"Жастар - Отанға!" бағдарламасын іске асыру бойынша Жол карталар бекітілді
"Жастар-Отанға!" бағдарламасы жастардың өмір сүру деңгейі мен әлеуметтік жағдайын арттыруға бағытталған 5 бағыттағы жұмысты қамтиды.
НҰР-СҰЛТАН. 11 МАУСЫМ - "Nur Otan" партиясы аймақтық филиалдары Саяси кеңесі Бюросының шешімімен "Жастар-Отанға!" бағдарламасын іске асыру бойынша еліміздің әрбір аудан, қала және облысы үшін 216 Жол картасы бекітілді, деп хабарлайды KAZAKHSTAN TODAY "Nur Otan" партиясының баспасөз қызметіне сілтеме жасап.
Мәселен, алдағы бес жыл ішінде 3,5 мыңға жуық индикаторға қол жеткізу, 35 жасқа дейінгі 4,5 миллионнан астам жас қазақстандықты қамтитын 6,5 мың іс-шараны іске асыру жоспарлануда.
"Жастар-Отанға!" бағдарламасы, жастардың өмір сүру деңгейі мен әлеуметтік жағдайын арттыруға бағытталған 5 бағыттағы жұмысты қамтиды: азаматтық белсенділік, сапалы білім, жұмыспен қамту, қолжетімді баспана және жас отбасыларды қолдау, тұлға ретінде даму мен бос уақытты тиімді өткізу.
Атап айтқанда, қалалық және ауылдық мектептер арасындағы білім беру сапасындағы алшақтық қысқартылады, жастардың ғылыми-зерттеу әлеуеті артады, отбасы институтына, сондай-ақ жас дарындарға жан-жақты қолдау көрсетілетін болады.
Өңірлерде жастарға берілген сайлауалды уәделерді орындауға кірісіп кетті. Мысалы, Түркістан облысында Жол картасына "Жасыл ел" жобасы арқылы 6400 жасты жұмысқа тарту, "Еңбек" бағдарламасы шеңберінде "Алғашқы жұмыс орны" жобасы арқылы 1048 жасты жұмысқа орналастыру және т.б. жоспарлар енгізілген.
Нұр-Сұлтанда жыл сайын пәтер сатып алуға 7 млрд. теңге бөлінетін "Елорда жастары" тұрғын үй бағдарламасы іске қосылады, ал Алматыда "Алматы жастары" жобасы аясында 2025 жылға дейін тұрғын үй сатып алуға 5 мың жас отбасы несие алады.
Ақмола облысында 2025 жылға дейін 2 700 орындық 7 студенттік жатақхананың құрылысы аяқталады. Петропавлда 2021 жылы Жастар театрының ашылуы жоспарлануда.
Алматы облысында жастардың жұмыспен қамтылуын арттыру үшін өңірлік бағдарлама жыл сайын 2 мыңға жуық жасты жұмыс орындарымен қамтамасыз етуге уәде береді.
Қостанай облысында бұқаралық спортты дамытуға ерекше көңіл бөлінеді. Мәселен, 2025 жылға дейін бағдарламаны іске асыру шеңберінде облыстың қалалары мен аудандарында жасанды жабыны бар 30 шағын футбол алаңы, жүзу бассейні, 10 стритбол алаңы, 12 стрит-воркаут алаңы, 29 хоккей корты салынатын болады.
Сонымен қатар, "Жастар – Отанға!" жастар кәсіпкерлігін дамытуға көңіл бөлінуде. Мәселен, Маңғыстау облысында жыл сайын 500 жас "Бастау бизнес" бағдарламасы бойынша тегін білім ала алады. Ал Тараз қаласында 2023 жылы "SMART" оқу орталығын ашу жоспарлануда.
