Елдегі түрмелерде 40 мың бейнекамера орнатылды
Сурет: polisia.kz
Мемлекет басшысының тапсырмасы бойынша Ішкі істер министрлігі пенитенциарлық мекемелер мен қызметтік кабинеттерде, сондай-ақ құқық қорғау органдарының барлық жедел-тергеу бөлімшелерінде үздіксіз жүргізілетін бейнебақылау жүйесін енгізді, - деп хабарлайды Polisia.kz.
Бейнебақылау жүйесі азаматтардың конституциялық құқықтарын қорғау мен қызметкерлердің іс-әрекеттерінің заңдылығын қамтамасыз ету құралы болып табылады. Өткен жылдың желтоқсан айында барлық полиция бөлімдері мен пенитенциарлық мекемелерде бейнебақылау жүйесін енгізу жұмысы аяқталды.
Қызметтік кабинеттерде, дәліздерде және баспалдақ алаңдарында, сондай-ақ полиция ғимараттарының периметрі бойынша 29 мыңға жуық бейнекамера, 78 пенитенциарлық мекемеде 40 мыңдай бейнекамера орнатылды. Ондағы бейнелер жедел басқару орталықтарына, қылмыстық-атқару жүйесі комитетінің ахуалдық орталығына және прокуратура органдарына шығарылған.
Ақылды жүйенің көмегімен түрмелер мен түзеу мекемелерінде қашып кетпек болудың үш фактісі анықталды, 23 суицидке жол берілмеді, топтық төбелес пен жаппай тәртіпсіздікке айналуы мүмкін тоғыз жанжал тоқтатылды. Жалпы 2023 жылы 15 мыңнан астам бұзушылық анықталды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қылмыстық кодекстен қоғамға қауіп төндірмейтін экономикалық құқық бұзушылықтар туралы баптар алынып тасталады
Қылмыстық кодекстен қоғамға қауіп төндірмейтін экономикалық құқық бұзушылықтар туралы баптар алынып тасталады, деп хабарлайды төменгі палатаның баспасөз қызметінен.
Мәжіліс экономикалық құқық бұзушылықтарды одан әрі қылмыстық сипаттан арылту және заңсыз жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл мәселелері туралы заң жобасы мен Әкімшілік құқық бұзушылық туралы кодекске ілеспе түзетулерді бірінші оқылымда мақұлдады. Түзетулерді депутаттар Мемлекет басшысының 2023 жылғы 1 қыркүйектегі "Әділетті Қазақстанның экономикалық бағдары" атты жолдауы мен экономиканы ырықтандыру шаралары туралы Жарлығын орындау мақсатымен әзірледі.
Қылмыстық кодекстің екі бабы толығымен қылмыссыздандырылады. Ауыр қоғамдық қауіп төндірмейтін экономикалық сипаттағы қылмыстар Әкімшілік құқық бұзушылық туралы кодекске ауыстырылады:
1. Қылмыстық кодекстің 219-бабы - кредитті заңсыз алу немесе бюджеттік кредитті мақсатсыз пайдалану.
Құқық бұзушылықтың элементтері біртекті әрі ұрлық, оның ішінде алаяқтық түрінде болғандықтан, Қылмыстық кодекстің 189 және 190-баптары бойынша қарастырылады. Бұл ретте осыған ұқсас әрекет үшін жауапкершілік ӘҚБтК 233-бабында қарастырылған.
2. Қылмыстық кодекстің 241-бабы - бухгалтерлік есеп және қаржылық есептілік туралы заңнаманы бұзу.
ӘҚБтК-нің 239-бабының алтыншы бөлігіне ауыстырыла ма? Ол бойынша бүгінде тек заңды тұлғаларды әкімшілік жауапкершілікке тарту қарастырылған. Түзетулерде жеке тұлғаларға арналған нормалар да енгізіледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда ҰБТ-ға тіркелу мерзімі ұзартылды
Қазақстанда ҰБТ-ға тіркелу мерзімі ұзартылды, деп хабарлайды ҚР Ғылым және жоғары білім министрі Саясат Нұрбек.
Негізгі ҰБТ-ға қатысуға өтініш беріп үлгермеген талапкерлердің пікірін еске ала отырып, ертең 22 мамыр сағ. 10.00-ден 18.00-ге дейін тестілеуге тіркелу базасы барлық тестіленушілер үшін ашылады.
