14.12.2022, 08:19 20376

Үндістандық миллиардер Қазақстандағы авиация, мұнай химиясы, көлік, жаңартылатын энергия көздері жобаларына қызығушылық танытты

Қазақстан Үкіметі бірлескен жобаларды іске асыру үшін қолдау көрсетуге дайын
Үндістандық миллиардер Қазақстандағы авиация, мұнай химиясы, көлік, жаңартылатын энергия көздері жобаларына қызығушылық танытты
Сурет: primeminister.kz
Астана. 14 желтоқсан. KAZAKHSTAN TODAY - ҚР Премьер-Министрі Әлихан Смайылов пен Adani Group компаниясының президенті Гаутам Адани Қазақстанда бірқатар инвестициялық жобаны іске қосу перспективаларын талқылады, деп хабарлайды ҚР Үкіметінің баспасөз қызметі.

Гаутам Адани компания бірінші кезекте азаматтық авиация, мұнай-химия секторы, көлік-логистикалық инфрақұрылым, жаңартылатын энергия көздерін дамыту және "жасыл" сутегін өндіру бойынша жобаларға қызығушылық танытып отырғанын атап өтті.

Біз ұзақ мерзімді инвестициялар салуға мүдделіміз және Қазақстанда қандай мүмкіндіктер, қандай жобалар бойынша ортақ қызығушылық барын білгіміз келеді. Біз белсенді жұмыс істеуге дайынбыз", - деді Гаутам Адани.


Кездесуде көлік және логистика, энергетика, тау-кен металлургия кешені, мұнай-химия, ауыл шаруашылығы және т. б. салаларда жобаларды іске асыру мүмкіндіктері қаралды. Премьер-Министр мұның барлығы Қазақстан экономикасы үшін басым бағыттар екенін атап өтті.

Осы орайда Adani Group-пен ынтымақтастықтың әлеуеті зор деп санаймыз және сіздің компанияңыздың біздің еліміздегі іскерлік байланыстарды кеңейту ниетін құптаймыз", - деді Әлихан Смайылов.


Ол республикада жаңа инвестициялық жобаларды іске қосу және жалпы кәсіпкерлік қызметті жүргізу үшін қолайлы жағдайлар жасалғанын айтты. Сонымен қатар Үкімет Қазақстанда холдинг жобаларын іске асыру үшін жан-жақты қолдау көрсетуге дайын.

Adani Group - 1988 жылы Гаутам Адани негізін қалаған үнді көпұлтты конгломераты. Компаниялар тобы әлемнің 70 елінде бар және активтерінің жиынтық құны $100 млрд-ты құрайды. Конгломерат жұмыс істеген жылдары әлем бойынша 100 мыңнан астам тікелей және жанама жұмыс орнын құрды.

Естеріңізге сала кетейік, кеше Қазақстан Президенті Қасым-Жомарт Тоқаев Adani Group компаниясының президенті Гаутам Аданиді қабылдады.
 

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.


тақырып бойынша жаңалықтар

Ең көп оқылғаны