Нұрсұлтан Назарбаев "Үздік шетелдік инвестор - 2008" конкурсының жеңімпаздарын марапаттады
Нұрсұлтан Назарбаев "Үздік шетелдік инвестор - 2008" конкурсының жеңімпаздарын марапаттады
Алматы. 5 желтоқсан. "Қазақстан Бүгін" - Нұрсұлтан Назарбаев "Үздік шетелдік инвестор - 2008" конкурсының жеңімпаздарын марапаттады, деп хабарлайды агенттік тілшісі президенттің баспасөз қызметіне сілтеме жасап.
Баспасөз қызметінің ақпаратына сәйкес, Алматыда мемлекет басшысының төрағалығымен Қазақстан Республикасы президентінің жанындағы Шетелдік инвесторлар кеңесінің қазақстандық үлесті дамыту мәселелеріне арналған 20-шы мерейтойлық жалпы мәжілісі өтіп, оның қорытындысы бойынша Нұрсұлтан Назарбаев "Үздік шетелдік инвестор - 2008" конкурсының жеңімпаздарын марапаттау рәсіміне қатысып, конкурс жүлдегерлеріне дипломдарын табыс етті.
Кеңесті ашқан Нұрсұлтан Назарбаев он жыл ішінде инвесторлармен кездесу жақсы дәстүрге, ал Кеңестің өзі - инвесторлар үшін де, сондай-ақ біздің еліміз үшін де аса маңызды тақырыптарды талқылайтын ашық алаңға айналып үлгергенін атап өтті.
Президент сондай-ақ жиналғандарға Кеңестің жаңа мүшелері - Еуропалық Қайта құру және даму банкінің президенті Томас Мироуды, Азия даму банкінің вице-президенті Шаою Жаоны және "Эни" корпорациясының Бас өндірістік директоры Клаудио Дескальциді таныстырып, олардың қызметіне табыс тіледі.
Кеңестің бұдан бұрынғы жалпы мәжілісінің хаттамасының орындалу барысы туралы, сондай-ақ қазақстандық үлесті дамытудың жай-күйі жөнінде ҚР Индустрия және сауда министрі В.Школьник есеп берді.
Мәжілісте сөз сөйлеген Еуропалық Қайта құру және даму банкінің президенті Томас Мироу қазақстандық үлесті дамыту бойынша Қазақстанда қабылданып жатқан шараларға қолдау білдірді және тараптардың осы бағытта бірлесіп әрекет ету қажеттігіне баса назар аударды.
"Самұрық-Қазына" ұлттық әл-ауқат қорының Басқарма төрағасы Қайрат Келімбетов өз сөзінде халықтың кәсіпкерлік белсенділігін қолдау, серпінді жобаларды жүзеге асыру, жаңа өнім түрлерін игеру жөніндегі ұлттық бағдарламалардың және қазақстандық үлесті дамыту жөніндегі басқа да бағдарламалардың үйлестірушісі ретінде Қордың қабылдап жатқан шаралары жайында баяндады.
Шетелдік инвесторлар кеңесінің мүшелері қазақстандық үлесті дамытудың негізгі проблемаларын, сондай-ақ инвестициялық саясат пен Қазақстандағы инвестициялық ахуал мәселелерін талқылады.
Кеңес жұмысын қорытындылай келе, Нұрсұлтан Назарбаев Қазақстан 2007 жылдың өзінде-ақ жаһандық қаржы дағдарысының алғашқы толқынын сезінгенін, соған сәйкес тиісті шаралар қабылдап, бейімделгенін, сондықтан да, дағдарыстың келесі толқынының мүмкін болар кері әсерлерінің алдын алуға айтарлықтай дайын болғандығын атап өтті.
"Бүкіл әлем қиыншылық кешіп жатқан қазіргідей жағдайда елдер тек өз экономикасының ішкі өсім қорларына сенім арта алатынына көз жеткізіп отырмыз", - деп атап көрсетті мемлекет басшысы.
Сонымен қатар, Президент қазақстандық үлес мәселесіне қатысты Үкіметтің жұмысын қанағаттанарлықсыз деп атап көрсетті. Атап айтқанда, міндеттер мен межелер айқындалмаған, оның шарттары мен ережелері әзірленбеген, қазақстандық тауар өндірушілермен жұмыс жүргізу бойынша қандай да бір нақты іс-қимыл қабылданбаған.
