Павлодар облысындағы «Деректерді өңдеу орталықтары алқабының» алғашқы нысаны 2027 жылғы маусымда іске қосылады
«Деректерді өңдеу орталықтары алқабы» жасанды интеллект пен бұлтты сервистерді дамытудың инфрақұрылымдық негізіне айналуға тиіс
Павлодар облысында қуаты 50 МВт болатын «Деректерді өңдеу орталықтары алқабының» (Data Center Valley) алғашқы нысанын 2027 жылғы маусымда іске қосу жоспарланып отыр. Жобаның жүзеге асырылу барысы Премьер-министр Олжас Бектеновтің төрағалығымен өткен Үкіметтегі кеңесте талқыланды.
Қазір құрылыс жұмыстары белсенді кезеңде. Энергетикалық орталықтар мен AI-фабрикалар ғимараттарына арналған қазаншұңқырларды қазу жұмыстары 90%-ға орындалып, іргетас қалау басталды.
2026 жылғы желтоқсанның соңына дейін деректер орталығы мен энергия блоктарының негізгі корпустарын, әкімшілік-тұрмыстық кешенді, бақылау-өткізу пункттерін және сыртқы инженерлік желілердің бір бөлігін салу жоспарланған. Іске қосу-баптау жұмыстары 2027 жылғы мамырда аяқталуға тиіс.
Жобаны электр энергиясымен қамтамасыз ету үшін қуаты 215 МВт қосалқы станция сатып алынды. Сондай-ақ сумен жабдықтау желілерінің жобасы әзірленіп, телекоммуникациялық инфрақұрылым жобаланып жатыр. Болашақта Data Center Valley жалпы қуатын кезең-кезеңімен 1 ГВт-қа дейін арттыру жоспарланып отыр.
Firebird AI және NVIDIA компанияларымен бірлесіп, Data Center Valley базасында жасанды интеллектіні, бұлтты технологиялар мен цифрлық сервистерді дамытуға арналған экожүйе құрылып жатыр. Сонымен қатар қосымша IT-қуаттар құру, инвесторлар мен негізгі клиенттерді тарту, жоғары өнімді есептеу кластерлерін орналастыру және бұлтты сервистерді дамыту мәселелері бойынша шетелдік компаниялармен келіссөздер жүргізілуде.
«Біздің бірінші кезектегі міндетіміз — алғашқы нысанның құрылысын 2027 жылғы маусымда аяқтау. Сонымен қатар клиенттер тарапынан расталған сұранысты ескере отырып, кампустың қуатын дәйекті түрде арттыруға мүмкіндік беретін инженерлік негіз құрып жатырмыз», — деді «Қазақтелеком» АҚ басқарма төрағасы Бағдат Мусин.
Кеңесте Cloud First Policy (Data Embassy) жобасын дайындау мәселесі де қаралды. Ол шет мемлекеттердің деректерін толық құқықтық егемендігін сақтай отырып, Қазақстан аумағында орналастыру мүмкіндігін қарастырады.
Олжас Бектенов «Деректерді өңдеу орталықтары алқабы» жасанды интеллект пен бұлтты сервистерді дамытудың инфрақұрылымдық негізіне айналып, Қазақстанның Орталық Азиядағы өңірлік AI-хаб ретіндегі ұстанымын нығайтуға тиіс екенін атап өтті.
Кеңес қорытындысы бойынша Премьер-министр құрылыс жұмыстарын уақтылы орындауды қамтамасыз етуді және жаңа серіктестер тарту үшін шетелдік технологиялық компаниялармен өзара іс-қимылды кеңейтуді тапсырды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Шыңғыс Әрінов Алматы облысының әкімі болып тағайындалды
Шыңғыс Әрінов Алматы облысының әкімі болып тағайындалды, деп хабарлайды Ақорда.
"Мемлекет басшысының Жарлығымен Шыңғыс Сайранұлы Әрінов Алматы облысының әкімі лауазымына тағайындалды", - деп айтылған хабарламада.
Естеріңізге сала кетсек, Шыңғыс Әрінов 2024 жылдың ақпан айынан 2026 жылдың қыркүйегіне дейін Төтенше жағдайлар министрі қызметін атқарды. Бұған дейін ҚР Мемлекеттік күзет қызметі бастығының орынбасары - ҚР Президенті Күзет қызметінің бастығы болған.
Бүгін Марат Сұлтанғазиев Алматы облысының әкімі қызметінен босатылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Сұлтанғазиев Алматы облысының әкімі қызметінен босатылды
Сурет: Үкімет
Қазақстан Президенті Қасым-Жомарт Тоқаев Марат Сұлтанғазиевті Алматы облысының әкімі қызметінен босатты, деп хабарлайды Ақорда.
"Мемлекет басшысының Жарлығымен Марат Елеусізұлы Сұлтанғазиев Алматы облысының әкімі лауазымынан босатылды", - деп айтылған хабарламада.
Сұлтанғазиев аймақты 2022 жылдың 11 маусымынан бері басқарып келген.
Бүгін, 4 қыркүйекте Қонаев қаласында Алматы облысының жаңа әкімі лауазымына кандидатураны келісу үшін мәслихат депутаттарының жиналысы өтеді деп жоспарланған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев еліміздің СІМ жаңа басшысына негізгі міндеттерді айқындап берді
Сурет: Ақорда
Қазақстан президенті Қасым-Жомарт Тоқаев жаңадан тағайындалған сыртқы істер министрі Мұхтар Тілеубердіні қабылдады, деп хабарлайды Ақорданың баспасөз қызметінен.
