Стартап-жобаларға ие мүгедектікі бар тұлғаларды қолдау шаралары қаралды
Кездесу екі сессиядан тұрды, оның біріншісі мүгедектігі бар тұлғалардың құқықтары бойынша Біріккен ұлттар ұйымы мен үкіметтік емес ұйымдардың ұсынымдарын орындауға арналды, ал екіншісі - лайықты өмір сүру деңгейіне мүмкіндік.
Алматы. 28 қыркүйек. Kazakhstan Today - ҚР еңбек және халықты әлеуметтік қорғау вице-министрі Ерлан Әукеновтің төрағалығымен, үкіметтік емес ұйымдар жасаған 50 жол картасын ескере отырып, Экономикалық, әлеуметтік және мәдени құқықтар туралы халықаралық пактінің ұсынымдарын талқылау бойынша онлайн режимде жұмыс тобының үшінші отырысы өтті. Кездесу барысында кәсіпкерлікпен айналысатын немесе стартап-жобаларға ие мүгедектікі бар тұлғаларды қолдау шаралары, сондай-ақ инклюзивті білім беруді ұйымдастыру және осы санаттағы азаматтарды жұмыспен қамту туралы шаралар жайы айтылды.
Кеңеске орталық мемлекеттік органдардың басшылары, ҚР Президенті Әкімшілігі жанындағы Адам құқықтары жөніндегі комиссияның хатшысы Тастемір Әбішев, Әйелдер істері және отбасылық-демографиялық саясат жөніндегі ұлттық комиссияның сарапшысы Әлия Айсина, Адам құқықтары жөніндегі ұлттық орталықтың сарапшысы Данияр Сабирин, сондай-ақ үкіметтік емес сектор өкілдері қатысты.
Кездесу екі сессиядан тұрды, оның біріншісі мүгедектігі бар тұлғалардың құқықтары бойынша Біріккен ұлттар ұйымы мен үкіметтік емес ұйымдардың ұсынымдарын орындауға арналды, ал екіншісі - лайықты өмір сүру деңгейіне мүмкіндік.
Ерлан Әукенов мүгедектігі бар тұлғалардың тұрмыстық жағдайын жақсарту бойынша, оның ішінде қолданыстағы заңнамаға өзгерістер туралы (24 заңнамалық актіге және 3 кодекске түзетулер енгізу), жүргізіліп жатқан кешенді жұмыстар туралы хабарлады.
Вице-министр өз сөзінде мүгедектігі бар адамдарды белсенді жұмысқа тарту мәселесіне ерекше назар аударды.
"Қазіргі уақытта мүгедектігі бар тұлғаларды одан әрі жұмысқа орналастыру үшін сұранысқа ие мамандықтар бойынша оқыту жүргізілуде. Мәселен, ерекше қажеттіліктері бар 120 адам IT-мамандықтар бойынша білім алуда. Кәсіппен айналысатын немесе стартап жобалары бар мүгедектігі бар тұлғаларға акселерация, істі кеңейту, бизнес-тәлімгерлік, оқыту, жаңа нарықтарға шығуға көмектесу мақсатында көмек көрсетіледі", - деді Ерлан Әукенов.
Сонымен қатар, ағымдағы жылдың қараша айында мүгедектігі бар азаматтарға арналған Мамандықтар атласын әзірлеу аяқталуда. Бұл жұмыс берушілерге, жұмыспен қамту орталықтарына және жеке HR-агенттіктерге, шектеу түріне сәйкес бос жұмыс орындарын таңдауға, Электронды еңбек биржасы арқылы бос жұмыс орындарын таңдауды автоматтандыруға мүмкіндік береді.
Сондай-ақ, кездесуде, БҰҰ мүгедектердің құқықтары жөніндегі арнайы баяндамашысы Каталина Агилар сөз сөйледі. Бұған дейін, ол, мүмкіндігі шектеулі жас әйелдердің репродуктивті денсаулықты қорғау құқығын заңнамалық деңгейде тануды ұсынды. Осыдан кейін ҚР "Халық денсаулығы және денсаулық сақтау жүйесі туралы" Кодексінде азаматтардың еркін репродуктивті таңдауы, репродуктивті денсаулықты қорғау қызметтерін алу және отбасын жоспарлау құқықтары анықталды.