Нұрсұлтан Назарбаев қазақстандық үлесті дамыту үкімет үшін ең бірінші мәселесі болуы тиіс екендігін мәлімдеді. Осыған байланысты мемлекет басшысы бірқатар нақты тапсырмалар берді.
Атап айтқанда, әрбір жер қойнауын пайдаланушымен нақты жұмыс жүргізу керек, ол үшін салалық министрліктердің, "Самұрық-Қазына" холдингі басшылығының қатысуымен жоғары деңгейдегі жұмыс тобын құру қажет.
Мемлекеттік органдар мен ұлттық компаниялардың басшылары сатып алу тапсырыстарына отандық өндірушілердің барынша қатысуын қамтамасыз етулері тиіс.
Нұрсұлтан Назарбаев кеңеске қатысушы шетелдік инвесторларға арнаған сөзінде олардың қаржы дағдарысына қарамастан, адамдарды әлеуметтік қорғауды қамтамасыз етуін және жұмыс орындарын сақтауы тиіс екендігін атап өтті.
Қазақстан Республикасы президентінің жанындағы Шетелдік инвесторлар кеңесінің келесі отырысы 2009 жылдың 12 маусымында Қостанай қаласында өтеді және әлемдік қаржы нарығындағы алмағайып жағдайда Қазақстанның одан арғы экономикалық дамуы үшін баламалы қаржы көздері мәселелеріне арналмақ.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
Қазақстан Президенті су тасқынынан кейін өңірлерді қалпына келтіру мерзімдерін белгіледі
Сурет: ТЖМ
Қазақстан президенті Қасым-Жомарт Тоқаев Қазақстан халқы Ассамблеясының "Бірлік. Жасампаздық. Өрлеу" атты ХХХІІІ сессиясының отырысында сөйлеген сөзінде су тасқынынан кейін өңірлерді қалпына келтіру мерзімдерін белгіледі, деп хабарлайды Мемлекет басшысының баспасөз қызметі.
Қазақта "Алпыс күн тасыған дария, алты күнде қайтады" деген сөз бар. Көп ұзамай қарғын су кетіп, жұрт күнделікті өмірге оралады. "Әр қиындықтың қайыры бар" дейді халқымыз.
Біріншіден, тасқын кезінде ел бірлігі нығая түсті. Арқадағы ағайынға, Жайықтағы жұртқа бүкіл Қазақстан халқы көмектесуге ұмтылды. Апат аймағында тұратын адамдар барша отандасымыздың шынайы жанашырлығын сезінді.
Екіншіден, елдің жағдайын жақсарту үшін ешкім қиындықтың келуін күтіп отырмайтыны анық. Дегенмен, мұндай апаттар біраз шаруаны шұғыл қолға алуға себепкер болады.
Тасқын аяқталған соң кейбір ауылдар тың жерге қоныстанып, жаңадан бой көтереді. Жол салынады, су тартылады. Ауылдарымыз мүлде жаңа келбетке ие болады. Жалпы, әлемдегі үлкен дағдарыстардың қарқынды дамуға жол ашатыны белгілі", деді президент.
Қазіргі алапат тасқын да, түптеп келгенде, елімізге оң әсерін тигізеді деп ойлаймын. Сын сағатта жұдырықтай жұмылған жұртымыз осы қалпында өрлеу, жаңғыру кезеңіне қадам басады. Бәрі де жақсы болады.
Бәріміз - бір елдің азаматымыз. Тарих тоғыстырған тағдырымыз - бір, сеніммен қадам басатын келешегіміз - бір. Біз біртұтас ұлт ретінде әрдайым бабалар аманатына адал боламыз. Қасиетті қара шаңырағымыз - Қазақстанның жарқын болашағын бірге жасаймыз. Біздің мақсатымыз - айқын, бұл - Әділетті Қазақстанды құру.
