АСТАНА. 17-қараша. Kazakhstan Today. Мемлекет басшысы Нұрсұлтан Назарбаев Анталияда өткен Түркітілдес мемлекеттер басшыларының VIII саммитіне қатысты, деп хабарлайды Kazakhstan Today тілшісі президенттің баспасөз қызметіне сілтеме жасап.
Саммит жұмысына қатысқан Изербайжан, Қазақстан, Қырғызстан және Түркия Республикаларының мемлекет басшылары Түркітілдес мемлекеттер арасындағы ортақ тарих, болмыс, мәдениет және тіл біртұтастығы, достық, теңдік және өзара тиімділік негізіндегі барлық салада қалыптасқан жоғары деңгейдегі қарым-қатынастар мен ынтымақтастықты одан әрі дамыту мәселелерін талқылады. Сондай-ақ Саммитке қатысушы мемлекет басшылары әлемдік және өңірлік бейбітшілік, қауіпсіздік, тұрлаулылық пен гүлденуді қамтамасыз ету бағытында екі жақты және көп жақты іс-қимылдарды қолдай отырып, дағдарыстарды бейбіт жолдармен шешу принциптеріне ниеттес екендіктерін атап өтті.
- Бүгінгі таңда Қазақстан мен түркітілдес мемлекеттер арасында шешімін таппай жатқан мәселе жоқ. Егемендік алған 15 жылдың ішінде арамыздағы саяси, әскери, сауда-экономикалық, ғылыми-техникалық және мәдени-гуманитарлық қарым-қатынастар мен өзара ықпалдастық біртіндеп стратегиялық әріптестікке алып келді. Елдеріміздің экономикалық әлеуеті жылдан-жылға өсіп келеді, бұл да өз кезегінде білім, мәдениет саласындағы жобаларды жүзеге асыру үшін зор мүмкіндік береді. Сондықтан кең ауқымды түркітілдес халықтардың мәдениет күндерін өткізіп, өз тілдерімізде ортақ тарих, әдебиет, өнер, поэзия анталогияларын шығаруды және оларды әлем тілдеріне аударуды жолға қою қажет деп білемін. Бұл мақсатта қазіргі таңдағы ақпараттық медиа мен озық үлгідегі технология көздері ұсынып отырған мүмкіндіктерді барынша қолдағанымыз жөн. Ұлттық-рухани сипатымызға жаһандану үрдісінің төндіріп отырған қаупіне ТҮРКСОЙ аясында бірлесе қарсы тұра аламыз. Ортақ тарихымыздың, өнеріміздің, рухани байлығымыздың қазыналарын алдымен өз арамызда танытып, үйретуге міндеттіміз. Күн тәртібінде тұрған тағы бір мәселе - түркітілдес халықтардың көркем, ғылыми және танымдық әдебиеттерінің ортақ бірыңғай қорын құру. Мәдениет, ғылым, білім салаларындағы қатынастарды нығайтумен қатар экономикалық ынтымақтастықты арттыру кезек күттірмейтін іс. Мәселен, бір ғана - жүк тасымалдау мәселесін шешу қанша пайда әкеледі. Ең алдымен, Алматыдан Мешхед арқылы Ыстамбұлға келетін контейнерлі жүк тасу жолын тұрақты түрде іске қосу арқылы бабалар салған Ұлы Жібек жолын қалпына келтіретін боламыз. Келесі бір маңызды мәселе - елдеріміздің іскер топ өкілдері арасындағы тығыз ынтымақтастықты жүйелі түрде жолға қою. Түркияның бұл бағытта тәжірибесі де, мүмкіндігі де жеткілікті. Біздің интеграциялануымыз - өңіріміздің тұрақтылығына, прогреске, экономикалық тәуелсіздік пен орнықты дамуға апаратын жол. Тек осындай жағдайда ғана біз - түркі әлемі жасампаздыққа ие бола аламыз, - деп атап өтті Елбасы Нұрсұлтан Назарбаев өзінің сөйлеген сөзінде.
