Қазақстан президенті ірі кәсіпорындардың шағын және орта бизнесті қолдау тетіктерін дәйектеуді тапсырды
Қазақстан президенті ірі кәсіпорындардың шағын және орта бизнесті қолдау тетіктерін дәйектеуді тапсырды
Астана. 4 желтоқсан. Kazakhstan Today - Қазақстан президенті Нұрсұлтан Назарбаев ірі кәсіпорындардың шағын және орта бизнесті қолдау тетіктерін дәйектеуді тапсырды. Бұл туралы Елбасы Нұрсұлтан Назарбаев бүгін Шетелдік инвесторлар кеңесінің жалпы мәжілісінің қорытындысы бойынша мәлімдеді, деп хабарлайды Kazakhstan Today.
"Мен үкіметке инвесторлармен бірлесіп, ірі кәсіпорындардың айналасында шағын және орта бизнестің өңдеуші кәсіпорындарын қолдаудың айқын тетіктерін жасауды, оларды тіисті құжаттармен бекітіп, оның орындалуын қатаң қадағалауды тапсырамын. Атқарылған жұмыстардың нәтижесі туралы маған 2010 жылдың бірінші жартысында есеп берілетін болсын", - деді Н. Назарбаев.
Оның айтуынша, осы принциппен "Қазақмыс" корпорациясы жұмыс істеуде, ол "өз кәсіпорнының төңірегінде оның шикізатынан өнімдер шығаратын шағын кәсіпорындар құруда".
Сонымен бірге президент "еліміздің индустриялық-инновациялық серпінді даму бағдарламасының аясында Шетелдік инвесторлар кеңесінің мүшелерімен бірлесе отырып, әртараптандыруға және шикізатты терең өңдеуге бағытталған келешегі бар жобаларды дәйектеуді" тапсырды.
"Осындай әрбір жоба бойынша бірлескен іс-қимылдардың айқын жоспары жасалып, оның нақты мерзімі көрсетіліп, үкіметтен бір адам жауапты болуға тиіс. Үкіметке, Кәрім Мәсімов мырзаның өзіне келесі жылдың бірінші тоқсанында тиісті жұмыстарды жүзеге асыруды, маған шетелдік инвесторлармен бірлесе келісілген жобалардың тізімін бекітуге әкелуді тапсырамын", - деді ол.
Сондай-ақ, мемлекет басшысы Қазақстандық үлесті арттыруға бағытталған жұмыстарды атқаруды тапсырды. "Үкіметке және "Самұрық - Қазына" қорына келесі жылдың бірінші жартысының аяғына дейін Қазақстанда өнеркәсіптің басымдық берілген салаларында жұмыс істейтін шетелдік компаниялармен Қазақстанның ғылыми-зерттеу институттарын тарта отырып, технологиялық ынтымақтастықтың айқын бағдарламасын жасауды тапсырамын", - деді ол.
"Ірі мұнай өндіруші компанияларға осы мәселе бойынша ынтымақтастыққа шақырамын", - деді Н. Назарбаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.