Мен Қазақстан Республикасының Тәуелсіздігін қорғауды Президент ретіндегі ең басты міндетім деп санаймын. Осы қастерлі міндет Әділетті Қазақстанды құру және белсенді әрі сындарлы сыртқы саясат жүргізу арқылы ғана орындалады. Биік мақсатқа жету үшін түрлі кедергіден өтеміз, барлық қиындықты жеңеміз. Ауқымды міндеттерді орындаймыз. Біз еліміздің басты құндылықтары мен бағыт-бағдарынан айнымаймыз. Мемлекеттілігімізді нығайтып, тәуелсіздік туын әрдайым биік ұстаймыз. Мен бұған нық сенемін және сол үшін бәрін жасаймын. Бұл - менің президенттік әрі перзенттік парызым.
Еліміз аман, жұртымыз тыныш болсын!", деп түйіндеді өз сөзін Қасым-Жомарт Тоқаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бектенов Атырау облысында су басу қаупін азайту үшін қабылданып жатқан шаралардың барысын тексерді
Қазақстан Премьер-Министрі Олжас Бектенов Мемлекет басшысы Қасым-Жомарт Тоқаевтың тапсырмаларын орындау аясында Атырау облысында су басу қаупін азайту үшін қабылданып жатқан шаралардың барысын тексерді, деп хабарлайды Үкіметтің баспасөз қызметінен.
Олжас Бектенов облыс орталығындағы тұрғын үй алаптары бекіністерін тексеру барысында Атырау қаласының су тасқынының болжамды екінші толқынына дайындық жұмыстарымен танысты. Батыс өңірде Ресей Федерациясының Ириклин су қоймасынан судың келуіне байланысты, сондай-ақ Жайық өзеніне құйылар сағадағы ірі тасқын мен су деңгейінің көтерілуі салдарынан жағдай күрделі күйінде қалып отыр.
Бұрын хабарланғандай, Батыс Қазақстан облысындағы ірі су тасқынынан кейін ағын су өзен арнасымен Атырау облысына қарай жылжып, Каспий теңізіне құяды. Соңғы тәулікте БҚО тарапынан келетін судың әсерінен Атырау қаласында су деңгейінің 6 см-ге көтерілуі тіркелді (су тасқыны басталғаннан бері жалпы көтерілуі 227 см-ді құрады).
Тұрғын үй алаптарын нығайту, сондай-ақ Жайықтың өткізу қабілетін арттыру үшін өзен түбін тереңдету жұмыстарының қарқыны тексерілді. Тиісті күштердің көлемді судың келуіне дайындық деңгейін қарап көрді.
Үкімет басшысы Олжас Бектенов Атырау облысына су тасқыны жағдайы тұрақтанған өңірлерден әскери қызметшілер мен техниканы жедел жеткізіп, күштерді арттыруды тапсырды.
Бүгінгі таңда су тасқынының алдын алу шараларының 92%-ы орындалды. Жұмысты тиімді жүргізу үшін қала 111 секторға бөлінген. Ұзындығы 482 км қорғаныс бөгеттері салынды, аяқталған учаскелер техникалық қадағалау арқылы тексерілді. Жұмыстарға ТЖМ, ІІМ, Қорғаныс министрлігі, Ұлттық ұланның 6 мыңға жуық әскери қызметшісі, әкімдік қызметкерлері, 2 мыңға жуық техника жұмылдырылған. Еріктілер тарапынан белсенді көмек көрсетілуде. Өткен сенбіде жағалауды нығайту сенбілігі аясында қаланы қорғау жұмыстарына 9 мыңға жуық ерікті қатысты.
Сонымен қатар Жайық өзенінен Каспий теңізіне су өткізу қабілетін арттыру үшін өзен түбін тереңдету жұмыстары жүргізілуде. Су жолдарын тазарту, тереңдету және кеңейту мақсатында арнайы техникалық флоттық кемелер, гидравликалық экскаваторлар қолданылуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Көктемгі дала жұмыстарына қосымша 400 миллиард теңгеге дейін қаражат тартылады
Көктемгі дала жұмыстарын оңтайлы егіншілік уақытында жүргізу бүгінгі күннің маңызды міндеттерінің бірі болып табылады. Бұл мiндеттi орындау үшiн ауыл шаруашылығы тауарын өндiрушiлердiң ұзақ уақыт бойы шектелген қарыз қаражатына қол жеткiзуi тиiс.