Сонымен қатар, бұған дейін қазақстандық үкіметтік емес ұйымдар мұғалімдерді оқытуды және мүгедектігі бар балалардың қажеттіліктері үшін қарапайым мектептердегі сыныптарды бейімдеуді ұсынған. Ұсынымдарды орындау үшін мектепке дейінгі және орта білім беру ұйымдары, сондай-ақ арнайы білім беру ұйымдары жабдықтармен және жиһаздармен жабдықталуда.
"Қазақстандағы парламентаризмді дамыту қоры" ҚҚ президенті Зәуреш Батталова халықтың тұрмысы төмен және ғаріп топтарына жататын адамдарға әлеуметтік тұрғын үйді кезектен тыс беруді көздейтін "Тұрғын үй қатынастары туралы" заңға өзгерістер енгізу туралы мәселені қарауды ұсынды.
Осы мәселені шешу үшін ағымдағы жылдың 11 мамырында Мемлекет басшысының төрағалығымен өткен Төтенше жағдай жөніндегі мемлекеттік комиссияның қорытынды отырысында, жыл соңына дейін Қазақстан Үкіметіне есепке алу, кезекке қою және тұрғын үйді бөлу құзыретін бере отырып, "Қазақстанның тұрғын үй құрылыс жинақ банкі" АҚ негізінде толыққанды даму және қолдау институты - "Отбасы банкін" құру тапсырылды. Банкте тұрғын үйге мұқтаж барлық адамдардың есебін жүргізетін, кезекте тұрғандардың мәліметтер қорын қалыптастыратын және жүргізетін, сонымен қатар тұрғын үйді, оның ішінде жалға берілетін баспананы тарататын "Тұрғын үймен қамтамасыз ету орталығы" құрылады.
Кездесуді қорытындылай келе, Ерлан Әукенов, ҚР Еңбек және халықты әлеуметтік қорғау министрлігі Әлеуметтік қызметтер саясатын дамыту департаментіне мүдделі мемлекеттік органдармен бірге мүгедектігі бар тұлғалардың құқықтары жөніндегі ұсынымдарды жүзеге асыруға қатысты үкіметтік емес ұйымдардың ұсыныстарын қарауды, сондай-ақ 2025 жылға дейінгі Қазақстан Республикасында мүгедектігі бар адамдардың құқығын қамтамасыз ету және өмір сүру сапасын жақсарту жөніндегі Ұлттық жоспарды іске асыру аясында бірлескен жұмысты жалғастыруды тапсырды.
Ақпаратты пайдаланѓан жаѓдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігініњ материалдарына авторлық қ±қық.
тақырып бойынша жаңалықтар
Алматыдағы рекреациялық аймаққа 230 гектарға жуық жер қайтарылды
Антикор Қоғамдық кеңесінің отырысында Алматы қаласының тау бөктеріндегі құрылыстың проблемалық мәселелері қаралды, деп хабарлайды Сыбайлас жемқорлыққа қарсы іс-қимыл агенттігінің баспасөз қызметінен.
Ағымдағы жылдың 26 сәуірінде Алматы қаласында Қазақстан Республикасы Сыбайлас жемқорлыққа қарсы іс-қимыл агенттігінің Қоғамдық кеңесінің көшпелі отырысы өтті.
Іс-шараға Агенттіктің Төрағасы Асхат Жұмағали, Алматы қаласының әкімі Ерболат Досаев, өнеркәсіп және құрылыс, ауыл шаруашылығы, төтенше жағдайлар, су ресурстары, экология, денсаулық сақтау министрліктерінің басшылық құрамы және т.б. қатысты.
Іс-шараның модераторы Парламент Мәжілісінің депутаты, Қоғамдық кеңестің төрағасы Марат Башимов болды.
Күн тәртібінде Агенттіктің 2023 жылы әкімдікпен бірлесіп өткізген Алматы қаласының тау бөктеріндегі құрылыс саласындағы жемқорлық тәуекелдерін сыртқы талдау қорытындылары бойынша ұсынымдарды іске асыру мәселесі қаралды.
Агенттік Төрағасы кіріспе сөзінде талдау қорытындысы бойынша анықталған негізгі жемқорлық тәуекелдері туралы айтып, олардың орындалуы ерекше бақылауда екенін атап өтті.
