Қазақстан мен Сауд Арабиясы туризм саласындағы ынтымақтастықты кеңейтуде
Сауда серіктестері алдағы жазғы маусымда Қазақстанға туристік бағыт ретінде жоғары қызығушылық бар екенін растады
Астана. 6 июня. KAZAKHSTAN TODAY - Қазақстан Республикасының Сауд Арабиясы Корольдігіндегі Елшілігінің ұйымдастыруымен "Қазақстанның туристік әлеуеті" тақырыбында дөңгелек үстел өтті, деп хабарлайды Қазақстан Республикасы Сыртқы істер министрлігінің баспасөз қызметінен.
Іс-шараға екі мемлекеттің ресми органдарының, жетекші туристік қауымдастықтарының, іскерлік орталары мен БАҚ өкілдері қатысып, өзара ықпалдастықтың жаңа мүмкіндіктерін талқылады.
Сауд тарапынан Сауд Туризм басқармасының басшылығы, сондай-ақ Корольдіктің "Al Matar", "Almosafer", "Oriental Sky", "Alahram" және "Jayak travel" сынды жетекші туроператорлары мен "Al Hokair Holding Group" және "Al Taleb Group" секілді ірі инвесторлық компанияларының басшылары бас қосты. Қазақстандық тараптан "Kite travel", "Imax Group Kazakhstan" және "Elite life" сияқты отандық туристік нарықтың танымал компаниялары өздерінің бірегей өнімдерін таныстырды.
Кездесудің ашылуында екі ел арасындағы туризм секторының зор әлеуеті мен өзара туристік ағынның оң динамикасы ерекше аталды. Саудтық саяхатшылар үшін Қазақстанның қауіпсіз, қолайлы әрі бірегей эко-туристік бағыт екендігіне ерекше назар аударылды.
Дөңгелек үстел аясында екі елдің туркомпаниялары арасында B2B кездесулері мен келіссөздері ұйымдастырылды. Бұл іскерлік алаңда қатысушылар өзекті ақпаратпен, сонымен қатар жаңа туристік маршруттармен әрі іскерлік байланыстармен алмасты.
Іс-шара қорытындысы бойынша ұйымдастыру деңгейіне жоғары баға берген саудтық серіктестер алдағы жазғы маусымда Қазақстанға деген туристік қызығушылықтың жоғары екенін растап, жаңа бірлескен турпакеттерді іске асыруға ниет білдірді, бұл өз кезегінде екі ел арасындағы туристік және инвестициялық ықпалдастықты жаңа белеске көтеруге серпін берді.
Ресми мәліметтерге сәйкес, Сауд Арабиясынан Қазақстанға келетін туристер саны тұрақты артып келеді: 2024 жылы бұл көрсеткіш 9 060 адамды құраса, 2025 жылы 11 666 адамға жеткен.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Сапар Сатаев Теміртау қаласының әкімі болып тағайындалды
Сурет: gov.kz
Қазақстан Республикасы Президенті Әкімшілігінің және қалалық мәслихат депутаттарының келісімімен Сапар Сатаев Теміртау қаласының әкімі болып тағайындалды. Жаңа әкімді қала активіне Қарағанды облысының әкімі Ермағанбет Бөлекпаев таныстырды.
Өңір басшысы Сапар Сатаевтың мемлекеттік басқару саласында мол тәжірибесі бар екенін, әлеуметтік-экономикалық даму мәселелерін жақсы білетінін және қажетті басқарушылық дағдыларға ие екенін атап өтті. Сондай-ақ, оның Балқаш қаласындағы қызметі ірі өнеркәсіп кәсіпорындарымен тиімді өзара іс-қимыл орнатуға мүмкіндік бергенін айтты.
Сапар Сатаев еңбек жолын 2002 жылы "Қазахавтожол" республикалық мемлекеттік кәсіпорнында бастаап, әр жылдары "Ботақара су қожалығы" коммуналдық мемлекеттік қазыналық кәсіпорнында директордың орынбасары және директордың міндетін атқарушы болып қызмет етті. Мемлекеттік қызметте 2010 жылдан бері еңбек етіп, Қарағанды облысы Бұқар жырау ауданындағы Ботақара кентінің әкімі қызметін атқарған.
