Кейінгі 4 жылда денсаулық сақтау жүйесін қаржыландыру 2 есе өсті
МӘМС енгізілгеннен бері денсаулық сақтау жүйесіне бағытталған қаржы көлемі артқан
Кейінгі 4 жылда денсаулық сақтау жүйесін қаржыландыру 1,2 трлн теңгеден 2,5 трлн теңгеге дейін өсті. Бұл туралы Орталық коммуникациялар қызметінде өткен брифингіде Денсаулық сақтау вице-министрі Тимур Сұлтанғазиев айтты, деп хабарлайды ҚазАқпарат.
Міндетті әлеуметтік медициналық сақтандыру (МӘМС) енгізілгенге дейін денсаулық сақтау саласындағы қаржы тапшылығы ауыр болды. Тапшылық 400 млрд теңгеге дейін жетті. Денсаулық сақтаудың жеке шығындары барлық шығындардың 39%-ын құрады. МӘМС-тің 4 жылғы жұмысынан кейін денсаулық сақтау жүйесі әлеуетінің өсуі байқалады. Мәселен, былтыр адамдар өз емханаларында 2019 жылмен салыстырғанда 3,2 есе көп қызмет алды", - деді Тимур Сұлтанғазиев.
Оның сөзінше, МӘМС енгізілгеннен бері денсаулық сақтау жүйесіне бағытталған қаржы көлемі артқан.
Денсаулық сақтау жүйесін қаржыландыру осы кезеңде 1,2 трлн теңгеден 2,5 трлн теңгеге дейін өсті. МӘМС-тің арқасында еліміздің бір тұрғынының денсаулығына жұмсалатын орташа шығыстар екі есе өсті - 56 мың теңгеден 122 мың теңгеге дейін", - деп тоқталды Тимур Сұлтанғазиев.
Вице-министрдің айтуынша, МӘМС енгізілген тұста осы жүйемен 1 300 ұйым қызмет көрсеткен. Ал қазір олардың саны 2 мыңға жетті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Президентке биылғы І тоқсанда жұмсалған республикалық бюджет қаражаты туралы есеп берілді
Сурет: akorda
Мемлекет басшысы Қаржы министрі Мәди Такиевті қабылдады, деп хабарлайды Ақорданың баспасөз қызметінен.
Президентке мемлекеттік қаржының негізгі параметрлері, оның ішінде биылғы І тоқсанда жұмсалған республикалық бюджет қаражаты туралы есеп берілді. Осы ретте 3 айдың қорытындысы бойынша мемлекеттік бюджетке 4,5 триллион теңгеге жуық кіріс кірген.
Қасым-Жомарт Тоқаевқа өнімсіз бюджет шығындарын оңтайландыру жұмыстары жөнінде мәлімет берілді. Мәди Такиевтің айтуынша, жүргізілген сараптама нәтижесінде биыл 300 миллиард теңгеден астам соманы қысқарту ұсынылған. Бұл қаражат экономикалық қайтарымы барынша жоғары шараларға жұмсалады.
Мемлекет басшысына бюджетті басқару тиімділігін арттыру бағытында қабылданып жатқан жұмыстар туралы баяндалды. Аталған шаралар жаңа Бюджет кодексіне енгізілген.
Бұдан бөлек Президентке салықтық-кедендік әкімшілендіру ісіндегі жаңа бастамалар таныстырылды. Министрдің айтуынша, жаңа Салық кодексінің жобасында салықтық әкімшілендірудің сервистік моделі енгізілген, тексерулер санын қысқарту жөніндегі нормалар қарастырылған, камералық бақылау және салық берешегін өндіріп алу тәсілдері өзгертілген.
Сонымен қатар Қасым-Жомарт Тоқаевқа Еуразиялық экономикалық одақтың үшінші елдермен кедендік шекарасындағы инфрақұрылымды жаңғырту жұмыстары жөнінде ақпарат берілді. Жобаның жүзеге асырылуы өткізу мүмкіндігін 6 есеге дейін ұлғайтып, өту уақытын 2 есе қысқартуға, сондай-ақ тауарлар мен көлік құралдарын тексеру ісін тәулік бойы онлайн режимде бақылауға мүмкіндік береді. Барлық өткізу пунктін реконструкциялау жұмыстарын жыл соңына қарай аяқтау жоспарланып отыр.
Мәди Такиев мемлекеттік сатып алу жүйесін реформалау жоспары жөнінде айтты. Оның мәліметінше, "Мемлекеттік сатып алу туралы" жаңа Заң жобасында сатып алу рәсімдерін жеңілдету және бюрократиядан арылту, құрылыс нарығында монополияға жол бермеу, барлық мемлекеттік және квазимемлекеттік ұйымның сатып алуларын бірыңғай платформаға көшіру көзделген.
Кездесу соңында Президент мемлекеттік қаржының жағдайын жақсарту, атап айтқанда, бюджеттің теңгерімділігін қамтамасыз ету, сондай-ақ салықтық және кедендік әкімшілендіру салаларын цифрландыру арқылы жетілдіру жөнінде бірқатар тапсырма берді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.