Мемлекет басшысы сондай-ақ Қазақстанда "Мәдени мұра" бағдарламасының шеңберінде халқымыздың тарихы, ауыз әдебиеті, ұлттық құндылықтары, қолөнері мен салт-дәстүрін насихаттауда, оларды жинақтап-жариялауда көптеген істер тындырылғанын атап көрсетті. Осы тұрғыда "Түркітілдес халықтардың мәдени мұрасы" атты халықаралық бағдарламаның қабылдануына бірлесе қолдау білдіру қажеттілігін атап өтті. Елбасы өз сөзінде жуырда ғана тілі мен ділі бір түркітілдес мемлекеттер мен халықтарының құрылтайын өткізіп, бүгінде түркітілдес мемлекеттер басшыларының басқосуын ұйымдастырып отырған Түрік Республикасының басшылығы мен әрдайым ыстық ықыласпен құшақ жая қарсы алатын бауырлас түрік халқына ризашылығын білдірді. Сондай-ақ Қазақстанның Дүниежүзілік сауда ұйымына, Түркияның Еуропа Одағына мүшелікке өтуі болашақта түркі әлемінің экономикалық, қаржылық байланыстар арқылы интеграциялануы үрдісіне серпін беріп, жеделдететін атап айтты. Осы тұрғыда Орталық Азия мемлекеттерінің одағын құру жөніндегі бастама аталған үрдісті ілгерілететін қозғаушы күшке айналатынына сенім білдірді.
- Анталия саммиті бауырлас түркітілдес халықтар республикаларының өз тәуелсіздіктерін алғанына 15 жыл толу қарсаңында болып жатқаны - біздің кездесуімізге ерекше маңыз береді. Алғашқы саммитке қатысқанда өз тәуелсіздіктерін жаңа ғана алған жас мемлекеттер бүгін халықаралық қауымдастықтың беделді мүшесі болып, дүниежүзінің саяси сахнасында берік орын алып отыр. Осыған байланысты Анталия саммиті біздің мемлекетеріміздің арасындағы ынтымақтастықтың жаңа кезеңінің басталуына мұрындық болмақ. Біздің елдеріміз аумағындағы табиғат байлығы мен шикізат қорларын әлем нарығына үздіксіз, тұрақты және үнемді түрде тасымалданып тұруына мүмкіндік беруіміз керек. Осы қатарда шілде айында іске қосылған Ақтау-Баку-Тбилиси-Джейхан мұнай құбырының маңызы зор, - деп атап өтті Түркия Республикасының президенті Ахмед Неджет Сезер.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Мемлекет басшысы Анталияда өткен Түркітілдес мемлекеттер басшыларының VIII саммитіне қатысты
тақырып бойынша жаңалықтар
Қазақстан Президенті су тасқынынан кейін өңірлерді қалпына келтіру мерзімдерін белгіледі
Сурет: ТЖМ
Қазақстан президенті Қасым-Жомарт Тоқаев Қазақстан халқы Ассамблеясының "Бірлік. Жасампаздық. Өрлеу" атты ХХХІІІ сессиясының отырысында сөйлеген сөзінде су тасқынынан кейін өңірлерді қалпына келтіру мерзімдерін белгіледі, деп хабарлайды Мемлекет басшысының баспасөз қызметі.
Қазақта "Алпыс күн тасыған дария, алты күнде қайтады" деген сөз бар. Көп ұзамай қарғын су кетіп, жұрт күнделікті өмірге оралады. "Әр қиындықтың қайыры бар" дейді халқымыз.
Біріншіден, тасқын кезінде ел бірлігі нығая түсті. Арқадағы ағайынға, Жайықтағы жұртқа бүкіл Қазақстан халқы көмектесуге ұмтылды. Апат аймағында тұратын адамдар барша отандасымыздың шынайы жанашырлығын сезінді.
Екіншіден, елдің жағдайын жақсарту үшін ешкім қиындықтың келуін күтіп отырмайтыны анық. Дегенмен, мұндай апаттар біраз шаруаны шұғыл қолға алуға себепкер болады.