2013-2015 жылдары Абай қаласының әкімі, кейін Бұқар жырау ауданы әкімінің орынбасары, кейіннен Приозерск қаласының әкімі қызметін атқарған.
2023 жылғы мамырдан бастап жаңа қызметке тағайындалғанға дейін Балқаш қаласының әкімі лауазымында еңбек еткен.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
KazAID Тәжікстан мемлекеттік қызметкерлеріне цифрландыру бойынша оқыту бағдарламасын өткізеді
20-29 шілде аралығында "KazAID" Қазақстандық халықаралық даму агенттігі Тәжікстанның мемлекеттік қызметшілеріне арналған "Мемлекеттік басқаруды цифрлық трансформациялаудың негіздері" атты оқыту тренингін өткізеді.
Тренингке Тәжікстаннан 15 мемлекеттік қызметші қатысуда. Қазақстандық мамандар қатысушыларды мемлекеттік басқаруды цифрландырудағы отандық тәжірибемен таныстырып, мемлекеттік секторға цифрлық шешімдерді енгізудің үздік тәжірибелері туралы баяндайды.
Оқу бағдарламасы Тәжікстан Республикасы президентінің Атқарушы аппараты жанындағы Цифрлық негіздер жобаларын іске асыру орталығымен бірлесіп, "Ұлттық ақпараттық технологиялар" АҚ-ның қолдауымен ұйымдастырылуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
"Қазақстан темір жолы" ұлттық компаниясының басқарма төрағасы тағайындалды
Сурет: Самұрық-Қазына
Елжас Мұратұлы Отыншиев "Самұрық-Қазына" АҚ басқармасының шешімімен "Қазақстан темір жолы" ҰК" АҚ басқарма төрағасы болып тағайындалды.
Ол Мәскеу физика-техникалық институтының "Жалпы және қолданбалы физика" мамандығы бойынша бакалавриат және магистратура бағдарламаларын тәмамдаған.
Еңбек жолын 2007 жылы Ernst & Young компаниясының Мәскеудегі кеңсесінде бизнесті бағалау және мәмілелерді сүйемелдеу департаментінің кеңесшісі болып бастады. 2009-2019 жылдары "Самұрық-Қазына" АҚ-да және оның еншілес компанияларында қызмет атқарған.
2021-2023 жылдары KIDF компаниясында басшылық лауазымдарда жұмыс істеп, инвестициялық портфельді басқаруға жетекшілік еткен.
2023 жылғы сәуірден осы уақытқа дейін "Самұрық-Қазына" АҚ-ның стратегия және активтерді басқару жөніндегі басқарушы директоры - басқарма мүшесі қызметін атқарды. Бұл лауазымда қордың мұнай-газ, теміржол, тау-кен және басқа да салалардағы портфельдік компанияларын басқаруға жауапты болды.
2024 жылғы ақпаннан бері "Қазақстан темір жолы" ҰК" АҚ директорлар кеңесінің мүшесі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанның СІМ мұнай тасымалдаған танкерлерге жасалған ұшқышсыз ұшу аппараттарының (ҰҰА) шабуылдарын қатаң айыптады
Сурет: ҚР СІМ
Қазақстан Республикасының Сыртқы істер министрлігі 2026 жылғы 17 және 19 шілдеде Қара теңіз акваториясында Каспий құбыры консорциумының (КҚК) инфрақұрылымы арқылы мұнайды заңды түрде тасымалдауға тартылған азаматтық кемелерге ұшқышсыз ұшу аппараттарының жасаған шабуылдарын қатаң айыптайды.
Аталған шабуылдарды Қазақстан Республикасының экономикалық мүдделеріне жол беруге болмайтын қол сұғушылық, сондай-ақ заңды халықаралық сауданы, жаһандық энергетикалық нарықтар мен халықаралық көлік-логистикалық жеткізу тізбектерінің қауіпсіздігін тұрақсыздандыруға бағытталған қасақана әрекеттер ретінде қарастырамыз", деп айтылған хабарламада.
СІМ мәлімдеуінше, Қара теңіз акваториясына КҚК терминалдарында мұнай тиеу мақсатында кіретін азаматтық кемелер туралы ақпарат алмасудың барлық мүдделі тараптар бұрын келіскен тетігінің әдейі ескерілмегені ерекше алаңдаушылық туғызады. Бұл азаматтық кемелер экипаждарының өмірі мен қауіпсіздігіне қатер төндірді.
