Мемлекеттік медиа саясат жетілдіруді қажет етеді
"Соңғы жылдары мемлекеттік БАҚ-н қаржыландыру көлемі бірнеше рет артты, алайда, өкінішке орай, танымалдылық пен халық тарапынан бұқаралық ақпарат құралдарына сенімділік артқан жоқ. Мемлекеттік БАҚ-ның оқырман және көрермен аудиториясы қазіргі таңда алдымызда тұрған мәселелерді шешуге жеткіліксіз", - деді М.Тажин.
Астана. 22-ақпан. Kazakhstan Today - Қазақстандағы мемлекеттік медиа саясат бірқатар бағыт бойынша жетілдіруді қажет етеді, деп хабарлайды Kazakhstan Today агенттігінің тілшісі.
Бұл туралы ҚР Мемлекеттік хатшысы Марат Тажин республикамыздың ақпараттық активтерімен кездесу барысында мәлім етті.
"Соңғы жылдары мемлекеттік БАҚ-н қаржыландыру көлемі бірнеше рет артты, алайда, өкінішке орай, танымалдылық пен халық тарапынан бұқаралық ақпарат құралдарына сенімділік артқан жоқ. Мемлекеттік БАҚ-ның оқырман және көрермен аудиториясы қазіргі таңда алдымызда тұрған мәселелерді шешуге жеткіліксіз", - деді М.Тажин.
"Міне, менде талдау бар: жүздеген, мыңдаған материалдар шығарылған, бірақ олардың біреуі де халық есінде қалмаған. Біз кім үшін жұмыс жасаймыз?! Біздің басты сыншымыз әрі тұтынушымыз - халық пен ақпараттық әсер деңгейі. Ал, біз немен айналысамыз?! Менің ойымша, ақпараттық тапсырысты бақылау - бұл Мәдениет және ақпарат министрлігінің тікелей міндеті, қателікке жол бермейтін орындау сапасының жаңа критериін жасап шығу керек", - деп жалғастырды өз сөзін Мемлекет хатшысы.
Сонымен қатар, М.Тажин мемлкеттік ақпараттық тапсырысты қалыптастыру саясатына және осы саладағы бюджеттік қаражатты тиімсіз жұмсауға жеке сын айтты.
"Осы мәселені бір жақты қылып, Мәдениет және ақпарат министрлігімен бірге мемлекеттік ақпараттық тапсырысты қалыптастыру саясатын, және де, ең бастысы оның орындалуын толығымен бақылау практикасын қайта қарап шығу қажет", - деп атап өтті ҚР Мемлекет хатшысы.
Оған қоса, ол мемлекеттік ақпараттық тапсырыс бойынша қаражатты жұмсаудың талдауын өткізуді және мемлекеттік БАҚ-ның бюджеттерін оңтайландыру қажеттігін атап өтті.
Естеріңізге сала кетейік, Қазақстандық БАҚ-да мемлекеттік ақпараттық тапсырысты орналастыру мәселесі ҚР Премьер-Министрінің Бірінші орынбасары - Өңірлік даму Министрі Бақытжан Сағынтаевтың қатысуымен өткен кеңейтілген алқа мәжілісінде талқыланған болатын.
"Мемлекеттік тапсырыстарды мемлкеттік емес БАҚ-да орналастыру жолдары едәуір түзетуді қажет етеді. Оны "әр қызға бір сырға" ұстанымымен таратып бермей, оқырмандардың, көрермендердің сұраныстарына ие, мазмұны қызықты, жаңашыл әдіспен жұмыс істейтін БАҚ ғана алуы керек", - деді М.Құл-Мұхаммед.
Сонымен қатар, ведомство басшысы мемлекеттік тапсырыс бойынша қаржыландырудың төменгі мөлшерлемесін белгілеу мәселесін де айтып өтті.
"Қазіргі қолданылып жүрген баға - сағатына 120 мың теңге республикалық телеарналардың нақты шығынын жаппайды. Мысал үшін, телеарна 5 млн теңге үшін эфирде 42 сағат көлемінде өнім көрсетуі қажет. Бұл мүмкін бе? Мүмкін емес деуге болады, мүмкін болған күннің өзінде де контент сапасы өте төмен болады. Баспа БАҚ-на келетін болсақ, мемлекеттік тапсырыстың тарифі коммерциялықтан ондаған есе аз", - деп жалғады сөзін М.Құл-Мұхаммед.