Өтініш беріп үлгермеген тест тапсырушылар app.testcenter.kz сайтында ұсынылған ҚОЛЖЕТІМДІ орындарға ғана тіркеледі. ❌2 рет өтініш берген талапкерлер үшін іс-әрекет қолжетімсіз болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Мемлекет басшысы Қазақстандағы Иран елшілігіне барды
Сурет: akorda
Қасым-Жомарт Тоқаев Астанадағы Иран Ислам Республикасының елшілігіне барып, Президент Ибрахим Раиси мен Үкімет делегациясы мүшелерінің тікұшақ апаты салдарынан қаза табуына байланысты иран халқына көңіл айтты және қолдау білдірді, деп хабарлайды Ақорданың баспасөз қызметінен.
Президент көңіл айту кітабына жазба қалдырды.
«Иран Ислам Республикасының Президенті Ибрахим Раисидің және Үкімет делегациясы мүшелерінің мезгілсіз қазасы туралы қаралы хабар қабырғамызды қайыстырды. Өз ұлтының ұлы перзенті Ибрахим Раиси – Отанына адал қызмет еткен тұғырлы тұлға. Біз оны парасатты басшы, беделді саясаткер, екі елдің ынтымақтастығын нығайтуға зор еңбек сіңірген қайраткер ретінде әрдайым есте сақтаймыз. Қазақ халқының және өзімнің атымнан ирандық бауырларымызға қайғырып көңіл айтамын. Марқұмдардың иманы саламат, рухы пейіште болсын!» – деп жазды Мемлекет басшысы.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қаскеев Стратегиялық жоспарлау және реформалар агенттігі төрағасының орынбасары лауазымына тағайындалды
Мемлекет басшысының өкімімен Сырымбет Ерденұлы Қаскеев Қазақстан Республикасының Стратегиялық жоспарлау және реформалар агенттігі төрағасының орынбасары лауазымына тағайындалды, деп хабарлайды Ақорданың баспасөз қызметінен.
Сырымбет Қаскеев 2014 жылы М. В. Ломоносов атындағы Мәскеу мемлекеттік университетін қолданбалы математика және информатика мамандығы бойынша бітірген.
Әр жылдары Халықаралық Валюта Қорының қаржылық бағдарламалау және саясат, фискалдық талдау және болжау бойынша біліктілігін арттыру курстарынан өтті.
2014-2016 жылдар аралығында «Экономикалық зерттеулер институты» АҚ талдамалық зерттеулер және болжамдау орталығының аға сарапшысы, директордың орынбасары лауазымдарын атқарды.
2016 жылдан бастап 2017 жылға дейін «Қазақстанның Даму Банкі» АҚ-да стратегия және жоспарлау департаментінің бас менеджері лауазымында жұмыс істеді.
2017-2020 жылдары «Бәйтерек Ұлттық басқарушы холдингі» АҚ талдау және зерттеулер департаментінің бас менеджері қызметін атқарды, 2020-2022 жылдары «Бәйтерек Ұлттық басқарушы холдингі» АҚ жобалық қаржыландыру және инвесторлармен жұмыс департаменті жобасының басшысы болды.
2022 жылғы сәуірден бастап Қазақстан Республикасы Стратегиялық жоспарлау және реформалар жөніндегі агенттігінің макроэкономикалық саясат департаментінің директоры болып табылады.
Президент жастар кадрлық резервінің мүшесі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Түркістан облысының шаруалары үшін суармалы судың бағасы 38%-ға дейін арзандады
Сурет: Depositphotos
Жыл басында су ресурстары және ирригация министрі Нұржан Нұржігітов шаруалардың өтінішін қанағаттандыру мақсатында "Қазсушар" филиалдарына дихандармен делдалсыз тікелей келісімшартқа отыру туралы тапсырма берген болатын. Осының нәтижесінде биыл Түркістан облысының шаруалары үшін суармалы судың бағасы 38%-ға дейін арзандады, деп хабарлайды министрліктің баспасөз қызметінен.
Мәселен, осыған дейін сор шаю жұмыстарына ағын су құны 1 гектарға - 6000-7000 теңге аралығында болса, биыл бекітілген тарифі бойынша қызмет құны 1 гектарға - 4282 теңге. Есептеу нәтижесінде қызмет құны орта есеппен 28% және 38%-ға дейін арзандағаны анықталды.