Өздеріңіз білетіндей, Мемлекет басшысы Алматы қаласын дамытуға, оңтүстік астананың жайлы қалалық ортасын құруға ерекше көңіл бөледі. Ел Президенті қаланың нүктелік құрылыс тәжірибесін жою қажеттігін бірнеше рет атап өтті, ал құрылыс кезінде оның тұрғындарының мүдделерін міндетті түрде ескеру қажет", - деп атап өтті Антикор басшысы.
Осыған байланысты, отырыс барысында жауапты орындаушылар тарапынан ұсыныстарды орындаудың сапасы мен уақыттылығына, формализмді жоюға ерекше назар аударылды.
Іс-шара аясында баяндамашылар жүргізілген жұмыстың нәтижелерін айтты.
Мәселен, Алматы қаласының жаңа Бас жоспары әзірленіп, бекітілді, онда табиғи сипаттағы төтенше жағдайларға ұшыраған аумақтар ескерілді.
Тұрғын аймақтан 229 га жер рекреациялық аймаққа қайтарылды, сібір жарасы бар жер учаскесі мемлекеттік меншікке берілді, барлық су объектілеріне түгендеу жүргізілді.
Тау бөктерінде анықталған 54 заңсыз объект бойынша мемлекет пайдасына 36 сот актісі шешілді, оның 30-ы заңды күшіне енді, 2 заңсыз объект бұзылды, тағы 3-і бұзуды күтуде.
Сонымен қатар, Парламент Мәжілісінде бірқатар заң жобалары қаралуда, онда Агенттіктің мемлекеттік сәулет-құрылыс бақылауының жауапкершілігін күшейту, ТЖМ-ге қала құрылысы жобаларын келісу, жекелеген құрылыс ұғымдарын регламенттеу және т.б. өкілеттіктер беру жөніндегі ұсынымдары ескерілген.
Қорытындылай келе, Агенттік Төрағасы қаралған мәселенің маңыздылығын атап өтіп, бірінші кезекте мегаполис тұрғындарының қауіпсіздігіне баса назар аудару қажеттігін айтты.
Бұл алаң кездейсоқ таңдалған жоқ, себебі талқыланып отырған мәселе қала жұртшылығы үнемі назарында және әрбір тұрғын бұл үшін алаңдайды, бұл халықты осы бағыттағы мемлекет жүргізіп жатқан жұмыс туралы хабардар етуді талап етеді", - деп атап өтті Антикор басшысы.
Іс-шара соңында жауапты орындаушыларға жоспарланған іс-шараларды қысқа мерзімде аяқтау үшін толық шаралар қабылдау бойынша нақты ұсыныстар берілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Президенті су тасқынынан кейін өңірлерді қалпына келтіру мерзімдерін белгіледі
Сурет: ТЖМ
Қазақстан президенті Қасым-Жомарт Тоқаев Қазақстан халқы Ассамблеясының "Бірлік. Жасампаздық. Өрлеу" атты ХХХІІІ сессиясының отырысында сөйлеген сөзінде су тасқынынан кейін өңірлерді қалпына келтіру мерзімдерін белгіледі, деп хабарлайды Мемлекет басшысының баспасөз қызметі.
Қазақта "Алпыс күн тасыған дария, алты күнде қайтады" деген сөз бар. Көп ұзамай қарғын су кетіп, жұрт күнделікті өмірге оралады. "Әр қиындықтың қайыры бар" дейді халқымыз.
Біріншіден, тасқын кезінде ел бірлігі нығая түсті. Арқадағы ағайынға, Жайықтағы жұртқа бүкіл Қазақстан халқы көмектесуге ұмтылды. Апат аймағында тұратын адамдар барша отандасымыздың шынайы жанашырлығын сезінді.
Екіншіден, елдің жағдайын жақсарту үшін ешкім қиындықтың келуін күтіп отырмайтыны анық. Дегенмен, мұндай апаттар біраз шаруаны шұғыл қолға алуға себепкер болады.
Тасқын аяқталған соң кейбір ауылдар тың жерге қоныстанып, жаңадан бой көтереді. Жол салынады, су тартылады. Ауылдарымыз мүлде жаңа келбетке ие болады. Жалпы, әлемдегі үлкен дағдарыстардың қарқынды дамуға жол ашатыны белгілі", деді президент.
Қазіргі алапат тасқын да, түптеп келгенде, елімізге оң әсерін тигізеді деп ойлаймын. Сын сағатта жұдырықтай жұмылған жұртымыз осы қалпында өрлеу, жаңғыру кезеңіне қадам басады. Бәрі де жақсы болады.
