Премьер-министр Олжас Бектеновтің төрағалығымен өткен Үкімет отырысында трансшекаралық хабтарды дамыту мәселесі қаралды. Онда сауда және интеграция министрі Арман Шаққалиев, көлік министрі Нұрлан Сауранбаев, өнеркәсіп вице-министрі Иран Шархан, сондай-ақ бірқатар өңір басшылары баяндама жасады, деп хабарлайды Үкіметтің баспасөз қызметінен.
Өз кезегінде Арман Шаққалиев Мемлекет басшысының тапсырмасына сәйкес 2030 жылға дейінгі көлік-логистикалық әлеуетті дамыту тұжырымдамасы аясында 5 трансшекаралық хабты қалыптастыру жұмыстары жүзеге асырылып жатқанын айтты.
Бүгінде барлық 5 трансшекаралық хаб бойынша жұмыстар жүруде. Біріншіден, басқарушы компаниялар және олардың жұмыс істеу шарттары айқындалды. Екіншіден, әлеуетті инвестициялық жобалардың пулдары қалыптастырылды. Үшіншіден, электр энергиясы, сумен жабдықтау, көлік жолдары және коммуникациялар сияқты негізгі инфрақұрылыммен қамтамасыз ету жұмыстары жүргізілуде. Өзбекстан шекарасындағы "Орталық Азия" халықаралық өнеркәсіптік кооперация орталығына 2025 жылдың 31 наурызында TURAN арнайы экономикалық аймағы мәртебесі берілді. Құрылыс екі кезеңмен жүзеге асырылуда. І кезең: 100 гектар аумақ функционалды аймақтарға бөлінді, сегіз өндірістік ғимарат салынды, ішкі жолдарды абаттандыру, сыртқы инженерлік желілерді тарту, кіреберіс жолдарын қамтамасыз ету жұмыстары жүргізілуде. Бірінші кезеңнің барлық жұмысы осы жылдың соңына дейін аяқталады. ІІ кезең: поли-винил-хлорид (ПВХ) өнімдерін, тамшылатып суару жүйелерін өндіру, мақта, күріш, дәнді-дақылдар мен майлы дақылдарды қайта өңдеу бағыттары бойынша жеті инвестициялық жоба айқындалды. Сонымен бірге орталық аумағында индустриялық парк салу жоспарлануда. 185,1 миллиард теңге инвестиция тартылып, 1 150 жұмыс орны құрылады. Орталықты толық іске қосу 2026 жылға жоспарланған", - деді ол.
Ал "Еуразия" трансшекаралық сауда орталығы Батыс Қазақстан облысының Орал қаласы әуежайының маңында орналасқан. Басқарушы компания - "Ақжайық" әлеуметтік-кәсіпкерлік корпорациясы. Облыс әкімдігі жалпы құны шамамен 140 миллиард теңге болатын құрылыс материалдары, жиһаз, шыны, мұнай-газ жабдықтары, пластмасса бұйымдары, сондай-ақ катализаторларды қайта өңдеу бағыттарындағы 16 инвестициялық жобаны жүзеге асыруды жоспарлап отыр.
