Қазақстанда 5 зауыт энергия үнемдеуші шамдар шығарады
Энергия үнемдеуші шамдар электр қуатын 5 есе үнемдеуге, сөйтіп халықтың жарық үшін шығыстарын арзандатуға мүмкіндік береді.
Астана. 14-маусым. Kazakhstan Today - Қазақстанда 5 зауыт энергия үнемдеуші шамдар шығарады, деп хабарлайды Kazakhstan Today агенттігінің тілшісі.
Энергия үнемдеуші шамдар электр қуатын 5 есе үнемдеуге, сөйтіп халықтың жарық үшін шығыстарын арзандатуға мүмкіндік береді.
Илемдік тәжірибеге сәйкес және Қазақстанда энергия қуатын үнемдеу мақсатында, сондай-ақ "Энергия үнемдеу және энергия тиімділігін арттыру туралы" Қазақстан Республикасының жаңа Заңына сәйкес, 2012 жылдың 1 маусымынан бастап қыздыру қуаты 100 Вт және одан жоғары электр шамдарын жасауға және оларды сатуға тыйым салынады. Оған қоса, 2013 жылдың 1 қаңтарынан бастап қуаты 75 Вт және одан жоғары, ал 2014 жылдың 1 қаңтарынан бастап қуаты 25 Вт және одан жоғары шамдардың өндірісіне және сатылымына тыйым салынады.
"Қазақэнергосараптама" АҚ-ның ақпараты бойынша, қазіргі таңда Қазақстанда энергия үнемдеуші шамдар шығаратын 5 зауыт жұмыс істеуде. Олар Шымкент, Алматы, Қарағанды, Астана және Тараз қалаларында орналасқан.
"Қазақэнергосараптама" АҚ стратегиялық талдау департаментінің директоры Инуар Қошқарбаевтың хабарлауынша, энергия үнемдеуші шамдар электр қуатын және қаражатты үнемдеуге жағдай жасайды.
"Қыздыру шамы, энергия үнемдеуші шамға қарағанда, электр қуатын 4-5 есе көп тұтынады, яғни ондай шамды қолданудың қаржылай шығыны да көп болады. Оған қоса, энергия үнемдеуші шамдар ұзақтау қызмет етеді",- деді И.Қошқарбаев Pm.kz сайтына берген сұхбатында.
Сарапшы сондай-ақ, құрамында сынап болғандықтан, қолданыстан шыққан ескі шамдарды арнайы орындарда жою керектігіне тоқталды. Бұл жұмыстарды ұйымдастыру әкімдіктерге жүктеліп отырғанын айтқан маман, "қыздыру шамдарын жоятын зауыттар жоқ өңірлерде арнайы пункттер ашу жоспарлануда", - деп атап көрсетті.
Баршаға мәлім, 2011 жылдың қараша айында Қазақстанда Энергия үнемдеу және энергия тиімділігін арттыру жөніндегі кешенді жоспар қабылданды. Оған қоса, ағымдағы жылдың 13 қаңтарында еліміздің энергетикалық қауіпсіздігін қамтамасыз етуге негізделген "Энергия үнемдеу және энергия тиімділігін арттыру туралы" ҚР заңы қабылданды.
Қыздыру шамдарын жасауға және оларды сатуға салынып отырған тыйым шаралары жоғарыда аталған құжаттардың шарттары және жалпы ішкі өнімнің энергетикалық сыйымдылығын төмендетуге, өнеркәсіп саласында, электр және жылу энергиялары өндірістеріндегі, сондай-ақтұрғын үй-коммуналдық шаруашылықтағы энергия тиімділігін арттыруға бағытталған маңызды тетік болып табылады.
Жоғарыда аталған Кешенді жоспардың мақсаты - 2015 жылы ЖІӨ-нің энергетикалық сыйымдылығын (2008 жылға қатысты) 10 пайызға төмендету болып табылады. Өнеркәсіптегі энерготиімділікті арттыру шаралары жыл сайын ең аз дегенде 7,8 млн. тонна мұнайға тең келетін бастапқы энергия ресурстарын, ТКШ және бюджет секторы салаларында - 0,9 млн. тонна мұнайға тең энергия ресурстарын үнемдеуге мүмкіндік береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.