АСТАНА. 21-ақпан. Kazakhstan Today. Қазақстанның Қауіпсіздік кеңесі таяу жылдарға арналған ұлттық қауіпсіздік стратегиясын бекітті. Бұл туралы бүгін президенттің басқаруымен өткен Қауіпсіздік кеңесінің отырысынан кейін өткен брифингте Қауіпсіздік кеңесінің хатшысы Берік Имашев құлағдар етті, деп хабарлайды Kazakhstan Today тілшісі.
"Қауіпсіздік кеңесінің бүгін өткен отырысында таяу жылдарға арналған ұлттық қауіпсіздік стратегиясы қаралып бекітілді",- деді Б.Имашев.
Оның айтуынша, бұл стратегия "мемлекеттік мекемелерді конструктивті әрі қауіпсіз ішкі және сыртқы орта қалыптастыруға бағытталған белсенді әрекеттерге, Қазақстанның Орталық Азия аймағы мен дүниежүзіндегі мүддесін мемлекеттік мекемелер тарапынан ілгерілетудің қолда бар және болашақ мүмкіндіктерін толық пайдалануға бағдар береді".
Б.Имашевтың айтуынша, "стратегия бірқатар принциптерге сәйкес, соның ішінде ұлттық мүддеге басымдық берілетін басты принцип бойынша жүзеге асырылады". "Стратегия шараларын орындау потенциалдық қатерлерді анықтау мен олардың алдын алуға бағытталады",- деді ол. Қауіпсіздік кеңесінің хатшысы стратегияның басты принциптеріне "ғаламдық және аймақтық қауіпсіздік жүйелеріне интеграциялану қажеттігін де" қосты.
"Осы стратегияның негізінде таяу уақыттарда президенттің әскери доктрина туралы, қару-жарақты модернизациялау жүйесі туралы және Қазақстанның арнаулы қызметтерін үйлестіру туралы актілері қабылданады",- деді хатшы. Стратегияның орындалуын үкімет Қауіпсіздік кеңесімен бірлесе бақылайды.
Өз кезегінде еліміздің индустрия және сауда министрі Ғалым Оразбақов стратегияның жобасын талқылау шеңберінде жаңа әскери-техникалық саясатты қалыптастыру мәселесі де көтерілгенін атап өтті. Министрдің айтуынша, онда Қазақстанның армиясы мен басқа да күш құрылымдарының қолындағы әскери техниканы жаңалау жайы қарастырылады. "Қару-жарақ пен әскери техниканы жаңалау, жаңасын сатып алу, бұл процесске еліміздің қорғаныс-өнеркәсіп кешенінің кәсіпорындарын тарту көзделінген",- деді ол. Ғ.Оразбақовтың айтуынша, осы мәселелердің аясында сонымен бірге Қазақстанның Дүниежүзілік сауда ұйымына мүшелікке өтуіне қатысты келіссөздердің барысы да талқыланған.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Қазақстанның Қауіпсіздік кеңесі таяу жылдарға арналған ұлттық қауіпсіздік стратегиясын бекітті
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.