Астанада Корея Республикасымен сауда-экономикалық және инвестициялық ынтымақтастықты дамыту мәселелері талқыланды

Қазақстанның Шаңхай қаласындағы Бас консулдығының қолдауымен "Астана" халықаралық қаржы орталығы (АХҚО) Шаңхай қор биржасы-мен бірлесіп "AIFC Connect: Shanghai 2026" іскерлік іс-шарасын өткізді, деп хабарлайды Қазақстан Республикасы Сыртқы істер министрлігінің баспасөз қызметінен.

Іс-шараның негізгі мақсаты Қазақстан мен Қытай арасындағы инвестициялық және қаржылық ынтымақтастықты нығайту, қытайлық инвесторлармен тікелей байланыстарды дамыту және АХҚО инфрақұрылымы арқылы жобаларды ілгерілету болды.

Қазақстанның Шаңхайдағы Бас консулы Нурлан Аққошкаров қазақ-қытай қатынастарының стратегиялық сипатын атап өтіп, инвестициялық өзара іс-қимылды тереңдету, капитал нарықтарын ықпалдастыру және екіжақты іскерлік байланыстарды кеңейту басымдықтарына тоқталды. Қазіргі таңда екі ел арасындағы тауар айналымы 48,7 млрд АҚШ долларына жетіп, тұрақты өсім бар екенін көрсетіп отыр.

Іс-шара аясында АХҚО, Жасыл қаржы орталығы және бизнес өкілдері, соның ішінде KAZ Minerals, Solidcore Eurasia және ITS CSD жобаларын таныстырды. Қатысушыларға инвестициялық бағыттардың кең ауқымы ұсынылды - тау-кен металлургиясы, инфрақұрылымдық жобалар, цифрлық шешімдер және "жасыл" қаржыландыру құралдары.

Капитал нарықтарын ықпалдастыру мәселелеріне ерекше назар аударылды. Талқылауға Самрук-Казына АҚ, China International Capital Corporation, Freedom Broker және Jiaxin International Resources Investment Ltd өкілдері қатысты.

Форум аясында АХҚО Жасыл қаржы орталығы мен International Green Economy Association арасында экологиялық бастамаларды дамытуға бағытталған өзара түсіністік туралы меморандумға қол қойылды. Сондай-ақ AIFC Insights талдау орталығы Орталық Азия мен Кавказ елдерінің капитал нарықтарына шолу ұсынып, Қазақстан аймақтағы ең ірі қаржы нарығы мәртебесін сақтап отырғанын, облигациялар нарығының көлемі шамамен 81 млрд АҚШ долларын құрайтынын атап өтті.

Маңызды нәтижелердің бірі ретінде Astana International Exchange биржасында юаньмен номинацияланған облигацияларды (панда-бондтарды) орналастыру мүмкіндіктерін кеңейту жарияланды. 2026 жылғы сәуірде AIX Қазақстан мен Орталық Азияда алғаш рет Самрук-Казына АҚ-ның 3 млрд юань көлеміндегі панда-бондтарын орналастырды. Бұл қытай капиталын тартудың қосымша арнасын қалыптастырады.

Жаһандық декарбонизация үрдісіне жауап ретінде халықаралық құралдармен, соның ішінде I-REC сертификаттары мен көміртек кредиттерімен жұмыс істеуге мүмкіндік беретін AIFC Carbon Platform аймақтық көміртек платформасы таныстырылды.

Сондай-ақ әуе кемелерін лизингке беру және қаржыландыру мәмілелерін құрылымдауға арналған АХҚО авиациялық хабының мүмкіндіктері ұсынылды.

Іс-шара Қазақстан мен Қытайдың бизнес және қаржы институттары өкілдері арасында нақты жобалар мен ынтымақтастық бағыттары талқыланған екіжақты кездесулермен аяқталды.

2025 жылғы 30 маусымда Astana International Exchange және Шаңхай қор биржасы екі ел биржалары арасындағы ұзақ мерзімді әріптестікті нығайту мақсатында өзара түсіністік туралы меморандумға қол қойды.

 

Қазақстан Республикасының Сыртқы істер министрінің орынбасары Әлібек Қуантыровтың Дания Корольдігіне сапары өтті, деп хабарлайды Қазақстан Республикасы Сыртқы істер министрлігінің баспасөз қызметінен.

