Қазақстанда ауыл шаруашылығы техникасының тозуы 80 пайызға жеткен
Қасым-Жомарт Тоқаев Қостанай облысына жұмыс сапары аясында "АгромашХолдинг KZ" акционерлік қоғамының Локализация орталығын аралап көрді, деп хабарлайды Ақорданың баспасөз қызметінен.
Президентке дөңгелекті ауыл шаруашылығы техникалары мен жалпы машина жасау саласы үшін қосалқы бөлшектер шығаратын кәсіпорынның жұмысы таныстырылды. Бүгінде мұнда 700 адам еңбек етеді. Зауыт жылына 250 мыңға жуық бөлшек өндіреді. Жыл басынан бері зауыттан 1 мыңға жуық трактор мен 300 комбайн шығарылған.
Президентке Локализация орталығы CLAAS тракторлары мен комбайндарының бірқатар қосалқы бөлшегін дайындауға тапсырыс алғаны жөнінде баяндалды. Бұдан бөлек, жуырда аспалы және тіркемелі техникаларды өндіруде әлемде үздік саналатын AMAZONE компаниясымен келісімшартқа қол қойылады. Биыл зауытта дән себу және бүрку қондырғыларының өндірісі де іске қосылмақ.
Мемлекет басшысына орталық қазіргі уақытта KIA компаниясымен бірлесіп, 2025 жылы іске қосылатын жаңа зауыттың құрамдас бөліктеріне арналған жабдықтар өндіру жұмыстарын бастағаны туралы мәлімет берілді.
Қасым-Жомарт Тоқаев кәсіпорынның еңбек ұжымымен жүздесті. Зауыт жұмысшылары Президенттің Қазақстан халқына арнаған Жолдауын зор ықыласпен тыңдағанын, әсіресе, жұмысшы мамандардың беделі арта түсетініне ерекше қуанғандарын жеткізді.
Мемлекет басшысы орталық жұмысшыларымен әңгімелесу барысында өндірістегі жергілікті үлесті арттыру, білікті мамандар даярлау және ауыл шаруашылығы техникаларын жаңарту қажет екеніне тоқталды.
Елімізде тозығы жеткен техникалар өте көп. Кейбір мамандардың айтуынша, ол 80 пайызға дейін жеткен. Қазақстанда шығарылған техниканың есебінен барлық паркті жаңартатын уақыт келді. Қазір колледждерде жұмысшы мамандықтар бойынша білім алған жастардың өндіріске келгені қуантады", − деді Қасым-Жомарт Тоқаев.
Өз кезегінде зауыт еңбеккерлері машина жасаушылардың атынан Президентке жұмысшы мамандарға қолдау көрсеткені үшін алғыс айтты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Ұлытау облысының жаңа әкімі тағайындалды
Қазақстан Республикасының Президенті Қасым-Жомарт Тоқаев Ұлытау облысының жаңа әкімін тағайындады, деп хабарлайды Ақорданың баспасөз қызметінен.
Дастан Адайұлы Рыспеков Ұлытау облысының әкімі лауазымына тағайындалсын", деп көрсетілген президент жарлығында.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Соңғы 5 жылда алғаш рет Аралға су жіберу жоспары 100%-ға жуық орындалды
Биыл соңғы 5 жылда алғаш рет вегетация кезінде Арал теңізіне су жіберу жоспары 100%-ға жуық орындалды. Жалпы 977 млн текше метр су жіберілді, деп хабарлайды Үкіметтің баспасөз қызметінен.
Соңғы жылдары теңізге 350-400 млн текше метр су келіп отырса, биылғы жылдың басынан бері бұл көлем 2 млрд текше метрден асты, ал жыл соңына дейін тағы шамамен 500 млн жіберу жоспарланып отыр.
