Қазақстан мен Қырғызстан Шу және Талас өзендеріндегі су қоймаларының жұмыс режимін және мемлекетаралық арналар арқылы су беру кестесін келісті
Комиссия мемлекетаралық пайдаланудағы су шаруашылығы объектілеріндегі жөндеу-қалпына келтіру жұмыстарының түрлері мен көлемдерін бекітті.
НҰР-СҰЛТАН. 26 СӘУІР - Қазақстан мен Қырғызстан вегетациялық кезеңге Шу және Талас өзендеріндегі су қоймаларының жұмыс режимін және мемлекетаралық арналар арқылы су беру кестесін келісті, деп хабарлайды KAZAKHSTAN TODAY ҚР Экология, геология және табиғи ресурстар министрлігінің баспасөз қызметіне сілтеме жасап.
Бейнеконференция байланысы режимінде Шу және Талас өзендерінде мемлекетаралық пайдаланудағы су шаруашылығы құрылыстарын пайдалану жөніндегі Қазақстан Республикасы мен Қырғыз Республикасы комиссиясының кезекті 28-ші отырысы өткізілді. Отырыс барысында Тараптар 2021 жылғы вегетациялық кезеңге Шу және Талас өзендеріндегі су қоймаларының жұмыс режимін және мемлекетаралық арналар арқылы су беру кестесін талқылады. Комиссия мемлекетаралық пайдаланудағы су шаруашылығы объектілеріндегі жөндеу-қалпына келтіру жұмыстарының түрлері мен көлемдерін бекітті.
Сонымен қатар, Комиссия "Шу және Талас өзендері бассейндері үшін іс-қимылдың Стратегиялық бағдарламасын" бекітті, оның шеңберінде халықаралық қаржы ұйымдарының қолдауымен су ынтымақтастығын нығайту жөніндегі іс-шаралар іске асырылатын болады.
Тараптар ағымдағы жылдың 4 тоқсанында Бішкек қаласында комиссияның келесі отырысын өткізуге келісті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстанда орман қорының тек 2 пайызы ғана өртті ерте анықтау жүйесімен жабдықталған
Сурет: gov.kz
Премьер-Министр Олжас Бектеновтің төрағалығымен өткен Үкімет отырысында тиісті ведомстволар мен әкімдіктердің өрт шығу қаупі бар кезеңге дайындығы қаралды. Төтенше жағдайлар министрі Шыңғыс Әрінов, экология және табиғи ресурстар министрі Ерлан Нысанбаев жағдай туралы баяндады. Бұрын ірі өрттер орын алған Абай, Павлодар және Қостанай облыстарының әкімдері қазір өңірлерде жүргізіліп жатқан алдын алу шаралары туралы есеп берді, деп хабарлайды Үкіметтің баспасөз қызметінен.
Өткен жылы өрт 116 мың гектардан астам орман қорын шарпыды. Материалдық шығын келтірілген экологиялық залалды есептемегенде 160 млрд теңгеден асты.
Облыс әкімдіктері Төтенше жағдайлар министрлігімен бірлесіп, материалдық-техникалық жарақтандыру, ЖЖМ резервін нығайту, минералдандырылған жолақтар құру, әуе кемелерін тарту мәселелерін қамтитын табиғи өрттердің алдын алу жоспарларын бекітті. Сонымен қатар орман шаруашылығы мекемелерімен қосымша 53 өрт-тактикалық оқу-жаттығу өткізіліп, орман күзетінің 1,3 мың қызметкері оқытылды, ірі өрттермен күресу үшін әр өңірде күштер мен құралдар тобы дайындалды.
Премьер-Министр өткен жылы ірі орман өрттерін сөндіру кезінде ТЖМ әуе кемелері жеткіліксіз болғандықтан, Қорғаныс, Ішкі істер министрліктері мен ҰҚК тікұшақтары тартылғанын баса айтты. Қазіргі уақытта Қазавиақұтқару авиациясының 19 ұшағы тұрақты дайындық режимінде болса, оның 9-ы су төгетін құрылғылармен жабдықталған. Әуеден барлау үшін 120 дрон бар.
Үкімет жалпы қаржыландыру көлемі 68 млрд теңгеден асатын Орман шаруашылықтарын материалдық-техникалық жарақтандыруды нығайту жөніндегі 2023-2027 жылдарға арналған кешенді жоспарды іске асыруда.
