АҚТӨБЕ. 19-маусым. Kazakhstan Today. Ақтөбе облысы "30 корпоративтік көшбасшы" мемлекеттік бағдарламасына қатысу үшін 7 топжарғыш жоба ұсынды. Бұл туралы Kazakhstan Today тілшісіне облыстық әкімшіліктің баспасөз қызметінен хабарлады.
Баспасөз қызметінің мәліметіне сәйкес, облыста индустриялық-инновациялық даму стратегиясының аясында жалпы құны 8 млрд долларды құрайтын 120 инвестициялық жоба жүзеге асырылуда. "Соның ішінде 21 жоба өңір үшін топжарғыш сипатта. Бұл тізімнен "Қазақстанның 30 корпоративтік көшбасшысы" мемлекеттік бағдарламасына 7 жоба ұсынылды",- деді облыс әкімінің баспасөз хатшысы Валентина Ускова. Оның айтуынша, жобаларды өңір басшысы селекторлық кеңесте жария еткен.
Ұсынылған жобалардың аясында В.Ускова "CNPC-Ақтөбемұнайгаз" акционерлік қоғамы тарапынан Жанажолда үшінші газ өңдеу зауытын салу (жылына 6 млрд текше метр газ), "SBS Steel" компаниясы тарапынан Ақтөбеде металлопрокат шығаратын және тотықтырылған окатыштарды пайдалану арқылы темір концентратынан темірді тікелей бөліп алатын электрометаллургиялық (жылына 500 мың тонна) зауыт салу жобаларын атады.
Баспасөз қызметінің ақпаратына сәйкес, облыста қуаты 360 МВт-тық газқұбырлы электр станциясы салынады. Ал 2006-жылы "Ақтөбе мыс компаниясы" ЖШС жылына 2,5 млн тонна мыс кенін өндіріп өңдейтін және жылына 200 мың тонна мыс концентратын шығаратын тау-кен байыту комбинатын пайдалануға берді. Жобаны сатылы дамыту аясында Хромтау ауданында кен байыту комбинаты мен мыс балқыту зауытының құрылысы салынуда.
Төртінші жоба бойынша "Интергласс Қазақстан" компаниясы тарапынан қуаты 21,7 млн шаршы метрді құрайтын флоат- әйнек өндіретін зауыт салу көзделген. Бұған қоса Хромтау ауданында "Восход Ориел" компаниясы Восход кенішінде хром кенін өндіріп өңдейтін (қуаты жылына 1 млн тонна) кен байыту комбинатын, сондай-ақ, "ММЗ" компаниясы Мартүк ауданында темір жол вагондарын шығаратын зауыт салмақшы. Кәсіпорын вагондар, жартылай вагондар, думпкарлар мен цистерналар өндіреді.
Ал жетінші жоба ұзындығы 410 шақырымдық Самара-Шымкент жол бөлігін жөндеуге бағытталады. Ол өңірдің инфрақұрылымын дамытуға байланысты.
"Топжарғыш" 7 жобаға жұмсалатын жалпы инвестиция көлемі 3 млрд долларды құрайды. Жаңа өндірістерде жылына 440 млрд теңгені құрайтын өнім өндірілмекші. "Бұл 2010-жылы өндірілетін өнім мөлшерін 2006-жылғымен салыстырғанда екі есе арттыруға мүмкіндік береді",- деп хабарлайды облыстық әкімшілік. "Инфрақұрылымдық жобалардан өзге барлық жобалар бойынша мемлекет тарапынан қаржыландыру талап етілмейді",- деп хабарлайды баспасөз қызметі.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Ақтөбе облысы "30 корпоративтік көшбасшы" мемлекеттік бағдарламасына қатысу үшін 7 топжарғыш жоба ұсынды
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.