Тасқын аяқталған соң кейбір ауылдар тың жерге қоныстанып, жаңадан бой көтереді. Жол салынады, су тартылады. Ауылдарымыз мүлде жаңа келбетке ие болады. Жалпы, әлемдегі үлкен дағдарыстардың қарқынды дамуға жол ашатыны белгілі", деді президент.
Қазіргі алапат тасқын да, түптеп келгенде, елімізге оң әсерін тигізеді деп ойлаймын. Сын сағатта жұдырықтай жұмылған жұртымыз осы қалпында өрлеу, жаңғыру кезеңіне қадам басады. Бәрі де жақсы болады.
Бәріміз - бір елдің азаматымыз. Тарих тоғыстырған тағдырымыз - бір, сеніммен қадам басатын келешегіміз - бір. Біз біртұтас ұлт ретінде әрдайым бабалар аманатына адал боламыз. Қасиетті қара шаңырағымыз - Қазақстанның жарқын болашағын бірге жасаймыз. Біздің мақсатымыз - айқын, бұл - Әділетті Қазақстанды құру.
Мен Қазақстан Республикасының Тәуелсіздігін қорғауды Президент ретіндегі ең басты міндетім деп санаймын. Осы қастерлі міндет Әділетті Қазақстанды құру және белсенді әрі сындарлы сыртқы саясат жүргізу арқылы ғана орындалады. Биік мақсатқа жету үшін түрлі кедергіден өтеміз, барлық қиындықты жеңеміз. Ауқымды міндеттерді орындаймыз. Біз еліміздің басты құндылықтары мен бағыт-бағдарынан айнымаймыз. Мемлекеттілігімізді нығайтып, тәуелсіздік туын әрдайым биік ұстаймыз. Мен бұған нық сенемін және сол үшін бәрін жасаймын. Бұл - менің президенттік әрі перзенттік парызым.
Еліміз аман, жұртымыз тыныш болсын!", деп түйіндеді өз сөзін Қасым-Жомарт Тоқаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бектенов Атырау облысында су басу қаупін азайту үшін қабылданып жатқан шаралардың барысын тексерді
Қазақстан Премьер-Министрі Олжас Бектенов Мемлекет басшысы Қасым-Жомарт Тоқаевтың тапсырмаларын орындау аясында Атырау облысында су басу қаупін азайту үшін қабылданып жатқан шаралардың барысын тексерді, деп хабарлайды Үкіметтің баспасөз қызметінен.
Олжас Бектенов облыс орталығындағы тұрғын үй алаптары бекіністерін тексеру барысында Атырау қаласының су тасқынының болжамды екінші толқынына дайындық жұмыстарымен танысты. Батыс өңірде Ресей Федерациясының Ириклин су қоймасынан судың келуіне байланысты, сондай-ақ Жайық өзеніне құйылар сағадағы ірі тасқын мен су деңгейінің көтерілуі салдарынан жағдай күрделі күйінде қалып отыр.
Бұрын хабарланғандай, Батыс Қазақстан облысындағы ірі су тасқынынан кейін ағын су өзен арнасымен Атырау облысына қарай жылжып, Каспий теңізіне құяды. Соңғы тәулікте БҚО тарапынан келетін судың әсерінен Атырау қаласында су деңгейінің 6 см-ге көтерілуі тіркелді (су тасқыны басталғаннан бері жалпы көтерілуі 227 см-ді құрады).
Тұрғын үй алаптарын нығайту, сондай-ақ Жайықтың өткізу қабілетін арттыру үшін өзен түбін тереңдету жұмыстарының қарқыны тексерілді. Тиісті күштердің көлемді судың келуіне дайындық деңгейін қарап көрді.
Үкімет басшысы Олжас Бектенов Атырау облысына су тасқыны жағдайы тұрақтанған өңірлерден әскери қызметшілер мен техниканы жедел жеткізіп, күштерді арттыруды тапсырды.
