ҚР президенті Кембридж университетінде болып, оқу орнының профессорлық-оқытушылық құрамымен және студенттерімен кездесті
Кездесуді ашқан Нұрсұлтан Назарбаев Кембридж университетінің ғасырлар бойы әлемдік ғылым мен білімнің орталығы болып келгеніне, сонымен бірге бүкіл адамзаттың дамуына зор үлес қосып келе жатқанына тоқталды.
Лондон. 27-шілде. Kazakhstan Today - ҚР президенті Кембридж университетінде болып, оқу орнының профессорлық-оқытушылық құрамымен және студенттерімен кездесті, деп хабарлайды Kazakhstan Today агенттігінің тілшісі.
Кездесуді ашқан Нұрсұлтан Назарбаев Кембридж университетінің ғасырлар бойы әлемдік ғылым мен білімнің орталығы болып келгеніне, сонымен бірге бүкіл адамзаттың дамуына зор үлес қосып келе жатқанына тоқталды.
"Мен үшін көптеген көрнекті тұлғалар мен Нобель сыйлығының лауреаттары түлеп ұшқан осыншалық беделді университетте сөз сөйлеу үлкен мәртебе", - деді Мемлекет басшысы.
Қазақстан Президенті әлемнің қазіргі құрылымының мәселелеріне деген өз көзқарасымен бөлісті, сонымен қатар Қазақстанның халықаралық аренадағы рөлі және елді дамыту перспективалары туралы әңгімеледі. Мемлекет басшысы ХХ және XXI ғасырлар аралығы Еуразияның зор геостратегиялық кеңістігіндегі ауқымды және түбірлі өзгерістер кезеңіне айналғанын атап өтті. Бұл уақыт былтырғы желтоқсанда мемлекеттік тәуелсіздігінің 20 жылдығын тойлаған Қазақстан үшін беріктігін бекемдеуге арналған сындарлы сынақ кезеңі болды.
"Кеңес Одағы тарағаннан кейін бізге ауқымды дағдарыс, әлсіз экономика және басқарудың тиімсіз жүйесі мұра болып қалды. Сондай жағдайда, 1992 жылы халықтың 40 пайызы кедейшілік шырмауында қалып, инфляция 2 мың пайызға жетті. Бізге тек экономиканы ғана емес, жаңа үлгідегі мемлекетті де басынан бастап құруға, түбірлі реформалар жүргізуге, жоспарлы жүйеден нарыққа, тоталиаризмнен демократияға көшуге тура келді", - деді Нұрсұлтан Назарбаев.
Мемлекет басшысы алдымен экономикалық, одан соң саяси ырықтандыруға алғашқы кезекте маңыз беретін реформаларды кезең-кезеңмен жүргізу қажетігіне айрықша назар аудартты.
"Саяси мәдениет пен тәжірибенің жоқтығы мемлекеттік институттарды сыйламаушылыққа, зорлық-зомбылыққа үндеуге ұшыратты. Бұл - кез келген ел үшін аса қауіпті жол. Мұның мысалы - Индіжандағы қақтығыстар, Оштағы жаппай бас көтерулер, сонымен қатар, Жаңаөзендегі оқиға. Біз үшін одан арғы даму ырғағын сақтау үшін тұрақтылықты жоғалтпау аса маңызды. Тәуелсіздікті сақтау және мемлекет құру - бүкіл ұлт үшін негізгі меже және міндет", - деді Мемлекет басшысы.
Бұған қоса Қазақстан Президенті өз сөзінде елдің тиімді әлеуметтік-экономикалық дамуы үшін мемлекеттік басқару жүйесін жетілдіруге баса назар аудару қажеттігіне тоқталды.
"Тәуелсіздік жылдары біз ІЖО көлемін жан басына шаққанда 16 есеге - 700 доллардан 12 мың долларға дейін арттырдық. 1999 жылдан 2007 жылға дейін Қазақстанның ІЖО өсімі орта есеппен 10 пайызды құрады. Біздің еліміз Орталық Азияға тартылған барлық инвестицияның 80 пайызын өзіне шоғырландырды. Бізге Еуропадан, Азиядан және Америкадан ірі инвесторлар мен әлемдік бизнестің көшбасшылары келді", - деді Нұрсұлтан Назарбаев.