Сапар ҚР Ауыл шаруашылығы Вице-министрі А.Бердалин, "Бәйтерек "ҰИХ" АҚ, "Samruk-Kazyna Invest", "Kazakhstan Investment Development Fund" және "Kazakh Invest" қоса алғанда, мемлекеттік органдар мен жетекші ұлттық қаржы және инвестициялық институттардың өкілдері кіретін өкілді ведомствоаралық делегацияның басшылығында жүзеге асырылды.

Ресми бағдарлама барысында Данияның Сыртқы істер министрлігінде екіжақты кездесулер өтті.

Министрдің орынбасары Дания СІМ Сауда және инвестициялар жөніндегі мемлекеттік хатшысы Лина Хансенмен кездесу өткізді, оның аясында тараптар қазақ-дат сауда-экономикалық және инвестициялық ынтымақтастығының ағымдағы жай-күйі мен даму перспективаларын талқылады. Даниялық инвестицияларды тартуға және жаңартылатын энергетика, "жасыл" технологиялар, су шешімдері, агроөнеркәсіптік кешен, көлік және логистика, цифрлық мемлекеттік басқару және жасанды интеллект сияқты басым секторлардағы өзара іс-қимылды кеңейтуге ерекше назар аударылды. Сондай-ақ, дат компаниялардың Қазақстанға сауда миссиясын ұйымдастыру жоспарлары талқыланды.

Мемлекеттік хатшының орынбасары - Дания СІМ Саяси мәселелер жөніндегі директоры Е.Барлосемен кездесу барысында екіжақты және халықаралық күн тәртібіндегі өзекті мәселелер бойынша пікір алмасты.

Дат тарапы Данияның сыртқы саяси және сауда-экономикалық күн тәртібіндегі Орталық Азия аймағының өсіп келе жатқан маңыздылығын растады және 2026 ж. тамыздан бастап қызметке кірісетін Орталық Азия елдеріндегі арнайы өкілі Ларс Туесенді таныстырды.

Тараптар сондай-ақ сауда, инвестициялар және іскерлік белсенділік үшін неғұрлым қолайлы жағдайлар жасауға бағытталған екіжақты ынтымақтастықтың нормативтік-құқықтық базасын кеңейту жөніндегі жұмысты жандандыруға келісті.

Сапардың жеке блогы агроөнеркәсіп саласындағы ынтымақтастықты дамытуға арналды. ҚР Ауыл шаруашылығы Вице-министрі А.Бердалин Данияның Азық-түлік, ауыл шаруашылығы және балық шаруашылығы министрлігінің, сондай-ақ Данияның ауыл шаруашылығы және азық-түлік жөніндегі кеңесінің басшылығымен кездесулер өткізді.

Келіссөздер барысында тараптар сүтті мал шаруашылығында озық дат технологияларын енгізу перспективаларын, соның ішінде дат селекцияның жоғары өнімді асыл тұқымды сүтті малын импорттау жоспарларын талқылады. Ветеринариялық қауіпсіздік, ауыл шаруашылығы өнімдерін терең өңдеу, аграрлық өнімдердің өзара саудасын кеңейту, сондай-ақ Қазақстанның агроөнеркәсіптік кешеніне даниялық инвестицияларды тарту мәселелеріне ерекше назар аударылды.

 

Әңгімелесу барысында президенттер Қазақстан мен Беларусь арасындағы қарым-қатынас жүйелі түрде дамып келе жатқанын атап өтіп, ынтымақтастықтың барлық бағыты бойынша оң динамика байқалатынын атап өтті, деп хабарлайды Ақорданың баспасөз қызметінен.

Мемлекеттер басшылары сауда-экономикалық және мәдени-гуманитарлық ықпалдастықты одан әрі кеңейту мүмкіндіктерін талқылады.

Тараптар өңірлік және халықаралық күн тәртібінің өзекті мәселелері жөнінде пікір алмасып, алдағы бірлескен іс-шаралардың кестесін қарастырды.

Қасым-Жомарт Тоқаев Александр Лукашенконы Жоғары Еуразиялық экономикалық кеңестің кезекті отырысына және Еуразиялық экономикалық форум жұмысына қатысуға шақырды. Аталған жиындар мамыр айының соңында Астана қаласында өтеді.

 

Қасым-Жомарт Тоқаев Андрей Бабишке бұл мемлекеттік награда Чехия мен Қазақстан арасындағы стратегиялық серіктестікті нығайтуға қосқан елеулі үлесі үшін табысталғанын айтты, деп хабарлайды Ақорданың баспасөз қызметінен.

