Елбасы Қазақстанға ресми сапармен келген Қырғыз Республикасының президентімен кездесті
Астана. 10-мамыр. Kazakhstan Today - Мемлекет басшысы Нұрсұлтан Назарбаев Қазақстанға ресми сапармен келген Қырғыз Республикасының Президенті Алмазбек Атамбаевпен кездесті, деп хабарлайды Kazakhstan Today агенттігінің тілшісі.
ҚР президентінің баспасөз қызметінің хабарлауынша, Ақордадағы кездесудің ресми рәсімінен кейін шағын және кең құрамда келіссөздер болып өтті. Қазақстан Республикасының Президенті Нұрсұлтан Назарбаев пен Қырғыз Республикасының Президенті Алмазбек Атамбаев екіжақты өзара іс-қимылдың өзекті мәселесін талқылады, сауда-экономикалық және мәдени-гуманитарлық ынтымақтастықты одан әрі дамыту жөніндегі міндеттерді белгіледі, сондай-ақ екі ел арасындағы өзара іс-қимылдың перспективалық бағыттарын анықтады. Келіссөздер барысында Қазақстанның Қырғызстандағы су энергетикалық нысандардың құрылысына қатысу мәселесі талқыланды.
Сонымен қатар, тараптар өңірде қауіпсіздік пен тұрақтылықты нығайту мәселесі бойынша пікір алмасып, халықаралық ұйымдардағы өзара іс-қимылды тереңдетудің ерекше маңыздылығын атап көрсетті.
Кездесудің қорытындысы бойынша екі елдің Президенттері энергетика, ауыл шаруашылығы, көлік және коммуникация, кен байыту және өңдеу өнеркәсібі, туризм және өзге салалардағы өзара тиімді ынтымақтастықты жандандыруға уағдаласты. Сонымен қатар, Мемлекет басшылары уәкілетті органдарға биыл Қазақстан мен Қырғызстанның Жоғары мемлекетаралық кеңесі мен Қазақстан-Қырғызстан үкіметаралық кеңесіне дайындық жүргізіп, белгіленген уақытында өткізуді тапсырды.
Ресми бағдарлама аяқталғаннан кейін Қазақстан Республикасының Президенті Нұрсұлтан Назарбаев пен Қырғыз Республикасының Президенті Алмазбек Атамбаев брифинг өткізді.
Мемлекет басшысы Қазақстан 1991-2011 жылдары аралығында Қырғызстан экономикасына 1 миллиардтан астам АҚШ доллары көлемінде инвестиция салғанын атап өтті. Екі ел арасындағы тауар айналымы 2011 жылы 750 миллионнан астам долларды құрады, 2010 жылмен салыстырғанда 27 пайызға артты.
"Біз таяу жылдар ішінде өзара тауар айналымын миллиардтық деңгейге жеткізудің нақты перспективасы мен мүмкіндігіне иеміз. 2010 жылдан бастап Қазақстан бауырлас Қырғызстан халқына жалпы сомасы 20 миллионнан астам доллар көлемінде өтеусіз гуманитарлық көмек көрсетті. Бұдан басқа, сомасы 7 миллион доллар болатын құрылыс материалдары түрінде, әскери ынтымақтастық аясында тағы 3 миллион доллар көлемінде көмек көрсетілді. Сөйтіп, жалпы алғанда, Қазақстан Қырғызстанға 30 миллион доллар бөлді. Біздің Қырғызстанға көрсеткеніміздей мұндай көмекті әлемнің ешбір елі көрсеткен жоқ. 2011 жылы біздің гуманитарлық көмегіміз 4 миллионнан астам долларды құрады. Мен бұл біздің елдеріміз арасындағы шынайы тату көршілестік қарым-қатынастардың жарқын көрінісі болып табылады деп ойлаймын", - деп атап өтті Нұрсұлтан Назарбаев.
Қазақстан Президенті сондай-ақ таяу уақытта қазақ-қырғыз инвестициялық қоры жұмысын бастайтындығынан хабардар етті.