Өткен жылы Экология және табиғи ресурстар министрлігінің табиғатты қорғау ұйымдары үшін 9 млрд теңгеге 25 өрт сөндіру машинасы, 51 шағын орман өрт сөндіру кешені, 154 трактор, 73 патрульдік көлік және 655 бірлік өрт сөндіру техникасы сатып алынды. Жергілікті атқарушы органдар 6,6 млрд теңгеге 20 өрт сөндіру машинасын, 127 тракторды және 76 патрульдік көлік сатып алды. Бұған дейін орман шаруашылығын материалдық-техникалық жарақтандыруға мұндай қаржы бөлінбеген.
Бүгінгі таңда қолда бар техниканың тозу пайызы жоғары күйінде қалып отыр және өрт сөндіру машиналары 72%, тракторлар 50% және патрульдік көліктер 55%-ды құрайды. Биыл кешенді жоспар шеңберінде материалдық-техникалық жарақтандыру жұмыстары жалғасады. Бұл мақсаттарға жергілікті бюджеттерден - 3,8 млрд теңге, ал ведомствоның табиғатты қорғау ұйымдарына түрлі қаржы көздерінен - 15,4 млрд теңге бөлінді.
Қазгидрометтің болжамына сәйкес, биыл жаз айлары ыстық әрі құрғақшылық болады деп күтілуде. Әсіресе, еліміздің батысы мен шығысында және оңтүстігінде аптап ыстық ұзақ сақталуы мүмкін. Осыған байланысты Премьер-Министр өрт қаупінің жоғары екеніне тоқталып, алдын ала дайындықты қамтамасыз етуді тапсырды. Биылдың өзінде 30-ға жуық орман өрті тіркелді. Мәселен, өткен жылы өрттен қатты зардап шеккен "Семей орманы" аумағы биыл тағы да отқа оранды. Абай облысының әкімдігі бақылауды күшейтуі керек. Алматы облысында Іле-Балқаш табиғи резерватының аумағында да қамыс өртеніп, үлкен аумаққа жайылып кетті. Ақтөбе, Атырау, Қарағанды, Жамбыл және Қызылорда облыстарында қамыс пен қураған шөп жанып, өртке ұласты.
Қазір мүдделі мемлекеттік органдар Табиғи өрттердің алдын алу және оларды жою жөніндегі іс-шаралар жоспарын іске асыруда. Алайда кейбір салаларда бұл жұмыстар тиісті деңгейде жүргізілмей отыр.
Үкімет басшысы Ақмола, Алматы, Шығыс Қазақстан, Жамбыл, Абай және Ұлытау облыстарында минералданған жолақтарды жасау енді ғана басталған, қажетті көлемнің үштен біріне әрең жететінін атап өтті. Арнайы жыртылған қорғаныш жолақтары жоқ елді-мекендер дала немесе орман өртінен қорғаусыз қалады. Ақтөбе, Павлодар, Қарағанды, Солтүстік Қазақстан облыстарының ауылдарындағы аумақтар әлі күнге дейін қураған шөп пен қоқыстардан тазартылмаған.
Орман және табиғатты қорғау мекемелерін өрт сөндіру техникаларымен жарақтандыру қарқыны мардымсыз екенін атап кету керек. Біз бұған өткен жылы көз жеткіздік. Ұшқышсыз ұшатын аппараттардың тапшылығы орман қоры мен даланы әуеден толық тексеруге мүмкіндік бермей отыр. Қазақстанда мұндай аппараттарды жасап шығаратындар бар. Заманауи техникалар мен табиғи өрттерді сөндіру құралдардың болмауы қызыл жалынмен күресте шұғыл шаралар қабылдауға кедергі келтіреді. Бұл мәселелердің барлығы кешенді шешімдер мен орталық және жергілікті мемлекеттік органдардың үйлесімді жұмысын талап етеді", - деп атап өтті Олжас Бектенов. Сонымен қатар орман өрттерін жедел анықтау үшін жаңа технологияларды енгізуді тапсырды.
