АСТАНА. 18-тамыз. Kazakhstan Today. Егер экологиялық заңнаманы орындау туралы талабы орындалмаған жағдайда Қоршаған ортаны қорғау министрлігі Теңізшевройлмен соттасуға дайын. Бұл туралы еліміздің қоршаған ортаны қорғау министрі Нұрлан Ысқақов бүгін журналистерге берген сұхбатында атап көрсетті, деп хабарлайды Kazakhstan Today тілшісі.
Экологиялық мекеменің қоршаған ортаны қорғауға қатысты Теңізшевройлға қойған талабы орындалмаған жағдайда не істейтіндігі жөніндегі сауалға Нұрлан Ысқақов : "онда біз сот процессін бастаймыз",- деп мәлімдеді.
"Біз биылғы жылдың басында 47 кәсіпорынды жапсақ, қазір олардың саны 100-ден асты",- деді ол.
"Мұндай жағдайда жасалатын қадамдар өте қарапайым: бастапқыда айыппұл салынады, сосын сотқа жолданады. Бұдан кейін өзіміз берген рұқсаттың күшін жоямыз. Бұл шараның өзі әсер ете алмаған жағдайда, кәсіпорын соттың шешімімен жабылады",- деді министр.
Н.Ысқақовтың айтуынша, Қоршаған ортаны қорғау министрлігі Теңізшевройлмен арадағы келісім-шартын қайта қарау туралы еліміздің энергетика және минералды ресурстар министрлігіне өтініш жолдаған. "Министрлік әзірге бізге жауап берген жоқ. Бірақ біз өз тарапымыздан сауалды төтесінен қойып отырмыз. Теңізшевройл еліміздің экологиялық заңнамасын жыл сайын дерлік бұзады",- деді Н.Ысқақов. "Сол себепті де біз Теңізшевройлмен арадағы келісім-шартын қайта қарау туралы хат жолдадық. Өйткені, бұдан басқа шаралар нәтиже бермеді",- деді ол.
Н.Ысқақовтың айтуынша, "келісім-шарты экологиялық талаптарды күшейту жағына қарай қайта қаралуға тиіс. Демек, кәсіпорын экологиялық нормативтерге қатаң бағынуы шарт".
"Министрлік қазір "ҚазМұнайГаз", "Қазақойл-Ақтөбе", "PetroKazakhstan" компанияларына да талап қоюда. "Біз үшін компания шетелдік пе, әлде отандық па бәрібір, ешкімге артықшылық берілмейді. Өкінішке орай, бізде әсіресе мұнай саласында лас жұмыс істейтін жер қойнауын пайдаланушылар көп. Рұқсат алғаннан кейін шын мәнісінде шектен шығып кететіндері баршылық",- деді ол.
Қоршаған ортаны қорғау министрлігі экологиялық заңнаманы орындау туралы талабы орындалмаған жағдайда Теңізшевройлмен соттасуға дайын
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.