Алматыда Тарақты руының Наурыз мерекесіне арналған кең ауқымды басқосуы өтті
Сурет: Скриншот
2026 жылдың 16 мамыры күні Алматы қаласында Ұлыстың ұлы күні - Наурыз мерекесіне арналған Тарақты руының кең ауқымды басқосуы жоғары деңгейде ұйымдастырылып өтті. Іс-шара Орта жүздің ноқта ағасы атанған Тарақты жұртының елдік бірлігін, рухани тұтастығын және салт-дәстүр сабақтастығын дәріптеуге арналды. Тағылымды жиын Алматы қаласы Тарақты ру басшысы Сурманов Әбіләкім Бекболұлының бастамасымен және ел ағаларының қолдауымен жүзеге асты.
Тарақты - Орта жүз құрамындағы тарихи тамыры терең, елдік дәстүрі мен ауызбіршілігімен танылған іргелі рулардың бірі.
Берекелі жиынға еліміздің әр өңірінен және Алматы қаласында тұратын Тарақты руының өкілдері қатысты. Атап айтқанда, Астана қаласынан еліміздің Тарақты руының басшысы Жұмашев Мұса Қасымханұлы, Түркістан өңірінен ру басшысы Достияров Аманкелді Кенжеәліұлы, Қосмезгіл ауылынан ру басшысы Құдайбергенов Құрманәлі Қасқабекұлы, Жаңаарқа ауданынан Әбдішев Қабдраш Түйтеұлы, сондай-ақ Қарағанды, Қызылорда, Шиелі, Созақ, Тараз, Талдықорған өңірлерінен және еліміздің өзге де аймақтарынан келген қадірлі қонақтар бас қосты.
Мерекелік басқосу таңертең сағат 10:00-де "Тарбағатай" банкет залының ауласында басталып, киіз үй тігіліп, ақ дастарқан жайылды. Қонақтарға дәстүрлі Наурыз көже ұсынылып, көктемнің шуақты күні мерекелік көңіл-күйді айшықтай түсті.
Дәстүр бойынша алғашқы сөз ақсақалдарға беріліп, Ашімхан аға, Есіркеп аға және өзге де ел ағалары ақ баталарын беріп, ел ішіндегі татулық пен ынтымаққа ізгі тілектерін жеткізді.
Одан кейін еліміздің Тарақты руының басшысы Мұса Қасымханұлы сөз алып, ел бірлігі, рухани сабақтастық және ұрпақ тәрбиесі туралы тағылымды ойларымен бөлісті.
Келесі кезекте Алматы қаласы Тарақты ру басшысы Әбіләкім Бекболұлы құттықтау сөз сөйлеп, ел ішіндегі бірлік пен дәстүрді сақтау, сондай-ақ осындай басқосуларды жүйелі түрде жалғастыру қажеттігін атап өтті.
Сөз соңында Тарақты руының өкілі, "Тарбағатай" банкет залының ұйымдастырылуына мұрындық болып, өз мейрамхана алаңын осы игі жиынға ұсынған Әмина апайға сөз берілді. Ол ел ішіндегі ынтымақ пен берекеге ақ тілегін жеткізді.
Мерекелік бағдарлама барысында ұлттық әндер шырқалып, би өнері орын алып, жиынның рухани мазмұны одан әрі тереңдей түсті.
Іс-шараның негізгі бөлігіне қатысушылар бұдан кейін "Тарбағатай" банкет залына өтіп, ақ дастарқан басына жайғасты. Осы сәтте ата-бабалар рухына Құран бағышталып, ел ішіндегі бірлік пен берекеге арналған баталар берілді. Одан әрі ақсақалдар мен ру басшылары ел бірлігі, рухани тәрбие және ұрпақ сабақтастығы жөнінде мазмұнды ойларымен бөлісті.
