АСТАНА. 5-мамыр. Kazakhstan Today. Қазақстан үшін ДСҰ-ға мүшелікке өту жөніндегі келіссөздерді соза беру тиімсіз. Бұл туралы бүгін "Қазақстан: халықаралық сауда режимі және ДСҰ" атты халықаралық сауда семинары аяқталғаннан кейін журналистерге берген сұхбатында ҚР индустрия және сауда вице-министрі Жанар Айтжанова пікір білдірді, деп хабарлайды Kazakhstan Today тілшісі.
"Тәжірибе көрсеткендей, ұйымға мүшелікке өту жөніндегі келіссөздерді соза беру оған өтуге ниет білдірген елдер үшін пайдасын тигізбейді. Өйткені, ДСҰ-ға мүше елдердің өз арасында көптеген келісімдер жасалады, ал олар жаңадан мүшелікке өтуші елдер үшін қатаң талаптар түрінде көрініс табады",- деді вице-министр. "Сол себепті, аутсайдер ретінде сыртта ұзақ уақытқа созылған келіссөздер жүргізгеннен гөрі, ұйымның өз ішінде осындай сауда раундтарына қатысқан тиімді",- деді ол.
Ж.Айтжанованың айтуынша, Қазақстан ағымдағы жылдың аяғына дейін ДСҰ-ға мүшелікке өту жөніндегі екі жақты келіссөздерді аяқтамақшы. "Біз келіссөздер жүргізіп жатқан 25 елден қазіргі жағдаймен 19 елмен келіссөздер аяқталды. Қалған 6 елмен арадағы келіссөздер біршама ілгері кезеңге аяқ басты",- деді ол. "Канада, Австралия және АҚШ-пен арада ет және сүт өнімдерінің импорттық баж салығы бойынша және басқа да бірнеше мәселе қалып отыр. Ал Еуропалық Одақпен арада шетелдік кәсіби білікті мамандардың Қазақстан аумағына келуі мен қаржылық қызметтерге қатысты мәселелер бар",- деді вице-министр. "Біздіңше, егер біз осы мәселелерді реттесек, онда ағымдағы жылдың аяғына дейін ДСҰ-ға мүшелікке өту жөніндегі екі жақты келіссөздерді аяқтай аламыз",- деді ол.
Вице-министрдің айтуынша, Қазақстанның ДСҰ-ға мүше болу мерзімін нақты айқындау көп жағдайда "ауылшаруашылығына қатысты мәселелердің" шешілуіне байланысты. "Идетте, ауылшаруашылығын қолдау мәселелері бойынша көп жақты келіссөздер - келіссөздер барысындағы ең ақырғы сәт болып табылады. ДСҰ-ға мүшелікке өту мерзімі дәл осы мәселенің шешілуіне байланысты анықталады",- деді ол. "Сол себепті келесі жыл келіссөздер барысында біздің ауылшаруашылығы мәселелеріміз шешілетін жыл болмақ",- деді Ж.Айтжанова.
"Қазақстан ауылшаруашылығын дамытуға мемлекет тарапынан қолдау көрсету көлемін сақтап қалуды одан әрі талап ете береді. Ауылшаруашылығына бөлінетін субсидияларды ешкім де алып тастағалы жатқан жоқ. Ауылшаруашылығын дамытуға арналатын дотациялар көлемі бойынша келіссөздер жүргізген кезде біз қазір мемлекетімізде бар мүмкіндіктерді ғана емес, сонымен бірге ел экономикасының ауылшаруашылығы саласын дамытудың орта және ұзақ мерзімді жоспарларын да ескереміз. Сол себепті, ауылшаруашылығы саласындағы келіссөздердің нәтижесі еліміздің ұлттық экономикалық басымдықтарына сай келеді",- деді ол.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Қазақстан үшін ДСҰ-ға мүшелікке өту жөніндегі келіссөздерді соза беру тиімсіз - ҚР индустрия және сауда вице-министрі
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.