"Біз Қырғызстан азаматтарының Қазақстан аумағына келу тәртібі туралы екіжақты Келісімді қол қоюға әзірлеу туралы үкіметтерімізге тапсырма бердік, ол бойынша Қырғызстан азаматтары Қазақстанда 90 тәулік бола алады. Шекара маңындағы ынтымақтастықты дамытуды жандандыру маңыздылығы ескеріліп, Қазақстан-Қырғызстан мемлекеттік шекарасында "Кеген-Қарқара" өткізу бекетін ашу туралы шешім қабылданды. Сонымен бірге, Қырғызстанның Кеден одағы мен Қазақстан, Ресей және Беларусь Бірыңғай экономикалық кеңістігіне қосылу мәселесі қаралды", - деді Нұрсұлтан Назарбаев.
Өз кезегінде Қырғыз Республикасының Президенті Қазақстан Президентіне шақыруы мен жылы шырайлы қабылдауы үшін алғысын айтты.
"Мен Нұрсұлтан Назарбаевқа, қазақстандық инвесторларға қолдау көрсеткендері үшін рахмет айтамын. Иртүрлі саяси оқиғаларға, кейбір рейдерлік фактілерге қарамастан, Қазақстанның Қырғызстанға инвестициясы азайған жоқ. Біз Қазақстан Республикасы тарапынан қуатты туыстық қолдауды сезінеміз. Қазір сөзден нақты іске көшетін кез келді", - деді Алмазбек Атамбаев.
Биыл Қазақстан Республикасы мен Қырғыз Республикасы арасындағы дипломатиялық қатынастардың орнағанына 20 жыл толады. Қазақстан мен Қырғызстан халықтары арасындағы байланысты нығайту мақсатында Нұрсұлтан Назарбаев пен Алмазбек Атамбаев Бішкекте Абайдың ескерткішін орнату, сондай-ақ екі елдің астанасында Шоқан Уәлиханов пен Шыңғыс Айтматов атына көше беру туралы шешім қабылдады.
Келіссөздердің нәтижесі бойынша тараптар Бірлескен мәлімдеме қабылдады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Алматыдағы рекреациялық аймаққа 230 гектарға жуық жер қайтарылды
Антикор Қоғамдық кеңесінің отырысында Алматы қаласының тау бөктеріндегі құрылыстың проблемалық мәселелері қаралды, деп хабарлайды Сыбайлас жемқорлыққа қарсы іс-қимыл агенттігінің баспасөз қызметінен.
Ағымдағы жылдың 26 сәуірінде Алматы қаласында Қазақстан Республикасы Сыбайлас жемқорлыққа қарсы іс-қимыл агенттігінің Қоғамдық кеңесінің көшпелі отырысы өтті.
Іс-шараға Агенттіктің Төрағасы Асхат Жұмағали, Алматы қаласының әкімі Ерболат Досаев, өнеркәсіп және құрылыс, ауыл шаруашылығы, төтенше жағдайлар, су ресурстары, экология, денсаулық сақтау министрліктерінің басшылық құрамы және т.б. қатысты.
Іс-шараның модераторы Парламент Мәжілісінің депутаты, Қоғамдық кеңестің төрағасы Марат Башимов болды.
Күн тәртібінде Агенттіктің 2023 жылы әкімдікпен бірлесіп өткізген Алматы қаласының тау бөктеріндегі құрылыс саласындағы жемқорлық тәуекелдерін сыртқы талдау қорытындылары бойынша ұсынымдарды іске асыру мәселесі қаралды.
Агенттік Төрағасы кіріспе сөзінде талдау қорытындысы бойынша анықталған негізгі жемқорлық тәуекелдері туралы айтып, олардың орындалуы ерекше бақылауда екенін атап өтті.
Өздеріңіз білетіндей, Мемлекет басшысы Алматы қаласын дамытуға, оңтүстік астананың жайлы қалалық ортасын құруға ерекше көңіл бөледі. Ел Президенті қаланың нүктелік құрылыс тәжірибесін жою қажеттігін бірнеше рет атап өтті, ал құрылыс кезінде оның тұрғындарының мүдделерін міндетті түрде ескеру қажет", - деп атап өтті Антикор басшысы.
Осыған байланысты, отырыс барысында жауапты орындаушылар тарапынан ұсыныстарды орындаудың сапасы мен уақыттылығына, формализмді жоюға ерекше назар аударылды.