Мемлекет басшысы Қазақстанның тек мұнай мен газ ғана емес, сонымен қатар металдардың барлық түрінің табиғи ресурстарының орасан зор қорына ие екенін атап өтті. Сонымен бірге қазіргі уақытта Қазақстан экономикасын әртараптандыруды қамтамасыз ету, шикізаттық экспортқа тәуелділік деңгейін төмендету, заманауи индустриялық база мен өздігінен дамитын иннновациялық жүйе құру міндеті алға қойылды.
"Дағдарыстың ең өршіген тұсында біз Үдемелі индустриялық-инновациялық даму бағдарламасын жүзеге асыруды бастап, елеулі нәтижелерге қол жеткіздік. Барлық индустриялық жобаларды жүйелі түрде қолдап отыру үшін Индустрияландыру картасын қалыптастырдық. Оған құны 76 миллиард доллардан асатын 706 жоба енгізілді. Елдің негізгі тірегі - инновация мен білімге негізделген экономика", - деді Нұрсұлтан Назарбаев.
Сонымен қатар, Мемлекет басшысы өз сөзінде Қазақстанның кеңестік дәуірден шыққан мемлекеттер арасында алғашқылардың бірі болып еуропалық жоғары білім беру аймағына енгенін айтты. 2010 жылы еліміз Еуропа мәдени конвенциясы мен Болон процесіне қосылды. Шетелде оқытатын "Болашақ" арнайы бағдарламасы белгіленді. 1993 жылдан бері 8 мыңнан астам жас қазақстандық мемлекет есебінен әлемнің үздік жоғары оқу орындарында білім алды. Ең танымал бағыттың бірі - Ұлыбритания. Британ жоғары оқу орындарында біздің 4 мыңнан астам студентіміз білім алды. 2001 жылдан бері Алматыда Қазақ-Британ техникалық университеті табысты жұмыс жасап келеді. Ол Қазақстанның ұлттық ғылыми-техникалық элитасын дайындап, қалыптастыру ісіне белсенді қатысуда. Астанада жаңа халықаралық жоғары оқу орны - "Назарбаев университетінің" ашылуы жоғары білім беру саласындағы басымдығы бар жоба болды. Кембридж университетімен білім беру бағдарламалары бойынша ынтымақтастық белсенді дамып келеді. Қазақстанның "Қазатомпром" компаниясы мен сіздердің университеттеріңіздің Кавендиш лабораториясы арасындағы тығыз ынтымақтастық мысалын көріп отырмыз.
Осы орайда Мемлекет басшысы Нұрсұлтан Назарбаев Қазақстанның Кембридж университетімен әсіресе жаңа технологиялар, қалпына келтірілетін қуат, экология салаларындағы ынтымақтастық ауқымын кеңейтуге әзір екенін айтты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Алматыдағы рекреациялық аймаққа 230 гектарға жуық жер қайтарылды
Антикор Қоғамдық кеңесінің отырысында Алматы қаласының тау бөктеріндегі құрылыстың проблемалық мәселелері қаралды, деп хабарлайды Сыбайлас жемқорлыққа қарсы іс-қимыл агенттігінің баспасөз қызметінен.
Ағымдағы жылдың 26 сәуірінде Алматы қаласында Қазақстан Республикасы Сыбайлас жемқорлыққа қарсы іс-қимыл агенттігінің Қоғамдық кеңесінің көшпелі отырысы өтті.
Іс-шараға Агенттіктің Төрағасы Асхат Жұмағали, Алматы қаласының әкімі Ерболат Досаев, өнеркәсіп және құрылыс, ауыл шаруашылығы, төтенше жағдайлар, су ресурстары, экология, денсаулық сақтау министрліктерінің басшылық құрамы және т.б. қатысты.
Іс-шараның модераторы Парламент Мәжілісінің депутаты, Қоғамдық кеңестің төрағасы Марат Башимов болды.
Күн тәртібінде Агенттіктің 2023 жылы әкімдікпен бірлесіп өткізген Алматы қаласының тау бөктеріндегі құрылыс саласындағы жемқорлық тәуекелдерін сыртқы талдау қорытындылары бойынша ұсынымдарды іске асыру мәселесі қаралды.
Агенттік Төрағасы кіріспе сөзінде талдау қорытындысы бойынша анықталған негізгі жемқорлық тәуекелдері туралы айтып, олардың орындалуы ерекше бақылауда екенін атап өтті.