Естеріңізге сала кетсек, маусым айының басында партияның Саяси кеңесі Бюросының шешімімен "Жастар-Отанға!" бағдарламасын іске асыруға 2025 жылға дейін республикалық Жол картасы бекітілді. Орталықта және жергілікті жерлерде бағдарламаның іске асырылу барысын Мәжіліс пен мәслихаттардың 616 жас депутатынан тұратын жаңадан құрылған Корпус бақылайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Әсел Жанасова жаңа қызметке тағайындалды
Сурет: Akorda
Ақорда Әсел Жанасованың жаңа қызметке тағайындалғанын хабарлады.
-Мемлекет басшысының Жарлығымен Әсел Жұбанышқызы Жанасова Қазақстан Республикасы Президентінің Әкімшілігі Басшысының орынбасары болып тағайындалды, олбұрынғы атқарған лауазымынан босатылды,- делінген ресми құжатта.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Мемлекет басшысы "Qarmet" АҚ директорлар кеңесінің төрағасы Андрей Лаврентьевті қабылдады
Сурет: Akorda
Қасым-Жомарт Тоқаевқа компанияның биыл атқарған жұмысының алдын ала нәтижелері мен инвестициялық бағдарламаларды іске асырудың негізгі бағыттары таныстырылды. Компания қызметінде оң динамика байқалады. Екі жылда болат өндірісі 22 пайызға, көмір концентраты 26 пайызға, темір кені 32 пайызға артты. Өнімнің өзіндік құны 28 пайызға арзандап, шығарылатын маркалардың түрі 260-тан 350-ге дейін ұлғайды, деп хабарлайды Ақорданың баспасөз қызметінен.
Андрей Лаврентьев 9 ірі инвестициялық жобадан тұратын кешенді бағдарламаны жүзеге асыру жайында баяндады. Бұл бастама елдегі болат өндірісін жүйелеп, металл прокаты импортын төмендетуді көздейді. Бұдан бөлек, болаттың жоғары сапалы жаңа маркаларын, соның ішінде атом электр станциясының құрылысына арналған өнім шығару жолға қойыла бастады.
Президентке көмір және тау-кен бағытын дамыту бағдарламасы таныстырылды. Еңбек қауіпсіздігі мен әлеуметтік бастамаларға баса мән берілді. Qarmet компаниясына қарасты медициналық және білім беру ұйымдары жаңғыртылып жатыр. Компания мен кәсіподақтар арасында жаңа ұжымдық келісімшарт жасалды. Құжат 35 мың еңбеккерге әлеуметтік кепілдік беруді қарастырады.
Мемлекет басшысына Qarmet жанынан ірі металлургиялық кластер құрылып жатқаны туралы айтылды. Бұл шағын және орта кәсіпорындардың шикізатты терең өңдеумен айналысуына мүмкіндік береді. Бағдарлама "Бәйтерек" ұлттық инвестициялық холдингімен бірге іске асырылмақ. Сондай-ақ машина жасау зауыттарының өндіріс барысында отандық болатты пайдалануы бойынша жүйелі жұмыс жүргізіліп жатыр.
Кездесу соңында Президент Qarmet металлургия кешенінде атқарылған жұмысқа оң бағасын беріп, даму жоспарына қолдау білдірді. Сонымен қатар кәсіпорынды жан-жақты жаңғырту, әлеуметтік мәселелерді шешу, экологиялық жағдайды жақсарту, машина жасау өндірісін жандандыру шараларын жалғастырудың маңызына тоқталды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Өскемен арматуралық зауыты КҚК қажеттіліктері үшін жабдықтар шығарады
Сурет: Akorda
Үкімет үйінде Премьер-министрдің бірінші орынбасары Роман Склярдың қатысуымен "Өскемен арматура зауыты" АҚ ("ӨАЗ" АҚ) мен "Каспий Құбыр Консорциумы-Қ" АҚ ("КҚК-Қ" АҚ) арасында ынтымақтастық туралы келісімге қол қою рәсімі өтті, деп хабарлайды Ақорданың баспасөз қызметінен.
