Орталық сайлау комиссиясы Құрылтай сайлауына халықаралық байқаушыларды қосымша аккредиттеді
Бүгін Орталық сайлау комиссиясы Құрылтай сайлауына тағы 405 халықаралық байқаушыны аккредиттеді.
Байқаушылар 7 шет мемлекет пен 9 халықаралық ұйымның атынан қатысады.
"Орталық сайлау комиссиясына Сыртқы істер министрлігінен 7 шет мемлекет пен 9 халықаралық ұйымның атынан 405 байқаушының кандидатурасы аккредиттеуге ұсынылды. Оның ішінде ТМД миссиясынан 75 байқаушы, ТМД ПАА-дан 23 кандидат, ЕҚЫҰ ДИАҚБ миссиясынан 208 байқаушы, Еуропа Кеңесінің Парламенттік Ассамблеясынан 23 байқаушы, Түркі мемлекеттері ұйымының миссиясынан 10 кандидат, Түркі мемлекеттері Парламенттік Ассамблеясының миссиясынан 22 адам, ШЫҰ миссиясынан 11 кандидат, АӨСШК-ден 9 байқаушы, Ислам азық-түлік қауіпсіздігі ұйымынан 7 адам, сондай-ақ Литва, Түркия, Грузия, Солтүстік Македония, Эстония, Нидерланд және Тәжікстаннан 17 кандидат бар", - деді ОСК төрағасының орынбасары Мұхтар Ерман.
Ол халықаралық байқаушыларды аккредиттеу әлі жалғасып жатқанын және ұсыныстардың түсуіне қарай мәліметтер жаңартылатынын атап өтті.
Осылайша, бүгінгі таңда Қазақстан Республикасы Құрылтайы депутаттарының сайлауына Орталық сайлау комиссиясы 656 байқаушыны аккредиттеді.
Бүгін сондай-ақ жеті партияның төрағалары қорытынды теледебатты қашан және қайда өткізетіні белгілі болды.
Бұған дейін қазақстандықтарға Құрылтай сайлауында дауыс беретін учаскесін қалай білуге болатыны түсіндірілген еді.
Құрылтайдың алғашқы құрамының депутаттарын сайлау 23 тамызда өтеді. Сайлау алдындағы үгіт-насихат жұмыстары 22 тамызға дейін жалғасады деп күтілуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Елімізде компаниялар клиенттерге жасалатын қоңырауды қашан таңбалауға міндеттеледі
Сурет: Depositphotos
Қазақстанда компаниялардан түсетін қоңырауларды міндетті таңбалау 2027 жылдың бірінші тоқсанынан бастап іске қосылуы мүмкін. Бұл туралы Үкіметтегі баспасөз мәслихатында Цифрлық даму министрлігі Телекоммуникациялар комитетінің төрағасы Дамир Сейсембеков мәлімдеді, деп хабарлайды агенттік тілшісі.
Сейсембеков заңнамаға қажетті түзетулердің қабылданып, күшіне енгенін еске салды.
"Колл-орталықтардан және басқа да ұйымдардан түсетін қоңырауларды міндетті түрде таңбалау қажет. Бұл түзетулердің бірқатары күшіне енді. Қазір министрлігімізде байланыс қызметтерін көрсету қағидалары әзірленіп, келісіліп жатыр. Онда бұл жүйенің қалай жұмыс істеуі керектігі және бірқатар техникалық мәселелер бекітіледі. Операторлардан ресми өтініш түсті, олар жүйені 2027 жылдың бірінші тоқсанынан бастап енгізуді сұрады", - деді ол.
Комитет басшысының айтуынша, бизнеске қосымша жүктеме түсірмеу үшін және де операторларға қажетті техникалық пысықтауларды жүргізуге уақыт беру үшін бұл мерзімдер қолдау табуы ықтимал.
"Қазір ережелер мемлекеттік органдардың қарауында. Менің ойымша, қазан айының ортасына дейін министр бұйрыққа қол қояды, сол кезде нақты мерзімдер де белгіленеді", - деп қорытындылады Сейсембеков.