Мерекелік басқосуда алыстан ат терлетіп келген ақсақалдар мен ел ағаларына ерекше құрмет көрсетілді. Ру басшылары - Мұса Қасымханұлы мен Әбіләкім Бекболұлына ұлттық нақышта тігілген заманауи этно-киім үлгілері мен шапандар жабылып, естелік сый-сияпаттар табысталды. Бұл игі дәстүр үлкендерге деген ілтипат пен құрметті айқын көрсетіп, жиынның ұлттық рухы мен заманауи мәдениет үйлесімін айшықтай түсті.
Мерекелік басқосуды Тараз қаласынан арнайы келген Тарақты руының азаматы, асаба Бегалы Скаков жүргізді. Ол өз жыр-термелері мен авторлық арнауларын орындап, кештің рухани мазмұнын тереңдете түсті.
Кеш соңында Алматы қаласы Тарақты ру басшысы Әбіләкім Бекболұлы қорытынды сөз сөйлеп, мұндай басқосулардың дәстүрлі түрде жалғасатынын және ел бірлігін нығайтуға бағытталған игі бастамалардың алдағы уақытта да жүйелі түрде жүзеге асатынын атап өтті. Сонымен қатар мерекелік жиынның жоғары деңгейде өтуіне Тарақты руының ақсақалдары мен ел азаматтары елеулі үлес қосқанын, ұйымдастыру жұмыстарына атсалысқан Қалданов Қайрат, Ғалымғазы Нұрғазин, Оразалы Исабеков, Қуаныш Исмаилов және өзге де азаматтарға алғыс білдірілді.
Бұл басқосу пандемиядан кейін алғаш рет кең көлемде ұйымдастырылған ірі жиындардың бірі болып, Тарақты жұртының ынтымағы мен тұтастығын айқын көрсетті.
Ағайын қайта қауышып, үлкендер бата беріп, жастар тағылым алды. Мұндай мазмұнды басқосулар ұлттық бірегейлікті нығайтып, рухани байланысты күшейтетін маңызды алаң ретінде өз мәнін айқындай түсті.
Алдағы уақытта да Алматы қаласының Тарақтылары осындай игі жиындарды жалғастырып, салт-дәстүрді ұлықтау бағытындағы жұмыстарды жүйелі түрде дамытуды көздеп отыр.
Береке мен бірлік - ұлттың өзегі. Тамыры терең Тарақты жұрты сияқты, қазақ елі де қашанда ынтымақты ту етіп, бірлік бар жерде береке мәңгі жасайтынын дәлелдеп келеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Балық шаруашылығы комитеті итбалықтардың қырылуына қатысты түсінік берді
Сурет: Depositphotos
Ауыл шаруашылығы министрлігінің Балық шаруашылығы комитеті 19 мамырда Каспий теңізінің жағалауынан табылған өлі итбалықтар туралы ақпаратқа жауап берді, деп хабарлайды Kazinform агенттігі.
2026 жылғы 19 мамырда Каспий теңізі мемлекеттік табиғи резерватының қызметкерлері Жайық-Каспий облысаралық бассейндік балық шаруашылығы инспекциясы және Түпқараған ауданының жергілікті атқарушы органымен бірлесіп, Түпқараған ауданындағы Каспий теңізі жағалауында мониторинг жүргізу барысында жағалауда қатты ыдыраған (2-4 кезең) 35 итбалық өлексесін анықтады.
Айта кету керек, өлі итбалықтардың жағаға шығарылуы батыстан соққан күшті дауылдың салдарынан болып тұрады. Дегенмен, барлық итбалықтардың өлімі бір уақытта болуы мүмкін. Каспий итбалығын зерттеуді жүзеге асыратын ғылыми ұйым (Гидробиология және экология институты) сынамаларды (тіс, жүн және тырнақ) алды. Ал, Маңғыстау облысы бойынша экология департаменті су мен топырақ үлгілерін жинады. Табылған өлекселердің қатты ыдырауына байланысты Ветеринариялық бақылау және қадағалау комитетінің ветеринариялық қызметі жұқпалы ауруларға патологиялық материалдың сынамаларын жинай алмады", - делінген хабарламада.
