Ипотекалық несиелерді қайта қаржыландыру бағдарламасы бойынша жаңа пайыздық ставкалар банктердің қарыз берген бүкіл мерзіміне жарамды - "Самұрық-Қазына"
Ипотекалық несиелерді қайта қаржыландыру бағдарламасы бойынша жаңа пайыздық ставкалар банктердің қарыз берген бүкіл мерзіміне жарамды - "Самұрық-Қазына"
Астана. 24 сәуір. "Қазақстан Бүгін" - Ипотекалық несиелерді қайта қаржыландыру бағдарламасы бойынша жаңа пайыздық ставкалар банктердің қарыз берген бүкіл мерзіміне жарамды. "Самұрық-Қазына" Ұлттық әл-ауқат қоры банктердің азаматтармен ипотекалық несиелерді қайта қаржыландыру үшін түзетін қосымша келісімдерде пайыздық көрсеткіштерді өзгерту жайлы бөлімді қосуын негізсіз деп есептейді, деп хабарлайды "Қазақстан Бүгін" агенттігінің тілшісі қордың баспасөз қызметіне сілтеме жасап.
Қор мәлімдемесіне сәйкес, "Самұрық-Қазына" Қоры бұл әрекеттердің бұрыс екенін мәлімдейді. Өйткені, жаңа пайыздық ставкалар (9, 11 пайыз) банктердің қарыз берген бүкіл мерзіміне жарамды. Сондықтан, банк ол пайыздық көрсеткіштерді өз қарауына қарай өзгерте алмайды.
Баспасөз қызметінің ақпаратына сәйкес, Қазақстан үкіметінің 2009 жылдың 17-ақпанындағы №179-шы қаулысына сай "Екінші деңгейлі банктердің ипотекалық несиелерді қайта қаржыландырудың кейбір мәселелеріне байланысты" және де 14-сәуірдегі үкімет енгізген өзгерістерге сәйкес, азаматтар өздері алған несиені әлеуметтік несие бойынша 9 пайызбен, жалпы несие бойынша 11 пайызбен қайта қаржыландыруға мүмкіндік алған.
"Түсіп жатқан арыз-шағымдарды сараптай келе, кей банктердің "үш жылдан соң өзіміз біржақты пайыздық көрсеткіштерді арттырамыз" деген шарт қойып жатқанын біліп отырмыз", делоінген хабарламада .
"Самұрық-Қазына" қоры мен банктер арасындағы келісімдерде "егер де банк бөлінген қаржыны дұрыс бағытта пайдаланбаса, қор банктерге салым ретінде салынған ақшаны, қандай да бір бөлігін қайтарып алады" делінген бап бар. Бірақ, үкіметтің тұрақтандыру бағдарламасына сай азаматтардың ипотекалық несиесін қайта қаржыландыру үшін бөлінген қаржыны қор мерзімінен бұрын қайтарып алмайды.
"Ипотекалық несиелерді қайта қаржыландыратын бағдарламаға қатысушы серіктес-банктерді бірігіп атқарып жатқан әлеуметтік маңызды миссиясына барынша жауапкершілікпен қарауға: ипотекалық қарызды қайта қаржыландыруға бөлініп жатқан ақшаны сол мақсатқа жұмсауына, қарыз алушылардың мойнына бүкіл жауапкершілікті артып қоймауға шақырамыз",- деді "Самұрық-Қазына" ҰИҚ басқарушы директоры - басқарма мүшесі Қайрат Ийтекенов.
Ақпаратты пайдаланған жағдайда "Казахстан Сегодня" ақпараттық агенттігіне гиперсілтеме жасау міндетті. «Қазақстан Бүгін» Ақпараттық агенттігінің материалдарына авторлық құқық.
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.