АСТАНА. 29-қыркүйек. Kazakhstan Today. Бүгін өткен парламент палаталарының бірлескен отырысында депутаттар "Сот жүйесі және судьялардың мәртебесі туралы" конституциялық заңға өзгерістер мен толықтырулар енгізу туралы" конституциялық заңды алғашқы оқылымда мақұлдады, деп хабарлайды Kazakhstan Today тілшісі.
"Заң жобасы құқықтық саясат жөніндегі тұжырымдаманы жүзеге асыру аясында сот жүйесін жетілдіруге бағытталған",- деп мәлімдеді құжатты таныстырған ҚР Жоғары сотының қылмыстық істер жөніндегі коллегиясының төрағасы Ибдірашит Жүкенов.
Оның айтуынша, енгізілетін түзетулердің көмегімен қазіргі судьялар мен судьялық лауазымнан үміткерлерге қойылатын талапты күшейту ұсынылып отыр. Сонымен бірге заң жобасы "әділеттілікке қол жеткізу сапасын, әрбір судьяның кәсіби біліктілігі мен жауапкершілігін көтерудің жаңа құқықтық тетігі болып табылатын сот қазылар алқасын қолданысқа енгізеді". "Сот қазылар алқасы Жоғарғы соттың жанынан құрылады және ол судьялардың кәсіби біліктілігі мен жұмысқа жарамдылық деңгейін анықтайды",- деді И.Жүкенов.
Сонымен бірге "судьялар қоғамдастығының жауапкершілігін көтеру мен субьективизмнен құтылу үшін заң жобасы тәртіптік істерді қозғау құзыретін сот төрағаларынан судьялардың тәртіптік квалификациялық алқасына беруді ұсынып отыр".
Депутаттар заң жобасын 24-қарашада өтетін парламент палаталарының бірлескен отырысында екінші оқылымда қарамақшы.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Парламент сот жүйесі және судьялардың мәртебесі туралы конституциялық заңға енгізілетін түзетулерді алғашқы оқылымда мақұлдады
тақырып бойынша жаңалықтар
Президентке биылғы І тоқсанда жұмсалған республикалық бюджет қаражаты туралы есеп берілді
Сурет: akorda
Мемлекет басшысы Қаржы министрі Мәди Такиевті қабылдады, деп хабарлайды Ақорданың баспасөз қызметінен.
Президентке мемлекеттік қаржының негізгі параметрлері, оның ішінде биылғы І тоқсанда жұмсалған республикалық бюджет қаражаты туралы есеп берілді. Осы ретте 3 айдың қорытындысы бойынша мемлекеттік бюджетке 4,5 триллион теңгеге жуық кіріс кірген.
Қасым-Жомарт Тоқаевқа өнімсіз бюджет шығындарын оңтайландыру жұмыстары жөнінде мәлімет берілді. Мәди Такиевтің айтуынша, жүргізілген сараптама нәтижесінде биыл 300 миллиард теңгеден астам соманы қысқарту ұсынылған. Бұл қаражат экономикалық қайтарымы барынша жоғары шараларға жұмсалады.
Мемлекет басшысына бюджетті басқару тиімділігін арттыру бағытында қабылданып жатқан жұмыстар туралы баяндалды. Аталған шаралар жаңа Бюджет кодексіне енгізілген.
Бұдан бөлек Президентке салықтық-кедендік әкімшілендіру ісіндегі жаңа бастамалар таныстырылды. Министрдің айтуынша, жаңа Салық кодексінің жобасында салықтық әкімшілендірудің сервистік моделі енгізілген, тексерулер санын қысқарту жөніндегі нормалар қарастырылған, камералық бақылау және салық берешегін өндіріп алу тәсілдері өзгертілген.
Сонымен қатар Қасым-Жомарт Тоқаевқа Еуразиялық экономикалық одақтың үшінші елдермен кедендік шекарасындағы инфрақұрылымды жаңғырту жұмыстары жөнінде ақпарат берілді. Жобаның жүзеге асырылуы өткізу мүмкіндігін 6 есеге дейін ұлғайтып, өту уақытын 2 есе қысқартуға, сондай-ақ тауарлар мен көлік құралдарын тексеру ісін тәулік бойы онлайн режимде бақылауға мүмкіндік береді. Барлық өткізу пунктін реконструкциялау жұмыстарын жыл соңына қарай аяқтау жоспарланып отыр.
Мәди Такиев мемлекеттік сатып алу жүйесін реформалау жоспары жөнінде айтты. Оның мәліметінше, "Мемлекеттік сатып алу туралы" жаңа Заң жобасында сатып алу рәсімдерін жеңілдету және бюрократиядан арылту, құрылыс нарығында монополияға жол бермеу, барлық мемлекеттік және квазимемлекеттік ұйымның сатып алуларын бірыңғай платформаға көшіру көзделген.
Кездесу соңында Президент мемлекеттік қаржының жағдайын жақсарту, атап айтқанда, бюджеттің теңгерімділігін қамтамасыз ету, сондай-ақ салықтық және кедендік әкімшілендіру салаларын цифрландыру арқылы жетілдіру жөнінде бірқатар тапсырма берді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.