Елордада үздік әлеуметтік жобалардың авторлары марапатталды

Нұр-Сұлтан. 4 қараша. Kazakhstan Today - Нұр-Сұлтан қаласында "Қазақстанның үздік әлеуметтік жобалары" VII республикалық конкурсының қорытындысы шығарылды. Марапаттау рәсімі Тәуелсіздік сарайында ҚР Премьер-Министрінің орынбасары Бердібек Сапарбаевтың, ҚР Еңбек және халықты әлеуметтік қорғау министрі Біржан Нұрымбетовтің, ҚР Президенті Әкімшілігінің және ҚР Үкіметі өкілдерінің, ҚР Парламенті депутаттарының және ҮЕҰ өкілдерінің қатысуымен өтті.

Биыл конкурсқа қатысуға 224 өтінім келіп түсті,оның ішінде өңірлік кезең барысында 57 жоба таңдап алынды. Алпыс шақты жобаны қарап шыққан комиссия мүшелері "Қазақстанның үздік әлеуметтік жобалары" республикалық көрмесінің қатысушыларын анықтады. Олардың ішінде Алматы қаласынан 4 жоба, Жамбыл облысынан 2 жоба, Шымкент қаласы, Павлодар, Қостанай, Алматы, Ақтөбе, Түркістан, Батыс Қазақстан және Солтүстік Қазақстан облыстарынан 1 жоба ұсынылды.

Комиссия құрамына ҚР Еңбек және халықты әлеуметтік қорғау министрлігінің өкілдері, ҚР Парламентінің депутаттары, бизнесмендер, ҮЕҰ және БАҚ басшылары, сондай-ақ әлеуметтік сала ардагерлері кірді. Биылғы жылы жобалар "Әлеуметтік проблемаларды шешуді ақпараттық ілгерілету", "Әлеуметтік саладағы волонтерлік қозғалысты дамыту", "Тең мүмкіндіктерді қамтамасыз ету", "Мүгедектігі бар адамдарды қоса алғанда, азаматтарды жұмыспен қамтуға көмек көрсету" және "Өмірлік қиын жағдайларды жеңуге көмек көрсету" 5 бағыты бойынша бағаланды.

Құттықтау сөз сөйлеген Бердібек Сапарбаев әлеуметтік қызметкер мамандығының қаншалықты маңызды әрі жауапты екендігін баса айтты.

"Әлеуметтік қызметкер - бұл борыш! Сіздер күн сайын қолдауға мұқтаж адамдардың қамқорлығы мен проблемаларын өз мойындарыңызға аласыздар. Сіздер уайымдап, шынайы көмек те көрсетесіздер. Қарттарға, мүгедектерге, балалы отбасыларға көмектесу арқылы сіздер оларға жылулық пен көтеріңкі көңіл сыйлайсыздар. Оларды көңілдендіріп, жүректерінде үміт пен сенімді оятасыздар. Сіздердің мамандықтарыңыз өте маңызды әрі мәртебелі. Азаматтарымыздың әлеуметтік көңіл-күйі сіздердің күнделікті еңбектеріңізге байланысты. Осынау мереке күнінде ерен еңбектеріңіз, адамдарға деген қамқорлықтарыңыз бен сүйіспеншіліктеріңіз үшін шынайы ризашылығымды білдіруге рұқсат етіңіздер" - деді Бердібек Сапарбаев.

Конкурс жеңімпаздарын құттықтай отырып, Біржан Нұрымбетов олардың жұмысының маңыздылығын атап көрсетті.

"Конкурстың барлық қатысушыларын шын жүректен құттықтаймын! Сіздер өз жобаларыңызды дайындай және іске асыра отырып, арнаулы әлеуметтік қызмет көрсету жүйесін жетілдіруге үлкен үлес қосып келесіздер. Финалға шыққан жобалардың әрқайсысы бүкіл республика бойынша енгізуге лайықты деп сеніммен айта аламын. Сіздерге қол жеткізген жетістіктеріңізбен тоқтап қалмай, азаматтарға көмек көрсетуге бағытталған игі істер жасауды жалғастыра берулеріңізді тілеймін", - деді министр.

"Қазақстанның үздік әлеуметтік жобалары" конкурсының жеңімпазы Алматы облысының "Адаптивті атқа міну" жобасының үйлестірушісі Қуаныш Нұрмахамбет болды. Бұл жоба иппотерапия бойынша қызмет көрсету арқылы ерекше қажеттіліктері бар баланың дене белсенділігін дамытуға бағытталған.