- Сіз Қазақстанның сенімді досы әрі халықаралық деңгейдегі көрнекті мемлекет қайраткерісіз. Екіжақты қарым-қатынасты табысты дамытуға бағытталған сындарлы ұстанымыңызды жоғары бағалаймын. Сіз өзара ықпалдастықты ілгерілету жолында аянбай еңбек етіп келесіз, сол себепті байланыстарымыздың келешегіне сеніммен қараймыз. Елдеріміз арасындағы саяси, сауда-экономикалық және мәдени-гуманитарлық ынтымақтастықты дамытуға зор үлес қосқаныңыз үшін Сізге І дәрежелі "Достық" орденін табыстау туралы шешім қабылдадым. Бұл жоғары марапат қазақ-чех берік достығының жарқын символына айналады. Серіктестігіміз болашақта да жанданып, нығая беретініне сенімдімін, - деді Президент.

Андрей Бабиш жоғары мемлекеттік наградамен марапаттағаны үшін Қасым-Жомарт Тоқаевқа ризашылығын білдірді.

- Екі ел арасындағы ынтымақтастықтың нәтижелі дамып келе жатқанына шынайы қуаныштымын. Саяси диалогымыз ашық әрі сындары сипатқа ие. Халықаралық аренадағы ықпалдастығымыз тұрақтылыққа, бейбітшілік пен серіктестікке бейіл екенімізді көрсетеді. Чех Республикасы Қазақстанның әлемдік аренадағы сенімді әріптесі екенін мақтан тұтады. Президент мырза, осы жоғары марапатқа лайық көргеніңіз және халықаралық серіктестік пен диалогты нығайтуға зор үлес қосқаныңыз үшін алғыс айтамын. Алдағы уақытта да халықтарымыз арасындағы достықты тереңдету, әлемде тұрақтылық орнату жолында қызмет ете береміз деп сенемін, - деді Чехия Премьер-министрі.

 

Екі ел делегацияларының қатысуымен өткен келіссөз барысында Президент өзара ықпалдастықты одан әрі нығайтудың әлеуеті мол екеніне тоқталды, деп хабарлайды Ақорданың баспасөз қызметінен.

- Екіжақты саяси ынтымақтастық пен экономикалық қарым-қатынастың болашағы зор деп санаймын. БҰҰ, ЕҚЫҰ және басқа да халықаралық ұйымдар аясындағы миссияларымыз тығыз жұмыс істеп, диалогты тұрақты түрде сақтап келеді. Көптеген бағыт бойынша байланыстарымызды дамытуға мүмкіндік жеткілікті, - деді Мемлекет басшысы.

Қасым-Жомарт Тоқаев Чехияның сындарлы әрі прагматикалық сыртқы саясатына жоғары баға берді. Президенттің айтуынша, екі ел арасындағы саяси диалог сан қырлы серіктестікке қолайлы жағдай жасайды. Парламентаралық ықпалдастық қарқынды дамып келеді.

Мемлекет басшысы Чехия Қазақстанның Еуропа Одағындағы негізгі сауда серіктестерінің бірі екеніне назар аударды.

- Тауар айналымының динамикасы көңіл көншітерліктей. Әрине, біз алдағы уақытта да сауда-экономикалық байланыстарды кеңейтуге ниеттіміз. Бүгінде елімізде 190-нан астам чех компаниясы жұмыс істеп жатыр, соның ішінде Škoda, Omnipol, Tatra және ZVVZ секілді маңдайалды кәсіпорындар мен басқа да өндіріс саласындағы сенімді әріптестеріміз бар. Бірлескен жобаларды жүзеге асыруға мүмкіндік мол, - деді Қасым-Жомарт Тоқаев.

Өз кезегінде Андрей Бабиш бүгінгі сапар екіжақты қарым-қатынастың жаңа кезеңіне жол ашатынын айтты.

- Біз Қазақстанды стратегиялық серіктес санаймыз. Бірлескен күш-жігердің арқасында екіжақты тауар айналымының көлемін арттырамыз деп сенемін. Ең алдымен, энергетика саласындағы ықпалдастықты нығайтқымыз келеді. Сіздің елден ұзақ мерзімді мұнай тасымалына мүдделіміз. Энергетика саласын дамыту стратегиямыз атом энергиясына арқа сүйейді. Сондықтан Қазақстанға әлемдегі уран өндіретін ірі мемлекет ретінде де қызығушылық танытамыз, - деді Чехия Премьер-министрі.

