжатта әуе кемесі сыйымдылығы төмен басқа әуе кемесіне ауыстырылған жағдайда жолаушыларды орналастырудың басым тәртібі де енгізілмек. Осыған сәйкес, бірінші кезекте кәмелетке толмаған жолаушылардың, мүгедектігі бар адамдардың, ауыр науқастардың, жүкті әйелдердің және зейнет жасындағы азаматтардың тасымалы қамтамасыз етіледі.
Сонымен қатар Көлік министрлігі жолаушылардың құқықтарын қорғауды күшейту мақсатында жолаушыны жеткізудің кешігуіне байланысты айыппұлды төлеудің нақты мерзімін белгілеу ұсынылады. Яғни, тиісті өтініш берілген күннен бастап төлем 10 күнтізбелік күннен кешіктірілмей жүзеге асырылуға тиіс. Сонымен қатар, тасымалдаушының кінәсі дәлелденген жағдайда тіркелмеген қол жүгінің бүлінуіне байланысты әуе компанияларының жауапкершілігін белгілеу көзделген.
Өзгерістер жобасы "Ашық НҚА" порталында жарияланып, қоғамдық талқылауға шығарылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
СІМ шетелдік журналистерге Құрылтай сайлауына аккредиттеуден өту мерзімдерін еске салды
Қазақстанның Сыртқы істер министрлігі шетелдік бұқаралық ақпарат құралдарының өкілдеріне Құрылтай депутаттарының сайлауын жариялау үшін аккредиттеуге өтінім қабылдау мерзімі аяқталып келе жатқанын еске салды.
Өтінім берудің соңғы күні — 2026 жылғы 16 тамыз. Сайлау 23 тамызда өтеді.
Аккредиттеуден өту үшін шетелдік журналистер бас редактордың хатын, жарамды шетелдік паспорттың көшірмесін, толтырылған аккредиттеу нысанын, көлемі 3×4 сантиметр электрондық фотосуретті және БАҚ туралы анықтамалық ақпаратты ұсынуы қажет.
Өтінімдер accreditation@mfa.kz электрондық поштасы арқылы қабылданады. Хаттың тақырыбына «Kurultai Elections 2026» деп жазылуы тиіс.
СІМ шетелдік журналистер Қазақстанда кәсіби қызметін ведомство берген тұрақты немесе уақытша аккредиттеуі болған жағдайда ғана жүзеге асыра алатынын еске салды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Павлодар облысындағы «Деректерді өңдеу орталықтары алқабының» алғашқы нысаны 2027 жылғы маусымда іске қосылады
«Деректерді өңдеу орталықтары алқабы» жасанды интеллект пен бұлтты сервистерді дамытудың инфрақұрылымдық негізіне айналуға тиіс
Павлодар облысында қуаты 50 МВт болатын «Деректерді өңдеу орталықтары алқабының» (Data Center Valley) алғашқы нысанын 2027 жылғы маусымда іске қосу жоспарланып отыр. Жобаның жүзеге асырылу барысы Премьер-министр Олжас Бектеновтің төрағалығымен өткен Үкіметтегі кеңесте талқыланды.
Қазір құрылыс жұмыстары белсенді кезеңде. Энергетикалық орталықтар мен AI-фабрикалар ғимараттарына арналған қазаншұңқырларды қазу жұмыстары 90%-ға орындалып, іргетас қалау басталды.
2026 жылғы желтоқсанның соңына дейін деректер орталығы мен энергия блоктарының негізгі корпустарын, әкімшілік-тұрмыстық кешенді, бақылау-өткізу пункттерін және сыртқы инженерлік желілердің бір бөлігін салу жоспарланған. Іске қосу-баптау жұмыстары 2027 жылғы мамырда аяқталуға тиіс.
Жобаны электр энергиясымен қамтамасыз ету үшін қуаты 215 МВт қосалқы станция сатып алынды. Сондай-ақ сумен жабдықтау желілерінің жобасы әзірленіп, телекоммуникациялық инфрақұрылым жобаланып жатыр. Болашақта Data Center Valley жалпы қуатын кезең-кезеңімен 1 ГВт-қа дейін арттыру жоспарланып отыр.
Firebird AI және NVIDIA компанияларымен бірлесіп, Data Center Valley базасында жасанды интеллектіні, бұлтты технологиялар мен цифрлық сервистерді дамытуға арналған экожүйе құрылып жатыр. Сонымен қатар қосымша IT-қуаттар құру, инвесторлар мен негізгі клиенттерді тарту, жоғары өнімді есептеу кластерлерін орналастыру және бұлтты сервистерді дамыту мәселелері бойынша шетелдік компаниялармен келіссөздер жүргізілуде.