Қорғас торабы арнайы экономикалық аймақ мәртебесіне ие. Оның құрамына "Қорғас" Халықаралық шекара маңы ынтымақтастық орталығы арнайы экономикалық аймағы, "Қорғас - Шығыс қақпасы" арнайы экономикалық аймағы кіреді. "Қорғас" Халықаралық шекара маңы ынтымақтастық орталығы арнайы экономикалық аймағы аумағында жалпы сомасы 234,4 миллиард теңге болатын 41 жоба жүзеге асырылуда. Оның ішінде 17 миллиард теңгеге сегіз жоба пайдалануға берілді. 33 жоба - 2027 жылға дейін жүзеге асырылады. "Қорғас-Шығыс қақпасы" Экономиқалық аймақта 64 қатысушы тіркелген. Бүгінгі таңда жалпы сомасы 58,6 млрд теңгеге, 32 инвестициялық жоба жүзеге асырылды. 2300-ге жуық жұмыс орны құрылды. Инвестиция көлемі 848,6 млрд. теңгені құрайтын тағы 32 жоба бар, онда 5000 астам жұмыс орнын құру жоспарлануда. Оның ішінде "Қазақстан-Қытай халықаралық өнеркәсіп қаласы", жел энергетикасы қондырғыларын, электр энергиясын сақтау және жинақтау жүйелерін шығаратын зауыт, металл бұйымдарын өндіру зауыты, кофе және шай сусындары зауыты бар. Өткізу қабілетін арттыру үшін инфрақұрылымдық жобалар жүзеге асырылуда. Олар - логистикалық дәліз құру, 18 теміржол желісіне дейін кеңейту (+10), SkyHansа халықаралық жүк жолаушылар әуежайының құрылысы, өндірістік-логистикалық кешенінің құрылысы, бонд қоймаларының құрылысы. Арнайы экономикалық аймақ аумағында 64 қатысушы тіркелген.
Каспий торабы аясында екі ірі жоба жүзеге асырылуда. Олар - Ақтау теңіз портындағы контейнерлік хаб және Құрық портындағы "Саржа" көпфункционалды теңіз терминалы. Екі жоба да "Ақтау теңіз порты" арнайы экономикалық аймағының құрамына енгізілген. Контейнерлік хаб үшін 19 гектар жер телімі бөлінді. Бұл "Ляньюньган Құрлықтық терминалы" компаниясымен бірлескен жоба. Инвестиция көлемі - 47,6 миллиард теңге. Хабтың алғашқы іске қосу кешені шілде айында пайдалануға берілді. Екінші кешеннің құрылысы 95% орындалып, жыл соңына дейін аяқталады. Жалпы жоба 2026 жылдың соңына дейін аяқталады деген жоспар бар. Жобалық қуаты - 240 мың ЖФЭ (жиырма футтық эквивалент) контейнер. "Саржа" теңіз терминалы "Semurg Invest" компаниясының жеке инвестициялары есебінен жүзеге асырылуда. Терминал аумағы - 284,7 гектар, инвестиция көлемі - 98 миллиард теңге. Жалпы жүк терминалы пайдалануға берілді. Астық, әмбебап жүк, химиялық өнімдер терминалдары мен көлік-логистикалық орталық құрылысы жалғасуда", - деді сауда және интеграция министрі Арман Шаққалиев.
Батыс Еуропа - Батыс Қытай" халықаралық транзиттік дәлізінің құрамдас бөлігіндегі Индустриялық сауда-логистикалық кешен "Қарасу" және "Ақ-Тілек" өткізу пункттерінің жанында орналасқан. $385,2 млн құрайтын 18 жобадан тұратын инвестициялық пул жасақталды. Бұл жобалар құрылыс, өнеркәсіп, ауыл шаруашылығы, сауда, туризм және медицина салаларын қамтиды. Үш жарым мыңға жуық жұмыс орны ашылады. Жамбыл облысының әкімдігімен кешен аумағын 50 гектардан 150 гектарға дейін кеңейту жұмыстары аяқталған соң,бұл кешен арнайы экономикалық аймаққа айналады. Жобаны іске қосу 2026 жылға жоспарланған.
Трансшекаралық хабтарды жүзеге асыру бойынша ұйымдастыру шаралары және инфрақұрылымның дайындық жұмыстары аяқталады. Жобаларды нақты іске қосу, логистикалық мүмкіндіктерді кеңейту және кооперацияның жаңа формаларын дамытуға басымдық беріледі. Нәтижесінде шекара маңындағы сауда процестерін тездетіп, шикізаттық емес экспорт көлемін 30%-ға арттыруға мүмкіндік береді және қазақстандық компаниялар үшін тиімді логистикалық жағдай жасайтын болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.