Жыл басынан бері 5 млрд теңгеден астам жалақы қарыздары қайтарылды - Бас прокуратура
Жыл басынан бері 5 млрд теңгеден астам жалақы қарыздары қайтарылды - Бас прокуратура
Астана. 2 шілде. "Қазақстан Бүгін" - Жыл басынан бері 5 млрд теңгеден астам жалақы қарыздары қайтарылды. Бұл туралы бүгін Астанада өткен брифингте Бас прокуратураның ресми өкілі Нұрдәулет Сүйіндіков мәлім етті, деп хабарлайды "Қазақстан Бүгін" агенттігі.
"2009 жылдың басынан бері прокурорлық қадағалаудың нәтижесінде 66 мың жұмысшыға тиесілі 5 млрд теңгеден астам жалақы қарызы өтелді. 363 тұлға тәртіптік, 727 тұлға әкімшілік, 1 адам қылмыстық жауапкершілікке тартылды ",- деді ресми өкіл.
Мәселен, Алматы қаласы прокурорының ұйғарымы бойынша "Алматытелефонқұрылыс" АҚ 200 қызметкеріне тиесілі 13 млн теңгеден астам жалақы қарыздарын қайтарды.
"Ақмола облысында "Жаңа-Жер" ЖШС прокурордың ұйғарымы бойынша өткен жылдың қыркүйек айынан бері пайда болған 301 қызметкерінің алдындағы 30 млн теңгеден астам жалақы берешегін өтеді. Сондай-ақ, прокурордың ұсынысы бойынша "Қазақалтын" АҚ 977 қызметкерге жалпы көлемі 54 млн теңгеден асатын жалақы қарызын жапты", деді ресми өкіл.
Сонымен қатар, Батыс Қазақстан облыстық прокуратурасы "БГС-Ақсай" және "Ақсай нан өнімдері комбинаты" ЖШС тиісінше, 213 қызметкердің алдындағы 15 млн теңгеден астам және 248 қызметкердің 17 млн теңгеден астам жалақы бойынша қарыздарын өтеу туралы ұйғарым шығарды.
Ақпаратты пайдаланған жағдайда "Казахстан Сегодня" ақпараттық агенттігіне гиперсілтеме жасау міндетті. «Қазақстан Бүгін» Ақпараттық агенттігінің материалдарына авторлық құқық.
тақырып бойынша жаңалықтар
Президентке биылғы І тоқсанда жұмсалған республикалық бюджет қаражаты туралы есеп берілді
Сурет: akorda
Мемлекет басшысы Қаржы министрі Мәди Такиевті қабылдады, деп хабарлайды Ақорданың баспасөз қызметінен.
Президентке мемлекеттік қаржының негізгі параметрлері, оның ішінде биылғы І тоқсанда жұмсалған республикалық бюджет қаражаты туралы есеп берілді. Осы ретте 3 айдың қорытындысы бойынша мемлекеттік бюджетке 4,5 триллион теңгеге жуық кіріс кірген.
Қасым-Жомарт Тоқаевқа өнімсіз бюджет шығындарын оңтайландыру жұмыстары жөнінде мәлімет берілді. Мәди Такиевтің айтуынша, жүргізілген сараптама нәтижесінде биыл 300 миллиард теңгеден астам соманы қысқарту ұсынылған. Бұл қаражат экономикалық қайтарымы барынша жоғары шараларға жұмсалады.
Мемлекет басшысына бюджетті басқару тиімділігін арттыру бағытында қабылданып жатқан жұмыстар туралы баяндалды. Аталған шаралар жаңа Бюджет кодексіне енгізілген.
Бұдан бөлек Президентке салықтық-кедендік әкімшілендіру ісіндегі жаңа бастамалар таныстырылды. Министрдің айтуынша, жаңа Салық кодексінің жобасында салықтық әкімшілендірудің сервистік моделі енгізілген, тексерулер санын қысқарту жөніндегі нормалар қарастырылған, камералық бақылау және салық берешегін өндіріп алу тәсілдері өзгертілген.
Сонымен қатар Қасым-Жомарт Тоқаевқа Еуразиялық экономикалық одақтың үшінші елдермен кедендік шекарасындағы инфрақұрылымды жаңғырту жұмыстары жөнінде ақпарат берілді. Жобаның жүзеге асырылуы өткізу мүмкіндігін 6 есеге дейін ұлғайтып, өту уақытын 2 есе қысқартуға, сондай-ақ тауарлар мен көлік құралдарын тексеру ісін тәулік бойы онлайн режимде бақылауға мүмкіндік береді. Барлық өткізу пунктін реконструкциялау жұмыстарын жыл соңына қарай аяқтау жоспарланып отыр.
Мәди Такиев мемлекеттік сатып алу жүйесін реформалау жоспары жөнінде айтты. Оның мәліметінше, "Мемлекеттік сатып алу туралы" жаңа Заң жобасында сатып алу рәсімдерін жеңілдету және бюрократиядан арылту, құрылыс нарығында монополияға жол бермеу, барлық мемлекеттік және квазимемлекеттік ұйымның сатып алуларын бірыңғай платформаға көшіру көзделген.
Кездесу соңында Президент мемлекеттік қаржының жағдайын жақсарту, атап айтқанда, бюджеттің теңгерімділігін қамтамасыз ету, сондай-ақ салықтық және кедендік әкімшілендіру салаларын цифрландыру арқылы жетілдіру жөнінде бірқатар тапсырма берді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.