Егіс жұмыстарын жеңілдетілген несиелендіруге 2024 жылы "Аграрлық несие корпорациясы" АҚ арқылы 140 миллиард теңге, "Азық-түлік корпорациясы" АҚ арқылы 40 миллиард теңге көлемінде бюджет қаражаты бөлінді, деп хабарлайды ҚР Ауылшаруашылық министрлігінің баспасөз қызметінен.
Осы қаражатты ескере отырып, Қазақстан Республикасы Ауыл шаруашылығы министрлігінің бағалауы бойынша көктемгі дала жұмыстарын қаржыландырудағы тапшылық шамамен 1,3 триллион теңгені құрайды.
Дегенмен, Қазақстан Республикасының Үкіметі егіс науқанын қаржыландыруға қолжетімділікті арттыру бойынша жұмыс жүргізуде.
Мемлекет басшысының тапсырмасы бойынша көктемгі егіс жұмыстарын жүргізуге берілетін несиенің пайыздық мөлшерлемесін субсидиялауға қаражат бөлу арқылы қосымша 400 миллиард теңгеге дейін қаражат тартылады.
Осы мақсаттарға Үкімет резервінен 60 млрд теңге бөлініп, ол қарыз несиелерінің құнын төмендетуге, сондай-ақ ауыл шаруашылығы тауарын өндірушілердің несиелеріне кепілдік беруге бағытталады.
Бұл тәсіл ауыл шаруашылығы кәсіпорындарына егіс жұмыстарын жүргізу үшін жылдық бірден 5% несие қаражатын беруге және жеткілікті кепілдік болмаған жағдайда несие сомасының 85% дейін кепілдік беруге мүмкіндік береді.
Ереже жобасы бүгін жергілікті атқарушы органдар мен Орталық мемлекеттік басқару органдарына келісу үшін жіберіледі.
Сондай-ақ бүгінде азық-түлік корпорациясын қосымша қаржыландыру үшін "Азық-түлік корпорациясы" 200 мың тонна астықты тауарлық несиелеу бағдарламасын жүзеге асыруға кірісті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев Қазақстан халқы Ассамблеясы төрағасының орынбасарларын тағайындады
Сурет: Akorda
Тоқаев Қазақстан халқы Ассамблеясы төрағасының орынбасарларын тағайындады, деп хабарлайды Ақорданың баспасөз қызмтінен.
Мемлекет басшысының өкімдерімен Лугмар Харкиевич Буларов және Юрий Германович Шин Қазақстан халқы Ассамблеясы Төрағасының орынбасарлары болып тағайындалды", деп көрсетілген Өкім мәтінінде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Есірткі саудасының 50 пайыздан астамы Астана, Алматы және Алматы облыстарына тиесілі - ҚМА
ҚМА есірткі құралдары мен прекурсорлардың таралуы тұрғысынан Telegram мессенджерінің арналары, әлеуметтік желілер мен хабарландыру сервистері қамтылған жаһандық желіге мониторинг жүргізуде, деп хабарлайды агенттіктің баспасөз қызметінен.
Мессенджерлердегі 300-ге жуық арна, тыйым салынған заттар сатылатын 4 ірі Darknet маркетплейс көзге түсті.
Ел аумағында Telegram арналары арқылы есірткі және психотроптық заттарды тұрақты негізде жарнамалаумен және сатумен айналысқан 80 пайдаланушының жеке басы анықталды.
Интернет-кеңістіктің Қазақстандық сегментіне жүргізілген мониторинг нәтижесінде 35 мыңға жуық қатысушысы бар есірткі сататын 3 ірі алаң,
есірткі заттарынының әлеуетті тұтынушылары болып табылатын 10 мыңға жуық адамның жеке басы анықталды.
Талдау көрсеткендей, тұтынушылардың 50% - дан астамы Астана, Алматы қалалары мен Алматы облысына тиесілі.
Агенттік өткен жылы айналымы 25,6 млрд теңгені құрайтын 36 есірткі дүкенін анықтады.
Биыл Telegram мессенджерінде 60 есірткі арнасына тиесілі 59 карт-шот анықталды.
Қаржылық барлау бөлімшесінің алдын ала талдау қорытындысы бойынша аталған дүкендердегі ақша қаражатының жалпы айналымы 3 млрд теңгені құрады.
Айналымы 82 млн теңгені құрайтын есірткі дүкендерінің бірі бойынша материалдар ІІМ-ге жолданды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.