«Біздің бірінші кезектегі міндетіміз — алғашқы нысанның құрылысын 2027 жылғы маусымда аяқтау. Сонымен қатар клиенттер тарапынан расталған сұранысты ескере отырып, кампустың қуатын дәйекті түрде арттыруға мүмкіндік беретін инженерлік негіз құрып жатырмыз», — деді «Қазақтелеком» АҚ басқарма төрағасы Бағдат Мусин.
Кеңесте Cloud First Policy (Data Embassy) жобасын дайындау мәселесі де қаралды. Ол шет мемлекеттердің деректерін толық құқықтық егемендігін сақтай отырып, Қазақстан аумағында орналастыру мүмкіндігін қарастырады.
Олжас Бектенов «Деректерді өңдеу орталықтары алқабы» жасанды интеллект пен бұлтты сервистерді дамытудың инфрақұрылымдық негізіне айналып, Қазақстанның Орталық Азиядағы өңірлік AI-хаб ретіндегі ұстанымын нығайтуға тиіс екенін атап өтті.
Кеңес қорытындысы бойынша Премьер-министр құрылыс жұмыстарын уақтылы орындауды қамтамасыз етуді және жаңа серіктестер тарту үшін шетелдік технологиялық компаниялармен өзара іс-қимылды кеңейтуді тапсырды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Шынар Ақпарова Оқу-ағарту бірінші вице-министрі болып тағайындалды
Сурет: ortcom.kz
Қазақстан Республикасы Үкіметінің қаулысымен Шынар Қуанышқызы Ақпарова Қазақстан Республикасының Оқу-ағарту бірінші вице-министрі болып тағайындалды.
Осы тағайындауға дейін ол 2025 жылғы қарашадан бастап Оқу-ағарту вице-министрі қызметін атқарды.
Шынар Ақпарова 1972 жылы Қарағанды облысында дүниеге келген. Целиноград қаржы-экономикалық техникумын, Е.А. Бөкетов атындағы Қарағанды мемлекеттік университетін және Қазтұтынуодағы Қарағанды экономикалық университетін тәмамдаған.
Еңбек жолын орыс тілі мен әдебиеті пәнінің мұғалімі болып бастаған. Әр жылдары мектеп директорының тәрбие жұмысы жөніндегі орынбасары, әдіскер болып жұмыс істеп, білім сапасын бақылау және қамтамасыз ету жүйесінде түрлі қызметтер атқарған.
2020-2023 жылдары Қарағанды облысының білім саласында сапаны қамтамасыз ету департаменті басшысының орынбасары, 2023-2025 жылдары аталған департаменттің басшысы болды. 2025 жылы Қазақстан Республикасы Оқу-ағарту министрлігі Білім саласында сапаны қамтамасыз ету комитеті төрағасының орынбасары қызметін атқарды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Орталық сайлау комиссиясы Құрылтай сайлауына халықаралық байқаушыларды қосымша аккредиттеді
Бүгін Орталық сайлау комиссиясы Құрылтай сайлауына тағы 405 халықаралық байқаушыны аккредиттеді.
Байқаушылар 7 шет мемлекет пен 9 халықаралық ұйымның атынан қатысады.
"Орталық сайлау комиссиясына Сыртқы істер министрлігінен 7 шет мемлекет пен 9 халықаралық ұйымның атынан 405 байқаушының кандидатурасы аккредиттеуге ұсынылды. Оның ішінде ТМД миссиясынан 75 байқаушы, ТМД ПАА-дан 23 кандидат, ЕҚЫҰ ДИАҚБ миссиясынан 208 байқаушы, Еуропа Кеңесінің Парламенттік Ассамблеясынан 23 байқаушы, Түркі мемлекеттері ұйымының миссиясынан 10 кандидат, Түркі мемлекеттері Парламенттік Ассамблеясының миссиясынан 22 адам, ШЫҰ миссиясынан 11 кандидат, АӨСШК-ден 9 байқаушы, Ислам азық-түлік қауіпсіздігі ұйымынан 7 адам, сондай-ақ Литва, Түркия, Грузия, Солтүстік Македония, Эстония, Нидерланд және Тәжікстаннан 17 кандидат бар", - деді ОСК төрағасының орынбасары Мұхтар Ерман.
Ол халықаралық байқаушыларды аккредиттеу әлі жалғасып жатқанын және ұсыныстардың түсуіне қарай мәліметтер жаңартылатынын атап өтті.