Түркістан облысы бойынша "Қазсушар" филиалы биыл шаруалармен су беру қызметі бойынша 6160 келісімшарт жасады. Оның ішінде, Мақтаарал және Жетісай аудандары бойынша 111,1 мың гектар суармалы алқапқа су беру туралы 2825 келісімшарт, Шардара ауданыны бойынша 41,3 мың гектар егіс алқабын тіршілік нәрімен қамтамасыз ету жөнінде 1280 келісімшартқа отырды.
Биылдан бастап еліміздің оңтүстігіндегі бірқатар шаруалар үшін суармалы су беру қызметінің құны арзандады. Себебі, 2024 жылғы вегетациялық кезеңге дайындық аясында "Қазсушар" мекемесі тұтынушылармен тікелей келісімшартқа отырып жатыр. Бұл ортадағы делдалдарды алып тастауға мүмкіндік береді. Тиісінше бірқатар тұтынушылар үшін қызметтердің құнын арзандатады. "Қазсушар" мекемесі 2024 жылдың вегетация маусымына 19 мыңнан астам тұтынушымен келісімшартқа отыруды жоспарлап отыр",- деді су ресурстары және ирригация министрі Нұржан Нұржігітов.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстандағы су тасқыны: су тасқынынан зардап шеккендер үшін 900-ге жуық үй салынуда
Сурет: akorda
Мемлекет басшысына су тасқыны салдарын жою және қалпына келтіру жұмыстары жөнінде есеп берілді, деп хабарлайды Ақорданың баспасөз қызметінен.
Президентке Премьер-Министр Олжас Бектенов су тасқынының салдарын жою және зардап шеккен азаматтарға жан-жақты көмек көрсету жұмыстары Үкіметтің тікелей қадағалауымен жүргізіліп жатқанын баяндады.
Үкімет басшысының мәліметі бойынша қазіргі кезде 61352 адам өз үйлеріне оралған. Эвакуациялық пункттердегі тұрғындарға (5452 адам) барлық қажетті көмек көрсетіліп жатыр.
20 мамырдағы жағдай бойынша 26 мыңнан астам отбасына 100 АЕК мөлшерінде бірреттік төлем беру үшін 10 миллиард теңгеден аса қаржы бөлінді (жалпы, 32 655 өтініш келіп түскен). Бұл жұмыстар Ақтөбе, Батыс Қазақстан, Ақмола, Қарағанды, Павлодар, Абай, Ұлытау облыстарында толықтай аяқталды. Ал Солтүстік Қазақстан облысында бірреттік қаржылай көмекті 6090, Қостанай облысында 4085, Атырау облысында 3730 отбасы алды.
Бұдан бөлек, зардап шеккен тұрғындарды баспанамен қамтамасыз ету жұмыстары жүргізіліп жатыр.
Қазіргі таңда баспаналары қираған 239 отбасы жаңа үйлер мен пәтерлерге қоныстанды. Атап айтқанда, Қостанай облысында 146, Ақмола облысында 57, Ақтөбе облысында 28, Қарағанды облысында 6, Павлодар облысында 2 баспана тұрғындардың игілігіне берілді.
Сонымен қатар Үкімет басшысының дерегіне сәйкес өңірлерде 873 жаңа үйдің құрылысы жүргізілуде. Нақтырақ айтқанда, Батыс Қазақстан облысында 357, Қостанай облысында 88, Ақтөбе облысында 153, Атырау облысында 70, Солтүстік Қазақстан облысында 200, Павлодар облысында 5 тұрғын үй салынып жатыр.
Қазірге дейін 891 отбасыға үйлерін жөндеу және қалпына келтіру шығындары үшін жалпы сомасы 1,9 миллиард теңге көлемінде өтемақы төленген.
Жалпы, су тасқынынан зардап шеккен аймақтарда 11137 тұрғын үй тексеріліп, 7863 нысанды бағалау жұмыстары аяқталды.
Бағалау ісінің аяқталуына қарай, зардап шеккен тұрғындарға аса қажетті дүние-мүлік сатып алу үшін 150 АЕК-ке дейін қосымша өтемақы төленіп жатыр. Сондай-ақ өлген малдың өтеуі үшін мемлекеттен бөлінген қаржылай көмектің көлемі 1,3 миллиард теңгеден асты.
Мемлекет қолдауынан бизнес те тыс қалмайды. Тасқыннан зардап шеккен кәсіпкерлердің шығынын өтеу механизмдері анықталып, тиісті жұмыстар басталып кетті. Бүлінген үй мен мүлікті жедел бағалау үшін қосымша ресурстар тартылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.