Чех Үкіметінің басшысы Қазақстанның энергетикалық қауіпсіздігі қуат өндірудің әртараптандырылған тәсіліне негізделгеніне мән берді. Сондай-ақ ол чех компанияларының аталған салада бірлескен жобаларды жүзеге асыруға дайын екенін растады.

Андрей Бабиш Қасым-Жомарт Тоқаевты жаңа Конституция қабылдау бойынша референдумның табысты өтуімен құттықтап, бұған мемлекеттілікті нығайтатын және елді жарқын болашаққа жетелейтін маңызды қадам ретінде баға берді.

Қасым-Жомарт Тоқаев пен Андрей Бабиш өнеркәсіп, мұнай-газ, атом энергиясы, көлік-логистика, қорғаныс өнеркәсібі, цифрландыру, ауыл шаруашылығы және денсаулық сақтау салаларындағы өзара ынтымақтастық перспективаларын талқылады.

Әңгімелесу барысында екі ел арасындағы қарым-қатынас тек экономикамен шектелмейтіні, ортақ тарихи оқиғалар мен мәдени-гуманитарлық байланыстарға негізделетіні жайында айтылды.

Мемлекет басшысы қазақ даласына Пржевальский жылқыларын қайта жерсіндіруді көздейтін бірегей жобаға атсалысқаны үшін чехиялық әріптестеріне ризашылығын білдірді. Президент Өңірлік экологиялық саммитте бұл бастаманы еліміздің биоалуантүрлілікті сақтау саласында жеткен жетістіктерінің бірі ретінде атаған болатын.

Премьер-министр Қазақстан азаматтарына виза режимін жеңілдету мәселесіне Чехияның екіжақты деңгейде және Еуропа Одағы аясында ықпал етуге ниетті екенін жеткізді.

Келіссөз қорытындысы бойынша тараптар жоғары деңгейде қол жеткізілген уағдаластықтарды нақты іске асыру үшін жобалар тізімін әзірлейді.

Андрей Бабиш Қасым-Жомарт Тоқаевты өзіне ыңғайлы уақытта Чехияға сапармен келуге шақырды. Мемлекет басшысы бұл ұсынысты ықыласпен қабыл алды.

 

Ақордада елімізге ресми сапармен келген Чех Республикасының Премьер-министрі Андрей Бабишті қарсы алу рәсімі өтті, деп хабарлайды Ақорданың баспасөз қызметінен.

Салтанатты шарада Қасым-Жомарт Тоқаев пен Андрей Бабиш бір біріне ресми делегация мүшелерін таныстырды. Құрмет қарауылының бастығы рапорт берген соң Қазақстан мен Чехияның әнұрандары орындалды.

Одан кейін Қазақстан Президенті мен Чехия Премьер-министрі келіссөз өтетін залға барды.

Қасым-Жомарт Тоқаев Андрей Бабишке ілтипат білдіріп, Қазақстан жұртшылығы оны Чех Республикасында ғана емес, Еуропаға белгілі саяси қайраткер ретінде жақсы білетінін жеткізді.

- Екі ел арасында бұрыннан тығыз әрі достық қарым-қатынас орнаған. Сауда-саттық табысты дамуда. Қос халықтың бір біріне құрметі зор. Ірі халықаралық құрылымдар шеңберінде бірлесе әрекет етіп келеміз. Бұл - өте маңызды. Елшіліктеріміз белсенді жұмыс істеп тұр. Орайлы сәтті пайдалана отырып, Өзіңізбен бірге чех кәсіпкерлерінен құралған үлкен делегация алып келгеніңіз үшін алғыс айтамын. Кеше Астанада бизнес-форум өтті. Оның нәтижесі елдерімізге пайдалы болады деп ойлаймын. Өз тарапымнан сан қырлы ынтымақтастығымызды одан әрі дамытуға бар күшімді саламын, - деді Президент.

Андрей Бабиш қонақжайлық танытқаны үшін Қасым-Жомарт Тоқаевқа ризашылығын білдіріп, еліміздің түрлі салада жеткен жетістіктеріне жоғары баға берді.

