АСТАНА. 3-шілде. Kazakhstan Today. Өзбекстан президенті Ислам Кәрімов биыл елімізге сапармен келетінін растады, деп хабарлайды Kazakhstan Today тілшісіне ҚР СІМ-нің баспасөз қызметі.
Өткен аптаның ортасында Ташкентте Қазақстанның Өзбекстандағы елшісі Асқар Мырзахметов Ислам Кәрімовке сенім хатын табыс етті.
“Рәсімнен кейін болған сұхбат барысында қазақ-өзбек қарым-қатынасының қазіргі ахуалы мен келешегі, 2006-жылғы наурыз айында Н.Назарбаевтың Өзбекстанға жасаған мемлекеттік сапарының қорытындысы бойынша Қазақстан мен Өзбекстан президенттері қол жеткізген уағдаластық аясындағы тапсырмаларды жүзеге асырудың маңызы туралы сөз қозғалды”,- делінген хабарламада.
“Сонымен бірге бұған дейін қол қойылған және қазір жобасы жасалып жатқан құжаттардың, соның ішінде, екі ел арасындағы 2006-2010-жылдарға арналған сауда-экономикалық және мәдени-гуманитарлық ынтымақтастық бағдарламасының уақытын тапқандығы атап көрсетілді”.
Бұдан бұрын да хабарлағанымыздай, А.Мырзахметов Қазақстанның Өзбекстан Республикасындағы төтенше және өкілетті елшісі болып сәуір айында тағайындалды. Бұған дейін аталмыш елшілікті Тілеухан Қабдырахманов басқарған.