Бүгінгі таңда Солтүстік Арал теңізінің су көлемі 22 млрд текше метрге жетті. Теңізге осыған дейін вегетация кезінде секундына 7-10 текше метр су жіберілген болса, биыл секундына 60-70 текше метр су жіберілді", - деп мәлімдеді Арал-Сырдария бассейндік инспекциясы басшысының орынбасары Зейнулла Қазтоғанов.
Бұдан бөлек, Ақшатау-Сорғақ және Қамыстыбас көлдер жүйесіне 45 млн текше метрден астам су жіберілді. Бұл балық шаруашылығы мен туризімді дамытуға тиімді әсер етіп отыр. Мәселен, соңғы жылдары Арал теңізінің минерализациясы азайып, балықтың көбейуіне жағымды әсер етуде. Теңіз тартылғаннан бері жергілікті балықшылар жылына 400 тонна ғана балық ауласа, қазір 7,5-8 мың тоннаға дейін балық аулайды.
Қаратерең ауылының 76 жастағы тұрғыны, балықшы Күнтуған Тұрғанбаев өмір бойы осы кәсіппен айналысып келеді. Оның айтуынша, туған өлкеге су келгелі жаңа мүмкіндіктер пайда болған.
Көзімізді ашқаннан теңізден балық аулаумен айналысып келеміз. Су келгелі балық та жанданып, дарияға кіріп жатыр. Биыл былтырғыға қарағанда балық көбірек. Аралды осы деңгейде ұстап тұрса, балық шаруашылығы дамиды", - дейді ол.
Осы ретте Су ресурстары және ирригация министрлігі Дүниежүзілік банкпен бірлесіп Солтүстік Арал теңізін сақтау жөніндегі жобаның екінші кезеңіне дайындалып жатыр. Қазіргі уақытта жоба бойынша қажетті құжаттама әзірленуде. Екінші кезең Солтүстік Аралды тұрақты сумен қамтамасыз етуден бастап экономикалық және әлеуметтік жобаларды дамытуға дейінгі түрлі бағыттарды қамтиды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Астанада "Elorda zhastary" бағдарламасы бойынша іріктеу нәтижелері белгілі болды
Елордалық тұрғын үй орталығы "Elorda zhastary" бағдарламасы бойынша іріктеу нәтижелерінің жарияланғанын хабарлады, деп хабарлайды Астана әкімдігінің баспасөз қызметінен.
Нәтижелерді zhilfond.kz порталынан және www.gov.kz Астана тұрғын үй және тұрғын үй инспекциясы басқармасының ресми сайтынан көруге болады. Онда барлығы үш тізім жарияланған: "Мақұлданды", "Резерв" және "Қабылданбады".
Мақұлданды" тізіміндегі азаматтарға 8 қазанда өтінім беру кезінде көрсетілген электрондық поштаға (мүмкін "Спам" папкасында болады), "Отбасы банк" АҚ-ға жіберудің электрондық нұсқасы жіберіледі, оны басып шығару қажет. 10 жұмыс күні ішінде онымен төлем қабілеттілігін бағалау үшін Астанадағы "Отбасы банк" АҚ-тың кез келген бөлімшесіне жүгіну керек. Жолдаманы алған сәттен бастап белгіленген мерзімде банкке келмеген жағдайда, тұрғын үй Орталығы оның күшін жоюға құқылы.
Резерв" тізіміндегі азаматтар бағдарламаның негізгі шарттарына сәйкес келеді, алайда аз балл жинап, лимиттің аяқталуына байланысты резервтік тізімге енгізілген. Егер мақұлданғандардың негізгі тізімінен банкте төлем қабілеттілігін растамағандар болса, төлем қабілеттілігінен өтуге жолдама тізімдегі кезектілікке сәйкес резервтік тізімнен азаматтарға берілетін болады.
Қабылданбады" тізіміндегі азаматтар не себепті бағдарлама талаптарына сәйкес келмегенін birge.astana.kz порталындағы жеке кабинетте толығырақ танысуға болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.