Іс-шара аясында баяндамашылар жүргізілген жұмыстың нәтижелерін айтты.
Мәселен, Алматы қаласының жаңа Бас жоспары әзірленіп, бекітілді, онда табиғи сипаттағы төтенше жағдайларға ұшыраған аумақтар ескерілді.
Тұрғын аймақтан 229 га жер рекреациялық аймаққа қайтарылды, сібір жарасы бар жер учаскесі мемлекеттік меншікке берілді, барлық су объектілеріне түгендеу жүргізілді.
Тау бөктерінде анықталған 54 заңсыз объект бойынша мемлекет пайдасына 36 сот актісі шешілді, оның 30-ы заңды күшіне енді, 2 заңсыз объект бұзылды, тағы 3-і бұзуды күтуде.
Сонымен қатар, Парламент Мәжілісінде бірқатар заң жобалары қаралуда, онда Агенттіктің мемлекеттік сәулет-құрылыс бақылауының жауапкершілігін күшейту, ТЖМ-ге қала құрылысы жобаларын келісу, жекелеген құрылыс ұғымдарын регламенттеу және т.б. өкілеттіктер беру жөніндегі ұсынымдары ескерілген.
Қорытындылай келе, Агенттік Төрағасы қаралған мәселенің маңыздылығын атап өтіп, бірінші кезекте мегаполис тұрғындарының қауіпсіздігіне баса назар аудару қажеттігін айтты.
Бұл алаң кездейсоқ таңдалған жоқ, себебі талқыланып отырған мәселе қала жұртшылығы үнемі назарында және әрбір тұрғын бұл үшін алаңдайды, бұл халықты осы бағыттағы мемлекет жүргізіп жатқан жұмыс туралы хабардар етуді талап етеді", - деп атап өтті Антикор басшысы.
Іс-шара соңында жауапты орындаушыларға жоспарланған іс-шараларды қысқа мерзімде аяқтау үшін толық шаралар қабылдау бойынша нақты ұсыныстар берілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Президенті су тасқынынан кейін өңірлерді қалпына келтіру мерзімдерін белгіледі
Сурет: ТЖМ
Қазақстан президенті Қасым-Жомарт Тоқаев Қазақстан халқы Ассамблеясының "Бірлік. Жасампаздық. Өрлеу" атты ХХХІІІ сессиясының отырысында сөйлеген сөзінде су тасқынынан кейін өңірлерді қалпына келтіру мерзімдерін белгіледі, деп хабарлайды Мемлекет басшысының баспасөз қызметі.
Қазақта "Алпыс күн тасыған дария, алты күнде қайтады" деген сөз бар. Көп ұзамай қарғын су кетіп, жұрт күнделікті өмірге оралады. "Әр қиындықтың қайыры бар" дейді халқымыз.
Біріншіден, тасқын кезінде ел бірлігі нығая түсті. Арқадағы ағайынға, Жайықтағы жұртқа бүкіл Қазақстан халқы көмектесуге ұмтылды. Апат аймағында тұратын адамдар барша отандасымыздың шынайы жанашырлығын сезінді.
Екіншіден, елдің жағдайын жақсарту үшін ешкім қиындықтың келуін күтіп отырмайтыны анық. Дегенмен, мұндай апаттар біраз шаруаны шұғыл қолға алуға себепкер болады.
Тасқын аяқталған соң кейбір ауылдар тың жерге қоныстанып, жаңадан бой көтереді. Жол салынады, су тартылады. Ауылдарымыз мүлде жаңа келбетке ие болады. Жалпы, әлемдегі үлкен дағдарыстардың қарқынды дамуға жол ашатыны белгілі", деді президент.
Қазіргі алапат тасқын да, түптеп келгенде, елімізге оң әсерін тигізеді деп ойлаймын. Сын сағатта жұдырықтай жұмылған жұртымыз осы қалпында өрлеу, жаңғыру кезеңіне қадам басады. Бәрі де жақсы болады.