Каспий теңізінің жағалауына мониторинг жұмыстары әлі жүрып жатыр. Жергілікті атқарушы орган балық инспекциясымен, "Каспий итбалығы" МТР-мне, "Qazaq balyk" республикалық балық шаруашылығы және аквашаруашылығы қауымдастығымен бірлесе отырып, өлекселерді жинап, санитарлық нормаларды сақтай отырып кәдеге жаратты.
Гидробиология және экология институты зерттеушілерінің айтуынша, итбалықтар бір айдан астам уақыт бұрын өлгенімен, жақында ғана батыстан соққан дауыл Маңғыстау облысы Түпқараған ауданының жағалауында жағаға шығып қалған. Сонымен қатар, ғалымдар көп жылдар бойы жүргізілген зерттеулерге сүйене отырып, итбалықтардың өлімі иммундық жүйенің әлсіреуінен және жұқпалы ауруларға бейімділікке әкелетін жалпы қарсылықтан болуы мүмкін деп санайды. Жағалаудағы мониторинг жұмыстары жалғасуда, жағдай тұрақты бақылауда", - делінген хабарламада.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ақтөбеде "Ақтөбе - тарының астанасы" атты ауқымды гастрофестиваль өтеді
30 мамыр күні Ақтөбе қаласы дәм мен дәстүрге толы мереке ортасына айналады. Қаладағы "Астана" саябағында "Ақтөбе - тарының астанасы" атты ауқымды гастрофестиваль өтеді.
Келуші қонақтарды таңғы 11:00-ден бастап ұлттық рух пен хош иіске толы атмосфера күтпек. Күн бойы жалғасатын мереке кешкі 17:00-ге дейін Ақтөбенің аграрлық дәстүрі мен заманауи гастрономиялық мүмкіндігін тоғыстырады. Сонымен қатар, "Әнім сенсің - Ақтөбе" этнофестивалі де мерекенің көркін аша түседі.
Фестиваль алаңында тарыдан әзірленген 50-ден астам тағам түрі ұсынылады. Дәстүрлі ұлттық ас мәзірі жәрмеңкесі, шоколадты жент дайындау шеберлік сағаттары, ыстық бауырсақ пен самаурын шайының хош иісі - бәрі де келген қонаққа ерекше әсер сыйлайды.
Ойыл ауданының шеберлері тарыны өңдеудің көне тәсілдерін көзбен көріп, қолмен сезінуге мүмкіндік береді. Ал қолөнер шеберлерінің бұйымдары - тері, киіз, ағаш, жүн және зергерлік өнердің заманауи үйлесімін көрсететін нағыз мәдени көрме болмақ.
Сондай-ақ, фестиваль аясында "Ақтөбе - тарының астанасы" атты ашық дөңгелек үстел өтеді. Мұнда сала мамандары мен сарапшылар тары өсіру дәстүрін жаңғырту, оның тағамдық құндылығын кеңінен насихаттау және өңірдің аграрлық-гастрономиялық әлеуетін дамыту бағыттарын талқылайды. Кіру тегін.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Астанада LRT қашан іске қосылатыны белгілі болды
Сурет: gov.kz
Елордадағы LRT 16-17 мамыр күндері іске қосылып, жолаушылар тасымалын бастайды. Бұл туралы «City Transportation Systems» ЖШС басқарма төрағасы Асылбек Дүйсебаев мәлімдеді, деп хабарлайды Kazinform агенттігі.
Бастапқы кезеңде жолаушылар ағыны 25-45 мың адам шамасында болады деп болжап отырмыз", – деді Асылбек Дүйсебаев.
Сондай-ақ ол станцияларда коммерциялық нысандар орналастыру қарастырылмағанын айтты. Оның сөзінше, бұл шешім технологиялық және өрт қауіпсіздігі талаптарына байланысты қабылданған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Мемлекеттік кірістер комитеті қазақстандықтарды алаяқтардан сақ болуға шақырды
Сурет: Depositphotos
Соңғы уақытта өзін Мемлекеттік кірістер комитетінің қызметкері ретінде таныстырып, салық төлеушілерге телефон арқылы хабарласатын белгісіз тұлғалардың азаматтарды жаңылыстыру фактілері тіркелуде, деп хабарлайды Қазақстан Республикасы Қаржы министрлігінің Мемлекеттік кірістер комитетінің баспасөз қызметінен.