Осылайша, бүгінгі таңда Қазақстан Республикасы Құрылтайы депутаттарының сайлауына Орталық сайлау комиссиясы 656 байқаушыны аккредиттеді.
Бүгін сондай-ақ жеті партияның төрағалары қорытынды теледебатты қашан және қайда өткізетіні белгілі болды.
Бұған дейін қазақстандықтарға Құрылтай сайлауында дауыс беретін учаскесін қалай білуге болатыны түсіндірілген еді.
Құрылтайдың алғашқы құрамының депутаттарын сайлау 23 тамызда өтеді. Сайлау алдындағы үгіт-насихат жұмыстары 22 тамызға дейін жалғасады деп күтілуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Жеті саяси партияның төрағалары 19 тамызда қорытынды теледебат өткізеді
Қазақстанда тіркелген жеті саяси партияның төрағалары Құрылтай сайлауы алдындағы қорытынды теледебатқа қатысады. Пікірсайыс 19 тамызда 24KZ телеарнасында өтеді, деп хабарлайды Орталық сайлау комиссиясы.
ОСК мүшесі Ләззат Сүйіндік дебат өтетін алаң мен оның форматы сайлау заңнамасының талаптары ескеріле отырып айқындалғанын мәлім етті. Барлық қатысушыға тең жағдай жасау негізгі қағидаттардың бірі болмақ.
"Оларды ұйымдастыру және өткізу тәртібі қандай да бір саяси партияға немесе оның кандидаттарына артықшылық бермеуге тиіс. Мәдениет және ақпарат министрлігінің ұсынысы бойынша "Хабар" агенттігі" АҚ-ның 24KZ телеарнасы қорытынды дебат өткізілетін алаң болып белгіленді", - деді Орталық сайлау комиссиясының мүшесі.
ОСК мәлімдеуінше, 24KZ телеарнасы техникалық және ұйымдастырушылық мүмкіндіктеріне, сондай-ақ ақпараттық қамту ауқымының кеңдігіне байланысты таңдалды.
Теледебат төрт раундтан тұрады: "Партияны таныстыру", "Оппоненттерге сұрақтар", "Көрерменден сұрақтары" және "Сайлаушыларға үндеу".
Тіркелген жеті саяси партияның төрағалары теледебатқа қатысатынын растады.
Бұған дейін қазақстандықтарға Құрылтай сайлауында дауыс беретін учаскесін қалай білуге болатыны түсіндірілген болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Каспий маңы елдерін теңізі деңгейінің төмендеуіне қарсы күресті күшейтуге шақырды
Сурет: Kazakhstan Today
Қазақстан Каспий теңізі деңгейінің төмендеуінің жалғасып келе жатқандығына байланысты Каспий маңы елдерін өзара ынтымақтастықты күшейтуге шақырды. Бұл мәселе Иранда Каспий теңізі күніне және теңіз ортасын қорғау жөніндегі Тегеран конвенциясының күшіне енгеніне 20 жыл толуына арналған конференцияда талқыланды, деп хабарлайды ҚР Сыртқы істер министрлігінің баспасөз қызметінен.
Конференцияға Қазақстан Республикасының Иран Ислам Республикасындағы Елшісі Онталап Оналбаев. Қатысушылар қатарында Иранның Вице-президенті - Қоршаған ортаны қорғау ұйымының басшысы Шина Ансари, Иран Парламентінің, мемлекеттік органдардың, дипломатиялық корпус пен БҰҰ Даму бағдарламасының өкілдері, сондай-ақ ғылыми және сарапшылық қауымдастық өкілдері болды.
Талқыланған негізгі тақырыптардың бірі Каспий теңізі деңгейінің одан әрі төмендеуі және оның экологиялық әрі әлеуметтік-экономикалық салдары болды. Қатысушылар Қазақстан Республикасының Президенті Қасым-Жомарт Тоқаевтың Каспий теңізінің одан әрі деградациясына жол бермеу жөніндегі Мемлекетаралық бағдарламаны әзірлеу туралы бастамасын атап өтті.
Қазақстан гидрологиялық және экологиялық деректер алмасуды жандандыруға, бірлескен мониторингті кеңейтуге, теңіз деңгейінің өзгеру себептері мен салдарын тереңірек зерделеуге және келісілген бейімделу шараларын әзірлеуге шақырды.
