Тоқаев Қазақстан мәдениетін шетелде насихаттаудың маңыздылығын атап өтті
Президент қоғамдық келісімді нығайту бағытындағы жүйелі жұмысты жалғастыруды тапсырды
Қазақстан президенті Қасым-Жомарт Тоқаев Мәдениет және ақпарат министрі Арман Қырықбаевпен кездесу барысында отандық мәдениеттің халықаралық аренадағы орнын кеңейтудің маңыздылығын атап өтті, деп хабарлайды Ақорданың баспасөз қызметінен.
Сондай-ақ, мәдениет пен креативті индустрияны одан әрі дамытуды, тарихи-мәдени мұраны сақтап, кеңінен насихаттау жұмыстарын күшейтуді тапсырды.
"Мемлекеттік ақпараттық саясат мәселелеріне ерекше назар аударылды. Президент отандық ақпарат кеңістігін жандандыруға, соның ішінде заң жобалау жұмысын заманауи цифрлық тәуекелдерді ескере отырып жетілдіруге күш салу қажет деп санайды", - деп айтылған хабарламада.
Сонымен қатар, мемлекет басшысы қоғамдық келісімді нығайту жұмыстарын дәйекті түрде жалғастыру, жастардың жасампаз әлеуетін жүзеге асыруына жағдай жасау жөнінде міндет жүктеді.
Естеріңізге сала кетсек, кеше Арман Қырықбаев ҚР мәдениет және ақпарат министрі қызметіне тағайындалған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.