Сауда министрлігі Электрондық сауда алаңдарында сатуға тыйым салынған және шектелген тауарлардың тізбесін жариялады
Сурет: gov.kz
Қазақстан Республикасы Сауда және интеграция министрлігі Электрондық сауда алаңдарында орналастыруға және сатуға тыйым салынған және шектелген тауарлардың тізбесін жасақтады, деп хабарлайды министрліктің баспасөз қызметінен.
Тізбе "Сауда қызметін реттеу туралы" Қазақстан Республикасы Заңының талаптарына сәйкес, мүдделі мемлекеттік органдардың өз құзыреті шегінде ұсынған ақпараты негізінде әзірленді. Сондай-ақ, тізбе Қазақстан Республикасының заңнамасымен Қазақстан Республикасының аумағында айналымына тыйым салу немесе шектеу белгіленген, соның ішінде электрондық сауда арқылы сатылатын тауарлар туралы мәліметтерді біріктіреді.
Тізбені орналастыру электрондық сауданың ашықтығын арттыруға бағытталған.
Министрліктің мәлімдеуінше, тізбе электрондық сауда алаңдарының иелеріне, интернет-дүкендерге, сатушыларға және электрондық сауданың басқа да қатысушыларына қолданыстағы шектеулер туралы өзекті ақпаратты жедел алуға және тауарларды орналастыру мен сату кезінде заңнама талаптарын ескеруге мүмкіндік береді.
Осылайша, бұл тізбенің болуы электрондық сауда алаңдарына тауар карточкаларын модерациялау кезінде бірыңғай тәсілдерді қолдануға, ал сатушыларға өз өнімдерін өткізу мүмкіндігін алдын ала бағалауға жағдай жасайды.
Бірыңғай тізбемен Қазақстан Республикасы Сауда және интеграция министрлігінің ресми интернет-ресурсындағы электрондық сауда мәселелеріне арналған бөлімнен танысуға болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ІІМ WhatsApp аккаунттарына алаяқтардың шабуылы туралы ескерту жасады
Сурет: Depositphotos
Жеке деректерді қорғау мақсатында Ішкі істер министрлігі WhatsApp мессенджеріндегі аккаунттарға рұқсатсыз қол жеткізу фактілері туралы ескертеді, - деп хабарлайды Polisia.kz.
ІІМ аккаунтыңыздың қауіпсіздігін күшейту үшін екі сатылы тексеруді қосуды ұсынады. Ол үшін WhatsApp қосымшасын ашып, "Баптаулар" бөліміне өтіңіз, "Аккаунт", одан кейін "Екі сатылы тексеру" бөлімін таңдап, "Қосу" батырмасын басыңыз. Алты таңбалы PIN-код орнатып, қолжетімділікті қалпына келтіруге арналған электрондық пошта мекенжайын енгізіңіз. Орнатылған PIN-кодты ешкімге хабарламаңыз.
Сондай-ақ аккаунтыңызға қосылған құрылғыларды тұрақты түрде тексеріп отыру қажет. Ол үшін мәзірді (оң жақ жоғарғы бұрыштағы үш нүкте) ашып, "Байланыстырылған құрылғылар" бөлімін таңдаңыз және қосылған құрылғылар тізімімен танысыңыз. Егер өзіңізге белгісіз құрылғыны байқасаңыз, оны таңдап, "Шығу" пәрменін басу арқылы қолжетімділікті дереу тоқтатыңыз.
Аккаунтыңыздың бұзылғанын білдіретін негізгі белгілер:
- белгісіз құрылғылардың қосылуы;
- сіздің қатысуыңызсыз хабарламалардың жіберілуі;
- таныстарыңыздан сіздің атыңыздан күмәнді өтініштердің келіп жатқаны туралы хабарламалар;
- өзіңіз сұратпаған растау кодтарының SMS арқылы келуі;
- сондай-ақ аккаунттан өздігінен шығып кету жатады.
ІІМ растау кодтарын ешкімге бермеуге кеңес береді.
"Егер күмәнді сілтемелерге өтпеңіз және бейтаныс адамдардың нұсқауымен бөгде қосымшаларды орнатпаңыз. Жеке деректеріңіздің қауіпсіздігіне жауапкершілікпен қараңыз. Аккаунтыңыздың бұзылу белгілері анықталған жағдайда, оны қорғау бойынша шұғыл шаралар қабылдап, құқық қорғау органдарына жүгініңіз. WhatsApp мессенджерінде рұқсатсыз белсенділік анықталған жағдайда "Байланыстырылған құрылғылар" бөліміндегі барлық белсенді сеанстарды дереу аяқтап, екі сатылы тексерудің PIN-кодын өзгертіңіз және аккаунтыңыздың бұзылуы мүмкін екендігі туралы байланыстағы адамдарды хабардар етіңіз",- деп ескертеді күш құрылымдары.