Қазақстан шабуылдарды дереу тоқтатуды және қазақстандық көмірсутек шикізаты экспорты инфрақұрылымының қауіпсіздігін қамтамасыз ету мақсатында жан-жақты шаралар қабылдауды талап етеді. Серіктес мемлекеттерді аталған шабуылдарды батыл айыптауға шақырамыз және барлық мүдделі тараптарды нақты іс-жүзіндегі шараларды бірлесіп әзірлеуге үндейміз. Халықаралық құқық нормаларын мүлтіксіз сақтау ғана осындай оқиғалардың қайталануына жол бермейді деп есептейміз", деп хабарлайды сыртқы саясат мекемесінен.
Қазіргі уақытта Қазақстан Республикасы келтірілген залалға жан-жақты бағалау жүргізуде. Оның қорытындылары бойынша Қазақстан өзінің заңды мүдделерін қорғау үшін халықаралық құқықта көзделген барлық тетіктерді, оның ішінде келтірілген залалды өтеу туралы талаптар қою құқығын өзіне қалдырады.
Қазіргі уақытта Қазақстан Республикасы қақтығыстарды бейбіт жолмен реттеудің баламасы жоқ екенін атап көрсетеді, халықаралық құқық қағидаттарына, кеме қатынасы еркіндігіне және халықаралық көлік-логистикалық әрі энергетикалық бағыттардың сенімді жұмыс істеуін қамтамасыз етуге бейілділігін растайды.
Естеріңізге сала кетейік, 17 шілдеде ұшқышсыз ұшу аппараты Nordic Zenith танкеріне шабуыл жасаған болатын. Кеме мұнай тиеу үшін портқа бет алған, сондай-ақ шабуыл кезінде оның трюмдері бос болған.
19 шілдеде Қара теңіз акваториясында қазақстандық мұнайды тасымалдаған танкерлерге ұшқышсыз ұшу аппараттарымен шабуыл жасалғаны да хабарланған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Бүгін Қазақстанда Металлургтер күні аталып өтуде
Сурет: Depositphotos
Қазақстан Республикасы Өнеркәсіп және құрылыс министрлігінің мәліметінше, металлургия өнеркәсібі - ел экономикасының жүйе құраушы негізгі салаларының бірі. Оның үлесіне Қазақстанның өңдеу өнеркәсібі өндірісінің 40%-дан астамы тиесілі.
2026 жылдың І жартыжылдығының қорытындысы бойынша өңдеу өнеркәсібіндегі өндіріс көлемі 9,8%-ға өсіп, 16,2 трлн теңгеге жетті. Осылайша бұл көрсеткіш тау-кен өндіру саласының көлемінен асып түсті. Өткен жылы да өңдеу өнеркәсібінің экономикадағы үлесі 13%-ды құраса, тау-кен өндіру саласының үлесі 11,9% болды",- деп хабарлайды министрліктің баспасөз қызметінен.
Металлургия секторы шикізаттық емес экспорттың елеулі бөлігін қамтамасыз етіп қана қоймай, өнеркәсібі әлеуетті өңірлердегі жұмыспен қамту ісінде маңызды рөл атқарып отыр. Бүгінде Қазақстанда болат, ферроқорытпа, мыс, алюминий, мырыш және басқа да өнім түрлерін шығаратын 274 кәсіпорын жұмыс істейді. Саладағы негізгі өндіріс орындары Қарағанды, Павлодар, Шығыс Қазақстан, Ақтөбе, Қостанай, Ұлытау облыстарында орналасқан.
Тек өткен жылдың өзінде кәсіпорындар 19 трлн теңгенің өнімін өндірді. Өнеркәсіптік өндіріс индексі 1,2%-ға өсті, оның ішінде қара металлургия бойынша өсім 4,3%-ды құрады.
Металлургия саласының басты күші - адамдар. Бүгінде бұл кешен кәсіпорындарында 200 мыңнан астам маман еңбек етеді. Осынау еңбеккерердің білімі, тәжірибесі және кәсіби тұрғыдағы қарым-қабілеті саладағы жұмыстың тұрақты жүруін, өндірістің дамуын және озық технологиялар енгізілуін қамтамасыз етіп келеді.