Өнеркәсіптік жабдықтың импортын алмастыру жөніндегі құжатқа "ӨАЗ" АҚ бас директоры Александр Будрис және Каспий құбыр консорциумының бас директоры Николай Горбань қол қойды.
Ынтымақтастық бекіткіш арматураның, сорғы агрегаттарының және электр қозғалтқыштарының жергілікті өндірісін дамытуға, магистралды мұнай құбыры нысандарында отандық жабдық қолдануды кеңейтуге, сондай-ақ құбыр арматурасының қазақстандық ірі өндірушісі мен мұнай тасымалдау инфрақұрылымындағы негізгі операторларының бірі арасында орнықты кооперацияны қалыптастыруға бағытталған.
Келісім шеңберінде тараптар "КҚК-Қ" АҚ-ны Қазақстаннан шыққан жоғары технологиялық материалдармен, жинақтаушы бөлшектермен және жабдықтармен қамтамасыз етуге, жабдыққа техникалық қызмет көрсетуді, жабдықты жаңғырту және сынақтан өткізуге, сондай-ақ инновациялық технологиялық шешімдерді бірлесіп әзірлеуге әрі енгізуге ниетті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Мемлекет басшысы Ұлттық банк төрағасы Тимур Сүлейменовті қабылдады
Сурет: Akorda
Президентке экономика мен қаржы жүйесінің жай-күйі және биылғы қаңтар-қараша айларында жүргізілген ақша-несие саясатының негізгі бағыттары жөнінде есеп беріліп, 2026 жылға арналған жоспар таныстырылды, деп хабарлайды Ақорданың баспасөз қызметінен.
Қасым-Жомарт Тоқаевқа іскерлік белсенділік, инфляцияға ықпал ететін факторлар және бағаны тұрақтандыру үшін қабылданған шаралар туралы айтылды. Үкімет, Ұлттық банк пен Қаржы нарығын реттеу және дамыту агенттігі 2026-2028 жылдарға арналған макроэкономиканы тұрақтандыру және халықтың әл-ауқатын арттыру жөніндегі бірлескен іс-қимыл бағдарламасын жүзеге асыруға кірісті.
Мемлекет басшысына қаржы, валюта және мемлекеттік бағалы қағаздар нарықтарындағы жағдай, Ұлттық қор мен Бірыңғай зейнетақы жинақтаушы қоры активтерінің, алтын-валюта резервтерінің жай-күйі туралы мәлімет берілді.
Жыл басынан бері Ұлттық қордың валюталық активтері 4,8 миллиард долларға өсті. 11 айдағы инвестициялық табыс шамамен 8,2 миллиард долларды немесе 13,7 пайызды құрады. Есепті кезеңде алтын-валюта резервтері 16,3 миллиард долларға немесе 36 пайызға ұлғайып, 62,1 миллиард долларға жетті. БЖЗҚ зейнетақы активтерінің көлемі биыл қаңтар-қараша айларында 2,6 триллион теңгеге немесе 11,7 пайызға артып, 25 триллион теңге болды.
Қасым-Жомарт Тоқаевқа жаппай цифрландыру барысы және Ұлттық банктің цифрлық жобалары жөнінде баяндалды. Соның ішінде Антифрод орталықтың жұмысына, ұлттық цифрлық қаржы инфрақұрылымдарын технологиялық тұрғыдан жүзеге асыруға мән берілді.
Тимур Сүлейменовтің айтуынша, Ұлттық банк баға тұрақтылығын сақтап, инфляцияны орташа 5 пайыздық межеде ұстап тұру үшін барлық қажетті шараны қабылдауда.
Кездесу соңында Президент инфляцияны төмендетуге, қаржы нарығы мен цифрлық трансформация секторының тұрақтылығын қамтамасыз етуге баса назар аударып, Ұлттық банк қызметіне қатысты бірқатар тапсырма берді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.