Қазақстан Huawei компаниясына бизнес үшін электрондық цифрлық платформа құру жобасында серіктес болуды ұсынды
Сурет: Depositphotos
ҚР Сауда және интеграция министрі Арман Шаққалиев Huawei Technologies Kazakhstan-ның Бас директоры Чжао Сюмен кездесті, деп хабарлайды Gov.kz.
Арман Шаққалиев ҚР Премьер-Министрінің орынбасары Серік Жұманғариннің ҚХР-ға тамыз айындағы жұмыс сапары барысында қазақстандық делегацияға Huawei Technologies компаниясының кеңсесінде көрсеткен қонақжайлылығы мен жылы қабылдағаны үшін Чжао Сюге алғысын білдірді.
Сауда және интеграция министрі талқылау тақырыбы өте уақтылы және өзекті екенін атап өтті. Мемлекет басшысы Қазақстан халқына Жолдауында Қазақстанды IT-елге айналдыру міндетін қойды. Бұл үшін барлық алғышарттар бар. Отандық IT-саласы экспортының көлемі өткен жылдың өзінде бес есеге өсті, алдағы жаңа мақсат - IT экспортын 1 млрд. АҚШ долл. дейін жеткізу. Ірі шетелдік IT-компанияларымен бірлескен кәсіпорындар ашу қойылған міндетті іске асыруға көмектеседі.
- Біз Цифрлық экожүйемізді дамыту үшін Huawei-мен ынтымақтастықта үлкен әлеуетті көріп отырмыз. Сіздердің компанияларңыздың инновациялар және технологиялық даму саласындағы стратегиясы экономика мен қоғамды цифрландыруға деген ұмтылыстарымызбен ұштасады, - деп атап өтті Министр. - Сіз ұсынған "Цифрлық Қазақстанға және Еуразиялық Хабқа апарар жол" бағдарламасы жоғары қызығушылық тудыруда, ол бүгінгі таңда Қазақстанды өңірлік цифрлық орталыққа айналдырудың өзекті шешімі болып табылады.
Инновациялық шешімдерді енгізу үшін Сауда және интеграция министрлігі бірқатар ұсыныстар жасады. Қазір бизнеске арналған сұраныс пен ұсыныстардың қазақстандық электрондық цифрлық платформасын құру жобасын дайындалып жатыр. Платформа верификацияланған отандық тауар өндірушілер мен қызмет көрсетушілердің кең ауқымын қамтиды. Нақты уақыт режиміндегі цифрлық бизнес шешімі тауарлар мен қызметтерді іздеу, сатып алушылар үшін өзекті көлемдер мен бағалар, келісімшарттарға қол қою, логистикалық компаниялар үшін сервис және тауарларды жеткізу шарттары бойынша сервистерді біріктіреді. Министрлік Huawei-ге осы жобада серіктес болуды және сауданы дамыту үшін цифрлық шешімдер жасау тәжірибесімен бөлісуді ұсынды.
Сонымен бірге, Министрлік озық технологиялар мен цифрлық шешімдерді қажет ететін инвестициялық экспортқа бағдарланған жобалардың, оның ішінде АӨК саласындағы жобалардың пулын қалыптастырды. Олардың арасында Алматы мен Жетісу облыстарында өз өнімдерін ОА және ЕАЭО елдеріне экспорттауға мүмкіндігі бар ақпараттық технологиялар және телекоммуникациялық жабдықтар өндірісі саласындағы жобалар да бар.
Сондай-ақ, ҚР ИИДМ ҚТЖ-мен бірлесіп сауда-логистикалық хабтарды құруды және одан әрі цифрландыруды пысықтауда. Пилоттық жобаны жақын арада Тәжікстанда іске қосу жоспарлануда. Хабтың қызметі жинап қою, сақтау, қайта өңдеу, жаңа тауарлар өндіру саласындағы өндірістік кооперацияны қамтамасыз етуге және оларды одан әрі жақын елдерге жөнелтуге бағытталатын болады. Сонымен қатар, барлық осы процестер диджитализациялануы керек, содан соң хаб жоғары технологиялық өндірістердің талаптарына жауап беретін болады.