МАМ басшысының сөзіне қарағанда, министрлік қазіргі күні мүдделі мемлекеттік органдармен бірлесіп мемлекеттік ақпараттық тапсырысты орналастырудың ерекше тәртібін әзірлеу мәселесін ойластыруда.
"Осыған байланысты, Ақпарат және мұрағат комитеті мемлекеттік тапсырысты орындауға анағұрлым көп мемлекеттік емес БАҚ-ын тартудың жаңа тарифін әзірлеуге кірісті", - деп хабарлады М.Құл-Мұхаммед.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Бектенов Атырау облысында су басу қаупін азайту үшін қабылданып жатқан шаралардың барысын тексерді
Қазақстан Премьер-Министрі Олжас Бектенов Мемлекет басшысы Қасым-Жомарт Тоқаевтың тапсырмаларын орындау аясында Атырау облысында су басу қаупін азайту үшін қабылданып жатқан шаралардың барысын тексерді, деп хабарлайды Үкіметтің баспасөз қызметінен.
Олжас Бектенов облыс орталығындағы тұрғын үй алаптары бекіністерін тексеру барысында Атырау қаласының су тасқынының болжамды екінші толқынына дайындық жұмыстарымен танысты. Батыс өңірде Ресей Федерациясының Ириклин су қоймасынан судың келуіне байланысты, сондай-ақ Жайық өзеніне құйылар сағадағы ірі тасқын мен су деңгейінің көтерілуі салдарынан жағдай күрделі күйінде қалып отыр.
Бұрын хабарланғандай, Батыс Қазақстан облысындағы ірі су тасқынынан кейін ағын су өзен арнасымен Атырау облысына қарай жылжып, Каспий теңізіне құяды. Соңғы тәулікте БҚО тарапынан келетін судың әсерінен Атырау қаласында су деңгейінің 6 см-ге көтерілуі тіркелді (су тасқыны басталғаннан бері жалпы көтерілуі 227 см-ді құрады).
Тұрғын үй алаптарын нығайту, сондай-ақ Жайықтың өткізу қабілетін арттыру үшін өзен түбін тереңдету жұмыстарының қарқыны тексерілді. Тиісті күштердің көлемді судың келуіне дайындық деңгейін қарап көрді.
Үкімет басшысы Олжас Бектенов Атырау облысына су тасқыны жағдайы тұрақтанған өңірлерден әскери қызметшілер мен техниканы жедел жеткізіп, күштерді арттыруды тапсырды.
Бүгінгі таңда су тасқынының алдын алу шараларының 92%-ы орындалды. Жұмысты тиімді жүргізу үшін қала 111 секторға бөлінген. Ұзындығы 482 км қорғаныс бөгеттері салынды, аяқталған учаскелер техникалық қадағалау арқылы тексерілді. Жұмыстарға ТЖМ, ІІМ, Қорғаныс министрлігі, Ұлттық ұланның 6 мыңға жуық әскери қызметшісі, әкімдік қызметкерлері, 2 мыңға жуық техника жұмылдырылған. Еріктілер тарапынан белсенді көмек көрсетілуде. Өткен сенбіде жағалауды нығайту сенбілігі аясында қаланы қорғау жұмыстарына 9 мыңға жуық ерікті қатысты.
Сонымен қатар Жайық өзенінен Каспий теңізіне су өткізу қабілетін арттыру үшін өзен түбін тереңдету жұмыстары жүргізілуде. Су жолдарын тазарту, тереңдету және кеңейту мақсатында арнайы техникалық флоттық кемелер, гидравликалық экскаваторлар қолданылуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Көктемгі дала жұмыстарына қосымша 400 миллиард теңгеге дейін қаражат тартылады
Көктемгі дала жұмыстарын оңтайлы егіншілік уақытында жүргізу бүгінгі күннің маңызды міндеттерінің бірі болып табылады. Бұл мiндеттi орындау үшiн ауыл шаруашылығы тауарын өндiрушiлердiң ұзақ уақыт бойы шектелген қарыз қаражатына қол жеткiзуi тиiс.
