АЛМАТЫ. 16 мамыр. Kazakhstan Today. Жыл сайынғы Currency Conference 2007 валюта конференциясының аясында өткен бәйге қорытындысы бойынша халықаралық үкіметтік емес "International Association of Currency Affairs" (IACA) ұйымы - Валюталық мәселелер жөніндегі халықаралық қауымдастық - Қазақстанның номиналы 10 000 теңгелік қағаз ақшасын үздік жаңа банкнота деп таныды. Бұл туралы Kazakhstan Today агенттігіне Қазақстан Республикасының Ұлттық банкінің баспасөз қызметі хабарлады.
Ұлттық банктің атап өткеніндей, Валюталық мәселелер жөнінденгі халықаралық қауымдастық төрағасы Ричард Хайкок "Үздік жаңа банкнота" жүлдесін тапсыру кезінде Қазақстанның Ұлттық банкі 2006 жылдың қарашасында шығарған банкнотаның жаңа серияларының күрделі және жоғары деңгейде қорғалғандығын атап өтті. Екінші орын Швецияның орталық банкі былтырғы жылдың наурыз айында шығарған номиналы 1000 крондық ақшасына берілсе, үшінші орынға Мексика банкі 2006 жылдың қарашасында айналымға енгізген 50 песо номиналындағы банкнота ие болған.
Конференция шеңберінде бәйге алғаш рет өткізілген. Сонымен қатар, үздік тиын немесе тиындар сериясы, банкнотаның үздік қорғаныс элементі, ақша жасау индустриясының үздік өнімі, валюта туралы үздік қоғамдық танымдық бағдарлама, банкноттар мен тиындар туралы үздік веб-сайт секілді аталымдардың жеңімпаздары белгілі болды. "Ұйым тағайындаған сыйлық банкноттар мен тиындар өндірісінде, оларды өңдеу мен басқаруда жетістіктерге жетуге көмектесу және оларды мойындауға арналған", - деп хабарлайды Ұлттық банк.
Валюта конференциясы 7-9 мамыр күндері Бангкок қаласында (Таиланд) өтті. Форум қолма-қол ақшаға, оның ішінде банкноттар мен тиындарды дайындау технологиясына, қорғаныс элементтерінің заманауи өңделіп жасалуына, әртүрлі мемлекеттердегі ақша айналымы мәселелеріне және оларды шешу жолдарына арналды.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Валюталық мәселелер жөнінденгі халықаралық қауымдастық Қазақстанның 10 000 теңгелік ақшасын үздік жаңа банкнота деп таныды
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.