"Отбасы банкте" тұрғын үй кезегін жылжыту үшін пара алу деректері анықталды
Қылмыстық іс қозғалды
2025 жылы "Отбасы банк" қызметкерлері арасында бірнеше сыбайлас жемқорлық дерегі анықталды. Банк қызметкерлері тұтынушылардың, риелторлардың, жеке сот орындаушылары мен нотариустардың сұрауын қанағаттандыру үшін заңсыз сыйақы алып отырған. Бұл туралы банктің жылдық есебінде айтылған.
Атап айтқанда, қызметкерлер тұрғын үй кезегін жылжытып бергендері үшін белгілі бір көлемде сыйақы алып келген.
Сонымен қатар, бөлімшелердің біріндегі қызметкер тұтынушылардың несие төлеу қабілетін растайтын табыс туралы жалған анықтамалар дайындаған. Кейін бұл құжаттар несиелік өтінімдерге қоса тіркелген.
Заңбұзушылықтарға қатысы бар қызметкерлермен еңбек шарттары бұзылды.
"Отбасы банкі" бұрынғы қызметкерлерін қылмыстық жауапкершілікке тарту жөнінде арыздар да жолдады. Құқық қорғау органдары бірнеше қылмыстық іс бойынша сотқа дейінгі тергеп-тексеру жүргізіп жатыр.
Банк сыбайлас жемқорлық сипатындағы құқық бұзушылықтарының алдын алуға бағытталған кешенді шаралар жүргізіп жатқанын атап өтті.
Естеріңізге сала кетсек, Санжар Жамалов "Отбасы банк" директорлар кеңесінің төрағасы болып тағайындалған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҰҚК 24 қылмыстық топ мүшелерінің әрекетінің жолын кесті
Сурет: ҰҚК
Жыл басынан бері Қазақстанда 24 қылмыстық топ мүшелерінің заңсыз әрекетінің жолын кесті, деп хабарлайды Ұлттық қауіпсіздік комитетінің баспасөз қызметінен.
Операциялар еліміздің бірнеше өңірінде прокуратураның үйлестіруімен ҰҚК мен полицияның бірлесуі арқылы жүргізілді.
Бопсалау, адам ұрлау, қаруды заңсыз сақтау және басқа да ауыр қылмыстарды жасады деген күдікпен 169-дан астам адам ұсталды. Олардың арасында қылмыстық топтардың жетекшілері де бар.
Сондай-ақ, құқық қорғау органдары шекара маңында, өнеркәсіп және қоршаған ортаны қорғау салаларында қылмыстық схемаларды ұйымдастырумен байланысты заңсыз кіріс көздері анықтап, оларды жойды.
Анықталған фактілер бойынша сотқа дейінгі тергеп-тексеру жүргізіліп жатыр.
Қылмыстық-процестік кодекстің 201-бабына сәйкес ҰҚК өзге мәліметтерді жариялаған жоқ.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Жамбыл облысында қоқыстан табылған нәрестенің анасы табылды
Сурет: Depositphotos
Жамбыл облысында полицейлер Қордай ауданындағы қоқыс контейнеріне жаңа туған қыз баланы тастап кеткен 37 жастағы әйелді анықтады, деп хабарлайды КТК телеарнасы.
Нәресте Гвардейский кентіндегі қоқыс контейнерінен табылған болатын. Қыз бала ауруханаға жеткізілді. Дәрігерлердің мәліметінше, оның жағдайы тұрақты, өміріне қауіп төніп тұрған жоқ.
Жамбыл облысы полиция департаментінің ресми өкілі Гүлсара Мұхтарқұлованың айтуынша, әйел бірнеше сағат ішінде табылған.
"Әйел полиция бөліміне жеткізіліп, кінәсін мойындап жауап берді", - деп хабарлады ол.
