Астанада жылжымайтын мүлікті сатуға қатысты алаяқтық ісі бойынша айыпталушылар сотталды
Сурет: ЖИ
Астананың қылмыстық істер жөніндегі ауданаралық соты жылжымайтын мүлікті сату кезіндегі алаяқтық пен ысырап ету ісі бойынша төрт адамды 8 және 9 жылға бас бостандығынан айырды, деп хабарлайды соттың баспасөз қызметінен.
Сот мәліметінше, сотталушылар пәтерлерді, тұрғын емес үй-жайлар мен автотұрақ орындарын сатамыз деген желеумен азаматтардан қолма-қол ақша алған және қаражатты жеке шоттарына аудартқан. Барлығы 51 жәбірленушіге 3 млрд теңгеден астам залал келтірілген.
Сонымен қатар, сот сотталушылардың жалған сатып алу-сату шарттары арқылы ЖШС қаражатын жымқырғанын анықтады. Клиенттерден алынған 3 млрд теңгеден астам қаражат компанияның есепшотына түспеген. Соның салдарынан ЖШС-ге де аса ірі көлемде залал келтірілген.
Сотталушыларға аса ірі көлемдегі алаяқтықты ұйымдастыру және оған көмектесу, сеніп тапсырылған мүлікті ысырап ету, сондай-ақ ақпаратты жасырын алуға арналған арнайы техникалық құралдарды заңсыз сатып алу және пайдалану сияқты айыптар тағылды.
Сот мәліметіне сүйенсек, олардың кінәсі жәбірленушілер мен куәгерлердің айғақтарымен, мамандардың қорытындыларымен, жасырын тергеу әрекеттерінің материалдарымен, заттай дәлелдемелермен және істің басқа да материалдарымен дәлелденді.
Прокурор заңға сәйкес жаза тағайындауды сұрады. Залалы өтелмеген жәбірленушілер қатаң жаза тағайындауды талап етті. Сотталушылар кінәсін мойындамай, қорғаушыларымен бірге өздерін ақтауды сұрады.
Сот істің фигуранттарын 8 және 9 жылға бас бостандығынан айырып, оларға 10 жыл бойы жылжымайтын мүлікті сатуға байланысты қызметпен айналысуға тыйым салды. Үкім заңды күшіне енген жоқ.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Түркістан облысында ауыл шаруашылығына бөлінген 103 млн теңге көлеміндегі субсидияның қолды болғаны анықталды
Сурет: Depositphotos
Қаржылық мониторинг агенттігінің Түркістан облысы бойынша департаменті 103 млн теңге көлеміндегі мемлекеттік субсидияны жымқырды деген күдікке ілінген қылмыстық топқа қатысты тергеуді аяқтады, деп хабарлайды ҚМА баспасөз қызметінен.
Тергеу нұсқасы бойынша, қылмыстық схеманы жүзеге асыру үшін үшінші тұлғалардың атына ресми түрде тіркелген төрт жеке кәсіпкерлік пен екі ЖШС пайдаланылған. Іс жүзінде кәсіпкерлік нысандарын күдіктілер өздеріне берілген электрондық цифрлық қолтаңбалар, мөрлер және банк шоттарын басқаруға құқық беретін нотариалды сенімхаттар арқылы іс жүзінде бақылауда ұстаған.
ҚМА мәліметінше, ақпараттық жүйелерге ауыл шаруашылығы жануарларын сатып алу мен олардың қолда бары, сондай-ақ асылдандыру жұмыстарының жүргізілгені туралы көрінеу жалған мәліметтер енгізілген. Кейін осы мәліметтердің негізінде субсидия алуға электрондық өтінімдер берілген
Бюджеттен алынған қаражат қолма-қол ақшаға айналдырылып, схемаға қатысушылар арасында бөлінген және жеке мақсаттарына жұмсалған.
Келтірілген залалдың жалпы сомасы 103 млн теңгені құрады.
Сот санкциясымен күдіктілерге тиесілі екі тұрғын үйге, төрт автокөлікке, автотұрақ орнына және жер теліміне тыйым салынды.
Күдіктілердің бірі қамауда, екіншісі кепілмен босатылған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Елімізде дінді желеу еткен 64 қылмыскер ұсталды
Сурет: Polisia.kz
Жыл басынан бері Қазақстанда діни-экстремистік идеяларды желеу етіп әрекет еткен 22 қылмыстық топтың қызметі тоқтатылып, 64 адам ұсталды, деп хабарлайды Polisia.kz.
ІІМ мәліметінше, олар бопсалаумен, алаяқтықпен, тонаумен айналысқан, браконьерлікпен және есірткі өткізумен шұғылданған. Сондай-ақ, қылмыстық әрекеттер жасау үшін атыс қаруын сақтаған.
Мұндай топтар Алматы қаласында, Ақтөбе, Атырау, Жамбыл, Маңғыстау және Батыс Қазақстан облыстарында әрекет еткен.
Атап айтқанда, Мәселен, Алматыда радикалды діни идеяларды ұстанған төрт адам қала тұрғынынан 7,5 млн теңгені ұрлап кеткен. Кінәлілер сот үкімімен 5 жылдан 6 жылға дейінгі мерзімге бас бостандығынан айырылды.
Петропавлда радикалды діни идеологияны ұстанушы әйел жасаған алаяқтықтың төрт эпизоды ашылды. Келтірілген залалдың жалпы сомасы 2 млн теңгеден асты. Әйел 3 жылға бас бостандығынан айырылды.
