АСТАНА. 1-қараша. Kazakhstan Today. Республика үкімет басшысы Даниал Ахметов Теңізде қазақ және түрік жұмысшылардың арасында қақтығыстың шығуына кінәлі адамдарды түгелдей компаниялардың басшылығынан бастап жауапкершілікке тарту қажет деп санайды. Үкімет басшысы бүгін "Теңізшевройл" ЖШС-нің бас директоры Тод Левимен кездесуде осындай пікір білдірді, деп хабарлайды Kazakhstan Today тілшісі үкіметтің баспасөз қызметіне сілтеме жасап.
Бұдан бұрын да хабарлағанымыздай, жұмысшылар арасындағы қақтығыс 20-қазанда болған.
Т.Левидің айтуынша, оқыс оқиғаның салдарынан 196 адам, оның ішінде 193 түрік, 2 қазақстандық және 1 үндістандық жұмысшылар зардап шекті. "Зардап шеккендер - "Сенімді құрылыс" компаниясының қызметкерлері. Бұл компания "Теңізшевройл" ЖШС-нің мердігері болып табылмайды",- деп мәлімдеді Т.Леви.
Өнім өңдейтін зауыт құрылысы салынып жатқан құрылыс алаңында жаппай төбелес шықты. Қазір онда жұмыстар жүргізіліп жатқан жоқ. "Теңізшевройл" компаниясының басшылығы оқиғаның себептерін нақты анықтау үшін жан-жақты талдау жасауда. Қауіпсіздікті қамтамасыз ету жоспарлары да дәйектелуде. Кәсіпорынның құрылыс алаңдарында қазір 200-дей тәртіп сақшысы кезекшілік жасауда.
Үкімет басшысы қолданылған шараларға қарамастан, бүгінгі күнге дейін нақты нәтиженің көрінбей отырғанын айтты. "Жеке меншік компаниялардың құрылыс алаңдарында тәртіп сақтаумен полиция шұғылданатын ел дүниежүзінде жоқ",- деді үкімет басшысы. Ол бір аптада тәртіп орнатуды тапсырды.
"Егер осы мерзімде шара қолдана алмасаңыздар, онда Қазақстанда ұлтаралық қақтығыс туғызып, айды аспанға бірақ шығарғалы отырсыздар. Жетекшілерден бастап барлық кінәлі адамдарды жауапкершілікке тарту қажет",- деді Д.Ахметов. Республика ішкі істер министрлігіне де "Сенімді құрылыс" компаниясына қатысты тексерулер жүргізу міндеті жүктелді. Бұл компания бүлінген мүлкінің соңынан қуынбайтынын мәлімдеген.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Республика үкімет басшысы Теңіздегі қақтығыстың шығуына кінәлі адамдарды жауапкершілікке тарту қажет деп санайды
тақырып бойынша жаңалықтар
Президентке биылғы І тоқсанда жұмсалған республикалық бюджет қаражаты туралы есеп берілді
Сурет: akorda
Мемлекет басшысы Қаржы министрі Мәди Такиевті қабылдады, деп хабарлайды Ақорданың баспасөз қызметінен.
Президентке мемлекеттік қаржының негізгі параметрлері, оның ішінде биылғы І тоқсанда жұмсалған республикалық бюджет қаражаты туралы есеп берілді. Осы ретте 3 айдың қорытындысы бойынша мемлекеттік бюджетке 4,5 триллион теңгеге жуық кіріс кірген.
Қасым-Жомарт Тоқаевқа өнімсіз бюджет шығындарын оңтайландыру жұмыстары жөнінде мәлімет берілді. Мәди Такиевтің айтуынша, жүргізілген сараптама нәтижесінде биыл 300 миллиард теңгеден астам соманы қысқарту ұсынылған. Бұл қаражат экономикалық қайтарымы барынша жоғары шараларға жұмсалады.
Мемлекет басшысына бюджетті басқару тиімділігін арттыру бағытында қабылданып жатқан жұмыстар туралы баяндалды. Аталған шаралар жаңа Бюджет кодексіне енгізілген.
Бұдан бөлек Президентке салықтық-кедендік әкімшілендіру ісіндегі жаңа бастамалар таныстырылды. Министрдің айтуынша, жаңа Салық кодексінің жобасында салықтық әкімшілендірудің сервистік моделі енгізілген, тексерулер санын қысқарту жөніндегі нормалар қарастырылған, камералық бақылау және салық берешегін өндіріп алу тәсілдері өзгертілген.
Сонымен қатар Қасым-Жомарт Тоқаевқа Еуразиялық экономикалық одақтың үшінші елдермен кедендік шекарасындағы инфрақұрылымды жаңғырту жұмыстары жөнінде ақпарат берілді. Жобаның жүзеге асырылуы өткізу мүмкіндігін 6 есеге дейін ұлғайтып, өту уақытын 2 есе қысқартуға, сондай-ақ тауарлар мен көлік құралдарын тексеру ісін тәулік бойы онлайн режимде бақылауға мүмкіндік береді. Барлық өткізу пунктін реконструкциялау жұмыстарын жыл соңына қарай аяқтау жоспарланып отыр.
Мәди Такиев мемлекеттік сатып алу жүйесін реформалау жоспары жөнінде айтты. Оның мәліметінше, "Мемлекеттік сатып алу туралы" жаңа Заң жобасында сатып алу рәсімдерін жеңілдету және бюрократиядан арылту, құрылыс нарығында монополияға жол бермеу, барлық мемлекеттік және квазимемлекеттік ұйымның сатып алуларын бірыңғай платформаға көшіру көзделген.
Кездесу соңында Президент мемлекеттік қаржының жағдайын жақсарту, атап айтқанда, бюджеттің теңгерімділігін қамтамасыз ету, сондай-ақ салықтық және кедендік әкімшілендіру салаларын цифрландыру арқылы жетілдіру жөнінде бірқатар тапсырма берді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.