Кездесу барысында мемлекет басшысы министрліктің негізгі міндеттерін айқындап, Қазақстанның ұлттық мүдделерін дәйекті түрде ілгерілетуді, теңгерімді сыртқы саясатты нығайтуды және экономикалық дипломатияны дамытуды тапсырды.
Тоқаев көпжақты ынтымақтастықты жандандыруға және шетелдегі Қазақстан азаматтарының құқықтары мен мүдделерін қорғау жөніндегі жұмыстың тиімділігін арттыруға ерекше назар аударды.
Сондай-ақ, мемлекет басшысының қатысуымен өтетін алдағы халықаралық іс-шаралардың кестесі қаралды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Лаос елдерінің СІМ саяси консультациялар туралы меморандумға қол қойды
Сурет: Ақорда
Қазақстан мен Лаос екі елдің сыртқы істер министрліктері арасында саяси консультациялар өткізуді көздейтін өзара түсіністік туралы меморандумға қол қойды, деп хабарлайды Ақорданың баспасөз қызметінен.
Қол қойылған үкіметаралық құжаттармен алмасу рәсімі Қазақстан Президенті Қасым-Жомарт Тоқаев пен Лаос Президенті Тхонглун Сисулиттің қатысуымен өтті.
Сонымен қатар, тараптар Қазақстанның Бас прокуратурасы мен Лаостың Жоғарғы халық прокуратурасы арасында өзара түсіністік туралы меморандуммен де алмасты.
Қазақстанның Жасанды интеллект және цифрлық даму министрлігі мен Лаостың Ғылым және технологиялар министрлігі ақпараттық-коммуникациялық технологиялар және электрондық мемлекеттік қызметтер саласындағы ынтымақтастық туралы меморандумға қол қойды.
Сондай-ақ, Астана мен Вьентьян бауырлас қалалар қарым-қатынасын орнату туралы меморандумға қол қойды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ҚР президентінің Құрылтайдағы өкілдігінің басшысы тағайындалды
Қазақстан Республикасы президентінің Құрылтайдағы өкілдігін Мұрат Қайырбек басқарады, деп хабарлайды Ақорданың баспасөз қызметінен.
"Мемлекет басшысының өкімімен Мұрат Әділғазыұлы Қайырбек Қазақстан Республикасы Президентінің Қазақстан Республикасының Құрылтайындағы Өкілдігінің басшысы лауазымына тағайындалды", - деп айтылған хабарламада.
Естеріңізге сала кетсек, Қазақстанда Үкіметтің жаңа құрамы жасақталып, төрт министрліктің басшысы ауысты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда Үкіметтің жаңа құрамы жасақталды
Қазақстанда Үкіметтің жаңа құрамы жасақталды. Олжас Бектенов премьер-министр қызметіне қайта тағайындалса, төрт министрліктің басшысы ауысты, деп хабарлайды агенттік тілшісі.
Олжас Бектенов 31 тамызда Қазақстанның премьер-министрі болып қайта тағайындалған болатын.
Үкіметтің жаңартылған құрамында төрт ведомствоның басшысы ауысты. Сыртқы істер министрлігін Мұхтар Тілеуберді басқарса, экология және табиғи ресурстар министрі болып Әлібек Қуантыров, мәдениет және ақпарат министрі болып Арман Қырықбаев, төтенше жағдайлар министрі болып Мұрат Мұханов тағайындалды.
Қалған министрліктердің басшылары өз қызметтерінде қалды.
Дәурен Қосанов Қорғаныс министрлігін, Ержан Сәденов Ішкі істер министрлігін, Ерлан Сәрсембаев Әділет министрлігін, Мәди Тәкиев Қаржы министрлігін басқаруды жалғастыратын болады.
Ерлан Ақкенженов энергетика министрі, Айдарбек Сапаров ауыл шаруашылығы министрі, Жұлдыз Сүлейменова оқу-ағарту министрі, Ақмарал Әлназарова денсаулық сақтау министрі қызметтеріне қайта тағайындалды.
Саясат Нұрбек ғылым және жоғары білім министрі, Нұржан Нұржігітов су ресурстары және ирригация министрі, Ербол Мырзабосынов туризм және спорт министрі, Нұрлан Сауранбаев көлік министрі болып өз лауазымдарынды қызмет етуді жалғастыратын болады.
Ал, Асқарбек Ертаев еңбек және халықты әлеуметтік қорғау министрі, Ерсайын Нағаспаев өнеркәсіп және құрылыс министрі, Арман Шаққалиев сауда және интеграция министрі қызметтерінде қалды.
Нұрлыбек Нәлібаев премьер-министрдің бірінші орынбасары болып қайта тағайындалса, Ғалымжан Қойшыбаев премьер-министрдің орынбасары - Үкімет Аппаратының басшысы, Қанат Бозымбаев премьер-министрдің орынбасары лауазымдарында қызмет ететін болады.
Сондай-ақ, Серік Жұманғарин премьер-министрдің орынбасары - ұлттық экономика министрі, Жаслан Мәдиев премьер-министрдің орынбасары - цифрлық даму, инновациялар және аэроғарыш өнеркәсібі министрі қызметтерін атқаруды жалғастырады.
Естеріңізге сала кетсек, 28 тамызда Қазақстан Үкіметі өз өкілеттігін тоқтатқан болатын. Үкімет мүшелері жаңа құрам жасақталғанға дейін өз міндеттерін атқаруды жалғастырды.
Бұған дейін Президент Қасым-Жомарт Тоқаев Үкімет құрамында кадрлық өзгерістер болатынын хабарлап, бұл өзгерістер Үкімет жұмысына жаңа серпін беретіндігін мәлім еткен болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.