Өз тарапынан Huawei Technologies Kazakhstan-ның бас директоры Чжао Сю жобаларды қарауға, сенімді және тексерілген ұзақ мерзімді серіктес ретінде жұмысын жалғастыруға, өңірлік цифрлық орталық ретінде Қазақстанның тұрақты дамуына өз үлесін қосуға дайын екенін мәлімдеді.
Кездесу қорытындысы бойынша тараптар алдағы уақытта тығыз ынтымақтастық орнатуды келісті.
Анықтама:
Huawei Technologies Co., Ltd" Компаниясы 1987 жылы Қытайда құрылған, АКТ инфрақұрылымының, жасыл энергетикалық шешімдердің, бұлтты есептеулердің және смарт құрылғылардың жетекші жаһандық жеткізушісі болып табылады. Huawei-де бүкіл әлем бойынша 120 000-нан астам белсенді патенттер, 700-ден астам "ақылды" қала жобалары, бүкіл әлем бойынша 35 000-нан астам серіктестермен ынтымақтастық бар. Қазіргі уақытта компания Global Fortune 500 тізімінде 49-орында.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан Республикасының жаңа Цифрлық даму министрі тағайындалды
2024 жылғы 6 мамырда Мемлекет басшысы Қасым-Жомарт Тоқаев жаңа цифрлық даму министрін тағайындады, деп хабарлайды Ақорданың баспасөз қызметінен.
Мемлекет басшысының Жарлығымен Жаслан Хасенұлы Мәдиев Қазақстан Республикасының Цифрлық даму, инновациялар және аэроғарыш өнеркәсібі министрі лауазымына тағайындалды", -деп көрсетілген Жарлық мәтінінде.
Жаслан Мәдиев 1983 жылы Алматы қаласында дүниеге келген. Әл-Фараби атындағы Қазақ ұлттық университетін, Колумбия университетін, Массачусетс технологиялық институтын тәмамдаған.
Еңбек жолын 2004 жылы "Альянс Банк" АҚ Халықаралық қатынастар департаментінің Халықаралық қаржы институттарымен жұмыс басқармасының маманы болып бастаған.
2020 жылғы қазаннан бастап қазіргі таңға дейін Қазақстан Республикасының Стратегиялық жоспарлау және реформалар жөніндегі агенттігі төрағасының орынбасары қызметін атқарды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ұлытау облысынан Қызылорда облысының көлдеріне 839 млн текше метрден астам тасқын суы жіберілді
Сурет: gov.kz
Су тасқыны кезінде Ұлытау облысының Кеңгір су қоймасынан 839 млн текше метрден астам су жіберілді. Осының нәтижесінде, алғаш рет Кеңгір су қоймасынан жіберілген су Сарысу өзені арқылы Қызылорда облысының көлдеріне жетті, деп хабарлайды Gov.kz.
Кеңгір су қоймасынан 307 млн текше метр су, Жезді су қоймасынан 81 млн текше метр су жіберілді, ал Сарысу өзеніндегі "Қызылжар темір жол станциясы" су бекеті арқылы 451 млн текше метр су келді.
Бүгінгі таңда Қызылорда облысының Телікөл көлдер жүйесінің қарқынды су жинағаны байқалады, бұл өңірдің ауыл шаруашылығына жағымды әсер етуі тиіс. Жиналған су одан әрі облыстағы күріш алқаптарына жіберілетін болады", - деді Су ресурстары және ирригация министрлігінің ресми өкілі Мөлдір Әбдуәлиева.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев су тасқынына қарсы күреске қатысқаны үшін бірқатар әскери қызметшілерге арнаулы атақтар, шендер мен наградалар табыс етті
Сурет: Akorda
Президент мемлекеттік наградалар, жоғары әскери және арнаулы атақтар, сыныптық шендер тапсыру рәсіміне қатысты, деп хабарлайды Ақорданың баспасөз қызметінен.