Естеріңізге сала кетсек, Қазақстанда заңды тұлғалардан түсетін қоңырауларды міндетті таңбалау енгізіледі. Мұндай қоңырау түскен кезде телефон экранында компанияның атауы көрсетілетін болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
АҚШ аумағында қазақстандық әйел ұсталды - СІМ түсініктемесі
Сурет: ЖИ
ҚР Сыртқы істер министрлігі АҚШ-та Қазақстан азаматының ұсталғаны туралы әлеуметтік желілерде тараған хабарламаларға қатысты түсініктеме берді.
"Қазақстан азаматшасын АҚШ-та заңды көші-қон мәртебесінің болмауына байланысты Флорида штатының аумағында АҚШ иммиграция қызметінің қызметкерлері ұстап алған", - деп хабарлады министрліктен.
Сондай-ақ, қазақстандық дипломаттардың қажетті консулдық көмек көрсету мақсатында АҚШ-тың мемлекеттік органдарымен және ұсталған азаматшаның отбасымен байланыс орнатқан.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ҚМА жалған хаттар арқылы жасалатын алаяқтықтың жаңа схемасы туралы ескертті
Сурет: Depositphotos
Қазақстанның Қаржылық мониторинг агенттігі ведомство атынан жіберілетін жалған ресми хаттарды пайдалану арқылы жасалатын алаяқтықтың жаңа схемасы туралы ескертті. Осындай кезекті хатты алаяқтар мемлекеттік органға жолдаған, деп хабарлайды ҚМА баспасөз қызметінен.
Мемлекеттік органға жолданған хатта қаскөйлер тексеру жүргізіліп жатқанын алға тартып, азамат туралы мәліметтерді, соның ішінде оның мінездемесі мен өзге де ақпаратты сұратқан.
Бұған дейін де алаяқтар осыған ұқсас тәсілді қолданған. Олар жалған хаттарды жібергеннен кейін азаматтарға телефон немесе мессенджер арқылы хабарласып, өздерін ҚМА қызметкерлері ретінде таныстырған. Түрлі сылтаумен азаматтардың жеке және банк деректерін алуға тырысқан немесе ақша бопсалаған.
Агенттік ҚМА қызметкерлері телефон арқылы банк шоттарының деректерін беруді немесе ақша аударуды талап етпейтінін атап өтті. Ведомство сондай-ақ, құжатта логотип, мөр немесе қолтаңба бар екеніне ғана сүйеніп, оған сенуге болмайтындығын ескертті.
Күдікті хат алған жағдайда оның шынайылығын Агенттіктің ресми байланыс арналары арқылы тексеруді және бейтаныс адамдарға жеке және банктік деректерді бермеуге кеңес береді.
Ақпаратты ҚМА-ның 1458 нөмірі бойынша call-орталығынан немесе +7 (7172) 70-84-79 телефоны арқылы кезекші бөлімнен тексеруге болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Оңтүстік Кореяның ірі корпорациясы Қазақстандағы технологиялық жобаларға шақырылды
Сурет: Ақорда
Қазақстан президенті Қасым-Жомарт Тоқаев Оңтүстік Кореяның Hanwha Group компаниясына технологиялар саласында бірлескен жобаларды жүзеге асыруды және Орталық Азия нарықтарына шығу үшін Қазақстанды алаң ретінде пайдалануды ұсынды. Президент Hanwha Group вице-төрағасы Ким Дон Вонмен инвестициялық және технологиялық ынтымақтастықтың перспективті бағыттарын талқылады, деп хабарлайды Ақорданың баспасөз қызметінен.
Тоқаев Қазақстанның Корея Республикасымен стратегиялық серіктестікті жоғары бағалайтынын, ал еліміз Hanwha Group компаниясын Корея Республикасының бірқатар стратегиялық маңызды салаларда халықаралық позициясы мығым жетекші бизнес топтарының бірі ретінде қарастыратынын атап өтті.
Президент Қазақстанда ұлттық жасанды интеллект экожүйесін қалыптастыру, цифрлық инфрақұрылымды дамыту бойынша ауқымды шаралар қабылданып жатқанын айта келе, Hanwha Group компаниясына Қазақстанды Орталық Азия нарығына шығатын технологиялық алаң ретінде пайдаланып, бірлескен жобаларды жүзеге асыруды ұсынды.