Өздеріңіз білетіндей, Мемлекет басшысы Алматы қаласын дамытуға, оңтүстік астананың жайлы қалалық ортасын құруға ерекше көңіл бөледі. Ел Президенті қаланың нүктелік құрылыс тәжірибесін жою қажеттігін бірнеше рет атап өтті, ал құрылыс кезінде оның тұрғындарының мүдделерін міндетті түрде ескеру қажет", - деп атап өтті Антикор басшысы.
Осыған байланысты, отырыс барысында жауапты орындаушылар тарапынан ұсыныстарды орындаудың сапасы мен уақыттылығына, формализмді жоюға ерекше назар аударылды.
Іс-шара аясында баяндамашылар жүргізілген жұмыстың нәтижелерін айтты.
Мәселен, Алматы қаласының жаңа Бас жоспары әзірленіп, бекітілді, онда табиғи сипаттағы төтенше жағдайларға ұшыраған аумақтар ескерілді.
Тұрғын аймақтан 229 га жер рекреациялық аймаққа қайтарылды, сібір жарасы бар жер учаскесі мемлекеттік меншікке берілді, барлық су объектілеріне түгендеу жүргізілді.
Тау бөктерінде анықталған 54 заңсыз объект бойынша мемлекет пайдасына 36 сот актісі шешілді, оның 30-ы заңды күшіне енді, 2 заңсыз объект бұзылды, тағы 3-і бұзуды күтуде.
Сонымен қатар, Парламент Мәжілісінде бірқатар заң жобалары қаралуда, онда Агенттіктің мемлекеттік сәулет-құрылыс бақылауының жауапкершілігін күшейту, ТЖМ-ге қала құрылысы жобаларын келісу, жекелеген құрылыс ұғымдарын регламенттеу және т.б. өкілеттіктер беру жөніндегі ұсынымдары ескерілген.
Қорытындылай келе, Агенттік Төрағасы қаралған мәселенің маңыздылығын атап өтіп, бірінші кезекте мегаполис тұрғындарының қауіпсіздігіне баса назар аудару қажеттігін айтты.
Бұл алаң кездейсоқ таңдалған жоқ, себебі талқыланып отырған мәселе қала жұртшылығы үнемі назарында және әрбір тұрғын бұл үшін алаңдайды, бұл халықты осы бағыттағы мемлекет жүргізіп жатқан жұмыс туралы хабардар етуді талап етеді", - деп атап өтті Антикор басшысы.
Іс-шара соңында жауапты орындаушыларға жоспарланған іс-шараларды қысқа мерзімде аяқтау үшін толық шаралар қабылдау бойынша нақты ұсыныстар берілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Президенті су тасқынынан кейін өңірлерді қалпына келтіру мерзімдерін белгіледі
Сурет: ТЖМ
Қазақстан президенті Қасым-Жомарт Тоқаев Қазақстан халқы Ассамблеясының "Бірлік. Жасампаздық. Өрлеу" атты ХХХІІІ сессиясының отырысында сөйлеген сөзінде су тасқынынан кейін өңірлерді қалпына келтіру мерзімдерін белгіледі, деп хабарлайды Мемлекет басшысының баспасөз қызметі.
Қазақта "Алпыс күн тасыған дария, алты күнде қайтады" деген сөз бар. Көп ұзамай қарғын су кетіп, жұрт күнделікті өмірге оралады. "Әр қиындықтың қайыры бар" дейді халқымыз.
Біріншіден, тасқын кезінде ел бірлігі нығая түсті. Арқадағы ағайынға, Жайықтағы жұртқа бүкіл Қазақстан халқы көмектесуге ұмтылды. Апат аймағында тұратын адамдар барша отандасымыздың шынайы жанашырлығын сезінді.
Екіншіден, елдің жағдайын жақсарту үшін ешкім қиындықтың келуін күтіп отырмайтыны анық. Дегенмен, мұндай апаттар біраз шаруаны шұғыл қолға алуға себепкер болады.
Тасқын аяқталған соң кейбір ауылдар тың жерге қоныстанып, жаңадан бой көтереді. Жол салынады, су тартылады. Ауылдарымыз мүлде жаңа келбетке ие болады. Жалпы, әлемдегі үлкен дағдарыстардың қарқынды дамуға жол ашатыны белгілі", деді президент.
Қазіргі алапат тасқын да, түптеп келгенде, елімізге оң әсерін тигізеді деп ойлаймын. Сын сағатта жұдырықтай жұмылған жұртымыз осы қалпында өрлеу, жаңғыру кезеңіне қадам басады. Бәрі де жақсы болады.