Министрлік еліміздің барлық металлургтерін кәсіби мерекесімен құттықтап, лларға зор денсаулық, отбасыларына амандық, бақ-береке, еңбектеріне толайым табыс тіледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан ОСК тағы 16 халықаралық байқаушыны аккредиттеді
2026 жылдың 17 шілдесінде Қазақстан Республикасының Орталық сайлау комиссиясы төрт шет мемлекеттен және үш халықаралық ұйымнан келген 16 халықаралық байқаушыны аккредиттеді.
Осылайша, алдағы сайлауды бақылау үшін аккредиттелген халықаралық байқаушылардың жалпы саны 76 адамға жетті, деп хабарлады Орталық сайлау комиссиясы.
2026 жылдың 17 шілдесіндегі жағдай бойынша Қазақстан Республикасы Сыртқы істер министрлігі Орталық сайлау комиссиясына төрт шет мемлекеттен және үш халықаралық ұйымнан 16 халықаралық байқаушыны аккредиттеу туралы ұсыныс енгізді", деп мәлім етті ОСК төрағасының орынбасары Мұхтар Ерман.
Атап айтқанда:
- ЕҚЫҰ Парламенттік Ассамблеясынан бір байқаушы - Польша Сенатының мүшесі Казимеж Клейна аккредиттелді.
- ҰҚШҰ Парламенттік Ассамблеясынан алты байқаушы, оның ішінде Ассамблеяның жауапты хатшысы Сергей Поспелов аккредиттелді.
- ЕҚЫҰ Демократиялық институттар және адам құқықтары жөніндегі бюросының (ДИАҚБ) миссиясынан бір байқаушы аккредиттелді.
Сонымен қатар:
- Грузиядан екі байқаушы, оның ішінде Грузия Орталық сайлау комиссиясының төрағасы Георгий Каландаришвили;
- Ираннан екі байқаушы, оның ішінде Иранның Қазақстандағы Төтенше және Өкілетті Елшісі Али Акбар Джоукар;
- Швециядан екі байқаушы, оның ішінде Швецияның Қазақстандағы Елшісі Стефан Эриксен;
- Қырғыз Республикасынан екі байқаушы аккредиттелді.
Орталық сайлау комиссиясында халықаралық байқаушылар тізімі жаңа ұсыныстар келіп түскен сайын толықтырылып отыратынын атап өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ЖИ дамыту әскери бәсекеге емес, бейбітшілік қағидаттарына негізделуі қажет - Тоқаев
Бұл орайда жасанды интеллектіні дамыту ісі өзара текетірес пен әскери бәсекеге емес, бейбітшілік пен тұрақты даму қағидаттарына негізделуі қажет. Бұл туралы Қазақстан президенті Шанхайда өтіп жатқан Дүниежүзілік жасанды интеллект жөніндегі конференцияда (WAIC) сөйлеген сөзінде мәлім етті, деп хабарлайды Ақорданың баспасөз қызметінен.
Мен Ұйымға мүше мемлекеттер мен мүдделі тараптардың барлығын жасанды интеллект стандарттары мен этикасын реттейтін тұрақты сарапшылық платформа құруға шақырамын. Сайып келгенде, ЖИ-дің болашағын адамдар айқындайды. Сондықтан алдағы уақытта аталған саланы жетік меңгерген мамандарға сұраныс күшейеді", - деді Қасым-Жомарт Тоқаев.
Оның пайымдауынша, жастарды цифрлық машықтарды игеруге, сыни ойлауға, ізденімпаздыққа және жоғары этикалық жауапкершілікке баулу керек.
Осыған орай Қазақстан Дүниежүзілік Жасанды интеллект саласындағы ынтымақтастық ұйымы аясында халықаралық мектептер желісін, озық тәжірибе орталықтарын және академиялық серіктестік құруды ұсынады", - деп мәлімдеді президент.
Сөзін қорыта келе, Мемлекет басшысы еліміздің бейбітшілікті сақтау, орнықты даму және жан-жақты өркендеу жолында жасанды интеллектінің әлеуетін пайдалануға ниетті барша серіктестермен нәтижелі ықпалдастық орнатуға дайын екенін жеткізді.
Бұған дейін Тоқаев АИ-ді толыққанды инфрақұрылымы бар салаға айналдыру туралы мәлімдеген болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.