Науқастардан МӘМС есебінен жасалған ота үшін қаражат қайта алынған
Сурет: unsplash.com
Қазақстан Республикасының Қаржылық мониторинг агенттігі Атырау облысындағы дәрігерге қатысты алаяқтық және заңсыз материалдық сыйақы алу фактілері бойынша алаяқтық схеманы әшкереледі, деп хабарлады агенттіктің баспасөз қызметінен.
"Күдікті 2023-2025 жылдар аралығында "Family Health Clinic" ЖШС мен "Ким В." ЖК клиникасында жұмыс істей отырып, пациенттерден варикоз ауруына жасалатын операциялардың МӘМС шеңберінде тегін жүргізілетіні туралы ақпаратты жасырған және көрсетілген қызметтер үшін төлемді өзінің банктік шоттарына қабылдап отырған",- деп айтылған хабарламада.
Сонымен қатар, "DamuMed" жүйесіне пациенттерге тегін медициналық көмек көрсетілгені туралы мәліметтер енгізіліп, соның негізінде медициналық ұйымдар Әлеуметтік медициналық сақтандыру қорынан қаржыландыру алған.
"Нәтижесінде күдікті 42 пациенттің 8 млн теңгеден астам қаражатын заңсыз иемденген. Ал көрсетілген медициналық қызметтер үшін медициналық ұйымдарға Қор тарапынан 14,8 млн теңгеден астам қаражат аударылған", - деп мәлім етті агенттіктен.
Бұдан бөлек, оның қызметтік міндеттерін орындағаны үшін пациенттерден заңсыз ақшалай сыйақы алған фактілері де анықталды.
"Күдіктіге қатысты елден кетпеу және тиісті мінез-құлық туралы қолхат түріндегі бұлтартпау шарасы қолданылды. Қылмыстық іс сотқа жолданды", - деп қорытындылады баспасөз қызметінен.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Талдықорған маңында құм-қиыршықтас қоспасын заңсыз өндіру фактісі тоқтатылды
Сурет: Polisia.kz
Жетісу облысының күш құрылымдары Балықты өзенінің жағалауында өткізген рейд барысында полицейлер құм-қиыршықтас қоспасын заңсыз өндіру және тиеу фактісін анықтады. Оқиға орнында табиғи материалды заңсыз тиеуге қолданылған трактор мен екі жүк көлігі анықталған, - деп хабарлайды Polisia.kz.
Аталған факт бойынша қажетті материалдар жинақталып, қолданыстағы заңнамаға сәйкес қарау және тиісті шаралар қабылдау үшін Жетісу облысы бойынша экология департаментіне жолданған.
Трактор арнайы тұраққа қойылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қытайдан жеткізілген контрабандалық тауар мемлекетке 2,7 млрд теңгеден астам шығын әкелген
Қазақстанның Бас прокуратурасы экономикалық контрабандамен айналысқан қылмыстық топтың қызметін тоқтатты, деп хабарлайды мекеменің баспасөз қызметінен.
Ведомствоның мәліметінше, қылмыстық топ ұзақ уақыт бойы әрекет еткен.
Тергеу барысында 37 компанияның ішінде ұйымдасқан қылмыстық топқа қатысы бар "Metlink" және "Urban Green" компаниялары бойынша ғана мемлекетке келтірілген залалдың көлемі 2,7 млрд теңгеден асқаны анықталды.
2026 жылғы 5 тамызда аталған іске қатысы бар деген күдікпен Қазақстан Республикасының азаматтары "Ш" және "А" ұсталып, Алматы қаласы Полиция департаментінің уақытша ұстау изоляторына қамалды.
2026 жылғы 7 тамызда тергеу сотының қаулысымен аталған күдіктілерге қатысты күзетпен ұстау түріндегі бұлтартпау шарасы санкцияланды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда жалған мемлекеттік тіркеу нөмірлерін заңсыз сату схемасы анықталды
Алматыда жүйелі түрде жалған мемлекеттік нөмірлерді дайындаумен және сатумен айналысқан заңсыз әрекеттің ұйымдастырушысы ұсталды, деп хабарлайды ҚР Бас прокуратурасының баспасөз қызметінен.
Тергеу мәліметтері бойынша, жалған нөмірлер Ресей Федерациясынан экспресс-жеткізу қызметі арқылы жеткізіліп, кейін Қазақстанның түрлі өңірлеріндегі тапсырыс берушілерге жіберіліп отырған.
"Жедел-іздестіру шаралары барысында жалған мемлекеттік тіркеу нөмірлік белгісі және басқа да заттай дәлелдемелер тәркіленді. Қылмысқа қатысы бар басқа да тұлғаларды анықтау бойынша ары қарай тергеу және жедел-іздестіру шаралары жүргізілуде",- деп айтылған хабарламада.
Бас көлік прокуратурасы жалған мемлекеттік тіркеу нөмірлік белгілерін пайдалану қылмыстық жауаптылыққа әкеп соғатынын ескертеді. Мұндай құқық бұзушылықтар жол қозғалысы қауіпсіздігіне тікелей қатер төндіреді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қызылордада алтынды заңсыз өндірумен айналысқан қылмыстық топ ұсталды
Қызылорда облысының Шиелі ауданында бағалы металдарды заңсыз өндірумен айналысқан қылмыстық топтың әрекеті тоқтатылды, деп хабарлайды ҚР ҚМА баспасөз қызметінен.
Агенттіктің мәлімдеуінше, Жаманкөл шатқалында күрделі өндірістік өңдеуді қажет етпейтін табиғи алтын өндірілген.
Топ мүшелерінің міндеттері өзара нақты бөлінген: біреулері алтын іздеушілерді тартып, өндіру жұмысын ұйымдастырса, енді біреулері тасымалдау мен сатуға жауапты болған. Тағы бір бөлігі қауіпсіздікті қамтамасыз еткен. Заңсыз әрекетті жасыру үшін аумақтың айналасына бақылаушылар қойылып, мотоцикл мінген адамдар маңайды торуылдаған. Олар бөгде адамдардың немесе мемлекеттік органдар қызметкерлерінің келгенін алдын ала ескертіп отырған", - деп айтылған хабарламада.
Тергеу амалдарына сәйкес, өндірілген алтын сату үшін Алматы қаласына жеткізіліп, одан түскен ақша топ мүшелерінің арасында бөлін отырған.
Тінту жүргізу барысында құрамында алтыны бар 500 грамнан астам шикізат, 2 арнайы техника, 12 металл іздегіш және 6 автокөлік тәркіленді. Сондай-ақ, 2 пневматикалық тапанша мен тегіс ұңғылы мылтық табылды.
Қазір 13 адам қамауға алынды. Тергеу амалдары жүргізілуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.