АЛМАТЫ. 15-маусым. Kazakhstan Today. Ақпараттық қауіпсіздікті қамтамасыз ету жөніндегі Шанхай ынтымақтастығы ұйымы іс-шараларының жоспарын тамыз айында Бішкекте өтетін саммитте қабылдау жоспарланған. Бұл туралы бүгін Шанхай ынтымақтастығы ұйымының екінші форумының ашылуында ұйым бас хатшысының орынбасары Владимир Захаров мәлімдеді, деп хабарлайды Kazakhstan Today тілшісі.
"Шанхай ынтымақтастығы ұйымына мүше елдер қазір ақпараттық қауіпсіздікті қамтамасыз ету жөніндегі іс-шаралардың жоспарын талқылауда. Ол іс жүзінде дайын болды. Біз тиісті шешімді мемлекет басшылары 16-тамызда Бішкекте қабылдайды деп күтіп отырмыз",- деді В.Захаров. "Бұл жоспар қылмыстық және лаңкестік сипаттағы қатерлерге қарсы тұруға бағытталған", деді ол.
"Байланыстың барлық түрлері қарқынды дамған қазіргі ахуалда ақпараттық-коммуникациялық технологиялардың осалдығына қатысты тауқымет тіптен шиеленісе түсті",- деді ұйым бас хатшысының орынбасары. Оның пікірінше, "сол себепті Шанхай ынтымақтастығы ұйымының шеңберінде ақпараттық желілерді бұзуға жасалған әрекеттерге қарсы тұру тетігін ойластыру, барлық мемлекеттік және азаматтық құрылымдардың ақпараттық қауіпсіздігін қамтамасыз ету үшін күш-жігерді үйлестіруге келісім жасалды".
"Өткен мерзімдегі ұйым іс-қызметіндегі ең негізгі басымдықтар бүкіл Шанхай ынтымақтастығы ұйымының шеңберінде бейбітшілік пен қауіпсіздікті қамтамасыз ету, экономика және әлеуметтік салалардағы интеграциялық құбылыстарды тереңдету болды",- деді В.Захаров өзінің форумды ашып сөйлеген сөзінде.
Ол сонымен қатар Шанхай ынтымақтастығы ұйымының екінші форумының бүгін - 15-маусым - атаулы күні өткізіліп отырғанын тілге тиек етті. "Бұл күні Шанхай ынтымақтастығы ұйымына 6 жыл толады",- деді ол.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Ақпараттық қауіпсіздікті қамтамасыз ету жөніндегі ШЫҰ іс-шараларының жоспарын Бішкек саммитінде қабылдау жоспарланған - ұйым бас хатшысының орынбасары
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.