Егіс жұмыстарын жеңілдетілген несиелендіруге 2024 жылы "Аграрлық несие корпорациясы" АҚ арқылы 140 миллиард теңге, "Азық-түлік корпорациясы" АҚ арқылы 40 миллиард теңге көлемінде бюджет қаражаты бөлінді, деп хабарлайды ҚР Ауылшаруашылық министрлігінің баспасөз қызметінен.
Осы қаражатты ескере отырып, Қазақстан Республикасы Ауыл шаруашылығы министрлігінің бағалауы бойынша көктемгі дала жұмыстарын қаржыландырудағы тапшылық шамамен 1,3 триллион теңгені құрайды.
Дегенмен, Қазақстан Республикасының Үкіметі егіс науқанын қаржыландыруға қолжетімділікті арттыру бойынша жұмыс жүргізуде.
Мемлекет басшысының тапсырмасы бойынша көктемгі егіс жұмыстарын жүргізуге берілетін несиенің пайыздық мөлшерлемесін субсидиялауға қаражат бөлу арқылы қосымша 400 миллиард теңгеге дейін қаражат тартылады.
Осы мақсаттарға Үкімет резервінен 60 млрд теңге бөлініп, ол қарыз несиелерінің құнын төмендетуге, сондай-ақ ауыл шаруашылығы тауарын өндірушілердің несиелеріне кепілдік беруге бағытталады.
Бұл тәсіл ауыл шаруашылығы кәсіпорындарына егіс жұмыстарын жүргізу үшін жылдық бірден 5% несие қаражатын беруге және жеткілікті кепілдік болмаған жағдайда несие сомасының 85% дейін кепілдік беруге мүмкіндік береді.
Ереже жобасы бүгін жергілікті атқарушы органдар мен Орталық мемлекеттік басқару органдарына келісу үшін жіберіледі.
Сондай-ақ бүгінде азық-түлік корпорациясын қосымша қаржыландыру үшін "Азық-түлік корпорациясы" 200 мың тонна астықты тауарлық несиелеу бағдарламасын жүзеге асыруға кірісті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев Қазақстан халқы Ассамблеясы төрағасының орынбасарларын тағайындады
Сурет: Akorda
Тоқаев Қазақстан халқы Ассамблеясы төрағасының орынбасарларын тағайындады, деп хабарлайды Ақорданың баспасөз қызмтінен.
Мемлекет басшысының өкімдерімен Лугмар Харкиевич Буларов және Юрий Германович Шин Қазақстан халқы Ассамблеясы Төрағасының орынбасарлары болып тағайындалды", деп көрсетілген Өкім мәтінінде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Есірткі саудасының 50 пайыздан астамы Астана, Алматы және Алматы облыстарына тиесілі - ҚМА
ҚМА есірткі құралдары мен прекурсорлардың таралуы тұрғысынан Telegram мессенджерінің арналары, әлеуметтік желілер мен хабарландыру сервистері қамтылған жаһандық желіге мониторинг жүргізуде, деп хабарлайды агенттіктің баспасөз қызметінен.
Мессенджерлердегі 300-ге жуық арна, тыйым салынған заттар сатылатын 4 ірі Darknet маркетплейс көзге түсті.
Ел аумағында Telegram арналары арқылы есірткі және психотроптық заттарды тұрақты негізде жарнамалаумен және сатумен айналысқан 80 пайдаланушының жеке басы анықталды.
Интернет-кеңістіктің Қазақстандық сегментіне жүргізілген мониторинг нәтижесінде 35 мыңға жуық қатысушысы бар есірткі сататын 3 ірі алаң,
есірткі заттарынының әлеуетті тұтынушылары болып табылатын 10 мыңға жуық адамның жеке басы анықталды.
Талдау көрсеткендей, тұтынушылардың 50% - дан астамы Астана, Алматы қалалары мен Алматы облысына тиесілі.
Агенттік өткен жылы айналымы 25,6 млрд теңгені құрайтын 36 есірткі дүкенін анықтады.
Биыл Telegram мессенджерінде 60 есірткі арнасына тиесілі 59 карт-шот анықталды.
Қаржылық барлау бөлімшесінің алдын ала талдау қорытындысы бойынша аталған дүкендердегі ақша қаражатының жалпы айналымы 3 млрд теңгені құрады.
Айналымы 82 млн теңгені құрайтын есірткі дүкендерінің бірі бойынша материалдар ІІМ-ге жолданды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.