Сонымен қатар, Ішкі істер министрлігі егер танысыңыздан шұғыл түрде ақша аударуды сұраған хабарлама келсе, міндетті түрде оған телефон арқылы немесе басқа байланыс құралы арқылы хабарласып, хабарламаны шынымен сол адамның өзі жібергеніне көз жеткізге кеңес береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бақыт Есімова Президенті әкімшілігінің бөлімінің меңгерушісі лауазымына тағайындалды
Бақыт Амангелдіқызы Есімова Қазақстан Республикасы Президенті Әкімшілігінің Өтініштерді қарауды бақылау бөлімінің меңгерушісі лауазымына тағайындалды.
Президент тиісті өкімге қол қойды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда шекарадан жүк көліктерін өткізуге қойылатын бақылау күшейтіледі
Сурет: Depositphotos
Қазақстанда мемлекеттік шекарадағы автомобиль өткізу пункттерінен жүк көліктерінің өтуіне қойылатын бақылау күшейтіледі. Бұл мәселе Премьер-министрдің бірінші орынбасары Нұрлыбек Нәлібаевтың төрағалығымен өткен Үкіметтегі жедел кеңесте талқыланды.
Кеңес барысында "Әлімбет", "Жайсаң" және "Сырым" өткізу пункттеріндегі жағдай қаралды.
"Қазақстанның өткізу пункттері штаттық режимде тәулік бойы жұмыс істеп тұр",- деп мәлім етті ҰҚК Шекара қызметінен.
Маусымдық кезеңде транзиттік тасымалдардың өсуіне байланысты билік автомобиль өткізу пункттерін жаңғыртуға бақылауды күшейтті. Бұл өз кезегінде бақылау рәсімдерінен өту уақытын қысқартуға мүмкіндік береді.
Сонымен қатар, басым өткізу пункттерінің маңында жүргізушілерге арналған сервистік күту аймақтары салынады және де бұл жұмыстарды 2027 жылы аяқтау жоспарланып отыр.
Кеңес қорытындысы бойынша Көлік министрлігі мен басқа да тиісті мемлекеттік органдарға автокөліктердің үздіксіз әрі жедел өткізілуін қамтамасыз ету тапсырылды. Осы мақсатта жергілікті атқарушы органдармен бірлескен жедел штабтар құрылды.
Жағдай Үкіметтің бақылауында.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев отандастарымызды Абай күнімен құттықтады
Сурет: Ақорда
Президент Қасым-Жомарт Тоқаев отандастарымызды Абай күнімен құттықтады, деп хабарлайды Ақорданың баспасөз қызметі.
"Ұлы ойшылдың шығармашылық әрі зияткерлік мұрасы әлемдік және ұлттық мәдениеттің асыл қазынасы қатарынан айрықша орын алады. Абай ілімі - рухани шамшырағымыз, айнымас темірқазығымыз. Ақын жұртшылықты толғандыратын көкейкесті мәселелерді бүкпесіз айтып, халқымызды бейқамдық пен жалқаулықтан аулақ болуға шақырды", - деді президент.
Мемлекет басшысы Абайдың адамды үнемі өзімен жұмыс істеуге, рухани өсуге және өзін-өзі жетілдіруге үндейтін кемел тұлға тұжырымдамасы - "Толық адам" идеясы туралы еске салды.
Президент биыл Қазақстан Абай күнін мемлекет пен қоғамдағы ауқымды өзгерістер аясында атап өтіп отырғанын айтты.
"Қазақстанның Халық Конституциясы заңды күшіне еніп, биліктің барлық институттарын түбегейлі жаңғырту үдерісі басталды. Бұл - шын мәнінде, ұзақ мерзімге арналған даму бағдарымызды айқындайтын ерекше кезең", - делінген құттықтауда.
Тоқаев сондай-ақ тамыз айында еліміздің тарихында алғаш рет Құрылтай сайлауы өтетінін еске салды. Оның пікірінше, бір палаталы Парламент реформаларға жаңа сапа береді.
"Бұл өзгерістердің түпкі мәні - жасампаздық құндылықтарын азаматтардың санасына сіңіріп, Қазақстанның тың қарқынмен дамуына жол ашу. Біз қоғамда жаңа этиканы қалыптастыру, ұлттық бірегейлікті нығайту және гуманистік идеалдарды дәріптеу барысында әрдайым Абайға жүгінеміз. Ұлы ақын халықтың болашағы үшін білімпаздық, еңбекқорлық, жауапкершілік сынды қасиеттер өте маңызды екенін ұғындырды, көрегендік танытып, жұртты бірлік пен келісімді сақтауға шақырды", - деді мемлекет басшысы.
Тоқаев "Қара сөздерді" қазіргі Қазақстан құндылықтарының қайнар көзі деп атады. Оның айтуынша, "Адал азамат", "Таза Қазақстан", "Заң және тәртіп" идеялары Абай армандаған үйлесімді қоғамның негізін құрайды.