Иран тарапы Каспий маңы мемлекеттерінің ынтымақтастығын нығайтуға мүдделі екенін растап, Тегеранда Тегеран конвенциясы Тараптарының жетінші конференциясын (COP7) өткізу жоспарлары туралы хабарлады.
Кездесуге қатысушылар Каспийдің бірегей экожүйесін сақтау үшін Каспий маңындағы бес мемлекеттің күш-жігерін одан әрі топтастыру қажеттігін атап өтті.
Естеріңізге сала кетсек, бүгін, 12 тамызда Каспий теңізі күні атап өтілуде. Бұл күг Тегеран конвенциясының - Каспий теңізінің теңіз ортасын қорғау жөніндегі негіздемелік конвенцияның күшіне енуімен байланысты. Құжат осыдан 20 жыл бұрын, 2006 жылғы 12 тамызда күшіне енген болатын.
Бұған дейін Қазақстан Президенті Қасым-Жомарт Тоқаев Каспий теңізі деңгейінің төмендеуіне қатысты пікір білдірген болатын. Ол теңіздің жағдайы бір ғана елдің емес, бүкіл өңірдің тағдырына қатысты екенін атап өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Каспий теңізі күні 12 тамызда атап өтілуде
Сурет: ҚР Экология министрлігі
12 тамызда Каспий теңізі күні атап өтіледі. Бұл дата Тегеран конвенциясының - Каспий теңізінің теңіз ортасын қорғау жөніндегі негіздемелік конвенцияның күшіне енуімен байланысты. Құжат осыдан 20 жыл бұрын, 2006 жылғы 12 тамызда күшіне енді, деп хабарлайды ҚР Экология министрлігі.
Каспий теңізі күні қарсаңында "Таза Қазақстан" экологиялық мәдениетті дамыту тұжырымдамасы шеңберінде "Caspian Sea Action Week 2026" халықаралық волонтерлік апталығы өткізілуде. Апталық іс-шараларына Каспий маңы мемлекеттері - Әзербайжан, Ресей Федерациясы, Иран және Түрікменстанның делегациялары, сондай-ақ Өзбекстан, Қырғызстан және Тәжікстан өкілдері, волонтерлер, экологиялық белсенділер, сарапшылар мен жастар қатысты.
6 тамызда Халықаралық волонтерлік апталықтың салтанатты ашылу рәсімі өтті. Алғашқы екі күнде экологиялық мониторингтің заманауи технологияларына және Каспий маңы елдері жүргізіп жатқан ғылыми зерттеулерге арналған халықаралық семинар мен дөңгелек үстел өтті.
8 тамызда Ақтау қаласында Қазақстан Республикасы Экология және табиғи ресурстар вице-министрі Мансұр Ошурбаевтың қатысуымен өткен "Caspian Clean Challenge" халықаралық экологиялық марафоны болды. Волонтерлер плоггинг форматында жағалау аумағында ауқымды тазалық жұмыстарын жүргізіп, қалдықтарды жинау және сұрыптауды жүзеге асырды, сондай-ақ экологиялық бастамалар мен жасыл технологиялармен танысты. Сол күні "Каспий өңірі волонтерлерінің достық аллеясы" ашылып, онда 80-нен астам ағаш отырғызылып, болашақ ұрпаққа арналған үндеулер жазылған "Уақыт капсуласы" орналастырылды.
9 тамызда Бозжыра шатқалында "Bozzhyra Clean Up" акциясы өтті. Қатысушылар Маңғыстаудың бірегей табиғи ландшафтарымен танысып, табиғи аумақтың тазалығын сақтауға бағытталған экологиялық сенбілік өткізді.
10-11 тамызда "Caspian Innovation Lab" халықаралық хакатоны өтті. Оның қатысушылары Каспий өңірінің экожүйесін сақтауға бағытталған жобаларды әзірлеп, сарапшылар назарына ұсынды. Сонымен қатар TED форматында ашық микрофон ұйымдастырылып, ол экобелсенділер мен сарапшылар арасында тәжірибе алмасуға және өзекті экологиялық мәселелерді талқылауға арналған алаңға айналды.
Апталықтың қорытынды іс-шарасы 12 тамызда өтетін "Caspian Talks" халықаралық волонтерлер саммиті болады. Саммит аясында халықаралық хакатон жеңімпаздарын марапаттау рәсімі және тәжірибе алмасу мен өзекті экологиялық сын-қатерлерді талқылайды.
Caspian Sea Action Week 2026 Каспий теңізін сақтауға бағытталған экологиялық акцияларды, ғылыми пікірталастар мен волонтерлік жобаларды біріктірді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.