Полиция қылмыстық іс қозғады. Қолда бар ақпаратқа сәйкес, әйелге шамамен 430 мың теңге айыппұл салынуы немесе ол 45 тәулікке дейін қамауға алынуы мүмкін.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан шекарасы арқылы есірткі, қару-жарақ және 159 тонна жанар-жағармайды заңсыз өткізбек болған
2026 жылғы тамызда қазақстандық шекарашылар мемлекеттік шекара арқылы тауарлар мен жүктерді заңсыз өткізудің 2089 дерегіне тосқауыл қойды, деп хабарлайды ҰҚК Шекара қызметінің баспасөз қызметі.
Атап айтқанда, есірткіні заңсыз өткізудің 30, қару-жарақ пен оқ-дәрілерді өткізудің 68 дерегі анықталды. Бес пневматикалық қару, 130 суық қару және 228 оқ-дәрі тәркіленді.
Сондай-ақ шекарашылар жалпы көлемі 159 тоннадан асатын жанар-жағармай материалдарын заңсыз өткізудің 1061 дерегінің алдын алды.
Бұдан бөлек, құны 1,8 млрд теңгеден асатын халық тұтынатын тауарлар мен 1,5 млрд теңгеден астам валютаны заңсыз тасымалдауға тосқауыл қойылды.
Бір ай ішінде шекара кеңістігінде Қазақстан заңнамасын бұзған 5588 адам ұсталды, оның 4907-сі - шетел азаматтары.
Каспий теңізінің акваториясында шекарашылар браконьерліктің 61 дерегіне тосқауыл қойды. Заңсыз балық аулау құралдары мен бекіре тұқымдас балықтар тәркіленді. Алдын алынған залал көлемі 561 млн теңгеден асты.
Шекара қызметі 63 қылмыстық іс қозғады. Тағы 4886 әкімшілік іс өндірісте жатыр. Олар бойынша 40 млн теңгеден астам айыппұл салынды.
Бұған дейін Қазақстанда терроризм және экстремизм үшін 20-ға жуық адамның сотталғаны хабарланған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ақтөбе облысында күшті әсер ететін заттарды өткізуге тосқауыл қойылды
Сурет: ІІМ бейнежазбасынан скриншот
Ақтөбе облысында күшті әсер ететін заттарды заңсыз өткізумен айналысқан ұйымдасқан қылмыстық топтың қызметіне тосқауыл қойылды, деп хабарлайды Polisia.kz.
ІІМ мәліметінше, Алматы қаласындағы дәріханалардың бірінің фармацевті өзінің заңды қызмет мүмкіндіктерін пайдалана отырып, күшті әсер ететін заттардың ірі көлемдегі партияларын Ақтөбе облысына жеткізуді ұйымдастырғаны анықталды. Жүргізілген жұмыстардың нәтижесінде қылмыстық топтың барлық мүшелері, оның ішінде ұйымдастырушы, оператор, ораушылар және заттарды жасырумен айналысқан күдіктілер ұсталды. Заңсыз айналымнан мыңнан астам дәрілік препарат тәркіленді.
Ведомство 2026 жылғы 1 қаңтардан бастап Қазақстанда күшті әсер ететін заттардың заңсыз айналымы үшін қылмыстық жауапкершілік енгізілгенін еске салды. Бұл қылмыс үшін 15 жылға дейін бас бостандығынан айыру жазасы қарастырылған.
Тамыз айында Алматыда гараждағы есірткі қоймасы жойылып, психотроптық заттар салынған 350-ден астам орама тәркіленді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанға Алматы әуежайы арқылы 30 келіден астам есірткі әкелмек болғандар ұсталды
Сурет: Depositphotos
Биыл тамызда Алматы қаласының әуежайында ҰҚК Шекара қызметі көлік прокуратурасының үйлестіруімен Оңтүстік-Шығыс Азия елдерінен келген рейстерден Қазақстанға аса ірі мөлшерде есірткі заттарын әкелудің үш әрекетінің жолын кесті, деп хабарлайды Ұлттық қауіпсіздік комитетінің баспасөз қызметінен.
ҰҚК мәліметінше, шетелдік азаматтардың жол жүгін тексеру барысында косметикалық өнімдерге жасырылған ыдыстардан "марихуана", "каннабис шайыры" және "гашиш майы" табылды.
