МИСКЕУ. 4-тамыз. Kazakhstan Today. Мәскеудегі ЕурАзЭҚ үйінде ЕурАзЭҚ-тың жанындағы тұрақты өкілдер комиссиясының отырысы өтуде. Бұл туралы Kazakhstan Today тілшісіне қоғамдастықтың баспасөз қызметі хабарлады.
Күн тәртібінде қоғамдастыққа мүше алты елдің интеграциялық ықпалдастығына қатысты кең көлемді мәселелер топтамасы қаралады. Атап айтсақ, өзара инвестицияларды қорғау және ынталандыру, сондай-ақ, техникалық реттеу, санитарлық, мал дәрігерлік және фитосанитарлық шаралар саласы бойынша ЕурАзЭҚ-тың ақпараттық жүйесін құру, қоғамдастықтың шекаралық мекемелерінің сыртқы шекараларда дағдарысты ахуалдар туындаған жағдайдағы ықпалдастығы туралы келісімдердің жобасы талқылануда.
Отырысқа қатысушылар ЕурАзЭҚ-қа мүше елдердің отын-энергетикалық кешендерін 2020-жылға дейін дамыту стратегиясының жобасын жасау төңірегінде пікір алмасып, Кедендік одаққа мүше елдердің сыртқы шекараларындағы өткізу бекеттерін жайластыру жөніндегі 2001-2005-жылдарға арналған бірлескен мақсатты бағдарламаның жүзеге асырылу барысын сарапқа салады.
Отырысқа ЕурАзЭҚ-тың бас хатшысы Григорий Рапота қатысуда.
Мәскеуде ЕурАзЭҚ-тың жанындағы тұрақты өкілдер комиссиясының отырысы өтуде
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.