Қуаныш Нұрмахамбеттің айтуынша, екі жыл ішінде 80-ге жуық адам атқа міну арқылы ақысыз оңалту қызметтерін алған. Осының нәтижесінде мүгедектігі бар балалардағы вестибулярлы және тірек-қимыл аппараты мен барлық бұлшықет топтарының функциялары жақсарып, вегетативті жүйке жүйесіне оң әсерін тигізді.

Екінші орынға алматылықтар Ләззат Қалтаеваның - "Мүгедектігі бар қыздарға арналған жеке өмір мектебі" мен Раиса Сыпабекованың - "Шыңға Өрлеу" әлеуметтік клубы жобалары ие болды.

"Мүгедектігі бар қыздарға арналған тәуелсіз өмір мектебі" жобасы мүмкіндіктері шектеулі жастарды қоғамға ықпалдастыруға, елде инклюзивті қоғам құруға бағытталған. Мұнда оларға мүгедектікке қатысты қорқыныш пен қауіпсіздікті жеңуге көмек көрсетіледі, өзін-өзі бағалауды жоғарылату мен өз өмірін жоспарлау және шешім қабылдау дағдыларын қалыптастыру бойынша жұмыс жүргізіледі.

"Шыңға өрлеу" жобасы көпбалалы және табысы аз отбасыларда тәрбиеленетін кіші мектеп жасындағы балаларға өмірлік тәжірибені, білім мен дағдыларды берудің үйлесімді процесін қалыптастыру арқылы, әр түрлі форматтағы нәтижелі, екі жақты қарым-қатынас жасаудың нітижесінде өмірде қиын жағдайға тап болған аға буын өкілдерін қоғам өміріне тартуды көздейді.

Үшінші орынды Солтүстік Қазақстан облысынан Сәлімхан Сәбитовтың "Тең жол" және Қостанай облысынан Айсұлу Жұмабаеваның "Мүгедектігі бар адамдарды қоса алғанда, азаматтарды жұмыспен қамтуға көмек көрсету" жобалары иеленді.

Сәлимхан Сәбитовтің жобасы - бұл қолмен басқарылатын көлікте автомобиль курстарын ұйымдастыру және жүргізуші куәліктерін беру арқылы тірек-қимыл аппараты бұзылған адамдарды оқытуды ұйымдастыру. Мүгедектігі бар әйелдерді жұмысқа орналастыратын тігін цехы - Айсұлу Жұмабаеваның табысты жобасы.

Жүлделі орындарға ие болған конкурс жеңімпаздары: 1 орын - 1,5 млн теңге, 2 орын - 1 млн теңге, 3 орын - 500 мың теңгеге ақшалай сертификаттармен, дипломдармен және стеллалармен марапатталды. Барлық финалистерге алғыс хаттар мен сыйлық сертификаттары табыс етілді.

Сонымен қатар, ҚР Еңбек және халықты әлеуметтік қорғау министрлігінің сайтында өткізілген онлайн дауыс беру нәтижелері бойынша ең көп дауыс жинаған үш жеңімпаз анықталды: 1 орынға - Павлодар облысынан Светлана Качураның "Жүрек үнімен" жобасы (9911 дауыс), 2 орынға - Нұр-Сұлтан қаласынан Евгения Чеботаревскаяның "Шуақты әлем" жобасы (8422 дауыс), 3 орынға - Шымкенттік Камила Ишметованың "Ерекше балаларға арналған аква терапиясы" жобасы, (5100 дауыс) тұрақтады. Онлайн дауыс беру жеңімпаздары бағалы сыйлықтармен марапатталды.

Салтанатты шара Гүлзира Бөкейхан, Нұрғали Тұрлыбеков, Тамара Асар, Ғаділбек Жанай, Ерхан Төлейбек, Қазақ саңыраулар қоғамы, Қазақ филармониясының ұжымы және "Назар" тобының қатысуымен ұйымдастырылған концертке ұласты.

Естеріңізге сала кетейік, "Қазақстанның үздік әлеуметтік жобалары" конкурсы өзекті әлеуметтік мәселелерді шешуге, соның ішінде мүгедектігі бар және мүгедек балалары бар отбасыларды оңалтуға, мүмкіндіктері шектеулі адамдарға әлеуметтік инфрақұрылым нысандарына кедергісіз қолжетімділікті қамтамасыз етуге, жұмысқа орналасуға, сондай-ақ олардың құқықтарын іске асыруға және қорғауға бағытталған жобаларды қолдау мақсатында өткізіледі. 2013 жылдан бастап 2019 жылға дейін конкурсқа қатысуға 1 192 өтінім берілді, оның ішінде өңірлік деңгейде 228 әлеуметтік жоба және республикалық деңгейде 19 жоба жеңімпаз деп танылды.

Ақпаратты пайдаланѓан жаѓдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігініњ материалдарына авторлық қ±қық.