Мемлекет басшысы Солтүстік Атлантикалық Альянстың бас хатшысымен кездесті
Мемлекет басшысы Солтүстік Атлантикалық Альянстың бас хатшысымен кездесті
Астана. 24 маусым. "Қазақстан Бүгін" - Мемлекет басшысы Нұрсұлтан Назарбаев бүгін Ақордада Солтүстік Атлантикалық Альянстың бас хатшысы Яап де Хооп Схеффермен кездесті, деп хабарлайды "Қазақстан Бүгін" агенттігі.
Солтүстік Атлантикалық Альянс бас хатшысы брифингте атап өткендей, мемлекет басшысымен кездесу барысында Қазақстан мен Солтүстік Атлантикалық Альянстың қарым-қатынасына қатысты мәселелер толық талқыланды.
"Біз Қазақстан мен Солтүстік Атлантикалық Альянс арасындағы қарым-қатынасқа қатысты, әсіресе Ауғанстанға қатысты мәселелерді талқыладық", - деді Я. Схеффер.
Сонымен бірге, Солтүстік Атлантикалық Альянс бас хатшысының айтуынша, Қазақстан президентімен кездесу кезінде "халықты жаппай қырып-жоятын қаруды таратпау және қаржылық-экономикалық дағдарыс мәселелері де талқыланды".
"Біз бұған дейін де талай мәрте кездескенбіз, әрине, президент Назарбаев - өңірдегі беделді адам, әсіресе Қазақстан мен одан тысқары жерлерде қауіпсіздікті қамтамасыз ету мәселесі бойынша беделі үлкен", - деді Я. Схеффер.
Сондай-ақ, Солтүстік Атлантикалық Альянс бас хатшысының айтуынша, ол Қазақстан мемлекет басшысын 2010 жылы республиканың ЕҚЫҰ-ына төрағалық жасайтындығына байланысты құттықтауын жеткізді.
Солтүстік Атлантикалық Альянс бас хатшысы Яап де Хооп Схеффер Қазақстанға Еуроатлантикалық серіктестік кеңесінің үшінші қауіпсіздік форумына қатысу үшін келді.
Ақпаратты пайдаланған жағдайда "Казахстан Сегодня" ақпараттық агенттігіне
гиперсілтеме жасау міндетті.
«Қазақстан Бүгін» Ақпараттық агенттігінің материалдарына авторлық құқық.
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.