Қазақстанда біліктілігі жоғары дәрігерлердің кетуін азайту туралы заң талқылануда
Заң жобасы «Халық денсаулығы және денсаулық сақтау жүйесі туралы» кодекске, «Мемлекеттік наградалар туралы» заңға, Қылмыстық кодекске, Қылмыстық-іс жүргізу кодексіне өзгерістер мен толықтырулар енгізуді көздейді
Астана. 10 ақпан. KAZAKHSTAN TODAY - Мәжілісте медицина қызметкерлерінің кәсіби жауапкершілігін сақтандыру туралы заң жобасының жаңа редакциясы қаралды, деп хабарлады ҚР Парламенті Мәжілісінің баспасөз қызметі.
Қазақстан Республикасының кейбір заңнамалық актілеріне денсаулық сақтау мәселелері бойынша өзгерістер мен толықтырулар енгізу туралы" заң жобасы Мемлекет басшысының тапсырмасы бойынша әзірленген. Ол медицина қызметкерлерінің мәртебесін арттыруға, пациенттердің құқықтарын қорғауға және медициналық көмектің сапасын жақсартуға бағытталған.
А.Ғиният министрлік медицина қызметкерлерінің кәсіптік жауапкершілігін сақтандырудың әртүрлі үлгісіне талдау жүргізгенін айтты.
Денсаулық сақтау министрлігі заң жобасының шеңберінде медицина немесе фармацевтика қызметкерінің кәсіби міндеттерін тиісінше орындамағаны үшін қылмыстық құқық бұзушылықтарды ізгілендіру және ҚР Қылмыстық кодексінің 317-бабының санкциялық шараларын төмендету жөніндегі нормаларды ұсынды.
Мысалы, денсаулыққа байқаусызда орташа және ауыр зиян келтіргені үшін айыппұл мөлшері мен қамауға алу мерзімін азайтып, пациенттің денсаулығына ауыр зиян келтірілген немесе қайтыс болған жағдайда "бас бостандығынан айыру" жазасының мерзімдерін қайта қараумен "бас бостандығын шектеуге" ауыстыру", - деді Ажар Ғиният.
Сондай-ақ министр кәсіптік жауапкершілікті сақтандыру жүйесімен 2023 жылы жалпы сомасы 4,6 млрд теңгеге 304 мыңнан астам медицина қызметкерін, тегін медициналық көмектің кепілдік берілген көлемінің есебінен 2,7 млрд теңгені және МӘМС есебінен 1,8 млрд теңгені қамту ұсынылып, оны республикалық бюджет комиссиясы қолдағанын айтты.
2023 жылдан бастап сақтандыруды жұмыс берушінің есебінен жүзеге асыруды ұсынамыз, ал 2025 жылдан бастап сақтандыру сыйлықақысының сомасын медициналық ұйым мен медицина қызметкерлерінің арасында бөлу ұсынылады, бұл ортақ кәсіптік жауапкершілікке әкеледі", - деді А.Ғиният.
Аталған заң жобасы және медицина қызметкерлерінің кәсіптік жауапкершілігін сақтандырудың ұсынылған моделі құқықтық қауіптерді азайтуға, жұмыс істеп тұрған кәсіби кадрлардың кетуін азайтуға, олардың қорғалуын арттыруға, жастарды өз болашағын медицина мамандығымен байланыстыруға ынталандыруға мүмкіндік береді.
Заң жобасын талқылау барысында депутаттар сұрақтарын қойып, ұсыныстарын айтты.
Сақтандыруды енгізуден медицина қызметкерлері нақты қандай пайда көреді?" - деген сауал қойды депутат Дәулет Мұқаев.
Біріншіден, әрбір қызметкерді кәсіби сақтандыру, екіншіден, пациенттердің де құқығын қорғау. Сондықтан әр қызметкер өзінің кәсіби функциясын орындау кезінде "мен ертең сотталып кетемін-ау" деп қорықпауы керек. Сонымен қатар заң жобасында тек сақтандыру емес, кәсіби біліктілігін арттыру, қосымша еңбекақы төлеу туралы нормалар қамтылған. Көмек көрсету кезінде медицина қызметкерінің жұмысына араласпау, әлеуметтік қолдау көрсету, марапаттар беру де көзделіп отыр", - деп жауап берді министр.
Заң жобасын талқылау жұмыс тобында жалғасады. Оған Әлеуметтік-даму комитетінің мүшесі Гүлдара Нұрымова жетекшілік етеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Президентке биылғы І тоқсанда жұмсалған республикалық бюджет қаражаты туралы есеп берілді
Сурет: akorda
Мемлекет басшысы Қаржы министрі Мәди Такиевті қабылдады, деп хабарлайды Ақорданың баспасөз қызметінен.
Президентке мемлекеттік қаржының негізгі параметрлері, оның ішінде биылғы І тоқсанда жұмсалған республикалық бюджет қаражаты туралы есеп берілді. Осы ретте 3 айдың қорытындысы бойынша мемлекеттік бюджетке 4,5 триллион теңгеге жуық кіріс кірген.
Қасым-Жомарт Тоқаевқа өнімсіз бюджет шығындарын оңтайландыру жұмыстары жөнінде мәлімет берілді. Мәди Такиевтің айтуынша, жүргізілген сараптама нәтижесінде биыл 300 миллиард теңгеден астам соманы қысқарту ұсынылған. Бұл қаражат экономикалық қайтарымы барынша жоғары шараларға жұмсалады.
Мемлекет басшысына бюджетті басқару тиімділігін арттыру бағытында қабылданып жатқан жұмыстар туралы баяндалды. Аталған шаралар жаңа Бюджет кодексіне енгізілген.
Бұдан бөлек Президентке салықтық-кедендік әкімшілендіру ісіндегі жаңа бастамалар таныстырылды. Министрдің айтуынша, жаңа Салық кодексінің жобасында салықтық әкімшілендірудің сервистік моделі енгізілген, тексерулер санын қысқарту жөніндегі нормалар қарастырылған, камералық бақылау және салық берешегін өндіріп алу тәсілдері өзгертілген.
Сонымен қатар Қасым-Жомарт Тоқаевқа Еуразиялық экономикалық одақтың үшінші елдермен кедендік шекарасындағы инфрақұрылымды жаңғырту жұмыстары жөнінде ақпарат берілді. Жобаның жүзеге асырылуы өткізу мүмкіндігін 6 есеге дейін ұлғайтып, өту уақытын 2 есе қысқартуға, сондай-ақ тауарлар мен көлік құралдарын тексеру ісін тәулік бойы онлайн режимде бақылауға мүмкіндік береді. Барлық өткізу пунктін реконструкциялау жұмыстарын жыл соңына қарай аяқтау жоспарланып отыр.
Мәди Такиев мемлекеттік сатып алу жүйесін реформалау жоспары жөнінде айтты. Оның мәліметінше, "Мемлекеттік сатып алу туралы" жаңа Заң жобасында сатып алу рәсімдерін жеңілдету және бюрократиядан арылту, құрылыс нарығында монополияға жол бермеу, барлық мемлекеттік және квазимемлекеттік ұйымның сатып алуларын бірыңғай платформаға көшіру көзделген.
Кездесу соңында Президент мемлекеттік қаржының жағдайын жақсарту, атап айтқанда, бюджеттің теңгерімділігін қамтамасыз ету, сондай-ақ салықтық және кедендік әкімшілендіру салаларын цифрландыру арқылы жетілдіру жөнінде бірқатар тапсырма берді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.