Павлодарда радикалды діни көзқарастарды ұстанатын жергілікті тұрғын алаяқтықтың 17 эпизодын жасаған. Келтірілген залал 8 млн теңгеден асты. Сот оған 5 жыл бас бостандығынан айыру жазасын тағайындады.
Жалпы, ішкі істер органдары діни экстремизм идеяларын ұстанушылар жасаған пайдакүнемдік-зорлық сипатындағы 155 қылмыстың бетін ашты. Заңсыз айналымнан 114 атыс қаруы, 3 суық қару, 7 граната, 1600-ден астам оқ-дәрі және 32 келіден астам есірткі тәркіленді.
Сонымен қатар полиция экстремистік және террористік қылмыстарды, оның ішінде интернетте радикалды идеологияны таратуды анықтап, жолын кесуде. Ақтөбеде қала тұрғыны әлеуметтік желілерде өзге дін өкілдерін қорлау арқылы діни араздықты жария түрде қоздырған. Ол 3 жыл 6 айға бас бостандығынан айырылды. Ақтөбедегі тағы бір жағдайда зорлық-зомбылық акцияларын жоспарлаған радикалды көзқарастағы жас жігіт ұсталды. Терроризмді насихаттағаны үшін сот оған 6 жыл бас бостандығынан айыру жазасын тағайындады.
Түркістан облысында радикалды діни идеологияны ұстанушы ұсталды. Ол интернетте халықаралық террористік ұйым - "Өзбекстан ислам қозғалысының" идеяларын белсенді түрде таратқан. Ол 7 жылға бас бостандығынан айырылды. Діни сенімдер қылмысты, зорлық-зомбылықты және араздықты қоздыруды ақтау үшін негіз бола алмайды.
Естеріңізге сала кетсек, "Қарасора" операциясының үш айында 21 тоннадан астам есірткі тәркіленген болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
The Finiko қаржы пирамидасын ұйымдастырушы Қазақстанға қайтарылды
Сурет: Depositphotos
ҚМА-ның Алматы қаласы бойынша департаменті прокуратура органдарының үйлестіруімен Интерполдың Ұлттық орталық бюросымен бірлесіп, 2022 жылдан бері халықаралық іздеуде жүрген "The Finiko" құрылымдық бөлімшесінің басшысын Түркиядан елге қайтарды, деп хабарлайды Қаржылық мониторинг агенттігінен.
ҚМА мәліметінше, тергеу барысында "The Finiko" ешқандай нақты кәсіпкерлік немесе инвестициялық қызмет жүргізбегені анықталды. Бұрын тартылған қатысушыларға төлемдер жаңа салымшылардан түскен қаражат есебінен жасалған. Осы тәсіл табыс түсіп жатқандай көрініс туғызып, азаматтардың қаражатын одан әрі тартуға мүмкіндік берген.
"Күдіктінің заңсыз әрекеті салдарынан қаржы пирамидасына салымшылардың 160 млн теңгеден астам қаражаты тартылған", - деп атап өтті баспасөз қызметінен.
Сонымен қатар, сотқа дейінгі тәркілеу аясында күдіктіге тиесілі құны 221 млн теңге болатын жер телімі мемлекет кірісіне алынды.
Бұған дейін осы қылмыстық іс бойынша үш адам мүлкі тәркіленіп, 6 жылға дейін бас бостандығынан айырылған.
Тергеу жалғасып жатыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бағанашылдағы балалар үйіне қатысты даудан кейін полицейлер жазаланды - ІІМ олардың есімдерін жарияламады Эксклюзив КТ
Сурет: Әлеуметтік желілердегі бейнежазбадан скриншот
Бағанашылдағы балалар үйінің тәрбиеленушілерін мәжбүрлеп көшіру әрекетінен кейін жүргізілген қызметтік тергеу қорытындысы бойынша Алматы полициясының бірқатар қызметкері тәртіптік жауапкершілікке тартылған. Бұл туралы Ішкі істер министрлігі Kazakhstan Today агенттігінің жолдаған сауалына берген жауабында мәлім етті.
"Сауалда көрсетілген дерек бойынша қызметтік тергеу жүргізіліп, оның қорытындысы бойынша Алматы қаласы Полиция департаментінің бірқатар қызметкеріне тәртіптік жауапкершілік шаралары қолданылды", - деп хабарлады министрліктен.
Бұл ретте ІІМ тәртіптік жауапкершілікке тартылған қызметкерлердің нақты аты-жөні мен лауазымдары аталмады. Сондай-ақ, ведомство балалар үйінің тәрбиеленушілерін мәжбүрлеп көшіру шараларына полиция қызметкерлерін тарту туралы тапсырманы кім бергенін де нақтыламады.
Естеріңізге сала кетсек, 2025 жылы Бағанашылдағы балалар үйінің тәрбиеленушілерін мәжбүрлеп көшіруге қатысты жағдай қоғамда үлкен резонанс тудырған болатын.
21 шілдеде қоғам қайраткері Аружан Саин №1 балалар үйіндегі жетім балаларды мәжбүрлеп көшіру сәті түсірілген видеоны жариялады.
Сол күні Қазақстан Президенті балалар үйінің тәрбиеленушілерін Алматыдан Қонаевқа көшіруді тоқтатуды тапсырып, бұл жағдайға байланысты қызметтік тергеу тағайындалған болатын.
Даудан кейін Алматы облысы әкімінің орынбасары Болат Күренбеков, білім басқармасының басшысы Салтанат Беспаева және ішкі саясат басқармасының басшысы Ерік Әбітов қызметтерінен босатылған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.