Алаяқтар қызмет түрін шұғыл түрде растау, тіркеу деректерін жаңарту немесе мобильді қосымша арқылы міндетті растаудан өту қажет екенін айтып, азаматтарды түрлі қосымшаларды жүктеуге, күмәнді сілтемелерге өтуге, авторизациядан өтуге, SMS-кодтарды, ЭЦҚ деректерін немесе өзге де жеке мәліметтерді енгізуге көндіреді.
Мысалы, алаяқтар қызметті "әр екі жыл сайын растау қажет" деген желеумен e-Salyq mobile немесе басқа қосымшаларды жүктеуді талап етіп, орындалмаған жағдайда қызметтің тоқтатылатынын айтуы мүмкін. Бұл ақпарат шындыққа сәйкес келмейді және алаяқтық схема болып табылады.
Мемлекеттік кірістер комитеті мұндай мазмұндағы қоңыраулар шалмайды, сондай-ақ телефон арқылы мобильді қосымшаларды жүктеуді, растау кодтарын, банк картасының деректерін, ЭЦҚ кілттерін, парольдерді беруді немесе бөгде сілтемелерге өтуді талап етпейді.
Азаматтарды сақ болуға шақырамыз:
- белгісіз тұлғалардың телефон арқылы берген нұсқауларын орындамаңыз;
- SMS-кодтарды, парольдерді және ЭЦҚ деректерін ешкімге бермеңіз;
- ақпаратты тек МКК-ның ресми ақпарат көздері арқылы тексеріңіз.
Осындай қоңыраулар түскен жағдайда әңгімені дереу тоқтатуды ұсынамыз.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Huawei Kazakhstan 32%-дық өсімді тіркеп, 2026 жылға арналған технологиялық басымдықтарды белгіледі
Сурет: Huawei
Huawei Technologies Kazakhstan компаниясы компанияның қазіргі және жаңа серіктестерінің басып қосып, дәстүрлі Partner Conference 2026 іс-шарасын өткізді. Қатысушылар іскерлік экожүйені дамыту, салалық басымдықтар және Қазақстан мен Орталық Азияның бірлесіп өсу жолының жаңа мүмкіндіктерін талқылады, деп хабарлайды Huawei.
2025 жылдың қорытындысы бойынша компания жергілікті нарықта тұрақты өсім көрсетті. Қазақстандағы Huawei Technologies компаниясының табысы 32%-ға артты, ал серіктестік сыйақылар мен рибейттердің көлемі 6 миллион АҚШ долларынан асып, алдыңғы жыл көрсеткіштерімен салыстырғанда 50%-ға жоғарылады. Компанияның белсенді серіктестерінің саны да 17%-ға өсіп, 200-ден асты.
Конференцияның басты тақырыбы жасанды интеллект инфрақұрылымы негізгі рөл атқаратын жаңа технологиялық күн тәртібіне көшу болды. Компания Қазақстан мен Орталық Азиядағы ЖИ бағытының дамуын, соның ішінде Ascend 950 чипі негізіндегі шешімдерді таныстырды.
2026 жыл Қазақстан үшін жасанды интеллект жылы болады және біз мұнда ең озық Ascend 950 ЖИ-чипін таныстырдық. ЖИ тиісті инфрақұрылымсыз толыққанды жұмыс істей алмайтынын түсіну маңызды, сондықтан ЖИ мен Atlas платформасының үйлесімі қажетті тиімділікті қамтамасыз етеді. Қазақстандағы біздің артықшылығымыз келесі үйлесімде: біз көптеген жылдар бойы әртүрлі салаларда, сымсыз желілер мен АT бағытында жұмыс істеп келеміз, ал енді бізде ЖИ-чип те бар. Барлық клиенттер мен серіктестер бұл үйлесімді өз кәсіпорындары үшін, Huawei-мен серіктестікте және клиенттердің бизнесі үшін пайдалана алады", - деді Huawei Technologies Kazakhstan компаниясының бас директоры Сун Ясуй.