Қасым-Жомарт Тоқаев Қазақстанның Hanwha Group компаниясымен серіктестікті кеңейтуге дайын екенін растады және қол жеткізілген уағдаластықтар өзара тиімді нақты жобаларға ұласатынына сенім білдірді.
Ким Дон Вон өз кезегінде Hanwha Group 1997 жылы Қазақстанмен ынтымақтастықты бастаған алғашқы кореялық корпорациялардың бірі екеніне назар аударды. Сондай-ақ, еліміздегі цифрландыру үдерісіне және түрлі жобаларды іске асыруға қатысу мүмкіндігін ерекше ықыласпен қабылдағанын атап өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев БҰҰ-ның бұрынғы Бас хатшысымен ұйымды реформалау мәселесін талқылады
Қазақстан президенті Қасым-Жомарт Тоқаев Сеулге мемлекеттік сапары аясында Біріккен Ұлттар Ұйымының 8-ші Бас хатшысы, Жаһандық жасыл даму институтының (GGGI) төрағасы Пан Ги Мунмен Біріккен Ұлттар Ұйымын реформалау және оны қазіргі заманғы шынайы жағдайларға бейімдеу мәселелерін талқылады, деп хабарлайды Ақорданың баспасөз қызметінен.
Мемлекет басшысы дамушы елдердің әлеуметтік тұрақтылықты, климат өзгерістеріне төзімділікті және экономикалық дамуды қамтамасыз етуге бағытталған "жасыл экономика" моделіне көшуіне қолдау білдіретін GGGI қызметінің маңызына тоқталды.
Өз кезегінде Пан Ги Мун Қазақстанның орнықты даму саласындағы табыстарын құптап, дүниежүзілік климат күн тәртібі аясында ынтымақтастықты жалғастыруға дайын екенін мәлімдеді.
Естеріңізге сала кетсек, Тоқаев Оңтүстік Кореяға мемлекеттік сапармен барған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Атырау әкімі қызметінен кетті
Шәкір Кейкиннің өз еркімен қызметінен кеткені хабарланды
Атырау облысының әкімдігі Атырау әкімі Шәкір Кейкиннің қызметінен кеткенін растады, деп хабарлайды агенттік тілшісі.
Берілген ақпаратқа сүйенсек, Кейкиннің қызметінен өз еркімен кеткен.
Естеріңізге сала кетсек, Шәкір Кейин Атырау әкімі қызметіне 2023 жылдың шілде айында тағайындалған болатын.
Шілде айында Атырау әкімінің міндетін атқарушы Тілек Махуовтың пара алды деген күдікпен ұсталғаны да хабарланған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Құрылтайда азаматтардың өтініштерін қабылдайтын қоғамдық қабылдау бөлмесі ашылды
I шақырылымдағы Құрылтайдың қоғамдық қабылдау бөлмесі азаматтардың депутаттармен тікелей байланыс орнатуы үшін ашылды, деп хабарлайды парламенттің баспасөз қызметінен.
Құрылтай спикері Айбек Дәдебайдың төрағалығымен өткен Бюро отырысында І шақырылымдағы Құрылтайдың Қоғамдық қабылдауын ашу туралы шешім қабылданды.
Құрылтай Төрағасының орынбасары Динара Закиеваның айтуынша, Қоғамдық қабылдау азаматтармен тікелей қарым-қатынас орнатуға, олардың өтініштері мен ұсыныстарын зер салып қарауға арналған алаң болмақ.
Қоғамдық қабылдауда депутаттардың азаматтарды қабылдауын ұйымдастыру және өткізу қағидалары әзірленді. Депутаттардың қабылдау кестесі барлық фракциялар және комитеттермен келісіліп, Құрылтайдың ресми сайтында орналастырылды.
Құрылтай депутатының қабылдауына Құрылтайдың ресми сайты арқылы электрондық өтініш жолдау, жазбаша немесе қолма-қол өтініш беру, сондай-ақ тікелей ауызша жүгіну арқылы жазылуға болады.
Қабылдау бөлмесінің жұмысын үйлестіру депутаттар Константин Авершинге, Айжан Аймағановаға және Шолпан Кариноваға тапсырылды.
Естеріңізге сала кетсек, Құрылтай жаңа жұмыс регламентін бекіткен болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.