08.09.2022, 15:02 8441

Смайылов мемлекеттік органдарды бизнеске қойылған негізсіз талаптардың күшін жоюда баяу әрекет еткені үшін сынға алды

ҚР Премьер-Министрі кәсіпкерлік қызметте "таза парақтан бастап" реттеуді енгізу және мемлекеттік бақылау мен қадағалауды автоматтандыру жөнінде кеңес өткізді.
Смайылов мемлекеттік органдарды бизнеске қойылған негізсіз талаптардың күшін жоюда баяу әрекет еткені үшін сынға алды
Сурет: primeminister.kz
НҰР-СҰЛТАН. 8 ҚЫРКҮЙЕК - ҚР Премьер-Министрі Әлихан Смайылов кәсіпкерлік қызметте "таза парақтан бастап" реттеуді енгізу және мемлекеттік бақылау мен қадағалауды автоматтандыру жөнінде кеңес өткізді, деп хабарлайды KAZAKHSTAN TODAY ҚР Премьер-Министрінің баспасөз қызметіне сілтеме жасап.
 
Ұлттық экономика министрі Әлібек Қуантыров көлік, сауда, қоғамдық тамақтану, қонақ үй қызметтері, жылжымайтын мүлікпен операциялар, тау-кен өндіру өнеркәсібі, компьютерлік бағдарламалау, тұтынушылардың құқықтарын қорғау, ақпарат және байланыс салаларындағы реттеуші актілерге жүргізілген талдау аяқталғанын атап өтті. 
 
Оның қорытындысы бойынша анықталған 22 мыңнан астам талаптың шамамен 3,8 мыңы (17%) жаңа реттеушілік саясаттың базалық шарттарына сәйкес келмейді, сондықтан олардың күші жойылады немесе қайта қаралады. 
 
Осы жұмыстың бірінші кезеңі аясында тағы жеті сала бойынша талдау жалғасып жатыр. Бұл ауыл шаруашылығы, қоймалау, құбыр көлігі, құрылыс, автомобильдер мен мотоциклдерді жөндеу, көші-қон, авторлық құқық және аралас құқықтарға қатысты. 
 
Премьер-Министр тиісті үйлестірудің болмауынан кейбір мемлекеттік органдар белгіленген мерзімдерді сақтамайтынын және бұл бекітілген жоспар-кестені орындауды кешіктіретінін атап өтті. 
 

Бұл реформаның маңызды екенін тағы да қайталаймын. Үнемі кейінге қалдыра беруге болмайды, бұл туралы қанша айтуға болады? Барлық негізсіз талаптарды тезірек алып тастауымыз керек. Реттеуші актілер бойынша барлық жұмысты биыл аяқтау қажет", — деді Әлихан Смайылов. 

 
Премьер-Министр бизнеске қойылатын жаңа талаптарды енгізуде өте мұқият болу керектігін айтты. 
 

Жаңадан қабылданатын реттеушілік талаптарға бақылауды күшейтуіміз керек. Егер "Атамекен" ҰКП тарапынан қандай да бір мәселе бойынша келіспеушілік болса, онда бұл мәселені шешу керек, бұған көз жұма қарауға болмайды", — деді Әлихан Смайылов. 

 
Сонымен қатар, отырыста мемлекеттік бақылау жүйесін толық автоматтандыруға көшу аясында мемлекеттік органдардың ақпараттық жүйелерін талдау аяқталып, салалық тәуекелдер матрицалары қалыптастырылғаны атап өтілді. 
 
Бүгінгі таңда "Smart Data Ukimet" ақпараттық-талдау жүйесі жаңартылып жатыр, оны 2023 жылдың ортасында пайдалануға беру жоспарланып отыр. 
 
Сондай-ақ, Премьер-Министр бұл жұмысты жандандыруды және мемлекеттік органдармен келісу мерзімдерін қысқартуды қайта қарауды тапсырды.
 
Бұған дейін хабарланғандай, ҚР Үкіметі азық-түлік бағасын тұрақтандырудың және ЖЖМ қамтамасыз етудің жаңа тетіктерін әзірледі.
 
 Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

Ең көп оқылғаны