"Енді біз Әділетті, Озық әрі Қуатты Қазақстанды құрып жатырмыз", - деп атап өтті Президент.
Сөз соңында Тоқаев қазақстандықтарға зор денсаулық, бақ-береке және жаңа жетістіктер тіледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Қытай Алматыдағы жер сілкіністерін бірлесіп зерттеуге кірісті
Сурет: ЖИ
Алматыда болашақ Қазақстан-Қытай бірлескен жер сілкіністерін зерттеу орталығы ғимаратының ашылу рәсімі өтті, деп хабарлайды ҚР Төтенше жағдайлар министрлігінің баспасөз қызметінен.
Ғимараттың ашылуы сейсмикалық қауіпсіздік саласындағы Қазақстан мен Қытай арасындағы ынтымақтастықты дамытудың маңызды кезеңіне айналды. Қазақстан тарапы болашақ бірлескен орталықтың жұмыс істеуі үшін қажетті инфрақұрылымды құрды. Екіжақты ғылыми өзара іс-қимылды жүйелі түрде дамыту мақсатында Қазақстан-Қытай бірлескен жер сілкіністерін зерттеу орталығын құру туралы үкіметаралық келісімге қол қойылғанға дейін Ұлттық сейсмологиялық бақылаулар мен зерттеулер ғылыми орталығының құрылымында үш мамандандырылған зертхананы қамтитын Жер сілкіністерін зерттеу орталығы құрылды.
Аталған зертханалардың функционалдық бағыты болашақ бірлескен орталықтың жоспарланған жұмыс моделіне сәйкес келеді. Бұл қазіргі кезеңнің өзінде бірлескен ғылыми зерттеулерді бастауға мүмкіндік береді. Осы мақсатта Қазақстан мен Қытайдың ғылыми ұйымдары Қазақстан Республикасы Төтенше жағдайлар министрлігінің "Ұлттық сейсмологиялық бақылаулар мен зерттеулер ғылыми орталығы" ЖШС мен ҚХР Жер сілкіністері жөніндегі әкімшілігінің Геофизика институты арасында геофизика және сейсмология саласындағы ғылыми-техникалық ынтымақтастық туралы өзара түсіністік туралы меморандумға қол қойды.
Іс-шараға төтенше жағдайлар министрі, генерал-лейтенант Шыңғыс Әрінов, Алматы қаласының әкімі Дархан Сатыбалды, Қытай Халық Республикасының Алматыдағы Бас консулы Су Фанцю, ҚХР Жер сілкіністері жөніндегі әкімшілігінің Геофизика институтының өкілдері, мемлекеттік органдардың, ғылыми қоғамдастықтың өкілдері және шақырылған қонақтар қатысты.
Бірлескен жобаны іске асыру Қазақстан мен Қытай арасындағы ғылыми өзара іс-қимылдың жаңа кезеңіне жол ашады. Зерттеу нәтижелері сейсмикалық белсенділікті мониторингілеу мен болжаудың заманауи әдістерін дамытуға, сондай-ақ екі елдің сейсмикалық қауіпсіздік деңгейін арттыруға елеулі үлес қосады деп күтілуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев: Солтүстік Қазақстан - еліміздің астықты аймағының бірі саналады
Қазіргі таңда Солтүстік Қазақстан еліміздің астықты аймағының бірі саналады. Бұл туралы Қазақстан президенті Қасым-Жомарт Тоқаев өңірдің 90 жылдығына арналған салтанатты іс-шараға қатысушыларды құттықтауында мәлім етті, деп хабарлайды Ақорда.
"Аймақта ауыл шаруашылығымен қатар өңдеу өнеркәсібі, машина жасау салалары қарқынды дамып келеді. Инвестициялық жобалар қолға алынып, өндіріс орындары іске қосылды. Мұның бәрі халықтың тұрмысын жақсартып, өңірдің одан әрі өркендеуіне ықпал ететіні анық", - деп атап өтті мемлекет басшысы.
Оның айтуынша, Солтүстік Қазақстан облысы - бүкіл әлемге танымал мемлекет және қоғам қайраткерлері, мәдениет пен әдебиет саласының аса көрнекті өкілдері, еңбек ардагерлері, көптеген құрметті тұлғалар, әйгілі спортшылар мен құқық қорғау саласының білікті мамандардың туған жері.
"Ата Заңды қабылдауға аймақ жұртшылығы да белсене қатысып, ауызбіршілік пен жауапкершіліктің озық үлгісін көрсетті. Облыста түрлі этнос өкілдері өзара құрмет пен достық дәстүрін сақтап, тату-тәтті өмір сүріп жатыр. Берекелі өңір барлық жетістікке азаматтардың жасампаздық қуатының арқасында қол жеткізіп келеді. Сіздер алдағы уақытта да ел игілігін еселеуге атсалыса бересіздер деп сенемін", - деді президент.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.