Бүгінгі таңда мемлекеттік орман қорының 2%-ы ғана орман өртін ерте анықтау жүйесімен қамтылған. "Бурабай" ұлттық паркінің аумағында қолданысқа енгізілген смарт-жүйенің арқасында соңғы жылдары ондағы өрт оқиғасы айтарлықтай қысқарды және өртке қарсы шұғыл әрекет ету жұмыстары күшейтілді. Бұл тәжірибені басқа да табиғи парктер мен резерваттарда қолдану керек.
Премьер-Министр ведомстволар мен өңірлердің басшыларына бірқатар тапсырма берді:
Әкімдіктер елді-мекендерде өрт сөндіру бекеттері мен өртке қарсы ерікті құрылымдарды ұйымдастыру жұмыстарын жалғастыруы қажет. Сонымен қатар орман шаруашылығы мекемелері күнделікті өрт сөндіру құралдарымен қамтамасыз етілуі тиіс.
Экология және табиғи ресурстар министрлігі мен жергілікті атқарушы органдар бұрын орын алған өрттердің тәжірибесін ескере отырып, өрт қаупі жоғары жерлерде қосымша бақылау бекеттерін қоюы тиіс. Сондай-ақ Төтенше жағдайлар министрлігімен және әкімдіктермен бірлесіп, өрт сөндіру көліктерімен және тікұшақтармен су алу үшін су көздері мен өрт сөндіру тоғандарын дайындау қажет.
Төтенше жағдайлар, Экология және табиғи ресурстар министрліктері мен әкімдіктерге табиғи өрттерге қарсы шұғыл әрекет ету бойынша көрші елдердің шекара маңындағы аумақтарының тиісті қызметтерімен өзара іс-қимылды күшейту қажет.
Төтенше жағдайлар, Мәдениет және ақпарат министрліктері, әкімдіктер өрт қауіпсіздігі талаптарын сақтау мәселесі бойынша халық арасында түсіндіру жұмыстарын күшейтіп, тиісті оқу-жаттығулар өткізуі керек.
Төтенше жағдайлар министрлігі мүдделі мемлекеттік органдармен бірлесіп, Еліміздегі орман және дала өрттерінің алдын алу және оларды жою жөніндегі арнайы ведомствоаралық жоспардың іске асырылуын күнделікті бақылауға алуы тиіс.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыда туристер үшін жаңа ақпараттық орталық ашылады
Сурет: gov.kz
Биыл 15 мамырда Достық даңғылы мен Оспанов көшесінің қиылысында (Терренкурдың соңғы нүктесі) туристер үшін жаңа ақпараттық орталық ашылады. Жұмыс уақыты 10:00-ден 20:00-ге дейін, демалыссыз жұмыс істейді, деп хабарлайды Алматы қаласы әкімдігінің баспасөз қызметінен.
Бұл Алматыдғаы 9-шы жаңа туристік ақпараттық орталық болмақ. Визит нүктенің ерекшелігі, граффити элементтерін қолданатын заманауи дизайнда.
Ақпараттық орталықта қаланың көрікті жерлері туралы кәсіби кеңестер беріледі, саяхатшыларға карталар, нұсқаулықтар, маршруттар атластары мен өзге де қажетті материалдар беріледі.
Былтыр ақпараттық нүктелерге бару статистикасы шетелдік туристердің қалаға деген қызығушылығының артып келе жатқанын көрсетеді. Өткен жылы Алматының ақпараттық нүктелерінде 21 391 шетелдік турист кеңес алды, бұл 2022 жылмен салыстырғанда 80,3% артық. Ақпараттық нүктелердегі қызмет көрсету бойынша үздік 5 елге Германия, Үндістан, ҚХР, Ресей және Оңтүстік Корея азаматтары кіреді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
2025 жылға қарай Шығыс Қазақстанның барлық тұрғындары таза ауыз сумен қамтылмақ
2025 жылға қарай Шығыс Қазақстанның барлық тұрғындары таза ауыз сумен қамтылмақ, деп хабарлайды облыс әкімдігінің баспасөз қызметінен.
Мемлекет басшысы 2021 жылы өңірлерді дамытудың ұлттық жобасы аясында алдағы 5 жыл ішінде халықтың 100% таза ауыз сумен қамтамасыз етуді жүктеген болатын.
