Ауыл шаруашылық министрлігі өңір әкімшіліктеріне жеміс-жидек және көкөніс өнімдерімен қамтамасыз ету жөніндегі облыстық бағдарламалар жасауды ұсынып отыр
Астана. 27 наурыз. "Қазақстан Бүгін" - Ауыл шаруашылық министрлігі өңірлік әкімшіліктерге жеміс-жидек және көкөніс өнімдерімен қамтамасыз ету жөніндегі облыстық бағдарламалар жасауды ұсынады. Бұл туралы бүгін министрліктің алқа отырысында Ауыл шаруашылық министрлігінің өңдеу өнеркәсібін дамыту және ДСҰ жөніндегі департамент директоры Айна Құсайынова мәлімдеді, деп хабарлайды "Қазақстан Бүгін" агенттігінің тілшісі.
"Облыстар мен Астана, Алматы қалаларының әкімдіктері бірінші кезекте өндірістің толық теңдестірілуін, оның ішінде, жылыжай, парник шаруашылығын, ішкі рынокты ерте көктемде шығатын көкөніспен қамтамасыз етуді қарастыратын өңірлерді көкөніспен және жеміс-жидекпен қамтамасыз етудің облыстық бағдарламаларын жасаулары қажет деп есептейміз", - деді А. Құсайынова.
Сонымен бірге, бағдарламаларда жеміс-жидек пен көкөніс өнімдерінің маусым аралығында жетпей тұрған көлемін республиканың өзге облыстарынан, алыс және жақын шетелдерден тасымалдау және керісінше артық өнімдерді өзге өңірлерге жеткізу бойынша болжамдық кесте қарастырырылуы керек, деп есептейді департамент директоры.
Сонымен бірге, сараптама жүргізіп тоқтап тұрған және өз мақсатына қолданылмай тұрған жеміс-көкөніс қоймаларын қалпына келтіру және болашақта олардың өз мақсатына орай қызмет етуіне жауап беретін нақты жауапты заңды тұлғаларды анықтау шараларын жасап шығару қажет. Илеуметтік-кәсіпкерлік корпорациялар немесе коммуналдық базарлардың құрылымдары осы ұйымдарға балама бола алатынын атап көрсетті А. Құсайынова.
Сонымен бірге, оның пайымдауынша, жеміс-жидек пен көкөніс өнімдерін делдалдарсыз сату үшін ірі сауда орталықтары мен халық тығыз қоныстанған жерлерде сауда орындарын бекіту, қосымша арнайы алаңқайлар, сондай-ақ, көлік құралдарынан және жол жиегіндегі сауданы ұйымдастыру қажет.
Барлық ниет білдірушілерге толық ақпарат беруді қамтамасыз ету үшін Ауыл шаруашылық министрлігі әкімдіктер өңірлердің жеміс-көкөніс өнімдеріне сұранысы мен ұсынысы туралы мәліметтерді оларды сауда базарларында сату шарттарын көрсете отырып өздерінің веб-сайттарында орналастыру мәселесін ойластырғанын жөн санайды.
"Сонымен қатар, ауыл шаруашылығы тауарларын өндірушілер кең қатысқан жеміс-көкөніс өнімдерін сату жәрмеңкелерін үнемі өткізіп тұру тәжірибесін жалғастыра беру керек", - деп атап көрсетті А. Құсайынова.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.