- Қазақстан - Орталық Азиядағы аса маңызды мемлекет. Сондықтан осынау ғажап елге сапармен келу - мен үшін зор мәртебе. Жақында жаңа Конституция қабылдадыңыздар. Құтты болсын! Сіздердің бұл бағыттағы тәжірибелеріңіз бізге де пайдалы болады деп есептеймін. Қазақстанға келу көптен бергі арманым еді. Өйткені мен университетті аяқтағаннан кейін, яғни, 1978 жылы Шымкент және Жамбыл (Тараз) қалаларымен өзара байланыс орнатқан департаментте жұмыс істедім. Қазақстан - энергетика саласында аса үлкен орны бар ел, әлемдегі уран өндіретін ірі мемлекеттердің қатарына кіреді. Бүгінде атом электр станцияларының маңызы арта түсті. Сол себепті осы салада келісімге келгенімізге қуаныштымын. Қазақстанның жасанды интеллект бағытындағы жетістіктері таңқаларлық. Екі елге ортақ дүние көп. Чехия мен Қазақстан үкіметтері өзара ынтымақтастықты одан әрі ілгерілету үшін аянбай еңбек етеді деп ойлаймын, - деді ол.

 

Қазақстан Республикасы Сыртқы істер министрлігінің Аппарат басшысы Амангелді Саинов Әзербайжан Республикасы Сыртқы істер министрінің орынбасары Эльнур Исрафил оглу Мамедовпен кездесті, деп хабарлайды Қазақстан Республикасы Сыртқы істер министрлігінің баспасөз қызметінен.

Келіссөздерге сыртқы саяси ведомстволардың кадрлық және қаржылық саясат, жылжымайтын мүлікті басқару және ақпараттық қауіпсіздік мәселелеріне жауапты құрылымдық бөлімшелер басшылары қатысты.

Дипломаттар дипломатиялық қызметтің рөлі және ұлттық мүдделерді тиімді ілгерілету мақсатында оларды одан әрі жетілдіру жолдары туралы пікір алмасты. Қазақстан мен Әзербайжанның сыртқы саяси ведомстволарының кадрлық саясатына, соның ішінде дипломаттарды іріктеу рәсімдерін жетілдіру және олардың кәсіби даярлығына ерекше назар аударылды.

Кездесу барысында сондай-ақ тараптар дипломатиялық өкілдіктер қызметін қаржылық қамтамасыз ету мен бюджеттік жоспарлаудың негізгі аспектілерін және дипломатиялық қызмет қызметкерлерін ынталандыру тетіктерін талқылады.

Сапар қорытындысы бойынша тараптардың ынтымақтастықты одан әрі тереңдетуге, тәжірибе алмасуды жүйелі түрде дамытуға және сыртқы саяси ведомстволар желісі бойынша бірлескен бастамаларды іске асыруға өзара мүдделілігі расталды.

 

Қазақстан Республикасы Президентінің жанындағы Мемлекеттік басқару академиясында магистратурада оқып жүрген жергілікті атқарушы органдардың бір топ мемлекеттік қызметкерлері Бакуда екі апталық оқу-тәжірибелік бағдарламадан өтті, деп хабарлайды Қазақстан Республикасы Сыртқы істер министрлігінің баспасөз қызметінен.

Бағдарлама Әзербайжан Республикасы Президентінің жанындағы Мемлекеттік басқару академиясы тарапынан ұйымдастырылып, мемлекеттік басқарудағы цифрлық трансформация, заң шығару қызметіндегі цифрландыру, гендерлік теңдік саясаты, туризм саясаты, экологиялық басқару, адам құқықтары, мемлекеттік егемендік және халықаралық қатынастар тақырыптарындағы дәрістерді қамтыды.

Бағдарлама аясында қатысушылар Парламенттің, ASAN инновациялар орталығының, Экономикалық реформаларды талдау және коммуникациялар орталығының, Халықаралық қатынастарды талдау орталығының, Отбасы, әйелдер және балалар мәселелері жөніндегі мемлекеттік комитеттің қызметімен танысты, сондай-ақ Қазақстанның Әзербайжандағы Елшілігінде болды.

Қазақстанның Бакудағы Елшісі Әлім Байел магистранттармен кездесу барысында мемлекеттік басқару саласындағы тәжірибе алмасу, бірлескен оқу бағдарламалары мен академиялық ынтымақтастық Қазақстан мен Әзербайжан арасындағы байланыстарды дамытуда маңызды рөл атқаратынын атап өтті. Мұндай іс-шаралар арқылы мемлекеттік қызметкерлер өздерінің кәсіби біліктілігін арттырып қана қоймай, бауырлас халықтардың мәдениеті мен мұраттарын, достас елдердің қоғамдық өмірінің қыр-сырын тереңірек танып-біледі.