Мемлекет басшысы - Қазақстан Қарулы Күштерінің Жоғарғы Бас қолбасшысы Қасым-Жомарт Тоқаев жиынға қатысушыларды Отан қорғаушы күнімен және алда келе жатқан Жеңіс күні мерекесімен құттықтап, осы екі мейрам жауынгерлік дәстүрдің сабақтастығын паш ететінін, батыр бабаларымыздың даңқты жолын қазір өскелең ұрпақ жалғастырып келе жатқанын атап өтті.
Бүгінде айбынды армиямыз - елдегі тұтастық пен тыныштықтың мықты қалқаны. Қуатты әскеріміз бейбітшілік пен берекелі өмірді қас қақпай күзетіп тұр. Олар қай кезде де қастерлі Отанымызды қорғауға дайын. Ерлік майданда ғана жасалмайды. Ерлікке бейбіт заманда да орын бар. Биыл біз соңғы 80 жылдағы ең жойқын тасқынға тап болдық. Елге қатер төнген сәтте сарбаздарымыз алдыңғы шептен табылды. Ұлттық ұлан, Ішкі істер министрлігі, Ұлттық қауіпсіздік комитеті, Төтенше жағдайлар министрлігі және Мемлекеттік күзет қызметінің жеке құрамы антқа адал болудың үлгісін көрсетті. Алапат тасқынға төтеп беру үшін 9 мыңнан астам әскери қызметші жұмыла еңбек етті. Мыңнан астам техника жеткізілді. Сын сағатта халқымыздың асыл құндылықтары анық байқалады. Осы орайда Солтүстік Қазақстан облысында апатқа қарсы күрескен 300 сарбаздың еңбегін ерекше атап өткім келеді. Олар күні-түні бөген салып, қаланы қарғын судан құтқаруға атсалысты. Жергілікті тұрғындар бұл сарбаздарға айрықша риза болды, оларды зор құрметпен шығарып салды. Міне, халық пен армияның мызғымас тұтастығы дегеніміз - осы. Мұндай мысалдар аз емес", - деді Президент.
Қасым-Жомарт Тоқаев Жеңіс күнін жақындатуға атсалысқан майдангерлер мен тыл еңбеккерлеріне әрқашан құрмет көрсетілетінін айтты. Осы ретте ардагерлерге мерекеге орай жыл сайын қосымша төлемақы берілетінін, ал биыл оның көлемі үш миллион теңгеге дейін өскенін жеткізді. Сонымен қатар өзінің бастамасымен биылдан бастап "Айбын" орденінің үш дәрежесі даңқты батырларымыз - Сағадат Нұрмағамбетовтің, Бауыржан Момышұлының және Рақымжан Қошқарбаевтың атымен аталатынын еске салып, ұлт перзенттерінің батылдығы мен батырлығы бүгінгі және болашақ ұрпақ үшін үлгі-өнеге болатынына назар аударды.
Мемлекет басшысының айтуынша, геоосаяси тұрақсыздық белең алған қазіргі жағдайда мықты әрі дайындығы сақадай сай әскердің маңызы айтарлықтай арта түсті.