Бәріміз - бір елдің азаматымыз. Тарих тоғыстырған тағдырымыз - бір, сеніммен қадам басатын келешегіміз - бір. Біз біртұтас ұлт ретінде әрдайым бабалар аманатына адал боламыз. Қасиетті қара шаңырағымыз - Қазақстанның жарқын болашағын бірге жасаймыз. Біздің мақсатымыз - айқын, бұл - Әділетті Қазақстанды құру.
Мен Қазақстан Республикасының Тәуелсіздігін қорғауды Президент ретіндегі ең басты міндетім деп санаймын. Осы қастерлі міндет Әділетті Қазақстанды құру және белсенді әрі сындарлы сыртқы саясат жүргізу арқылы ғана орындалады. Биік мақсатқа жету үшін түрлі кедергіден өтеміз, барлық қиындықты жеңеміз. Ауқымды міндеттерді орындаймыз. Біз еліміздің басты құндылықтары мен бағыт-бағдарынан айнымаймыз. Мемлекеттілігімізді нығайтып, тәуелсіздік туын әрдайым биік ұстаймыз. Мен бұған нық сенемін және сол үшін бәрін жасаймын. Бұл - менің президенттік әрі перзенттік парызым.
Еліміз аман, жұртымыз тыныш болсын!", деп түйіндеді өз сөзін Қасым-Жомарт Тоқаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бектенов Атырау облысында су басу қаупін азайту үшін қабылданып жатқан шаралардың барысын тексерді
Қазақстан Премьер-Министрі Олжас Бектенов Мемлекет басшысы Қасым-Жомарт Тоқаевтың тапсырмаларын орындау аясында Атырау облысында су басу қаупін азайту үшін қабылданып жатқан шаралардың барысын тексерді, деп хабарлайды Үкіметтің баспасөз қызметінен.
Олжас Бектенов облыс орталығындағы тұрғын үй алаптары бекіністерін тексеру барысында Атырау қаласының су тасқынының болжамды екінші толқынына дайындық жұмыстарымен танысты. Батыс өңірде Ресей Федерациясының Ириклин су қоймасынан судың келуіне байланысты, сондай-ақ Жайық өзеніне құйылар сағадағы ірі тасқын мен су деңгейінің көтерілуі салдарынан жағдай күрделі күйінде қалып отыр.
Бұрын хабарланғандай, Батыс Қазақстан облысындағы ірі су тасқынынан кейін ағын су өзен арнасымен Атырау облысына қарай жылжып, Каспий теңізіне құяды. Соңғы тәулікте БҚО тарапынан келетін судың әсерінен Атырау қаласында су деңгейінің 6 см-ге көтерілуі тіркелді (су тасқыны басталғаннан бері жалпы көтерілуі 227 см-ді құрады).
Тұрғын үй алаптарын нығайту, сондай-ақ Жайықтың өткізу қабілетін арттыру үшін өзен түбін тереңдету жұмыстарының қарқыны тексерілді. Тиісті күштердің көлемді судың келуіне дайындық деңгейін қарап көрді.
Үкімет басшысы Олжас Бектенов Атырау облысына су тасқыны жағдайы тұрақтанған өңірлерден әскери қызметшілер мен техниканы жедел жеткізіп, күштерді арттыруды тапсырды.
Бүгінгі таңда су тасқынының алдын алу шараларының 92%-ы орындалды. Жұмысты тиімді жүргізу үшін қала 111 секторға бөлінген. Ұзындығы 482 км қорғаныс бөгеттері салынды, аяқталған учаскелер техникалық қадағалау арқылы тексерілді. Жұмыстарға ТЖМ, ІІМ, Қорғаныс министрлігі, Ұлттық ұланның 6 мыңға жуық әскери қызметшісі, әкімдік қызметкерлері, 2 мыңға жуық техника жұмылдырылған. Еріктілер тарапынан белсенді көмек көрсетілуде. Өткен сенбіде жағалауды нығайту сенбілігі аясында қаланы қорғау жұмыстарына 9 мыңға жуық ерікті қатысты.
Сонымен қатар Жайық өзенінен Каспий теңізіне су өткізу қабілетін арттыру үшін өзен түбін тереңдету жұмыстары жүргізілуде. Су жолдарын тазарту, тереңдету және кеңейту мақсатында арнайы техникалық флоттық кемелер, гидравликалық экскаваторлар қолданылуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.