Батыс Қазақстанда 2014 жылы мәдениет саласын дамытуға 4,2 млрд теңге бөлінеді

Алматы. 28 шілде. Kazakhstan today. Батыс Қазақстан облысында биылғы жылы мәдениет саласын дамыту үшін бөлінген қаржы көлемі 4 млрд 203 млн 400 мың теңгені құрап отыр. Бұл өткен жылмен салыстырғанда 13,5%-ға артық.

Халықтың дүниетанымы, рухани байлығы, тыныс-тіршілігі, салт-дәстүрі, шұрайлы тілі, діні - дәл осы "мәдениет" деген асыл ұғыммен астасып жатыр.

Бүгінгі таңда облыс пен Орал қаласының тұрғындарына 403 мемлекеттік көпшілік кітапхана, 277 клуб мекемелері мен 5 автоклуб, 16 музей, 2 драма театр, 5 кинотеатр, 53 киноқондырғы, 4 мәдениет және демалыс саябағы мен 1 көрме залы, 2 қоғамдық - "Старый Уральск" және Ғабдулла Тукайдың мұражайлары мен 3 жекеменшік кинотеатр мәдени қызмет көрсетіп келеді.

2013 жылы мәдениет саласына облыстық бюджеттен 3 млрд 701 млн 573 мың теңге бөлінсе, биылғы жылы бөлінген қаржы көлемі 4 млрд 203 млн 400 мың теңгені құрап отыр. Бұл өткен жылмен салыстырғанда 13,5%-ға артық.

Соңғы жылдары Теректі ауданының Сарыөмір, Казталов ауданының Жаңажол ауылдық клубының ғимараты жаңадан салынып, пайдалануға берілсе, биылғы жылы Қадыр Мырза Илі атындағы шығармашылық орталық, Қаратөбе ауданының Сулыкөл ауылында 200 орындық ауылдық клуб пен кітапхана, Казталовка ауданындағы Бостандық ауылдық клубының ғимараттары жаңадан салынып, пайдалануға беріледі деп жоспарлануда.

Сондай-ақ заман талабына сай типтік үлгідегі Жұбан Молдағалиев атындағы облыстық ғылыми-әмбебап кітапханасы құрылысының жобалық-сметалық құжаттамасы дайындалуда.