СЕМЕЙ. 8-қыркүйек. Kazakhstan Today. Бүгін Орталық Азиядағы бес елдің өкілдері Семейде ядролық қарудан азат аймақ құру туралы келісімге қол қойды, деп хабарлайды Kazakhstan Today тілшісі.
Мәселен, Қазақстан жағынан құжатқа ҚР СІМ Қасымжомарт Тоқаев, Қыргызстан жағынан СІМ Аликбек Джекшенкулов, Өзбекстан жағынан СІМ Владимир Норов қол қойды. Тәжікстан атынан осы елдің сыртқы істер министрінің бірінші орынбасары Саймумин Ятимов, Түрікменстан атынан осы елдің Қазақстандағы елшісі Мухамед Абалаков келісімге қол қойды.
"Орталық Азиядағы ядролық қарудан азат жаңа аймақ бірқатар бірегей сипаттамаларымен ерекшеленеді. Біріншіден, бұл аймақта бұрын ядролық қаруға ие болған мемлекет бар, екіншіден, ядролық қарудан азат аймақ алғаш рет солтүстік жарты шарда құрылып отыр, үшіншіден, бұл келісім Орта Азиядағы барлық бес мемлекетті толық қамтитын, қауіпсіздік саласындағы бірінші көп жақты келісім болып табылады. Сондай-ақ, ядролық қарудан азат аймақ тұңғыш рет ядролық қаруы бар және жалпы аумағы 3 млн. 882 мың шаршы шақырымды құрайтын екі алып мемлекетпен ортақ ауқымды шекарасы бар аймақта құрылып отыр",- делінген бүгін ҚР СІМ таратқан хабарламада.
Бұдан бұрын да хабарлағанымыздай, келісімге қол қойған мемлекеттер Орталық Азияның аумағында ядролық қару, оның компоненттері немесе басқа да ядролық жарылғыш құрылғыларды өндіру, сатып алу және орналастыруға тыйым салу жөнінде міндеттеме жүктеп алады. Бірақ осы орайда ядролық энергияны бейбіт мақсатта пайдалануға тыйым салынбайды.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Семейде Орталық Азия елдерінің өкілдері ядролық қарудан азат аймақ құру туралы келісімге қол қойды
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.