Сол кезеңде Шығыс Қазақстанда тұрғындардың 97%-ы сумен қамтылған еді (722,7 мың адамның 682,2 мың адамы). Ауыртпалық негізінен ауыл тұрғындарына түсті. Себебі облыстағы 356 елдімекеннің 274-і немесе 77 пайызы ғана сумен қамтамасыз етілді: 205 ауылға су құбыры тартылды, 69-ына блокты-модульдік су тазарту станциялары орнатылды. Үш жылдың ішінде 68 ауыл сумен қамтамасыз етілді.
Шығыс Қазақстан облысының энергетика және тұрғын үй-коммуналдық шаруашылық басқармасының басшысы Нұрлан Рамазановтың айтуынша, бүгінде Шығыс Қазақстан халқының 99 пайызы таза ауыз сумен қамтылған. Бұл облыстағы 727,1 мың тұрғынның 719,6 мың адамы. Қалаларда халық таза ауыз сумен 99,9%, ауылдарда 97,2% қамтамасыз етілген.
Десек те, 19 елді мекендегі 7500 тұрғын таза ауыз суға қол жеткізе алмай отыр. Оның 587-сі қала тұрғындары, ал 6913 адам сумен қамтамасыз етілмеген 14 ауыл және су құбыры желілерін қайта жаңғыртуды қажет ететін үш елді мекенде тұрады.
2024-2025 жылдары халықты ауыз сумен толық қамтамасыз ету үшін облыста жалпы сомасы 17 468,9 млн.теңгеге (РБ - 14352,8 млн. теңге; ОБ - 3116,1 млн. теңге) 16 жобаны іске асыру жоспарлануда. Оның ішінде 3 жоба Өскемен мен Шемонаихада, 13 жоба ауылдық жерлерде жүзеге асырылады.
Биыл 8 жобаны аяқтау жоспарлануда. Ауылды жерлерде іске асырылып жатқан үш жоба облыстық бюджеттен 1,4 млрд теңге қосымша қаржыландыруды қажет етіп отыр. Атап айтқанда, Глубокое ауданының Малубинка ауылы, Алтай ауданындағы Малеевск ауылы және Шемонаиха ауданының Убинка ауылы.
Ағымдағы жылдың соңына дейін облыс тұрғындарының 99,4 пайызы сумен жабдықтау қызметіне қол жеткізбек.
Облыстың 4060 тұрғынын сумен қамтамасыз етуге бағытталған 2025 жылы аяқталатын 8 жобаның қатарына: 448 адамды қамтитын Өскемен қаласындағы Комсомольский ауылын қалпына келтіру, жалпы саны 386 адамды қамтитын Үлкен-Нарын және Катон-Қарағай ауылдарын қайта құру, Ұлан ауданы Отрадное ауылындағы (308 адам), Шемонаиха ауданының Березовка (282 адам) және Большая речка (381 адам) ауылдарындағы құрылыс жұмыстары кіріп отыр.
Сондай-ақ, Ұлан ауданының Асубұлақ (1633 адам) және Бозанбай (613 адам) ауылдарын қайта құру бойынша тиісті құжаттар әзірленуде.
Жобалау-сметалық құжаттарын әзірлеуді ағымдағы жылдың маусым айына дейін аяқтау жоспарларынып отыр. Осыдан кейін республикалық бюджетке өтініш жіберілетін болады.
Жұмыс жүйелі жүргізілуде. Аймақ басшысы Ермек Көшербаев атқарылып жатқан жұмыстардың сапасына назар аударып, тиісті аудит жүргізіп, жалпы жағдайды жіті бақылауда ұстауды тапсырды.
Шығыс Қазақстан облысы бойынша санитарлық-эпидемиологиялық бақылау департаменті елді мекендердегі ауыз судың белгіленген нормаларға сәйкестігіне талдау жасайтын болады.
Халықты таза ауыз сумен қамтамасыз ету жөніндегі Мемлекет басшысының тапсырмасының орындалу барысы туралы толық ақпарат тұрғындарға қолжетімді болу үшін облыс әкімдігінің сайтында жарияланады.
Сондай-ақ, облыс басшысы қалалар мен аудандарға жұмыс сапары аясында сумен жабдықтау және тазарту нысандарын өзі аралауды көздеп отырғанын атап өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.