Бүгінгі таңда су тасқынының алдын алу шараларының 92%-ы орындалды. Жұмысты тиімді жүргізу үшін қала 111 секторға бөлінген. Ұзындығы 482 км қорғаныс бөгеттері салынды, аяқталған учаскелер техникалық қадағалау арқылы тексерілді. Жұмыстарға ТЖМ, ІІМ, Қорғаныс министрлігі, Ұлттық ұланның 6 мыңға жуық әскери қызметшісі, әкімдік қызметкерлері, 2 мыңға жуық техника жұмылдырылған. Еріктілер тарапынан белсенді көмек көрсетілуде. Өткен сенбіде жағалауды нығайту сенбілігі аясында қаланы қорғау жұмыстарына 9 мыңға жуық ерікті қатысты.
Сонымен қатар Жайық өзенінен Каспий теңізіне су өткізу қабілетін арттыру үшін өзен түбін тереңдету жұмыстары жүргізілуде. Су жолдарын тазарту, тереңдету және кеңейту мақсатында арнайы техникалық флоттық кемелер, гидравликалық экскаваторлар қолданылуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Көктемгі дала жұмыстарына қосымша 400 миллиард теңгеге дейін қаражат тартылады
Көктемгі дала жұмыстарын оңтайлы егіншілік уақытында жүргізу бүгінгі күннің маңызды міндеттерінің бірі болып табылады. Бұл мiндеттi орындау үшiн ауыл шаруашылығы тауарын өндiрушiлердiң ұзақ уақыт бойы шектелген қарыз қаражатына қол жеткiзуi тиiс.
Егіс жұмыстарын жеңілдетілген несиелендіруге 2024 жылы "Аграрлық несие корпорациясы" АҚ арқылы 140 миллиард теңге, "Азық-түлік корпорациясы" АҚ арқылы 40 миллиард теңге көлемінде бюджет қаражаты бөлінді, деп хабарлайды ҚР Ауылшаруашылық министрлігінің баспасөз қызметінен.
Осы қаражатты ескере отырып, Қазақстан Республикасы Ауыл шаруашылығы министрлігінің бағалауы бойынша көктемгі дала жұмыстарын қаржыландырудағы тапшылық шамамен 1,3 триллион теңгені құрайды.
Дегенмен, Қазақстан Республикасының Үкіметі егіс науқанын қаржыландыруға қолжетімділікті арттыру бойынша жұмыс жүргізуде.
Мемлекет басшысының тапсырмасы бойынша көктемгі егіс жұмыстарын жүргізуге берілетін несиенің пайыздық мөлшерлемесін субсидиялауға қаражат бөлу арқылы қосымша 400 миллиард теңгеге дейін қаражат тартылады.
Осы мақсаттарға Үкімет резервінен 60 млрд теңге бөлініп, ол қарыз несиелерінің құнын төмендетуге, сондай-ақ ауыл шаруашылығы тауарын өндірушілердің несиелеріне кепілдік беруге бағытталады.
Бұл тәсіл ауыл шаруашылығы кәсіпорындарына егіс жұмыстарын жүргізу үшін жылдық бірден 5% несие қаражатын беруге және жеткілікті кепілдік болмаған жағдайда несие сомасының 85% дейін кепілдік беруге мүмкіндік береді.
Ереже жобасы бүгін жергілікті атқарушы органдар мен Орталық мемлекеттік басқару органдарына келісу үшін жіберіледі.
Сондай-ақ бүгінде азық-түлік корпорациясын қосымша қаржыландыру үшін "Азық-түлік корпорациясы" 200 мың тонна астықты тауарлық несиелеу бағдарламасын жүзеге асыруға кірісті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев Қазақстан халқы Ассамблеясы төрағасының орынбасарларын тағайындады
Сурет: Akorda
Тоқаев Қазақстан халқы Ассамблеясы төрағасының орынбасарларын тағайындады, деп хабарлайды Ақорданың баспасөз қызмтінен.
Мемлекет басшысының өкімдерімен Лугмар Харкиевич Буларов және Юрий Германович Шин Қазақстан халқы Ассамблеясы Төрағасының орынбасарлары болып тағайындалды", деп көрсетілген Өкім мәтінінде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.