АСТАНА. 22-желтоқсан. Kazakhstan Today. Қазақстанның Ұлттық қауіпсіздік комитетінің тергеу және жедел бөлімшелері 2006 жылы әртүрлі мемлекеттік органдардың 261 лауазымды тұлғаларына қатысты сыбайлас жемқорлық қылмыстары бойынша қылмыстық іс қозғаған. Бұл туралы бүгін Астанада өткен баспасөз мәслихатында ҚР ҰҚК-нің ресми өкілі Кенжеболат Бекназаров құлағдар етті, деп хабарлайды Kazakhstan Today тілшісі.
К. Бекназаров соттардың сыбайлас жемқорлыққа қатысты қылмыстық тергеу істері бойынша 73 лауазымды тұлғаға қатысты 63 айыптау үкімін шығарғандығын, төрт азамат пара бергені үшін сотталғандығын хабарлады.
"ҰҚК қызметкерлерінің қозғаған қылмыстық істері бойынша сотталғандардың үштен бірі, яғни 25 адам ішкі істер органдарының қызметкерлері", - деді ҰҚК өкілі.
Оның ақпаратына сүйенсек, сотталғандардың арасында үш сот, он үш қаржы полициясының қызметкері, әділет министрлігінің алты қызметкері, алты салық маманы және үш сот администраторы бар.
"Сонымен қатар, ұлттық қауіпсіздік органдарының материалдары бойынша үстіміздегі жылы ұйымдасқан қылмысқа қатысты 28 тұлға сотталған, олардың төртеуі ұйымдасқан қылмыстық топтардың жетекшілері, біреуі "қылмыс әлемінің серкелерінің бірі", - деп хабарлады К. Бекназаров.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Ұлттық қауіпсіздік комитеті 2006 жылы мемлекеттік органдардың 261 қызметкеріне қатысты қылмыстық іс қозғаған
тақырып бойынша жаңалықтар
Президентке биылғы І тоқсанда жұмсалған республикалық бюджет қаражаты туралы есеп берілді
Сурет: akorda
Мемлекет басшысы Қаржы министрі Мәди Такиевті қабылдады, деп хабарлайды Ақорданың баспасөз қызметінен.
Президентке мемлекеттік қаржының негізгі параметрлері, оның ішінде биылғы І тоқсанда жұмсалған республикалық бюджет қаражаты туралы есеп берілді. Осы ретте 3 айдың қорытындысы бойынша мемлекеттік бюджетке 4,5 триллион теңгеге жуық кіріс кірген.
Қасым-Жомарт Тоқаевқа өнімсіз бюджет шығындарын оңтайландыру жұмыстары жөнінде мәлімет берілді. Мәди Такиевтің айтуынша, жүргізілген сараптама нәтижесінде биыл 300 миллиард теңгеден астам соманы қысқарту ұсынылған. Бұл қаражат экономикалық қайтарымы барынша жоғары шараларға жұмсалады.
Мемлекет басшысына бюджетті басқару тиімділігін арттыру бағытында қабылданып жатқан жұмыстар туралы баяндалды. Аталған шаралар жаңа Бюджет кодексіне енгізілген.
Бұдан бөлек Президентке салықтық-кедендік әкімшілендіру ісіндегі жаңа бастамалар таныстырылды. Министрдің айтуынша, жаңа Салық кодексінің жобасында салықтық әкімшілендірудің сервистік моделі енгізілген, тексерулер санын қысқарту жөніндегі нормалар қарастырылған, камералық бақылау және салық берешегін өндіріп алу тәсілдері өзгертілген.
Сонымен қатар Қасым-Жомарт Тоқаевқа Еуразиялық экономикалық одақтың үшінші елдермен кедендік шекарасындағы инфрақұрылымды жаңғырту жұмыстары жөнінде ақпарат берілді. Жобаның жүзеге асырылуы өткізу мүмкіндігін 6 есеге дейін ұлғайтып, өту уақытын 2 есе қысқартуға, сондай-ақ тауарлар мен көлік құралдарын тексеру ісін тәулік бойы онлайн режимде бақылауға мүмкіндік береді. Барлық өткізу пунктін реконструкциялау жұмыстарын жыл соңына қарай аяқтау жоспарланып отыр.
Мәди Такиев мемлекеттік сатып алу жүйесін реформалау жоспары жөнінде айтты. Оның мәліметінше, "Мемлекеттік сатып алу туралы" жаңа Заң жобасында сатып алу рәсімдерін жеңілдету және бюрократиядан арылту, құрылыс нарығында монополияға жол бермеу, барлық мемлекеттік және квазимемлекеттік ұйымның сатып алуларын бірыңғай платформаға көшіру көзделген.
Кездесу соңында Президент мемлекеттік қаржының жағдайын жақсарту, атап айтқанда, бюджеттің теңгерімділігін қамтамасыз ету, сондай-ақ салықтық және кедендік әкімшілендіру салаларын цифрландыру арқылы жетілдіру жөнінде бірқатар тапсырма берді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.