Біздің әскери қызметшілеріміз БҰҰ аясындағы түрлі бітімгерлік операцияларға қатысып, өздерінің кәсібилігі мен жоғары деңгейдегі жауынгерлік машығын көрсетіп келеді. Жуырда Қазақстан Голан жоталарындағы миссиясын дербес орындау жөніндегі Біріккен Ұлттар Ұйымының мандатына алғаш рет ие болды. Соңғы жылдары әлем елдерінің әскери қуаты туралы рейтингтегі орнымыз едәуір жақсарды. Бұл әскеріміздің дайындығы жоғары екенін әрі үйлесімді әрекет ететінін білдіреді. Қазақстан жер-жаһанға өзін бейбіт ел ретінде танытты. Біз барлық мемлекетпен достық қатынас орнаттық. Кез келген шиеленісті сындарлы диалог арқылы шешу керек деп есептейміз. Бірақ арқаны кеңге салып, қамсыз отыруға болмайды. Қуатты әскеріміз түрлі қатерге сақадай сай тұруға тиіс. Мықты әскер - елдіктің тірегі", - деді Президент.
Қасым-Жомарт Тоқаев Қазақстанның айбынды армиясы кәсіби тұрғыдан білікті әрі заманға сай озық болуы үшін Қарулы Күштерімізді одан әрі нығайту жұмыстары жалғасатынын жеткізді.
Күні кеше ғана елімізде жаңа авиация базасы ашылды. Бұл - ұлттық қорғаныс жүйесінің әлеуеті арта түсті деген сөз. Біз армияның беделін көтеруге айрықша мән береміз. Отан қорғау - баршамызға ортақ парыз. Мұны, әсіресе, өскелең ұрпақ терең түсінгені абзал. Мемлекет жас сарбаздарға жан-жақты қолдау көрсетіп жатыр. Оларға арнайы білім гранттары бөліне бастады. Несиені өтеу мерзімі кейінге шегерілді. Енді армияда жүріп, нақты мамандық алуға болады. "Ер жігітке жарасар, қолындағы найзасы" деп әйгілі Бұқар жырау батырлық пен ерлікті ерекше дәріптеген. Шын мәнінде, әскер - мемлекеттің аса маңызды символы. Мен сарбаздарымыздың жауынгерлік рухы жоғары болғанын мақтан етемін", - деді Мемлекет басшысы.
Салтанатты жиында Қасым-Жомарт Тоқаев Отан қорғаушылардың еліміздегі ынтымақ пен тыныштықты сақтауға зор үлес қосып келе жатқанын атап өтіп, офицерлерге әскери және арнаулы атақтар, сыныптық шендер тапсырды.
Мемлекет басшысының Жарлығымен әскери және арнаулы атақ, сыныптық шен алған офицерлердің тізімін мына сілтеме арқылы көруге болады.
Бұдан бөлек, Президент әскери және қызметтік борышын атқаруда көрсеткен ерлігі мен жанқиярлығы, елдің ұлттық қауіпсіздігі мен қорғаныс қабілетін қамтамасыз етуге, заңдылық пен құқықтық тәртіпті нығайтуға қосқан үлесі үшін бір топ азаматты мемлекеттік наградалармен марапаттады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда "Жеңіс пойызы" жолға шықты
Жеңіс күніне орай рәсімделген пойыз Астанадан Павлодарға жолға шықты, деп хабарлайды "Қазақстан темір жолы" ҰК" АҚ баспасөз қызметінен.
9 мамыр қарсаңында Астанадан Павлодарға Жеңіс күніне орай арнайы рәсімделген №7502 электр пойызы жолға шықты. Безендірілген электр пойызы соғыс жылдары бейбітшілік үшін құрбан болған қазақ жауынгерлерінің ерлігін еске алуға арналған.
Құрам Жеңіс лентасының және Ұлы Отан соғысының батырлары Бауыржан Момышұлы, Мәншүк Мәметова, Әлия Молдағұлова, Қасым Қайсенов, Талғат Бегелдинов және басқалардың суреттерімен безендірілген. Мереке құрметіне жолсеріктер жолаушыларды салтанатты формамен қарсалды. Жолаушылар "Жеңіс пойызының" алдында суретке түсіп, лезбіздерін білдірді.
Жыл сайын "Жолаушылар тасымалы" АҚ мерекеге сәйкес пойыздарды безендіріп, жолаушылардың сапарын ерекшелендіруге қызмет етеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.