Бәріміз - бір елдің азаматымыз. Тарих тоғыстырған тағдырымыз - бір, сеніммен қадам басатын келешегіміз - бір. Біз біртұтас ұлт ретінде әрдайым бабалар аманатына адал боламыз. Қасиетті қара шаңырағымыз - Қазақстанның жарқын болашағын бірге жасаймыз. Біздің мақсатымыз - айқын, бұл - Әділетті Қазақстанды құру.
Мен Қазақстан Республикасының Тәуелсіздігін қорғауды Президент ретіндегі ең басты міндетім деп санаймын. Осы қастерлі міндет Әділетті Қазақстанды құру және белсенді әрі сындарлы сыртқы саясат жүргізу арқылы ғана орындалады. Биік мақсатқа жету үшін түрлі кедергіден өтеміз, барлық қиындықты жеңеміз. Ауқымды міндеттерді орындаймыз. Біз еліміздің басты құндылықтары мен бағыт-бағдарынан айнымаймыз. Мемлекеттілігімізді нығайтып, тәуелсіздік туын әрдайым биік ұстаймыз. Мен бұған нық сенемін және сол үшін бәрін жасаймын. Бұл - менің президенттік әрі перзенттік парызым.
Еліміз аман, жұртымыз тыныш болсын!", деп түйіндеді өз сөзін Қасым-Жомарт Тоқаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бектенов Атырау облысында су басу қаупін азайту үшін қабылданып жатқан шаралардың барысын тексерді
Қазақстан Премьер-Министрі Олжас Бектенов Мемлекет басшысы Қасым-Жомарт Тоқаевтың тапсырмаларын орындау аясында Атырау облысында су басу қаупін азайту үшін қабылданып жатқан шаралардың барысын тексерді, деп хабарлайды Үкіметтің баспасөз қызметінен.
Олжас Бектенов облыс орталығындағы тұрғын үй алаптары бекіністерін тексеру барысында Атырау қаласының су тасқынының болжамды екінші толқынына дайындық жұмыстарымен танысты. Батыс өңірде Ресей Федерациясының Ириклин су қоймасынан судың келуіне байланысты, сондай-ақ Жайық өзеніне құйылар сағадағы ірі тасқын мен су деңгейінің көтерілуі салдарынан жағдай күрделі күйінде қалып отыр.
Бұрын хабарланғандай, Батыс Қазақстан облысындағы ірі су тасқынынан кейін ағын су өзен арнасымен Атырау облысына қарай жылжып, Каспий теңізіне құяды. Соңғы тәулікте БҚО тарапынан келетін судың әсерінен Атырау қаласында су деңгейінің 6 см-ге көтерілуі тіркелді (су тасқыны басталғаннан бері жалпы көтерілуі 227 см-ді құрады).
Тұрғын үй алаптарын нығайту, сондай-ақ Жайықтың өткізу қабілетін арттыру үшін өзен түбін тереңдету жұмыстарының қарқыны тексерілді. Тиісті күштердің көлемді судың келуіне дайындық деңгейін қарап көрді.
Үкімет басшысы Олжас Бектенов Атырау облысына су тасқыны жағдайы тұрақтанған өңірлерден әскери қызметшілер мен техниканы жедел жеткізіп, күштерді арттыруды тапсырды.
Бүгінгі таңда су тасқынының алдын алу шараларының 92%-ы орындалды. Жұмысты тиімді жүргізу үшін қала 111 секторға бөлінген. Ұзындығы 482 км қорғаныс бөгеттері салынды, аяқталған учаскелер техникалық қадағалау арқылы тексерілді. Жұмыстарға ТЖМ, ІІМ, Қорғаныс министрлігі, Ұлттық ұланның 6 мыңға жуық әскери қызметшісі, әкімдік қызметкерлері, 2 мыңға жуық техника жұмылдырылған. Еріктілер тарапынан белсенді көмек көрсетілуде. Өткен сенбіде жағалауды нығайту сенбілігі аясында қаланы қорғау жұмыстарына 9 мыңға жуық ерікті қатысты.
Сонымен қатар Жайық өзенінен Каспий теңізіне су өткізу қабілетін арттыру үшін өзен түбін тереңдету жұмыстары жүргізілуде. Су жолдарын тазарту, тереңдету және кеңейту мақсатында арнайы техникалық флоттық кемелер, гидравликалық экскаваторлар қолданылуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.