Бәріміз - бір елдің азаматымыз. Тарих тоғыстырған тағдырымыз - бір, сеніммен қадам басатын келешегіміз - бір. Біз біртұтас ұлт ретінде әрдайым бабалар аманатына адал боламыз. Қасиетті қара шаңырағымыз - Қазақстанның жарқын болашағын бірге жасаймыз. Біздің мақсатымыз - айқын, бұл - Әділетті Қазақстанды құру.
Мен Қазақстан Республикасының Тәуелсіздігін қорғауды Президент ретіндегі ең басты міндетім деп санаймын. Осы қастерлі міндет Әділетті Қазақстанды құру және белсенді әрі сындарлы сыртқы саясат жүргізу арқылы ғана орындалады. Биік мақсатқа жету үшін түрлі кедергіден өтеміз, барлық қиындықты жеңеміз. Ауқымды міндеттерді орындаймыз. Біз еліміздің басты құндылықтары мен бағыт-бағдарынан айнымаймыз. Мемлекеттілігімізді нығайтып, тәуелсіздік туын әрдайым биік ұстаймыз. Мен бұған нық сенемін және сол үшін бәрін жасаймын. Бұл - менің президенттік әрі перзенттік парызым.
Еліміз аман, жұртымыз тыныш болсын!", деп түйіндеді өз сөзін Қасым-Жомарт Тоқаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бектенов Атырау облысында су басу қаупін азайту үшін қабылданып жатқан шаралардың барысын тексерді
Қазақстан Премьер-Министрі Олжас Бектенов Мемлекет басшысы Қасым-Жомарт Тоқаевтың тапсырмаларын орындау аясында Атырау облысында су басу қаупін азайту үшін қабылданып жатқан шаралардың барысын тексерді, деп хабарлайды Үкіметтің баспасөз қызметінен.
Олжас Бектенов облыс орталығындағы тұрғын үй алаптары бекіністерін тексеру барысында Атырау қаласының су тасқынының болжамды екінші толқынына дайындық жұмыстарымен танысты. Батыс өңірде Ресей Федерациясының Ириклин су қоймасынан судың келуіне байланысты, сондай-ақ Жайық өзеніне құйылар сағадағы ірі тасқын мен су деңгейінің көтерілуі салдарынан жағдай күрделі күйінде қалып отыр.
Бұрын хабарланғандай, Батыс Қазақстан облысындағы ірі су тасқынынан кейін ағын су өзен арнасымен Атырау облысына қарай жылжып, Каспий теңізіне құяды. Соңғы тәулікте БҚО тарапынан келетін судың әсерінен Атырау қаласында су деңгейінің 6 см-ге көтерілуі тіркелді (су тасқыны басталғаннан бері жалпы көтерілуі 227 см-ді құрады).
Тұрғын үй алаптарын нығайту, сондай-ақ Жайықтың өткізу қабілетін арттыру үшін өзен түбін тереңдету жұмыстарының қарқыны тексерілді. Тиісті күштердің көлемді судың келуіне дайындық деңгейін қарап көрді.
Үкімет басшысы Олжас Бектенов Атырау облысына су тасқыны жағдайы тұрақтанған өңірлерден әскери қызметшілер мен техниканы жедел жеткізіп, күштерді арттыруды тапсырды.
Бүгінгі таңда су тасқынының алдын алу шараларының 92%-ы орындалды. Жұмысты тиімді жүргізу үшін қала 111 секторға бөлінген. Ұзындығы 482 км қорғаныс бөгеттері салынды, аяқталған учаскелер техникалық қадағалау арқылы тексерілді. Жұмыстарға ТЖМ, ІІМ, Қорғаныс министрлігі, Ұлттық ұланның 6 мыңға жуық әскери қызметшісі, әкімдік қызметкерлері, 2 мыңға жуық техника жұмылдырылған. Еріктілер тарапынан белсенді көмек көрсетілуде. Өткен сенбіде жағалауды нығайту сенбілігі аясында қаланы қорғау жұмыстарына 9 мыңға жуық ерікті қатысты.
Сонымен қатар Жайық өзенінен Каспий теңізіне су өткізу қабілетін арттыру үшін өзен түбін тереңдету жұмыстары жүргізілуде. Су жолдарын тазарту, тереңдету және кеңейту мақсатында арнайы техникалық флоттық кемелер, гидравликалық экскаваторлар қолданылуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.