Сараптама қорытындысына сәйкес, тәркіленген есірткінің жалпы салмағы 32 килограмнан асты
Үш дерек бойынша материалдар процестік шешім қабылдау үшін құзыретті органдарға жіберілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Жетісуда 19 жастағы күдіктіден ірі көлемде есірткі тәркіленді
Сурет: Polisia.kz
Жетісуда полиция қызметкерлері есірткі сақтады және таратты деген күдікпен 19 жастағы жігітті ұстады. Оның автокөлігінен 400 грамнан астам тыйым салынған зат табылды, деп хабарлайды Polisia.kz.
Daewoo автокөлігі Көксу ауданының Балпық би ауылындағы жанармай құю станцияларының бірінің маңында тоқтатылды. Көлікте көршілес өңірдің 19 жастағы тұрғыны болған.
Тінту барысында полиция қызметкерлері скотчпен оралған пакетті анықтады. Оның ішінен ұнтақ тәрізді зат салынған, әрі қарай таратуға дайындалған болуы мүмкін 310 орама табылды.
Сараптама нәтижесі бойынша 65 грамнан астам мефедрон, 79 грамнан астам α-PVP және шамамен 17 грамм гашиш тәркіленді.
Күдікті ұсталып, қамауға алынды. Сотқа дейінгі тергеу басталды. Полиция есірткінің жеткізілуі мен таратылуының ықтимал арналарын анықтап жатыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Полиция мен мамандандырылған ХҚКО қызметкерлері жүздеген автокөлікті заңсыз тіркеумен айналысқан
Сурет: Depositphotos
Алматы облысында 800-ден астам автокөлікті заңсыз тіркегені үшін 17 адам сотталды. Мемлекет 6,6 млрд теңгеден астам тіркеу және кәдеге жарату алымдарын ала алмаған, деп хабарлайды Қаржылық мониторинг агенттігінің баспасөз қызметінен.
ҚМА мәліметінше, қылмыстық топ екі жыл бойы әрекет еткен. Схемаға қатысушылар автокөліктерді белгіленген талаптарды айналып өтіп, есепке қоюға көмектескен.
Алғашқы кезеңде схемаға қатысушылар техникалық регламент талаптарын бұза отырып Қазақстанға әкелінген 642 жүк көлігін заңсыз тіркеген.
Кейін қылмыстық әрекет жеңіл көліктерге қатысты "қосар көліктерді тірілту" деп аталатын схема бойынша жалғасқан. Заңсыз әкелінген көліктерге Қазақстанда бұрын тіркеліп, кейін есептен шығарылған көліктердің VIN-кодтары берілген. Осы тәсілмен тағы 209 көлік тіркелген.
Заңсыз схемаға полиция қызметкерлері, мамандандырылған ХҚКО қызметкерлері және жеке нотариустар қатысқан. Олар ақпараттық жүйелерге жалған мәлімет енгізуді және жалған тұлғаларға сенімхат рәсімдеуді қамтамасыз еткен.
Төленбеген тіркеу алымының сомасы 5,4 млрд теңгені, утиль алымы 1,2 млрд теңгені құрады. Тергеу барысында көлік иелері алғашқы тіркеу алымдарын өз еркімен төлеп, нәтижесінде мемлекетке 1 млрд теңгеден астам қаражат қайтарылды.
Сонымен қатар, сот үкімімен сотталғандардың қылмыстық табысқа сатып алған бес автокөлігі мемлекет кірісіне тәркіленді.
Бұрынғы төрт полиция қызметкері арнайы атақтарынан айырылды. Қатысы бар нотариустарға сот нотариаттық қызметпен айналысуға тыйым салды.
Сот үкімі заңды күшіне енген жоқ.
Бұған дейін Қазақстанда "Азаматтарға арналған үкімет" мемлекеттік корпорациясының қызметкерлері қатысқан шетелдіктерге ЖСН-ді заңсыз рәсімдеу схемасы әшкереленген болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.