Huawei-дің ЖИ-ге арналған шешімдерін TikTok, Alibaba және Tencent сияқты ірі технологиялық компаниялар қазірдің өзінде пайдаланып отыр. 2026 жылы Huawei Kazakhstan өңірде бұл бағытты белсенді түрде дамытып, аппараттық инфрақұрылымды бағдарламалық шешімдермен, салалық қосымшалармен және серіктестердің интеграциялық сервистерімен біріктіруді көздейді.
Инновациялар біздің басты басымдығымыз болып қала береді: жаһандық табыстың 126 миллиард долларының 27 миллиарды зерттеулер мен әзірлемелерге бағытталды. Бүгінде қызметкерлеріміздің 55%-ы дәл осы салада жұмыс істейді. Бұл бізге Wi-Fi 7 және деректерді сақтау жүйелері сияқты бағыттарда көшбасшылықты сақтауға мүмкіндік береді. Біздің талшықты-оптикалық жобаларымыздың ауқымы соншалық, олардың жалпы ұзындығы Жер шарын 30 реттен астам айналып шығуға жетеді", - деп атап өтті Huawei Technologies Kazakhstan корпоративтік бизнес бойынша сату директоры Чэнь Вэй.
Серіктестік модельдің практикалық құндылығын қаржы секторындағы Unified Technologies компаниясының кейсі көрсетті. Компания Қазақстандағы филиалдық желісі кең ірі банк үшін іске асырылған жобаны таныстырды. Команда алдында бөлінген банктік инфрақұрылым үшін тұрақты, жоғары өнімді, ауқымдалатын және қорғалған желі құру міндеті тұрды. Жобада Huawei-дің SD-WAN, Campus Network, Data Center Network және Firewall негізіндегі шешімдері пайдаланылды. Нәтижесінде клиент тұрақты желілік инфрақұрылымға қол жеткізіп, шығындарын оңтайландыра алды.
Компания серіктестермен практикалық жұмысты күшейтетінін де атап өтті. Қазірдің өзінде Қазақстанда 300-ден астам бірлескен воркшоп өткізілді және 50-ден астам POC-жоба жүзеге асырылуда. Алдағы уақытта Huawei оқыту бағдарламаларын, демонстрациялық жобаларды, бірлескен маркетингті, техникалық сараптаманы және сатуды қолдау бағдарламаларын дамытуды жоспарлап отыр.
Тұрақты және ұзақ мерзімді ынтымақтастық ережелерді сақтау, адалдық пен ашықтықсыз мүмкін емес. Біздің басымдығымыз - серіктестердің мүдделерін қорғау және әділ орта қалыптастыру. Біз өзара тиімділік пен бизнесті жүргізудің жоғары стандарттарын сақтау ғана Қазақстанның бүкіл цифрлық экожүйесінің тұрақты өсімінің кепілі екеніне сенімдіміз", - деп атап өтті Huawei Technologies Kazakhstan компаниясының бақылау және қадағалау жөніндегі директоры Ли Чэнь.
2026 жылы Huawei Kazakhstan компаниясының коммерциялық бизнесі қаржы секторына, білім беру саласына және IT бағытына ерекше назар аударады. Сонымен қатар компания цифрлық трансформацияға, инфрақұрылымдық шешімдерге және процестердің тиімділігін арттыруға сұраныс өсіп жатқан басқа салалармен де жұмысты жалғастырады.
Конференция қорытындысы бойынша Huawei Technologies Kazakhstan серіктестік экожүйені елдің цифрлық трансформациясының негізгі қозғаушы күштерінің бірі ретінде дамытуды жалғастыратынын растады. Компания серіктестерімен бірге Қазақстан мен Орталық Азия нарығында заманауи АКТ, ЖИ және салалық шешімдерді енгізуді кеңейтуді жоспарлап отыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.